༢༠༡༠ ཕྱི་ཟླ་ ༣ ཚེས་ ༣༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༢༩ ཉིན་དབྱིན་ཇིའི་གསར་འགྱུར་བྷི་བྷི་སི་དྲྭ་རྒྱའི་ (BBC) ནང་སྤེལ་བའི་གནས་ཚུལ་ལྟར་ན་རྒྱལ་སྤྱིའི་ཉེས་ཡངས་ཐོབ་ཐང་ཚོགས་པས་ (Rights group Amnesty International) རྒྱ་ནག་གཞུང་ལ་སྲོག་ཁྲིམས་ཕོག་པའི་བཙོན་པའི་གྲངས་ཚད་ཇི་ཙམ་ཡོད་མིན་གསལ་སྟོན་དགོས་པའི་འབོད་སྐུལ་ཞུས་ཡོད། ཚོགས་པ་དེའི་ལོ་འཁོར་སྙན་ཐོའི་ནང་ཕྱི་ལོ་ ༢༠༠༩ ལོར་རྒྱལ་ཁབ་ཁག ༡༨ ནང་མི་གྲངས་ ༧༡༤ ཙམ་ལ་སྲོག་ཁྲིམས་བཅད་ཡོད། འོན་ཀྱང་རྒྱལ་སྤྱིའི་ཉེས་ཡངས་ཚོགས་པས་འཛམ་གླིང་ཁྱོན་ཡོངས་ལས་རྒྱ་ནག་གཅིག་པུའི་ནང་སྲོག་ཁྲིམས་བཅད་པའི་བཙོན་པའི་གྲངས་ཚད་མང་བ་ཡོད་པར་ངོས་འཛིན་བྱེད་བཞིན་ཡོད་གང་ཡིན་ཟེར་ན། རྒྱ་ནག་གཅིག་པུའི་ནང་མི་གྲངས་སྟོང་ཕྲག་མང་པོར་སྲོག་ཁྲིམས་བཅད་ཡོད་པར་ཚོད་དཔག་གནང་བཞིན་ཡོད། འོན་ཀྱང་རྒྱ་ནག་གཞུང་གིས་དེ་སྔ་དང་མི་འདྲ་བར་དེང་སང་སྲོག་ཁྲིམས་གཅོད་རྒྱུ་ཉུང་དུ་བཏང་ཡོད་སྐོར་བརྗོད་ཡོད་ནའང་། སྲོག་ཁྲིམས་བཅད་པའི་བཙོན་པའི་གནས་སྟངས་གསལ་བཤད་དགོས་པའི་རེ་འདུན་བཏོན་པར་རྒྱ་ནག་གཞུང་ཕྱོགས་ནས་གནས་ཚུལ་དེའི་རིགས་ནི་རྒྱལ་ཁབ་ཀྱི་གསང་བ་ཡིན་སྐོར་བརྗོད་ནས་གསལ་སྟོན་བྱེད་ཀྱི་མེད་ཅེས་བྷི་བྷི་སིའི་དྲྭ་རྒྱའི་ནང་བཀོད་ཡོད། འོན་ཀྱང་སྔ་ལོའི་ནང་དཔང་རྟགས་གང་བྱུང་བ་དང་དེ་བཞིན་ད་ལྟའི་ཆར་གནས་ཚུལ་ཁུངས་ལྡན་མང་པོར་གཞི་བཅོལ་ནས་བཤད་ན་རྒྱ་ནག་ནང་སྲོག་ཁྲིམས་བཅད་པའི་མི་གྲངས་སྟོང་ཕྲག་བརྒལ་གྱི་ཡོད་ཅེས་རྒྱལ་སྤྱིའི་ཉེས་ཡངས་ཚོས་པས་བརྗོད་ཡོད་པ་དྲྭ་རྒྱ་དེའི་ནང་འཁོད་ཡོད། དེ་བཞིན་དྲྭ་རྒྱ་དེའི་ནང་རྒྱལ་སྤྱིའི་ཉེས་ཡངས་ཚོགས་པའི་བར་བརྒལ་དྲུང་ཆེ་སྐུ་ཞབས་ཁ་ལའོ་ཌིའོ་ཁོར་ཌོན་ (Claudio Cordone) ལགས་ཀྱིས་བརྗོད་དོན། རྒྱ་ནག་གཞུང་གིས་སྲོག་ཁྲིམས་གཅོད་རྒྱུ་ཉུང་དུ་བཏང་ཡོད་སྐོར་བརྗོད་བཞིན་ཡོད། གལ་ཏེ་དངོས་ལྡན་ཡིན་ན་ཁོང་ཚོས་མི་གྲངས་ཇི་ཙམ་སྲོག་ཁྲིམས་བཅད་ཡོད་མེད་གསལ་བཤད་མི་བྱེད་པའི་རྒྱུ་མཚན་གང་ཡིན་ནམ། ཕྱི་ལོ་ ༢༠༠༧ རྗེས་སུ་རྒྱ་ནག་ནང་སྲོག་ཁྲིམས་ཀྱི་ཉེས་ཆད་ཕོག་པ་རྣམས་ཁྲིམས་ཁང་གོང་མར་བསྐྱར་ཞིབ་བྱེད་རྒྱུའི་ཁྲིམས་ལུགས་གསར་པ་ཞིག་གཏན་འབེབས་བྱས་པ་དེའི་ཐོག་ནས་སྲོག་ཁྲིམས་ཀྱི་ཉེས་ཆད་ཕོག་པ་མང་པོ་ཞིག་ལ་ཆག་ཡངས་ཡོང་བཞིན་ཡོད་སྐོར་རྒྱ་ནག་གཞུང་གིས་བརྗོད་ཀྱི་ཡོད། འོན་ཀྱང་ཇི་སྲིད་སྲོག་ཁྲིམས་བཅད་པའི་བཙོན་པའི་གྲངས་ཚད་ཀྱི་ཐོ་གཞུང་དེ་གཞུང་གི་གསང་བ་ཆགས་པ་དེ་སྲིད་དུ་ཁོང་ཚོས་གྲངས་ཚད་ཆག་ཡོད་སྐོར་བརྗོད་པ་དེ་དངོས་འབྲེལ་ཡིན་མིན་དང་ད་ལྟའི་སྲོག་ཁྲིམས་ཕོག་པའི་གྲངས་ཚད་དེ་ཇི་ཡིན་ཞིབ་འཇུག་བྱེད་ཐུབ་མི་སྲིད་པ་ཞིག་རེད་ཅེས་རྒྱལ་སྤྱིའི་ཉེས་ཡངས་ཚོགས་པས་བརྗོད་ཡོད། རྒྱལ་སྤྱིའི་ཉེས་ཡངས་ཚོགས་པས་དམིགས་བསལ་སེམས་འཚབ་བྱེད་གཞི་ནི་བོད་དང་ཤིང་ཅང་ནང་ངོ་རྒོལ་གྱི་ཟིང་ཆ་ལངས་རྗེས་སྲོག་ཁྲིམས་བཅད་པའི་བཙོན་པ་དེ་ཚོ་ཆགས་ཡོད། དེ་ཡང་རྒྱལ་སྤྱིའི་ཉེས་ཡངས་ཚོགས་པས་ད་ཆ་རྒྱ་ནག་གཞུང་གིས་རྒྱལ་སྤྱིའི་ཁྲིམས་ལུགས་ལ་སྲུང་བརྩི་ཞུ་རྒྱུ་དང་། སྲོག་ཁྲིམས་ཀྱི་ཉེས་ཆད་དེ་ཁྲིམས་ལུགས་དང་ལྡན་པའི་ཐོག་ལག་སྟར་བྱ་རྒྱུ། སྲོག་ཁྲིམས་ཀྱི་ཉེས་ཆད་གཏོང་ལུགས་གཏོང་སྟངས་ཇི་ཡིན་ཕྱི་གསལ་ནང་གསལ་བྱེད་དགོས་པའི་དུས་ཚོད་རན་ཐག་ཆོད་ཡོད་ཅེས་བརྗོད་ཡོད།།
