༢༠༡༠ ཕྱི་ཟླ་ ༣ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༢༠ ཉིན་རྒྱབ་ཆུ་ཚོད་ ༡།༣༠ ཐོག་བོད་གཞུང་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་སྐབས་ ༡༤ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་དགུ་པ་མཇུག་སྒྲིལ་དང་སྟབས་བསྟུན་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། ཚོགས་གཞོན་རྒྱ་རི་སྒྲོལ་མ་མཆོག་རྣམ་གཉིས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་གྲོས་ཚོགས་ཚོགས་དུས་དགུ་པར་སྩལ་བའི་གསུང་འཕྲིན་དང་། གྲོས་གཞི་གྲོས་ཆོད་ཇི་ལྟར་བྱུང་བའི་སྐོར་ལ་ཚོགས་གཙོ་མཆོག་གིས་གསར་འགོད་གསལ་བསྒྲགས་གནང་དོན། འདི་གར་ཕེབས་པ་ཚང་མར་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་དམིགས་སུ་བཀར་ནས་བོད་མི་མང་སྤྱི་འཐུས་ལྷན་ཚོགས་ངོས་ནས་གསར་འགོད་གསལ་བསྒྲགས་སྤེལ་དགོས་དོན་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་ ༡༤ པའི་བོད་མི་མང་སྤྱི་འཐུས་ལྷན་ཚོགས་གྲོས་ཚོགས་ཚོགས་དུས་དགུ་པའི་ཐོག་གསུང་འཕྲིན་ཕེབས་པའི་ནང་མང་ཚོགས་ལའང་ཕྱི་གསལ་ནང་གསལ་བཟོ་དགོས་པའི་བཀའ་སློབ་ཕེབས་པར་བརྟེན། ཁ་སང་ང་ཚོ་ཚོགས་ཆུང་གཉིས་ཆ་བགོས་བྱས་ཏེ་ཚོགས་པ་བཞིན་ཚོགས་ཆུང་གཅིག་ནས་དེ་རིང་ཐག་གཅོད་བྱུང་བ་དེ་གསར་འགོད་གསལ་བསྒྲགས་གནང་རོགས་ཞེས་བརྗོད་ལྟར་བྱས་པ་རེད། ད་རེས་རྩ་བའི་གནས་ཚུལ་དེ་གསལ་པོ་ཆགས་པ་ཡིན་དུས་མང་ཚོགས་ནས་མཁྱེན་དགོས་པའི་གནད་འགག་ཆེན་པོར་བརྩིས་ཀྱི་ཡོད། གསུང་འཕྲིན་རིན་པོ་ཆེ་སྔོན་ནས་རྒྱང་སྲིང་གྲུབ་ཟིན་པར་བརྟེན། རྣམ་པ་ཚོས་མཁྱེན་དགོས་པ་ཞིག་ནི་འདས་པའི་ལོ་ལྔ་བཅུའི་ནང་ང་ཚོས་མང་གཙོའི་འཕེལ་རིམ་གྱི་གོམ་པ་བརྒྱབ་ཐུབ་ཡོད་པར་༸གོང་ས་མཆོག་གིས་དགའ་སྤོབས་ཡོད་ཅེས་གསུང་འཕྲིན་ནང་ཕེབས་ཡོད།
དེ་བཞིན་སྤྱི་འཐུས་རྣམ་པ་ཚོའི་ཕྱག་ལས་གནང་སྟངས་དང་རྣམ་དཔྱོད་སྟོན་སྟངས་དེ་ཚོའི་ཐོག་ནས་རྟོན་བཞིའི་འཇུག་ལྡོག་མ་ནོར་བར་སྒེར་གྱི་དོན་དུ་རྩོད་པ་དང་ཕྱོགས་འཐེན་སྤངས་ཏེ་གྲོས་ཚོགས་ལས་དོན་གནས་ཚད་དང་སྤུས་ཚད་གོང་མཐོར་གཏོང་དགོས་རྒྱུར་སོགས་ཀྱི་བཀའ་ཕེབས་པར་བརྟེན། དེ་དང་འབྲེལ་བའི་ད་རེས་ང་ཚོས་གྲོས་ཚོགས་ནང་སྤྱི་མོས་ཀྱི་གྲོས་ཆོད་བཞག་པ་དེ་གྲོས་ཚོགས་ཀྱི་གནས་ཚད་དང་སྤུས་ཚད་གོང་སྤེལ་ཆེད་ནུས་པ་སྤངས་པའི་ཐོག་ནས་མ་འོངས་པར་འབད་འབུངས་བྱེད་རྒྱུ་དང་། ང་ཚོ་སྤྱི་འཐུས་ཚོའི་ངོས་ནས་ནུས་པ་མ་འདང་པའི་དབང་གིས་རྟོན་བཞིའི་འཇུག་ལྡོག་ནོར་བའི་གནས་ཚུལ་བྱུང་བ་དེ་དག ༸གོང་ས་༸སྐྱབས་མགོན་ཆེན་པོ་མཆོག་ལ་བཟོད་གསོལ་ཞུ་བ་དང་སྦྲགས་མཐོལ་བཤགས་ཞུ་གི་ཡོད། ད་རེས་ང་ཚོས་སྒེར་འཁོན་ཕྱོགས་ལྷུང་རིགས་སྤངས་ཏེ་མང་ཚོགས་ལ་འགན་འཁུར་བའི་ཐོག་ནས་སྤང་བླང་ཞུ་གི་ཡིན་ཞེས་དམ་བཅའི་གྲོས་ཆོད་དེ་དག་བཞག་ཡོད། དེ་བཞིན་ཕྱི་ལོ་ ༢༠༠༨ ལོར་སྐུ་ཚབ་རྣམ་གཉིས་ཀྱི་རྒྱ་ནག་འགོ་ཁྲིད་དང་མཇལ་སྐབས་སྤྲད་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་བསམ་འཆར་གྱི་ཡིག་ཆ་དང་། བོད་རྒྱ་འབྲེལ་མོལ་ཐེངས་དགུ་པའི་སྐབས་སྤྲད་པའི་འགྲེལ་བརྗོད་ཡིག་ཆ་དེ་དག་གྲོས་ཚོགས་ཀྱི་མོས་མཐུན་མེད་པ་དང་གྲོས་ཚོགས་ལ་མ་བསྟན་པའི་ཡིག་ཆ་ཡིན་སྐོར་གྲོས་ཚོགས་དང་སྤྱི་ཚོགས་མི་མང་ཁྲོད་སྐད་ཆ་ཡོང་གི་འདུག དབུ་མའི་ལམ་གྱི་བཞེངས་ཕྱོགས་དེའི་ཐོག་ནས་བསམ་འཆར་དང་འགྲེལ་བརྗོད་ཀྱི་ཡིག་ཆ་དེ་དག་༸གོང་ས་མཆོག་གི་དགོངས་གཞི་ཡིན་མིན་གྱི་དོགས་པ་མང་པོ་ཞིག་བསླངས་པའི་གནས་ཚུལ་དེ་དག་རྩ་དོན་དང་འབྲེལ་བ་ཆགས་པ་ཡིན་དུས་ཕྱི་གསལ་ནང་གསལ་ཡོང་ཆེད། ད་རེས་གྲོས་ཚོགས་ཀྱི་འཐུས་མི་དང་བཀའ་ཤག ལྷག་པར་༸གོང་ས་མཆོག་གི་དམིགས་བསལ་སྐུ་ཚབ་རྣམ་གཉིས་དང་དེ་བཞིན་འབྲེལ་ཡོད་བཀའ་ཟུར་བཅུ་ཙམ་ཆེད་འབོད་བྱས་ཏེ་གནས་ཚུལ་དེ་རྣམས་གསལ་པོ་དང་འཁྲུན་ཐག་ཆོད་པ་ཞིག་བཟོ་སླད་བགྲོ་གླེང་གི་དོགས་འདྲི་དང་ཉན་ཞིབ་མཐིལ་ཕྱིན་ཉིན་གཅིག་ལྷག་གནང་སྟེ་འཛིན་སྐྱོང་བཀའ་ཤག་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ཡིན་པའི་ར་འཕྲོད་དང་། འཐུས་མི་ཚོའི་དགོངས་འཆར་གསུངས་པ་དེར་ལན་འདེབས་ཁ་གསལ་བསྐྱོན་ཏེ་མཐའ་བསྡོམས་སུ་བཀའ་ཤག་ངོས་ནས་གྲོས་ཆོད་ངོ་བོ་གང་འདྲ་ཞིག་བཞག་དགོས་ཀྱི་ཡོད་མེད་བསམ་ཚུལ་ཡང་སྟོན་གནང་ཡོད། སོགས་དང་། ཡང་ཁོང་གིས་གསུང་དོན། དེ་བཞིན་བོད་ནང་གི་བོད་མི་ཚོར་ང་ཚོ་འདིར་༸རྒྱལ་བ་རིན་པོ་ཆེའི་ཐུགས་རྗེའི་བཀའ་དྲིན་འོག་མང་གཙོའི་ལམ་སྲོལ་གསར་གཏོད་འོག་བསམ་ཚུལ་འདྲ་མིན་བྱུང་བ་དེས་གཅིག་སྒྲིལ་དང་ནུས་པ་མཉམ་སྤངས་མེད་པ་བཙན་བྱོལ་སྤྱི་ཚོགས་འདི་ཁ་འཐོར་རྩ་བ་ནས་ཆགས་མེད། ༸གོང་ས་མཆོག་གི་གསུང་འཕྲིན་ཕེབས་པའི་སྟེང་གྲོས་ཆོད་གྲོས་འཆར་འཇོག་རྒྱུའི་ཐད་དགག་བྱ་མེད་པ་སྤྱི་མོས་ཐོག་ནས་བློ་སེམས་སྒྲིལ་ཏེ་གཏན་འབེབས་བྱུང་ཡོད། བོད་ནང་གི་བོད་མི་ཚོར་གསལ་པོ་མཁྱེན་རྟོགས་ཆེད་ད་རེས་གསལ་འགྱུར་བརྒྱུད་ལམ་དེ་དག་བརྒྱུད་ནས་ཞུ་གི་ཡོད། ཅེས་སོགས་ཀྱི་གསར་འགོད་གསལ་བསྒྲགས་གནང་ཡོད།
