༢༠༡༠ ཕྱི་ཟླ་ ༣ ཚེས་ ༡༡ རེས་གཟའ་ཕུར་བུ།
༄༅། །བོད་རྒྱལ་ལོ་ ༢༡༣༧ ཕྱི་ལོ་ ༢༠༡༠ ཟླ་ ༣ ཚེས་ ༡༠ ཉིན་ཕྱི་ལོ་ ༡༩༥༩ ལོར་བོད་ཀྱི་རྒྱལ་ས་ལྷ་སར་བོད་མི་སེར་སྐྱ་ཁྲི་སྟོང་མང་པོས་བོད་བསྟན་པ་ཆབ་སྲིད་ཀྱི་ཆེད་དུ་རྒྱ་ནག་བཙན་འཛུལ་པར་ཞི་བའི་སྒེར་ལངས་བྱས་ཏེ་འདི་ལོ་ལོ་ཧྲིལ་པོ་ ༥༡ འཁོར་བའི་དུས་དྲན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བར་སྔར་རྒྱུན་བཞིན་ཚོགས་ཡོད།
བཞུགས་སྒར་རྡ་སའི་ཉེ་འཁོར་གཙོས་འཛམ་གླིང་རྒྱལ་ཁབ་གང་ས་ནས་ཕེབས་པའི་བོད་དོན་རྒྱབ་སྐྱོར་བ་ཚང་མས་དུས་དྲན་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༠༠ ཐོག་གཞུང་འབྲེལ་གྱི་མཛད་སྒོ་དངོས་གཞི་འགོ་འཛུགས་སྐབས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། ཆོས་བརྒྱུད་ཁག་གི་བླ་ཆེན་རྣམ་པས་དབུས་སྤྱི་འཐུས་ལས་ཟུར་རྣམ་པ། ལྷན་ཁང་སོ་སོའི་དྲུང་ཆེ་ཆུང་གི་གཙོས་སྲི་ཞུའི་ལས་ཟུར་རྣམ་པ། སྡེ་ཚན་ཁག་གི་འགན་འཛིན་དང་བླ་སྤྲུལ་དགེ་བཤེས་རྣམ་པ། གཞུང་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་འགན་འཛིན་བཅས་སེར་སྐྱ་མི་མང་སྟོང་ཕྲག་མང་པོ་ཚང་འཛོམས་ཐོག་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸ཞབས་སོར་འཁོད་འཕྲལ་མཛད་སྒོ་དངོས་གཞི་དབུ་འཛུགས་ཀྱིས་བཀའ་དྲུང་མི་འགྱུར་རྡོ་རྗེ་ལགས་ནས་མཛད་རིམ་ངོ་སྤྲོད་ཀྱི་ཐོག་མར་སེར་སྐྱ་མི་མང་ཚང་མས་སྐུ་བཞེངས་ཐོག་བཀའ་ཁྲི་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་བཞིན་བོད་གཞུང་ཟློས་གར་ཚོགས་པས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་བོད་ཀྱི་བསྟན་པ་ཆབ་སྲིད་ཀྱི་དོན་དུ་ལུས་སྲོག་ལོངས་སྤྱོད་དང་བཅས་པ་བློས་བཏང་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ་ངག་བཅད་མྱ་ངན་གུས་འདུད་སྐར་མ་གཅིག་ཞུས། དེ་ནས་བོད་གཞུང་ཟློས་གར་ཚོགས་པས་བདེན་ཚིག་སྨོན་ལམ་གསུང་སྐབས་ཚང་མས་ལག་གཉིས་ཐལ་མོ་སྦྱར་ཏེ་འུར་འདོན་གནང་གྲུབ་རྗེས་བཀའ་ཁྲི་མཆོག་གིས་བཀའ་ཤག་གི་གཏམ་བཤད་གནང་། དེ་ནས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་མི་མང་སྤྱི་འཐུས་ཀྱི་གཏམ་བཤད་གནང་། དེ་རྗེས་༸གོང་ས་མཆོག་གིས་དུས་དྲན་གྱི་གསུང་བཤད་བཀའ་དྲིན་ཆེ་བ་སྩལ་གྲུབ་རྗེས་གསུམ་བཅུའི་དུས་དྲན་གྱི་མཛད་སྒོར་ཕེབས་པའི་རྒྱ་རིགས་མང་གཙོ་དོན་གཉེར་བ་དང་ཉི་ཧོང་། སོག་རིགས་བཅས་ལ་དམིགས་བསལ་བཀའ་སློབ་ཕེབས་དོན། སྔ་ལོ་ང་ཚོས་གསུམ་བཅུའི་དྲན་གསོ་བྱེད་སྐབས་རྒྱ་རིགས་གྲོགས་པོ་མང་པོ་ཞིག་སླེབས་ཡོད་པ་རེད། འདི་ལོ་ཡང་སྔོན་ལོ་ལས་མང་བ་སླེབས་ཡོད། ཁོང་རྣམས་ལ་སུ་གཅིག་གིས་ཁྲལ་སྐུལ་མཁན་མེད་ལ། གསུམ་བཅུའི་དུས་དྲན་འདིར་མཉམ་ཞུགས་བྱས་པ་ཡིན་ན་དངུལ་གྱི་ཁེ་བཟང་རག་རྒྱུ་མེད། དེ་བཞིན་མིང་ཡང་ཆེ་རུ་འགྲོ་རྒྱུ་མེད། འོན་ཀྱང་ཕྱོགས་གཅིག་ནས་དྲང་བདེན་གྱི་འཐབ་རྩོད་རང་བཞིན་ལ་མི་ཤེས་ལྡན་སུ་ཡིན་ཡང་དེ་ལ་དོ་སྣང་དང་རྒྱབ་སྐྱོར་བྱེད་རྒྱུའི་བསམ་བློ་སླེབས་ཀྱི་རེད། གཉིས་ནས་རྒྱ་རིགས་ཚོས་བོད་ཀྱི་གནད་དོན་འདི་གང་ལྟར་རྒྱ་ནག་གི་རྒྱལ་ཁབ་ངོས་ནས་བཤད་ནའང་མཚན་ཤས་ཡོང་རྒྱུའི་གཞི་རྩ་ཞིག་ཆགས་ཀྱི་ཡོད། དེ་འདྲ་ཡིན་དུས་བོད་ཀྱི་གནད་དོན་འདི་སེལ་དགོས་རྒྱུ་ཞིག་ཡིན།
གཉིས་ནས་ང་ཚོས་འཐབ་རྩོད་བྱེད་རྒྱུ་འདི་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་དང་མི་ཉམས་གོང་འཕེལ་ཡོང་རྒྱུའི་དམིགས་ཡུལ་གཙོ་བོ་ཡིན་སྟབས། བོད་ཀྱི་ཆོས་དང་རིག་གཞུང་འདིས་རྒྱ་ནག་མིང་མང་དུང་ཕྱུར་བཅུ་གྲངས་ལ་ཏན་ཏན་ཕན་ཐོགས་ཡོད་པ་ཞིག་ཆགས་ཀྱི་ཡོད། བར་སྐབས་ངོས་ཀྱིས་རྒྱ་རིགས་གྲོགས་པོ་དེ་འདྲ་ཐུག་སྐབས་ཁ་ཤས་ཀྱིས་འདི་འདྲ་བརྗོད་ཀྱི་འདུག འདས་པའི་ལོ་དྲུག་ཅུའི་རིང་རྒྱ་ནག་ལ་ལོ་སྟོང་ཕྲག་རིང་གི་ཡ་རབས་དང་བཟང་སྤྱོད་ཀྱི་གོམས་གཤིས་དང་ལྟ་སྤྱོད་ཡོད་པ་དེ་དག་བར་སྐབས་གཏོར་བཤིག་དང་ཉམས་ཆག་ཕྱིན་པ་རེད། ད་ལྟ་རྒྱ་ནག་མི་མང་ནང་དངུལ་ཁོ་ན་མ་གཏོགས་བསམ་བློ་གཏོང་རྒྱུ་མེད་པ་ལྟར་གྱུར་ཏེ་ལོ་སྟོང་ཕྲག་རིང་ལ་ཡོད་པའི་གོམས་གཤིས་བཟང་པོ་དེ་མེད་པ་ཆགས། གོམས་གཤིས་དང་ལམ་སྲོལ་གསར་པ་ཞིག་ཀྱང་མ་རག་པའི་དབང་གིས་དཀའ་ངལ་མང་དག་ཅིག་འཕྲད་བཞིན་འདུག དེ་ལྟ་བུའི་དཀའ་ངལ་དེ་བོད་ཀྱི་ཆོས་དང་རིག་གཞུང་ཐོག་ནས་སེལ་ཐུབ་རྒྱུའི་རེ་བ་རྒྱག་གི་ཡོད། མ་འོངས་པར་རྒྱ་ནག་མི་མང་དུང་ཕྱུར་མང་པོ་ཡོད་པ་དེ་དག་ལ་ཡ་རབས་བཟང་པོའི་ལྟ་སྤྱོད་ཅིག་བོད་ནས་མར་བསླབ་ཐུབ་རྒྱུའི་རེ་བ་ཡོད་ཅེས་དེ་འདྲ་བརྗོད་ཀྱི་འདུག དེར་བརྟེན་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་དང་མི་ཉམས་གོང་སྤེལ་ཡོང་རྒྱུར་ང་ཚོས་ལས་འགུལ་བྱེད་རྒྱུ་དེར་རྒྱ་རིགས་གྲོགས་པོ་མང་པོ་ཞིག་གིས་རྒྱུ་མཚན་དེ་འདྲའི་ཐོག་ནས་རྒྱབ་སྐྱོར་དང་ཚ་ཤ་བྱེད་ཀྱི་ཡོད།
དེ་འདྲ་ཡིན་དུས་དེ་རིང་འདིར་མང་ཚོགས་ཚང་མ་ཡོད་སར་འདིར་རྒྱ་རིགས་གྲོགས་པོ་ཁྱེད་རང་ཚོར་ཐུགས་རྗེ་ཆེ་ཟེར་གྱི་ཡིན། དེ་བཞིན་འདིར་ཉི་ཧོང་གི་གྲོགས་པོ་ཚོགས་ཁག་གཅིག་དང་རུ་སུའི་ཁོངས་ནས་ཀལ་མུཀ་གི་གྲོགས་པོ་ཚོགས་ཁག་གཅིག་ཕེབས་ཡོད། ཀལ་མུཀ་ཁྱེད་རང་ཚོར་ཆ་བཞག་ན། བོད་ཀྱི་ཆོས་དང་རིག་གཞུང་ཀལ་མུཀ་གིས་མཚོན་པའི་ཨུ་རུ་སུའི་ཁོངས་ཀྱི་ས་ཁུལ་ཁག་གཅིག་ལ་ཧ་ལམ་ལོ་དྲུག་བརྒྱ་བདུན་བརྒྱའི་གོང་ནས་བོད་ཡིག་ཐོག་ནས་ནང་ཆོས་བསླབ་རྒྱུ་དང་བོད་ཡིག་ཐོག་ནས་རིག་གནས་ཆེ་བ་ལྔའི་གྲས་གསོ་བ་རིག་པ་དང་སྒྲ་རིག་པ། ཚད་མ་རིག་པ་དེ་ཚོའི་གྲས་བསླབ་རྒྱུ་ཕལ་ཆེར་གཅིག་གྱུར་ཆགས་ཀྱི་ཡོད། བར་སྐབས་ཧ་ཅང་ཉམས་ཆག་ཕྱིན་པའི་དབང་གིས་ཉེ་ཆར་ཨུ་རུ་སུའི་སྲིད་གཞུང་ནས་ཨུ་རུ་སུའི་རྒྱལ་ཁབ་ནང་ལ་སློབ་ཚན་ནང་ཆོས་ཀྱི་བསམ་པ་བཟང་པོ་དང་ཡ་རབས་བྱེད་རྒྱུའི་བསླབ་བྱ་དེ་ཚོའི་གྲས་སློབ་དེབ་ནང་བཅུག་དགོས་ཀྱི་འདུག ཅེས་དེ་འདྲའི་ཐག་གཅོད་བྱུང་ཡོད། དེར་བརྟེན་ཀལ་མུཀ་གི་ས་ཁུལ་དེར་སྔ་མོ་ནས་བོད་ཀྱི་ནང་ཆོས་བྱེད་མཁན་ནང་པ་གཅིག་གྱུར་ཡིན་སྟབས། ཁོང་ཚོའི་མངའ་སྡེའི་སློབ་གྲྭ་ཁག་གི་ནང་དུའང་ཆོས་སློབ་སྦྱོང་བྱེད་རྒྱུའི་ཐག་གཅོད་བྱས་ཏེ་ལོ་འདིའི་ནང་ནས་འགོ་འཛུགས་རྒྱུའི་གནས་ཚུལ་འདི་ལྟར་བྱུང་བ་ཡིན་ཙང་། ང་ཚོ་བོད་མི་བཙན་བྱོལ་བ་ཚོའི་སློབ་གྲྭའི་སློབ་དེབ་ནང་ནས་ནང་ཆོས་ངོ་སྤྲོད་དང་ནང་ཆོས་སློབ་སྦྱོང་བྱེད་རྒྱུའི་སྲོལ་ཞིག་ཡོད་སྟབས། དེ་ཚོའི་ཐོག་ནས་ཕར་སློབ་སྦྱོང་ལེན་རྒྱུའི་ཆེད་འདི་གར་འབྱོར་ཡོད་པ་རེད། གོང་དུ་ངོས་ཀྱི་གསུང་བཤད་ནང་ཡོད་པ་ལྟར་ང་ཚོ་བཙན་བྱོལ་བ་ཆགས་ཏེ་ལོ་ ༥༡ ཕྱིན་པའི་རྗེས་སུ་བོད་ཀྱི་ཆོས་དང་རིག་གཞུང་ལ་དོ་སྣང་བྱེད་མཁན་སྔར་ནས་བོད་ཀྱི་ནང་ཆོས་དང་འབྲེལ་བ་ཡོད་མཁན་གྱི་ཡུལ་གྲུ་ཚོས་དམིགས་བསལ་གྱི་དོ་སྣང་བྱེད་ཀྱི་ཡོད། དེ་བཞིན་ཧི་མ་ལ་ཡའི་རི་རྒྱུད་དེ་དག་གིས་བོད་ཀྱི་ཆོས་དང་རིག་གཞུང་ལ་གཞི་ནས་དོ་སྣང་གསར་པ་ཞིག་སླེབས་ཏེ། སོ་སོ་རང་ཉིད་ཀྱི་རྩ་བའི་རིག་གཞུང་གང་ཞིག་ཡིན་པ་དང་རྩ་བའི་ལོ་རྒྱུས་ཀྱི་ཐོག་ནས་འབྱུང་ཁུངས་གང་འདྲ་ཡིན་པ་དེ་དག་དྲན་གསོ་ལྟ་བུ་ཐེབས་ཏེ་དོ་སྣང་གསར་སླེབས་ཀྱི་འདུག དེ་སྔ་སངས་རྒྱས་པའི་ཆོས་མཐོང་འདོད་མེད་པའི་ཡུལ་གྲུ་ཚོ་ཡིན་ཡང་ཤེས་ཡོན་ཅན་རིགས་གཅིག་གིས་ནང་ཆོས་ཀྱི་ཐོག་ནས་རིག་གནས་གསར་པ་ཤེས་རྒྱུ་དང་ལྷག་པར་དུ་སེམས་ཁམས་རིག་པའི་སྐོར་ལ་ནང་ཆོས་ནས་ཚུར་བསླབ་རྒྱུ་ནང་པའི་གཞུང་ནས་བཤད་པའི་སེམས་ཁམས་རིག་པའི་རྣམ་གཞག་དང་དེང་སང་གི་དུས་རབས་གསར་པའི་ཚན་རིག་གི་སེམས་ཀྱི་རྣམ་གཞག་དང་ཀླད་རྩའི་རྣམ་གཞག་དེ་ཚོའི་གྲས་ཏེ་གོ་བསྡུར་བྱས་ནས་ཕན་ཚུན་ཉམས་མྱོང་སྤེལ་བའི་ཐོག་ནས་མིའི་ཤེས་ཡོན་ཡར་རྒྱས་གཏོང་རྒྱུ་དང་། ལྷག་པར་དུ་མིའི་སེམས་ཀྱི་དཀའ་ངལ་སེལ་ཐབས་ལ་འབད་བརྩོན་གསར་པ་བྱེད་དགོས་ཀྱི་ཡོད། ཕྱོགས་གཅིག་ནས་ང་ཚོ་བཙན་བྱོལ་བ་ཆགས་ཏེ་སོ་སོ་རང་འགོ་མ་ཐོན་པ་ལྟ་བུ་རེད། ལྷག་པར་དུ་བོད་ཀྱི་བདེན་དོན་ཐོག་ལ་ཧ་ལས་པའི་སེམས་ཁུར་ཞིག་ང་ཚོར་སླེབས་ཀྱི་ཡོད་ལ་འགན་ཡང་ཆེན་པོ་སླེབས་ཀྱི་ཡོད། གཞིས་ལུས་རྒྱ་ཆེའི་མི་མང་གིས་རེ་བ་མིག་འབུར་ང་ཚོར་བལྟས་བསྡད་ཡོད། དེར་བརྟེན་ང་ཚོར་འགན་ཞིག་ཡོད། ཡང་ཕྱོགས་གཅིག་ནས་ང་ཚོའི་ཆོས་དང་རིག་གཞུང་འདིས་མིའི་སྤྱོད་བཟང་དང་ཡ་རབས་ཀྱི་སྤོབས་པ་དེ་དག་ལ་ང་ཚོར་གོ་སྐབས་དང་དུས་ཚོད་གསར་པ་ཞིག་གི་སྒང་ནས་དེ་དག་ལ་འབྲེལ་བ་བྱས་ཏེ་ཕན་ཐོགས་བྱེད་ཐུབ་རྒྱུའི་གོ་སྐབས་ཤིག་འདུག ངོས་ཀྱིས་རྟག་པར་དྲན་གྱི་ཡོད། དཔེར་ན། ངོས་ལ་ཆ་བཞག་ན། རྩེ་ཕོ་བྲང་པོ་ཏཱ་ལར་ད་ལྟ་བསྡད་ཡོད་ན། བཞུགས་ཁྲི་དེའི་སྒང་ལ་བསྡད་བོད་ཇ་བཏུངས་ཏེ་རྫིག་པོ་བྱས་ནས་ཕལ་ཆེར་དེ་འདྲ་བྱས་ནས་བསྡད་ཡོད་པ་རེད། ང་ཚོ་བཙན་བྱོལ་བ་ཆགས་པའི་ཐུགས་རྗེས་བཀའ་དྲིན་ལ་བརྟེན་ནས་འཛམ་གླིང་འདིའི་སྟེང་ངོ་ཤེས་མང་པོ་ཆགས་པ་མ་ཟད། བོད་ཀྱི་ཆོས་དང་རིག་གཞུང་གི་རིན་ཐང་ག་ཚོད་ཡོད་པ་དེ་ཡང་འཛམ་གླིང་འདིའི་ཐོག་མཐོང་ཐུབ་པ་ཞིག་ཆགས། དེ་ལྟ་བུའི་རྐྱེན་ངན་གྲོགས་སུ་ཤར་གྱི་ཕན་ཐོགས་བྱུང་འདུག དེར་བརྟེན་ང་ཚོ་འདི་གར་ལོ་ ༥༡ ཕྱིན་པར་སེམས་སྐྱོ་པོ་ཞིག་རེད། འོན་ཀྱང་དོན་གོ་ཆོད་ཡོད་གཙོ་ཆེ་ཤོས་བོད་ནང་ང་རང་ཚོའི་དངོས་གནས་འཛམ་གླིང་གི་གཅེས་ནོར་ལྟ་བུ་ཤོད་ཐུབ་རྒྱུའི་ཆོས་དང་རིག་གཞུང་ཟབ་པོ་ཞིག་ཡོད་པ་འདི་བོད་ནང་ལ་ཉམས་པ་སོར་ཆུད་ཡག་པོ་ཞིག་བྱེད་ཐུབ་པ་བྱུང་ན། རྒྱ་ནག་རྒྱལ་ཁབ་ལོ་རྒྱུས་ཐོག་ནས་ཧ་ལམ་ནང་པའི་རྒྱལ་ཁབ་རེད།རྒྱ་ནག་ནང་ལྟོས་དང་ནང་པའི་ལྷ་ཁང་ག་ཚོད་མང་པོ་འདུག ལྷག་པར་དུ་རྗེ་བཙུན་འཇམ་དཔལ་དབྱངས་ཀྱི་གནས་རྩ་ཆེན་པོ་བརྩི་རྒྱུའི་རི་བོ་རྩེ་ལྔ་དེ་ཡང་བོད་ལ་མེད་པར་རྒྱ་ནག་ལ་ཡོད། དེ་བཞིན་རི་བོ་ཏཱ་ལ་ཞེས་སྤྱན་རས་གཟིགས་ཀྱི་གནས་རྩ་ཆེན་ཆེན་པོ་བརྩིས་ཀྱི་ཡོད་པ་དེ་ཡང་རྒྱ་ནག་ལ་ཡོད། གང་ལྟར་ལོ་རྒྱུས་ཐོག་ནས་རྒྱ་ནག་ནང་ལ་ནང་ཆོས་ཧ་ཅང་དར་ཡོད། ནམ་རྒྱུན་རྒྱ་རིགས་ཆོས་གྲོགས་ཚོ་ཐུག་སྐབས་ངོས་ཀྱིས་རྟག་པར་ཁྱེད་རང་ཚོ་བཅོམ་ལྡན་འདས་ཀྱི་དགེ་ཕྲུག་རྒན་པ་དང་ང་ཚོ་གཞོན་པ་རེད། དེར་བརྟེན་དགེ་ཕྲུག་གཞོན་པས་རྒན་པར་གུས་འདུད་བྱེད་རྒྱུ་དེ་ཡ་རབས་ཀྱི་སྤྱོད་བཟང་གི་འགྲོ་ལུགས་ཤིག་རེད། ཅེས་ངོས་ཀྱིས་རྟག་པར་དུ་གུས་འདུད་བྱེད་ཀྱི་ཡོད། གུས་འདུད་བྱས་པ་དང་ཆབས་ཅིག་རྩེད་མོ་རྩེས་ཏེ་འོན་ཀྱང་ནང་པ་སངས་རྒྱས་པའི་ཆོས་ཀྱི་ཤེས་ཚད་ཐོག་ཆ་བཞག་ན། དགེ་ཕྲུག་གཞོན་པ་ཚོ་སྐྱོ་ཡོད་པ་མ་རེད། ཅེས་བརྗོད་ཀྱི་ཡོད། གང་ལྟར་ང་ཚོ་ཆབ་སྲིད་རྐྱང་པའི་ཐོག་ལ་བསམ་བློ་བཏང་ནས་སྡོད་རྒྱུ་མི་འདུག ང་ཚོ་བོད་ཀྱི་འཐབ་རྩོད་འདི་ཆབ་སྲིད་རྐྱང་པ་ཞིག་མིན་པར་སངས་རྒྱས་པའི་བསྟན་པ་དང་འབྲེལ་བའི་འཐབ་རྩོད་ཅིག་ཆགས་ཡོད།
སངས་རྒྱས་ཀྱི་བསྟན་པ་དང་འབྲེལ་བ་དེ་ཡང་བོད་གཅིག་པུའི་སྐད་ཆ་མིན། བོད་ས་མཐོའི་སྒང་དེ་ནས་ཆུ་བོ་ས་ཁུལ་མང་པོར་ཁྱབ་པ་ལྟར་བོད་ས་མཐོའི་སྒང་གི་སངས་རྒྱས་ཀྱི་བསྟན་པ་འདི་དེའི་གཡས་གཡོན་གྱི་ཡུལ་གྲུ་མང་པོ་ཞིག་ལ་འབྲེལ་བ་ཡོད་པ་དང་ཕན་ཐོགས་ཡོད་པ་ཞིག་ཆགས་ཡོད། དེར་བརྟེན་ང་ཚོ་ཚང་མའི་བསམ་བློ་རྒྱ་ཆེ་ས་དང་མིག་རྒྱང་རིང་ས་ཤིག་ནས་བསམ་བློ་བཏང་ན། ང་ཚོ་ཚང་མས་སེམས་ནང་སོ་སོས་གྲ་སྒྲིག་བྱེད་རྒྱུ་དང་ཞུམ་པ་མི་ཡོང་རྒྱུ། དེ་བཞིན་སེམས་ནང་སྙིང་སྟོབས་གོང་ནས་གོང་དུ་འཕེལ་རྒྱུ། ང་ཚོར་རྐྱེན་ངན་བྱུང་ཡང་གོ་ཆོད་སོང་བསམ་པ་ཞིག་ནང་བསམ་བློའི་ནང་བྱུང་བ་ཡིན་ན་ཕན་གྱི་རེད། གཞན་ཡིད་མུག་སྟེ་བསྡད་པ་ཡིན་ན་ཆོ་ཁྱོན་ནས་མེད། དེ་འདྲ་ཡིན་བཀྲ་ཤིས་བདེ་ལེགས། ཞེས་བཀའ་སློབ་ཟབ་མོ་ཕེབས་ཡོད། དེ་ནས་བོད་གཞུང་ཟློས་གར་ཚོགས་པས་གསུམ་བཅུའི་དྲན་གླུ་བཏང་རྗེས་གཞུང་འབྲེལ་གྱི་མཛད་སྒོ་དངོས་གཞི་ལེགས་པར་གྲུབ། དེ་རྗེས་ཕྱི་རྒྱལ་ཡུལ་ཁག་ནས་ཕེབས་པའི་མི་རིགས་དང་རང་རིགས་སེར་སྐྱ་མང་ཚོགས། དེ་བཞིན་ཉེ་འཁོར་སློབ་གྲྭ་ཁག་གི་སློབ་ཕྲུག་སྟོང་ཕྲག་མང་པོས་ལག་ཏུ་བོད་རྒྱལ་ཁབ་ཆེན་པོའི་རྒྱལ་དར་སོགས་འཁྱེར་ཏེ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་ནས་རྡ་ཤོད་ཁྲིམས་ཁང་བར་ཞི་བའི་སྐད་འབོད་ཤུགས་ཆེ་བྱས་ཡོད་པ་རེད།།
