༢༠༡༠ ཕྱི་ཟླ་ ༤ ཚེས་ ༢༦ རེས་གཟའ་ཟླ་བ།
ཞོགས་དུང་(བཀྲ་རྒྱལ་)ལགས།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༠ ཟླ་ ༣ ཚེས་ ༡༠ ནས་བཟུང་བོད་ཀྱི་ས་ཁུལ་ཡོངས་སུ་དམ་བསྒྲགས་ཆེན་པོ་ཡོད་མིན་ལ་མ་ལྟོས་པར། བོད་མི་ཚོས་མུ་མཐུད་ཞི་བའི་ལས་འགུལ་འདྲ་མིན་སྤེལ་བའི་གནས་ཚུལ་ཐོན་ཡོད་པ་མ་ཟད། ལྷག་པར་ཨ་མདོ་རྨ་ཆུ་རྫོང་བོད་ཡིག་སློབ་འབྲིང་དང་
ཞོགས་ལྗང་ངམ་འབྲོང་བུ་ལགས།
འབྲི་རུ་རྫོང་རྩ་ལ་ཤང་ལྟེ་བའི་སློབ་ཆུང་སོགས་ནས་ཞི་རྒོལ་གྱི་ལས་འགུལ་སྤེལ་ཡོད། དེ་བཞིན་འབར་ཁམས་དགེ་འོས་སློབ་གྲྭ་སོགས་ནས་གདུང་སེམས་མཉམ་སྐྱེ་མཚོན་ཐབས་བྱས་པ། ཕྱོགས་མཚུངས་ཁམས་དཀར་མཛེས་དང་གསེར་རྟ། སྐྱེ་རྒུ་མདོ། ཨ་མདོ་རྔ་པ་སོགས་སུ་བོད་མི་ཚོས་དངོས་སུ་དོན་ཏེ་ངོ་རྒོལ་གྱི་ལས་འགུལ་
ཐེའུ་རང་ངམ་བཀྲིས་རབ་བརྟན་ལགས།
འདྲ་མིན་སྤེལ་བའི་གནས་ཚུལ་གཅིག་མཇུག་གཉིས་མཐུད་དུ་ཐོན་ཡོད། དེ་མིན་གྱི་ས་ཁུལ་ཁག་གཅིག་ཏུ་ངོ་རྒོལ་གྱི་ལས་འགུལ་སྤེལ་ཡོད་ཀྱང་ཞིབ་ཕྲའི་གནས་ཚུལ་ཁ་གསལ་ཤེས་རྒྱུར་དམ་བསྒྲགས་ཤིན་ཏུ་ཆེ་བས་ཆ་ཚང་ཤེས་རྟོགས་དཀའ་བའི་གནས་སུ་གྱུར། འོན་ཀྱང་རྒྱ་ནག་གཞུང་ཕྱོགས་ནས་སྔ་ལོའི་ལོ་མཇུག་ནས་བཟུང་བོད་མི་ཞི་རྒོལ་བ་རྣམས་གང་བྱུང་འཛིན་བཟུང་དང་། ལྷག་པར་བོད་རིགས་དགེ་རྒན་དང་རྩོམ་པ་པོ་ཁག་གཅིག་ལ་ཉེས་དོན་གང་ཡིན་གསལ་བཤད་ཙམ་ཡང་མེད་པར་འཛིན་བཟུང་བྱེད་བཞིན་པའི་གནས་ཚུལ་འཐོན་བཞིན་ཡོད། དེ་ནི་དེང་སྐབས་གསར་དུ་ལག་ལེན་བྱེད་བཞིན་པའི་བྱུས་ངན་གསར་པ་ཞིག་ཡིན་པ་མ་ཟད། ཐབས་བྱུས་དེའི་ཐོག་ནས་རྒྱ་ནག་གཞུང་ཕྱོགས་ནས་དེང་སྐབས་བོད་ནང་གི་བོད་རིགས་ཤེས་ཡོན་ཅན་ཚོར་ཆབ་སྲིད་ཀྱི་ཉེས་མིང་གཡོགས་ཏེ་གང་བྱུང་འཛིན་བཟུང་བྱས་ནས་་བརྗོད་རང་དབང་ལའང་བཀག་འགོག་ཤུགས་ཆེ་བྱས་དང་བྱེད་བཞིན་ཡོད། དཔེར་ན། རྨ་ཆུ་རྫོང་བོད་ཡིག་སློབ་འབྲིང་གི་དགེ་རྒན་ཁག་གཅིག་ལས་གནས་ནས་གནས་དབྱུང་བཏང་བ་དང་སློབ་ཕྲུག་དང་དགེ་རྒན་བཀག་ཉར་བྱས་པ། དགེ་རྒན་ ༢༡ ཙམ་ལ་དངུལ་གྱི་ཆད་པ་བཅད་པ། རྨ་ཆུ་རྫོང་བོད་ཡིག་སློབ་ཆུང་གི་དགེ་རྒན་དང་འབར་ཁམས་དགེ་འོས་སློབ་གྲྭའི་དགེ་རྒན་ལྔ་ཙམ་འཛིན་བཟུང་བྱས་པ། འབྲི་རུ་རྫོང་རྩ་ལ་ཤང་ལྟེ་བའི་སློབ་ཆུང་གི་སློབ་ཕྲུག་ན་གཞོན་ཁག་གཅིག་བཀག་ཉར་བྱས་པ་སོགས་དང་། དེ་བཞིན་ཉེ་དུས་ཟླ་ ༤ པའི་ནང་ནུབ་བྱང་མི་རིགས་སློབ་གྲྭ་ཆེན་མོའི་སློབ་ཕྲུག་མཛོད་དགེ་རྫོང་ཁོངས་ནས་ཡིན་པ་རྩོམ་པ་པོ་ཐེའུ་རང་ངམ་བཀྲིས་རབ་བརྟན་ལགས་དང་། བསང་ཆུ་རྫོང་ཁོངས་ནས་ཡིན་པ་ནུབ་བྱང་མི་རིགས་སློབ་གྲྭ་ཆེན་མོའི་སློབ་ཕྲུག་རྩོམ་པ་པོ་ཞོགས་ལྗང་ངམ་འབྲོང་བུ་ལགས་གཉིས་རྒྱུ་མཚན་ཁ་གསལ་གང་ཡང་མེད་པར་འཛིན་བཟུང་བཀག་ཉར་བྱས་ཡོད་འདུག ཕྱོགས་མཚུངས་ཟླ་ ༤ ཚེས་ ༢༣ ཙམ་དུ་མཚོ་སྔོན་ཞིང་ཆེན་མི་རིགས་དཔེ་སྐྲུན་ཁང་གི་རྩོམ་སྒྲིག་པ་གཅན་ཚ་རྫོང་ཁོངས་ནས་ཡིན་པ་ཞོགས་དུང་བཀྲ་རྒྱལ་ལགས་ཟི་ལིང་གྲོང་ཁྱེར་གྱི་ཉེན་རྟོག་པས་རྒྱུ་མཚན་ཁ་གསལ་གང་ཡང་མེད་པར་འཛིན་བཟུང་བྱས་ཡོད་པ་བཅས་ནི་རྒྱ་ནག་གཞུང་ཕྱོགས་ནས་དམིགས་ཡུལ་ངེས་ཅན་ཡོད་པའི་ཐོག་བོད་རིགས་ཤེས་ཡོན་ཅན་ཚོར་རྡུང་རྡེག་གཏོང་བའི་ལས་འགུལ་གསར་པ་ཞིག་ཡིན་པར། བོད་ནང་གི་ཤེས་ཡོན་ཅན་ཚོས་ངོས་འཛིན་གཅིག་མཚུངས་བྱེད་བཞིན་ཡོད་འདུག
