༢༠༡༠ ཟླ་ ༤ ཚེས་ ༣༠ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༤ ཚེས་ ༣༠ ཉིན་བཙན་བྱོལ་བོད་གཞུང་ལྔ་བཅུའི་དུས་དྲན་གོ་སྒྲིག་ཚོགས་ཆུང་གིས་གོ་སྒྲིག་ཐོག་རྡ་སའི་ཉེ་འགྲམ་གྱི་རྡ་རི་ཐང་ཆེན་དུ་༸གོང་ས་༸སྐྱབས་མགོན་ཆེན་པོ་མཆོག་རྡ་སར་༸ཞབས་སོར་འཁོད་དེ་མི་ལོ་ ༥༠ འཁོར་བའི་རྗེས་དྲན་དང་། ཧི་མ་ཅལ་གཞུང་མང་ལ་ཐུགས་རྗེ་ཆེ་ཞུའི་དུས་དྲན་གྱི་མཛད་སྒོ་ཚོགས་ཡོད།
༸གོང་ས་༸སྐྱབས་མགོན་ཆེན་པོ་མཆོག་གིས་ཧི་མ་ཅལ་མངའ་སྡེའི་བློན་ཆེན་མཆོག་ལ་ཐུགས་རྗེ་ལེགས་འབུལ་མཚོན་ཆེད་སྐུ་ཐང་སྩོལ་བཞིན་པ།
དེ་ཡང་སྔ་དྲོ་ཆུ་ཚོད་ ༩།༠༠ ཐོག་རྡ་རིའི་ཐང་ཆེན་དུ་བཙན་བྱོལ་བོད་གཞུང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་འགན་འཛིན་རྣམ་པ། ལྷན་ཁང་ཁག་གི་དྲུང་ཆེ་ཆུང། གཞུང་འབྲེལ་མིན་པའི་ཚོགས་པ་ཁག་གི་འགན་འཛིན། དེ་བཞིན་ཀྒ་ར་རྗོང་གི་རྫོང་དཔོན་གྱི་དབུས་ལས་ཁུངས་མ་ལག་དང་བཅས་པའི་འགན་འཛིན། ཧིན་བོད་མཛའ་འབྲེལ་ཚོགས་པ་དང་འཕགས་བོད་འབྲེལ་མཐུད་ཚོགས་པའི་ཚོགས་མི། ས་གནས་རྒྱ་གར་གྱི་གཞུང་འབྲེལ་མིན་པའི་ཚོགས་པ་ཁག་གི་འགན་འཛིན་དང་སློབ་ཕྲུག ས་གནས་ཡུལ་མི། སེར་སྐྱ་མང་ཚོགས་དང་ཕྱི་ནང་གསར་འགོད་པ་བཅས་ཚང་འཛོམས་ཐོག་བོད་གཞུང་ཟློས་གར་གྱིས་གར་རོལ་དང་བཅས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་།
སྐུ་མགྲོན་གཙོ་བོ་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པེ་རེམ་ཀུ་མར་ཌུ་མལ་མཆོག ཧི་མ་ཅལ་མངའ་སྡེའི་བཟོ་ལས་བློན་ཆེན་སྐུ་ཞབས་ཀི་ཤན་ཀ་པུར་མཆོག་བཅས་ལ་ཕེབས་བསུ་གཟབ་རྒྱས་ཞུས་བསྟུན་གནས་ཆུང་སྒྲ་དབྱངས་གླིང་གི་གསུང་ཞབས་རྣམས་ཀྱིས་དུང་རྒྱ་རོལ་མོ་དང་བཅས་ཤིས་བརྗོད་གསུང་གྲུབ་མཚམས་བོད་གཞུང་ཟློས་གར་ཚོགས་པས། ཧི་མཱ་ཅལ་ཐུགས་རྗེ་ཆེ། ཞེས་པའི་གླུ་གཞས་རོལ་དབྱངས་དང་བཅས་གཟིགས་འབུལ་ཞུས། དེ་ནས་བཀའ་ཁྲི་མཆོག་གིས་ཐོག་མར་བོད་སྐད་དང་དེ་ནས་ཧིན་སྐད་ཐོག་དུས་དྲན་དང་འབྲེལ་བའི་གསུང་བཤད་གནང་། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཧི་མཱ་ཅལ་མང་ཚོགས་ལ་ཐུགས་རྗེ་ལེགས་འབུལ་གྱི་མཚོན་རྟགས་སྟོན་པའི་སྐུ་ཐང་ཞིག་དང་དངུལ་འཛིན་ཞིག་ཧི་མཱ་ཅལ་མངའ་སྡེའི་བློན་ཆེན་མཆོག་ལ་སྩལ་གནང་མཛད་པ་མ་ཟད།
དཔལ་ལྡན་བཀའ་བློན་ཁྲི་པ་མཆོག་གི་བཟོ་ལས་བློན་ཆེན་སྐུ་ཞབས་ཀི་ཤན་ཀ་པུར་མཆོག་ལ་ཐུགས་རྗེ་ལེགས་འབུལ་གྱི་མཚོན་རྟགས་སྐུ་ཐང་ཞིག་ཕྱག་རྟགས་སུ་ཕུལ། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ཆེན་དང་འབྲེལ་བའི་བཀའ་སློབ་སྩལ། དེ་ནས་ཧི་མ་ཅལ་མངའ་སྡེའི་བློན་ཆེན་སྐུ་ཞབས་པེ་རེམ་ཀུ་མར་ཌུ་མལ་མཆོག་གིས་གསུང་བཤད་ལེགས་པར་གྲུབ་མཚམས་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས་ཐུགས་རྗེ་ཆེ་ཞུའི་གསུང་བཤད་གནང་སྟེ་སྔ་དྲོའི་མཛད་སྒོ་ལེགས་པར་གྲུབ།།
