༢༠༡༠ ཕྱི་ཟླ་ ༤ ཚེས་ ༡༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༤ ཚེས་ ༡༥ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་གཞུང་ཆོས་རིག་ལས་ཁུངས་ཀྱིས་གོ་སྒྲིག་ཐོག་བོད་མདོ་ཁམས་སྐྱེ་རྒུ་མདོ་ཁུལ་དུ་ས་ཡོམ་གྱི་གོད་ཆག་ཕོག་པ་རྣམས་ལ་གདུང་སེམས་མཉམ་སྐྱེ་མཚོན་སླད་སྨོན་ལམ་གསུང་འདོན་གནང་ཡོད། དེ་ཡང་སྔ་དྲོ་ཆུ་ཚོད་ ༩།༠༠ ཐོག་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དབུ་བཞུགས་ཀྱིས་རྣམ་རྒྱལ་གྲྭ་ཚང་གི་དགེ་འདུན་པའི་གཙོས་བཞུགས་སྒར་གནས་འཁོད་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ་དང་གཞན་ཡང་གཉུག་མར་གནས་པ་དང་། དེ་བཞིན་ཟུར་སྐྱོང་སྡེ་ཚན་ཁག ས་གནས་བདེ་དོན། མང་ཚོགས་སོགས་ཁྱོན་མི་གྲངས་སྟོང་ཕྲག་བརྒལ་བ་ལྷན་འཛོམས་ཐོག་ས་ཡོམ་གྱི་འཇིག་པས་རྐྱེན་འདས་སུ་གྱུར་པ་དང་རྨས་སྐྱོན་ཀྱི་སྡུག་བསྔལ་བཟོད་དཀའ་བ་བྱུང་བཞིན་པ་དང། ད་དུང་ཆུ་རུད་ཀྱི་ཉེན་ཁ་ཡོད་པ་སོགས་ཀྱི་ཆེད་སྨོན་ལམ་གསོལ་འདེབས་ཚོགས་ཏེ་རྐྱེན་འདས་སུ་འགྱུར་བ་རྣམས་ཀྱི་མཚོན་སེམས་ཅན་ཚེ་ལས་འདས་པ་ཡོངས་ཀྱི་ཚེ་རབས་ཕྲེང་བར་བསགས་པའི་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་རིམ་བརྒྱུད་སྐུ་བཞིའི་ཡེ་ཤེས་ལྔ་ལྡན་གྱི་གོ་འཕང་རིན་པོ་ཆེ་མྱུར་དུ་ཐོབ་ཆེད་དང་། ཕྱོགས་མཚུངས་གོད་ཆག་འོག་རྨས་སྐྱོན་ཕོག་པ་རྣམས་ཀྱང་མྱུར་དུ་དྲག་སྐྱེད་ཀྱིས་ཚེ་ལྷག་དོན་ལྡན་ཡོང་བ་དང་འཇིག་རྟེན་ཀུན་ཏུ་སྙིགས་ལྔའི་རྒུད་ཚོགས་སྤྱི་དང་ཁྱད་པར་འབྱུང་གཞིའི་འཇིག་པ་མི་བྱུང་བར་བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་ཐུབ་སླད། ཆོས་རིག་ལས་ཁུངས་ནས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་དང་འཕགས་མཆོག་འདུས་པ་རྒྱ་མཚོར་བསྙེན་བཀུར་མང་ཇ། དགེ་བཙུན་སྔགས་གསུམ་ལ་སྐུ་འགྱེད་ཧིན་སྒོར་ ༥༠ རེ་བཅས་འབུལ་ལམ་ཞུས་ཡོད།
