༢༠༡༠ ཕྱི་ཟླ་ ༤ ཚེས་ ༢༡ རེས་གཟའ་ལྷག་པ།
༄༅། །ཆོས་རིག་ལས་ཁུངས་ནས་འདི་གར་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༤ ཚེས་ ༡༠ ཉིན་བཙན་བྱོལ་བོད་གཞུང་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྡེ་ར་ལྡུན་དུ་ཡོད་པའི་མངོན་དགའ་བོད་ཕྲུག་དམིགས་བསལ་དགོས་མཁོ་ཅན་གྱི་སློབ་གྲྭ་དབུ་བརྙེས་ནས་ལོ་ངོ་བཅུ་འཁོར་བའི་དུས་དྲན་སྲུང་བརྩི་གནང་སྐབས། དཔལ་ལྡན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་བཀའ་ཁྲིའི་སྐུ་ཚབ་ཀྱི་ངོ་བོར་གདན་འདྲེན་ཞུས་པ་ལྟར། ཕྱི་ལོ་ ༢༠༡༠ ཟླ་ ༤ ཚེས་ ༩ ཉིན་ལྡི་ལི་ནས་མེ་འཁོར་ནང་ཕེབས་འཐོན་གྱིས་ས་གནས་སུ་འབྱོར་བ་དང་། འཕྲོད་བསྟེན་ལས་ཁུངས་ཀྱི་སྐུ་ཚབ་དང་སྡེར་ལྡུན་ས་གནས་འགོ་འཛིན། མངོན་དགའ་སློབ་གྲྭའི་འགན་འཛིན་གཙོས་པའི་ལས་བྱེད་རྣམས་ཀྱིས་དགའ་བསུ་སྣེ་ལེན་གཟབ་རྒྱས་ཞུས། ཕྱི་ལོ་ ༢༠༡༠ ཟླ་ ༤ ཚེས་ ༡༠ ཉིན་མཛད་འཆར་བཞིན་མངོན་དགའ་སློབ་གྲྭ་དབུ་བརྙེས་ནས་ལོ་ངོ་བཅུ་འཁོར་བའི་རྟེན་འབྲེལ་མཛད་སྒོར་ཕེབས་མཚམས་མཛད་རིམ་སྙན་སྒྲོན་དང་། བོད་རྒྱལ་ཁབ་དང་རྒྱ་གར་རྒྱལ་གླུ་བཏང་ཟིན་པ་དང་། སློབ་ཕྲུག་རྣམས་ནས་ལུས་རྩལ་གཟིགས་འབུལ་རྗེས། དཔལ་ལྡན་ཆོས་རིག་བཀའ་བློན་མཆོག་ནས་བོད་དབྱིན་སྐད་ཡིག་ཐོག་སྤེལ་བའི་སློབ་གྲྭའི་ངོ་སྤྲོད་ཡིག་ཆ་དབུ་འབྱེད་གནང་། སློབ་གྲྭའི་འགན་འཛིན་ནས་དུས་དྲན་ངོ་སྤྲོད་དང་། སློབ་གྲྭའི་ལས་བྱེད་དང་སློབ་ཕྲུག་རྣམས་ནས་གཞས་སྣ་གཟིགས་འབུལ་གྲུབ་མཚམས། དཔལ་ལྡན་བཀའ་བློན་མཆོག་ནས་དུས་དྲན་དང་འབྲེལ་བའི་གསུང་བཤད་དང་ལམ་སྟོན་གནང་། སློབ་གྲྭའི་དྲན་རྟེན་མཚོན་རྟགས་ཤིག་ཀྱང་སློབ་གྲྭའི་འགན་འཛིན་ནས་འབུལ་བཞེས་གནང་འདུག སྐབས་དེའི་དུས་སྟོན་དུ་ས་གནས་སུ་བཞུགས་པའི་མང་གཙོའི་ཀ་བ་གསུམ་གྱི་ལས་ཟུར་རྣམ་པ་དང་། གཞུང་ཞབས་དྲུང་ཟུར་དང་ལས་ཟུར། ས་གནས་ཁྲིམས་ཞིབ་པ། མ་སུ་རིའི་བོད་ཁྱིམ་གྱི་དྲུང་ཆེ་དང་འབྲེལ་ཡོད་ཁག ས་གནས་འགོ་འཛིན་ཁག འབྲེལ་ཡོད་རྒྱ་གར་མི་སྣ། ཆོས་སྡེ་ཁག་གི་སྐུ་ཚབ་དང་མང་ཚོགས་བཅས་ཕེབས་གནང་འདུག དེའི་རྗེས་སློབ་གྲྭའི་དགེ་ཆེ་ནས་ཐུགས་རྗེ་ཆེ་ཞུའི་གསུང་བཤད་དང་ཉིན་གུང་གསོལ་སྟོན་ལྷན་བཞེས་གནང་། ཕྱི་དྲོ་དཔལ་ལྡན་ཆོས་རིག་བཀའ་བློན་མཆོག་སྐྱབས་རྗེ་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་དང་སྐྱབས་རྗེ་འབྲི་གུང་སྐྱབས་མགོན་ཆེ་ཚང་རིན་པོ་ཆེ་རྣམ་གཉིས་མདུན་ལ་ཆེད་བཅར་དང་། ཞོར་དུ་སྲོང་བཙན་དཔེ་མཛོད་ཁང་དུ་གཟིགས་ཞིབ་ཀྱང་གནང་ཡོད། ཚེས་ ༡༡ ཉིན་བཀའ་བློན་མཆོག་སྡེར་ལྡུན་ནས་ཕེབས་འཐོན་གྱིས་བཞུགས་སྒར་དུ་ཕེབས་འབྱོར་གནང་ཡོད་པ་བཅས་སོ།
