༢༠༡༠ ཕྱི་ཟླ་ ༤ ཚེས་ ༢༣ རེས་གཟའ་པ་སངས།
༄༅། །སྤྱི་འཐུས་དགེ་བཤེས་བེ་རི་འཇིགས་མེད་དབང་རྒྱལ་ལགས་ཀྱིས་འདི་གར་བཏང་གནས་ནང་གསལ། ཁམས་ཡུལ་ཤུལ་ཁུལ་དུ་ས་ཡོམ་རྐྱེན་པས་མི་ཤི་ཁྱིམ་སྟོང་དང་རྐྱེན་ངན་གོད་ཆག་བྱུང་བར། ཏྲེ་ཧོར་དཀར་མཛེས་ཁུལ་དཀར་མཛེས་དགོན་པ་ནས་རྒྱ་སྒོར་ ༨༠༠༠༠ དང་། ཁང་སར་སྐྱབས་མགོན་གྱིས་རྒྱ་སྒོར་ ༢༠༠༠༠། དཀར་མཛེས་དགོན་པའི་དགེ་འདུན་པ་ཚོས་རྒྱ་སྒོར་ ༣༠༠༠༠ བཅས་བསྡོམས་པའི་རྒྱ་སྒོར་ ༡༣༠༠༠༠ དང་། དེ་བཞིན་ལྷ་སར་ཡོད་པའི་དཀར་མཛེས་ཀྱི་ཚོང་པ་ཁག་གཅིག་ནས་རྒྱ་སྒོར་ ༨༠༠༠༠ བཅས་ཁྱོན་བསྡོམས་སྒོར་ ༢༡༠༠༠༠ བྱུང་ཡོད་པ་མ་ཟད། ད་དུང་ཚོང་པ་ཁག་གཅིག་ནས་བསྡུ་རྒྱུ་ལུས་ཡོད་པ། དེ་དག་ནས་མུ་མཐུད་དེ་བསྡུ་རུབ་ཀྱིས་འབུལ་ལམ་ཞུ་རྒྱུ་ཡིན་ལུགས་དགེ་བཤེས་བེ་རི་འཇིགས་མེད་དབང་རྒྱལ་ལགས་སུ་བརྗོད་ཡོད་པ་རེད། ཕྱོགས་མཚུངས་དཀར་མཛེས་གྲོང་རྡལ་གྱི་བོད་རིགས་མི་མང་ཤང་གཉིས་ཀྱིས་གྲོ་ནས་སྲན་གསུམ་དང་རྩམ་པ་སོགས་ཟས་རིགས་རྒྱ་མ་ ༡༤༠༠༠༠ ལྷག་དང་། གྱོན་ཆས་སོགས་ཤར་རླུང་རྟགས་ཅན་གྱི་མོ་ཊ་གསུམ་བཏང་ཟིན་པ་དང་། ད་དུང་མང་ཚོགས་ནས་མུ་མཐུད་དེ་འཚང་ཁའི་ངང་ཞལ་འདེབས་འབུལ་བཞིན་ཡོད་པའི་གནས་ཚུལ་ཐོན་འདུག དཀར་མཛེས་ཡུལ་དགོན་གཉིས་ནི་ཏྲེ་ཧོར་ཁུལ་གྱི་རྫོང་ཁག་ལྔ་ཡོད་པའི་ནང་ནས་དཀར་མཛེས་རྫོང་ཁོངས་ནས་ཤང་ཁག་ ༢༤ ཡོད་པའི་ནང་ནས་ཤང་ཁག་བཅུའི་ཁོངས་ཡིན། རྒྱ་གཞུང་གི་གོ་སྒྲིག་འོག་ཡོད་པ་རྣམས་གསར་འགྱུར་དང་། རླུང་འཕྲིན། བརྙན་འཕྲིན་ཁག་ལ་སྟོན་བཞིན་ཡོད་པ་ལས། བོད་རིགས་བསྡུས་བསྡད་ས་གནས་གང་ས་ནས་མི་རྒྱུ་ཟོག་གསུམ་གྱིས་རོགས་རམ་རྒྱ་ཆེར་གནང་དང་གནང་བཞིན་ཡོད་པ་དེ་དག་དང་། དགོན་པ་ཁག་དང་མི་མང་དྭང་བླངས་ཀྱིས་རོགས་སྐྱོབ་གནང་མཁན་རྣམས་གསར་འགྱུར་དང་། རླུང་འཕྲིན། བརྙན་འཕྲིན་བཅས་སུ་དེ་ཙམ་ཐོན་གྱི་མེད་པ་མ་ཟད། རྐྱེན་ངན་ཁྲོད་ནས་ཕུང་པོ་བཏོན་པ་དང་རྨས་མ་སྐྱོབ་རིགས་ལ་ཁ་ཞེ་གཉིས་མེད་ཀྱིས་གདོང་མཆོང་བྱེད་མཁན་མང་ཆེ་བ་ནི་གྲྭ་པ་དང་མི་མང་ཚོ་ཡིན་ནའང་། ཉེན་ཁ་ལས་བསྐྱབས་ཚར་བ་དང་སྐྱོབ་མཁན་རྣམས་ཟུར་ཕུད་བྱས་ཏེ་རྒྱ་རིགས་དམག་མི་ཚོས་དཀྱིལ་ལ་འཚང་ནས་འདྲ་པར་དང་བརྙན་འཕྲིན་བླངས་ཏེ་གང་སར་ཁྱབ་བསྒྲགས་བྱེད་བཞིན་ཡོད་པ་བཅས་སོ།
