༢༠༡༠ ཕྱི་ཟླ་ ༣ ཚེས་ ༡༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༡༡ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ཕྱི་དྲིལ་ལྷག་པ་ཚེ་རིང་ཚོགས་ཁང་ནང་ཡུ་རོབ་དཔལ་འབྱོར་དང་སྤྱི་ཚོགས་ལྷན་ཁང་ (European Economic and social Committee) གི་འཐུས་མི་གསུམ་གྱིས་གསར་འགོད་གསལ་བསྒྲགས་ཤིག་སྤེལ་ཡོད། སྐབས་དེར་ཐོག་མར་ཨོ་སི་ཏྲི་ཡ་ (Austria) ནས་ཡིན་པ་འཐུས་མི་ལྕམ་ཨན་ནེ་མ་རི་ཡ་ (Anne-Marie Sigmund) ལགས་ཀྱིས་འཐུས་མི་སོ་སོ་ངོ་སྤྲོད་དང་སྦྲགས་ཡུ་རོབ་དཔལ་འབྱོར་དང་སྤྱི་ཚོགས་ལྷན་ཁང་དང་ལྷན་ཁང་དེའི་ལས་གཞི་ཇི་ཡིན་ངོ་སྤྲོད་མདོར་བསྡུས་ཤིག་གནང་དོན། ང་ཚོའི་ཚོགས་པའི་ནང་རྒྱལ་ཁབ་འདྲ་མིན་ ༢༧ ནས་འཐུས་མི་གྲངས་ ༣༤༤ ཙམ་ཡོད། ཚོགས་པ་དེ་དུམ་བུ་གསུམ་དུ་ཆ་བགོས་བྱས་ཡོད། ང་ཚོ་འདིར་དངོས་ཡོད་གནས་ཚུལ་ཇི་ཡིན་འཚོལ་ཞིབ་ཆེད་ཡོང་བ་ཡིན། སྔ་ལོའི་ཕྱི་ཟླ་ ༩ ནང་ཡུ་རོབ་དཔལ་འབྱོར་དང་སྤྱི་ཚོགས་ལྷན་ཁང་གི་ཚོགས་གཙོ་སྐུ་ཞབས་མ་རི་ཡོ་སེ་པི་ལགས་ཀྱིས་གཙོས་འཐུས་མི་ཁག་གཅིག་རྒྱ་ནག་གཞུང་གིས་བོད་ནང་གི་གནས་སྟངས་དེ་སྐུ་ཚབ་འཐུས་མི་ཚོས་རང་གིས་མིག་གི་དངོས་སུ་མཐོང་བ་དང་རྣ་བས་དངོས་སུ་ཐོས་དགོས་ཚུལ་གྱི་བསམ་ཚུལ་བཏོན་པ་ལྟར་བོད་དུ་ཕེབས་པ་རེད། ཚོགས་གཙོ་མ་རི་ཡོ་སེ་པི་ལགས་ཀྱིས་ཡུ་རོབ་དཔལ་འབྱོར་དང་སྤྱི་ཚོགས་ལྷན་ཁང་གི་བོད་ཀྱི་གནད་དོན་དང་འབྲེལ་བའི་ལས་གཞི་དེ་མཇུག་སྡོམ་མ་གནང་གོང་ང་ཚོ་རྡ་སར་འགྲོ་དགོས་པའི་བཀའ་མངགས་གནང་བྱུང་ཞེས་སོགས་བརྗོད་ཡོད། དེ་རྗེས་འཐུས་མི་ལྕམ་མ་ཌི་ས་ཤར་མ་ (Madi Sharma) ལགས་ཀྱིས་མ་འོངས་བོད་ཀྱི་སྤྱི་ཚོགས་ནང་གཞོན་སྐྱེས་ཚོར་ཚོང་ལས་དང་འབྲེལ་བའི་ཁོ་མོ་རང་ཉིད་ཀྱི་རྒྱབ་ལྗོངས་ཤེས་ཡོན་གྱི་ཉམས་མྱོང་གཞིར་བཞག་ཐོག་རོགས་རམ་གནང་རྒྱུའི་ལས་གཞི་གང་ཡིན་ངོ་སྤྲོད་མདོར་ཙམ་གནང་བ་དང་། ལྷག་པར་བོད་ཀྱི་བུད་མེད་ཚོར་སྤྱི་ཚོགས་ནང་འགན་ཁྲིད་ཡོད་པའི་མི་རབས་གསར་པ་ཞིག་བསྐྲུན་སླད་ལས་རིགས་འདྲ་མིན་ཐོག་སྦྱོང་བརྡར་སྤྲོད་རྒྱུའི་འཆར་གཞི་ཡོད་པ་རྣམས་གསལ་བཤད་ཞུས་ཡོད། དེ་རྗེས་འཐུས་མི་སྐུ་ཞབས་ཧེན་རི་ (Henry) ལགས་ཀྱིས་རྡ་སར་སླེབས་རྗེས་རང་གི་མྱོང་ཚོར་ཇི་བྱུང་དང་འདིར་ཡོང་དགོས་དོན་གཙོ་བོ་དེ་བཙན་བྱོལ་བོད་མིའི་སྤྱི་ཚོགས་ནང་སྤྱི་ཚོགས་དང་དཔལ་འབྱོར་གྱི་འཛུགས་སྐྲུན་དང་འབྲེལ་བའི་ཡར་རྒྱས་ཇི་འདྲ་གཏོང་འཆར་ཡོད་པ་རྣམས་གསལ་བཤད་གནང་གྲུབ་མཚམས་གསར་འགོད་པ་ཁག་གཅིག་ལ་དྲི་བར་ལན་འདེབས་ཀྱི་གོ་སྐབས་ཀྱང་གནང་ཡོད། ཡུ་རོབ་དཔལ་འབྱོར་དང་སྤྱི་ཚོགས་ལྷན་ཁང་གི་འཐུས་མི་གསུམ་པོ་ཕྱི་ཚེས་ ༩ ཉིན་༸གོང་ས་སྐྱབས་མགོན་ཆེན་པོ་མཆོག་མཇལ་བཅར་ཞུས་ཡོད་པ་དང་གསུམ་བཅུའི་དུས་དྲན་གྱི་མཛད་སྒོར་མཉམ་ཞུགས་གནང་ཡོད་པ་རེད།
