༢༠༡༠ ཕྱི་ཟླ་ ༤ ཚེས་ ༧ རེས་གཟའ་ལྷག་པ།
༸གོང་ས་༸སྐྱབས་མགོན་ཆེན་པོ་མཆོག་གིས་སོལ་ཝི་ནི་ཡའི་གྲོང་ཁྱེར་མ་རི་བྷོར་གྱི་སྐྱེས་མོད་ཚལ་དུ་ཞི་བའི་ལྗོན་ཤིང་འདེབས་འཛུགས་མཛད་བཞིན་པ།
༄༅། །ཕྱི་ལོ་ ༢༠༡༠ ཟླ་ ༤ ཚེས་ ༦ ཉིན་གྱི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་དང་མ་རི་བྷོར་ Maribor གྲོང་ཁྱེར་སྤྱི་ཁྱབ་པ་རྣམ་གཉིས་གྲོང་ཁྱེར་སྤྱི་ཁྱབ་པའི་ལས་ཁུངས་ནང་མཇལ་འཕྲད་མཛད་སྐབས་གྲོང་ཁྱེར་སྤྱི་ཁྱབ་པས་མགོན་པོ་གང་ཉིད་མཆོག་ལ་མ་རི་བྷོར་གྲོང་ཁྱེར་གྱི་ལྡྡེ་མིག་འབུལ་ལམ་ཞུས་ཡོད། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་གྲོང་ཁྱེར་མ་རི་བྷོར་གྱི་སྐྱེད་མོས་ཚལ་དུ་ཞི་བའི་ལྗོན་ཤིང་ཞིག་འདེབས་འཛུགས་མཛད་དེ་མང་ཚོགས་རྣམས་ལ་བཀའ་སློབ་སྩལ་དོན། འཚེ་བ་དང་། མི་གསོད་ཁྲག་སྦྱོར། དམག་འཁྲུག་དེ་དག་ད་ཆ་མི་འཚམས་པའི་གནས་སྟངས་ཤིག་ཆགས་ཡོད། དུས་རབས་ ༢༠ པ་དེ་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཡོད་ཀྱང་། དུས་རབས་ ༢༡ པ་འདི་གྲོས་མོལ་གྱི་དུས་རབས་ཤིག་ཡོང་བ་བྱེད་དགོས་ཅེས་བཀའ་སྩལ།
༸གོང་ས་༸སྐྱབས་མགོན་ཆེན་པོ་མཆོག་ལ་གྲོང་ཁྱེར་སྤྱི་ཁྱབ་པས་གྲོང་ཁྱེར་ལྡེ་མིག་འབུལ་ལམ་ཞུ་བཞིན་པ།
དེ་རྗེས་མགོན་པོ་གང་ཉིད་མཆོག་གིས་མ་རི་བྷོར་སློབ་གྲྭ་ཆེ་མོའི་སློབ་ཕྲུག་གྲངས་ ༡༠༠༠ ཙམ་ལ་འགྲོ་བ་མིའི་རིན་ཐང་ཐོག་བཀའ་སློབ་བཀའ་དྲིན་སྩལ། དེ་ནས་ཉིན་གུང་ལྗགས་སྨིན་གོང་དུ་༸གོང་ས་༸སྐྱབས་མགོན་ཆེན་པོ་མཆོག་དང་སོལ་ཝི་ནི་ཡའི་སྲིད་བློན་ཟུར་པ་དང་སོལ་ཝི་ནི་ཡའི་མང་གཙོ་ཚོགས་པའི་ཚོགས་གཙོ་སྐུ་ཞབས་ཇ་ནེ་ཛི་ཇན་སི་ (Janez Jans) མཆོག་དང་མཇལ་འཕྲད་མཛད།
མང་ཚོགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ཉན་བཞིན་པ།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་གྲོང་ཁྱེར་མ་རི་བྷོར་ནང་མང་ཚོགས་ ༥༠༠༠ ཙམ་ལ་ཆུ་ཚོད་གཉིས་ཙམ་རིང་། སྟོང་ལོ་གསར་པར་སྨན་པའི་ཀུན་སྤྱོད། ཅེས་པའི་བརྗོད་གཞིའི་ཐོག་བཀའ་སློབ་སྩོལ་སྐབས་སོལ་ཝི་ནི་ཡའི་ཁྱིམ་མཚེས་རྒྱལ་ཁབ་ཨོས་ཏྲི་ཡ། ཨི་ཊ་ལི། ཧང་གྷཱ་རི། ཀོ་རོ་ཤི་ཡ་བཅས་ནས་མི་མང་པོ་ཞིག་༸གོང་ས་མཆོག་གི་བཀའ་སློབ་ཞུ་བར་བཅར་ཡོད། སྐབས་དེར་མང་ཚོགས་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་ཤེས་ཡོན་དང་བདེ་སྐྱིད། བྱམས་བརྩེ། ཆབ་སྲིད།ལེགས་བྱང་དེ་བཞིན་མགོན་པོ་གང་ཉིད་མཆོག་གི་ཡང་སྲིད་བཅས་ཀྱི་བརྗོད་གཞི་དང་འབྲེལ་བའི་སྐོར་བཀའ་དྲི་ཞུ་རྒྱུའི་གོ་སྐབས་ཐོབ་ཡོད། དེ་ཡང་སྐབས་དེར་བུད་མེད་གཅིག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་མི་ཚེའི་དགོས་དོན་གཙོ་བོ་གང་ཡིན་བཀའ་དྲི་ཞུས་པར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། མི་ཚེ་བདེ་སྐྱིད་ལྡན་པ་དེ་ཡིན། མ་འོངས་པར་ངེས་གཏན་གང་ཡང་མེད་ནའང་ང་ཚོས་རེ་བ་རྒྱག་རྒྱུ་རེད། རེ་བ་དང་བྲལ་ན་མི་ཚེ་ཐུང་དུ་འགྲོ་རྒྱུ་རེད། རེ་བ་ཡོད་པ་དེ་ཚོད་ཀྱིས་ཡག་པོ་རེད། མི་ཚེའི་དགོས་དོན་ནི་བདེ་སྐྱིད་ཡིན། ཞི་བདེ་ངོ་མ་དེ་སོ་སོ་རང་ཉིད་ཀྱི་ནང་གི་བསམ་བློ་ནས་ཡོང་དགོས། ཐ་མག་ཉེ་ཐག་དང་ཤོ་སྦག ཆང་རག་སོགས་ལ་ལོངས་སྤྱོད་བྱེད་རྒྱུ་དེ་དག་ནི་ནང་གི་ནུས་པ་དང་བསམ་བློའི་རིན་ཐང་ངོས་འཛིན་མ་ཐུབ་པ་ལས་བྱུང་བ་ཡིན་ཞེས་བཀའ་སྩལ། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་གནད་དོན་དང་འབྲེལ་ནས་བཀའ་སྩལ་དོན། ངོས་རང་ཕྱི་ལོ་ ༡༩༥༩ ལོར་རྒྱ་གར་ནང་ཡོང་དགོས་བྱུང་བ་དེ་འབྱུང་བའི་འཇིག་པས་གོ་ཆག་ཕོག་པ་དང་། བོད་མི་ནང་ཁུལ་ནང་འཁྲུུག་བྱུང་བ་ལ་བརྟེན་ནས་བྲོས་བྱོལ་དུ་ཡོང་བ་ཞིག་མིན་པར་བོད་ནང་མགྲོན་འབོད་མེད་པའི་མགྲོན་པོ་གསར་པ་ཞིག་འབྱོར་ནས་མགྲོན་པོ་དེས་བོད་ནང་དབང་སྒྱུར་བྱས་པར་བརྟེན་ནས་བཙན་བྱོལ་དུ་ཡོང་དགོས་བྱུང་བ་ཞིག་ཡིན། ང་ཚོས་རྒྱ་ནག་དང་ཁ་བྲལ་བྱེད་ཀྱི་མེད་ལ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་སུ་གནས་རྒྱུར་ཆོད་སེམས་འཆང་བཞིན་ཡོད་ཅེས་བཀའ་སྩལ། བཀའ་སློབ་གྲུབ་མཚམས་ཕྱི་ནང་གསར་འགོད་པ་གྲངས་ ༡༦༨ ཙམ་ལ་བཀའ་སློབ་སྩལ་ཡོད་པ་བཅས།།
