༢༠༡༠ ཕྱི་ཟླ་ ༤ ཚེས་ ༨ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཕྱི་ཟླ་ ༤ ཚེས་ ༧ ཉིན་བོད་གཞུང་འཕྲོད་བསྟེན་ལས་ཁུངས་ནས་གོ་སྒྲིག་ཐོག་འཛམ་གླིང་འཕྲོད་བསྟེན་ཉིན་མོ་སྲུང་བརྩི་ཞུས་པ། དེ་ཡང་ཉིན་རྒྱབ་ཆུ་ཚོད་ ༢ ཐོག་འཛམ་གླིང་འཕྲོད་བསྟེན་ཉིན་མོ་དང་སྟབས་བསྟུན་བོད་གཞུང་ལས་བྱེད་ཀྱི་གསོལ་ཐབ་ཡང་སྟེང་ཚོགས་ཁང་དུ་ལས་ཁུངས་ཁག་གི་ལས་བྱེད་རྣམས་ཚང་འཛོམས་ཀྱིས་ཐོག་མར་འཕྲོད་བསྟེན་དྲུང་ལས་བསྟན་འཛིན་དབྱིག་གཉེན་ལགས་ནས་མཛད་རིམ་ངོ་སྤྲོད་གནང་རྗེས་འཕྲོད་བསྟེན་བཀའ་བློན་མཆོག་གིས་འཛམ་གླིང་འཕྲོད་བསྟེན་ཉིན་མོར་གནང་བའི་ཡོངས་ཁྱབ་གསུང་བཤད་འཕྲོད་བསྟེན་དྲུང་འཕར་སྟོབས་རྒྱལ་ཚེ་རིང་ལགས་ནས་སྒྲོགས་སྦྱང་གནང་བའི་ནང་འཁོད་དོན། ལོ་ལྟར་ཕྱི་ཟླ་ ༤ ཚེས་ ༧ ཉིན་འཛམ་གླིང་རྒྱ་ཁྱབ་ཏུ་འཛམ་གླིང་འཕྲོད་བསྟེན་ཉིན་མོ་སྲུང་བརྩི་ཞུ་ཡི་ཡོད་པ་དང་། འཛམ་གླིང་འཕྲོད་བསྟེན་ལྷན་ཚོགས་ནས་ལོ་ལྟར་གནས་དོན་གལ་གནད་ཆེ་བ་ཞིག་གི་ཐོག་དམིགས་བཀར་ལས་འགུལ་སྤེལ་དགོས་གཏན་འབེབས་གསལ་བསྒྲགས་གནང་གི་ཡོད་པ་བཞིན། འདི་ལོ་ ༢༠༡༠ ལོར་གྲོང་ཁྱེར་དང་འཕྲོད་བསྟེན་ཞེས་གསལ་བསྒྲགས་གནང་ཡོད། དེ་ནི་གྲོང་གསེབ་ས་ཁུལ་མང་པོ་གྲོང་ཁྱེར་གྱི་ངོ་བོར་བསྒྱུར་རྐྱེན་གྱིས་མི་ཚོགས་ཆེ་བ་དང་། འཕྲུལ་འཁོར་མང་བ། འཛུགས་སྐྲུན་རྒྱ་བསྐྱེད་གཞི་རྒྱ་ཆེ་བ་སོགས་ཀྱིས་སྤྱི་ཚོགས་ཀྱི་འཕྲོད་བསྟེན་ཐོག་ཤུགས་རྐྱེན་ངན་པ་ཇེ་ཆེར་འགྲོ་བཞིན་པ་དེ་དག་ལས་སྐྱོབས་ཐབས་དང་། གྲོང་ཁྱེར་གྱི་འཕྲོད་བསྟེན་བཟང་ཕྱོགས་སུ་ཁ་ཕྱོགས་ཐུབ་པ་བཟོ་རྒྱུ་བཅས་ལ་དམིགས་པ་ཞིག་ཡིན་འདུག རང་རེའི་བོད་མིའི་གཞིས་ཆགས་ཁག་ནང་དུའང་ལོ་ངོ་བཅུ་ཕྲག་གསུམ་ལྷག་གི་ནང་འཛུགས་སྐྲུན་དང་ཡར་རྒྱས་གང་ཙམ་འགྲོ་བཞིན་པ་ཡིན། ད་དུང་འཛུགས་སྐྲུན་གྱི་ལས་གཞི་གསར་སྤེལ་བྱེད་བཞིན་པར་སོང་། འཛུགས་སྐྲུན་གནང་སྐབས་གཡས་གཡོན་འགྲོ་ལམ་མམ་འགྲུལ་ལམ་ལ་མི་གནོད་པ། ཆར་ཆུ་དང་བཙོག་ཆུ་རྒྱུགས་བདེའི་ཆུ་ཡུར་ཚད་ལྡན་དགོས་པ། གསང་སྤྱོད་དང་འཁྲུས་ཁང་ཚད་ལྡན་ཡོང་ཐབས།གཞན་ཡང་ཁོར་ཡུག་ལ་མི་གནོད་པ་སོགས་རང་ཉིད་དང་སྤྱི་ཚོགས་ཀྱི་འཕྲོད་བསྟེན་ལ་ཕན་པའི་ཕུགས་བསམ་བཅང་དགོས། སྤྱིར་བཏང་རང་རེའི་སྤྱི་ཚོགས་ནང་འཕྲོད་བསྟེན་སྐོར་དོ་སྣང་དང་སེམས་ཁུར་ཆེ་རུ་འགྲོ་བཞིན་པ་གང་ལེགས་ཀྱང་། ད་དུང་ནད་རིགས་འགའ་ཤས་ཐོག་དམིགས་བསལ་དོ་སྣང་དགོས་པ་དཔེར་ན། འགོས་ནད་ཀྲི་སྦི་སྐོར་ལོ་མང་རིང་སྨན་བཅོས་ཙམ་མིན་པར་སྔོན་འགོག་སློབ་གསོ་ལམ་སྟོན་རྒྱུན་ཆད་མེད་པར་ཞུ་བཞིན་ཡང་ད་དུང་གོ་རྟོགས་ཞན་པ་མ་ཟད། ཉེན་ཁ་ཅན་གྱི་རིམ་པ་གསུམ་པའི་ཀྲི་སྦི་ནད་གཞི་ན་གཞོན་ཚོའི་ནང་མང་དུ་འགྲོ་བ། འགོས་ནད་ཚབས་ཆེ་གཉན་ནད་རེག་དུག་གི་ནད་པའང་མི་འབོར་ལ་དཔག་པའི་གང་ཙམ་མང་པོ་ཐོན་ཡོང་གི་ཡོད་པ། མཆིན་པའི་གཉན་ཚད་ཀྱི་ནད་གཞི་རྒྱ་ཆེ་ཡོད་པ་སོགས་ནད་རིགས་འདི་ཚོར་མང་ཚོགས་ནས་སྔོན་འགོག་བྱེད་ཕྱོགས་ཐོག་དོ་སྣང་ཤུགས་ཆེ་རུ་གཏོང་དགོས་མཐོང་། འདི་ག་འཕྲོད་བསྟེན་ལས་ཁུངས་ནས་ལམ་སྟོན་ཞུ་མུས་ལྟར་ཚང་མས་དུས་ནས་དུས་སུ་ནད་རིགས་ཡོད་མེད་བརྟག་དཔྱད་དང་འབྲེལ་སྔོན་འགོག་གི་ཐབས་ལམ་བསྟེན་རྒྱུ་ཧ་ཅང་གལ་ཆེ་བས་དགོངས་པར་དམ་འཛིན་གནང་རོགས་ཞུ་རྒྱུ་བཅས་འཁོད་ཡོད།
དེ་རྗེས་བདེ་ལེགས་སྨན་ཁང་གི་སྨན་པ་བསོད་ནམས་དོན་གྲུབ་ལགས་ནས་ (Urbanisation and Health) གྲོང་ཁྱེར་དང་འཕྲོད་བསྟེན། ཞེས་པའི་བརྗོད་གཞིའི་ཐོག་གཏམ་བཤད་གནང་ཡོད་པ་དང་། དེ་ནས་འཕྲོད་བསྟེན་དྲུང་ལས་བསྟན་འཛིན་དབྱིག་གཉེན་ལགས་ནས་སྔར་ལམ་བཞིན་གངས་སྐྱིད་ཁུལ་དུ་ཁོར་ཡུག་གཙང་བཟོའི་ལས་རིམ་གསལ་བསྒྲགས་དང་ཐུགས་རྗེ་ཆེ་ཞུས་རྗེས་བོད་གཞུང་ལྷན་ཁང་ཁག་དང་། བདེ་ལེགས་སྨན་ཁང་། སྨན་རྩིས་ཁང་བཅས་ས་ཁུལ་ཆ་བགོས་གནང་བ་གཞིར་བཟུང་ཁོར་ཡུག་ཁག་གཙང་བཟོ་ལེགས་པར་གནང་ཡོད་ཅིང་། གཙང་བཟོའི་ལས་དོན་གྲུབ་མཚམས་འཕྲོད་བསྟེན་ལས་ཁུངས་ནས་ལས་བྱེད་རྣམས་ལ་གསོལ་ཇ་དང་། བཞེས་ཏོག ཆབ་མངར་མོ་བཅས་ཀྱང་གནང་ཡོད། འཛམ་གླིང་འཕྲོད་བསྟེན་ཉིན་མོར་མཉམ་ཞུགས་གནང་མཁན་བོད་མི་མང་སྤྱི་འཐུས་རྒྱུན་ལས་དང་། ལྷན་ཁང་སོ་སོའི་དྲུང་ཆེ་ཆུང་བཅས་ལས་བྱེད་ཆེ་ཕྲ་ཆུང་གསུམ་མཉམ་ཞུགས་གནང་ཡོད་པའི་གནས་བསྡུས་སུ།
