༢༠༡༠ ཕྱི་ཟླ་ ༣ ཚེས་ ༡༦ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༡༦ ཉིན་བོད་གཞུང་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་ནས་རང་གི་མི་ཚེའི་ལོ་རྒྱུས་དང་འབྲེལ་བའི་རྒྱལ་སྤྱིའི་གར་སྟེགས་སྟེང་བོད་དོན་དྲིལ་བསྒྲགས་ཀྱི་དར་ཆ་མཐོན་པོར་བསྒྲེངས་པའི་གནད་དོན་རྣམས་ཕྱོགས་སྒྲིག་བྱས་པའི་ཡུལ་གྱར་དང་ངའི་མི་ཚེ་ཞེས་པའི་དེབ་དེ་དབུ་འབྱེད་གནང་བ། དེ་ཡང་གོང་ཚེས་ཉིན་གྱི་སྔ་དྲོ་ ༩།༠༠ ཐོག་སྐུ་མགྲོན་གཙོ་བོ་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་དང་། དྲུང་ཆེ་བསྟན་འཛིན་ཕུན་ཚོགས་ཨ་ཏི་ཤ་ལགས། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་འགན་འཛིན་དང་སྐུ་ཚབ། གསར་འགོད་པ་བཅས་ལྷན་འཛོམས་ཀྱིས་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་ཕུལ་བ་དང་། དེ་ནས་དཔེ་དེབ་རྩོམ་པ་པོ་དགའ་ལྡན་གྲྭ་བག་གྲོ་ལགས་ཀྱིས་དེབ་འདི་བཏོན་དགོས་པའི་དམིགས་ཡུལ་ཐོག་གསུང་བཤད་གནང་དོན། ཕྲན་རང་ཡུལ་གྱར་བའི་འཚོ་བའི་ཁྲོད་ལོ་ངོ་ཉི་ཤུ་ཙམ་རིང་བོད་ནང་གི་ཆབ་སྲིད་བཙོན་པ་མང་པོའི་ཕུགས་འདུན་དང་རེ་སྐུལ་ལྟར། རྡ་སར་གནས་སྡོད་བྱས་ཏེ་རྒྱལ་སྤྱིའི་སྡིངས་ཆ་འདྲ་མིན་སྟེང་བོད་ཀྱི་གནད་དོན་དྲིལ་བསྒྲགས་ཀྱིས་མཚོན་བོད་ནང་བཞུགས་པའི་འཐབ་གྲོགས་རྣམ་པའི་རེ་བ་ཆུད་ཟོས་སུ་མ་བཏང་བར་ད་བར་རྒྱུན་འཁྱོང་བྱས་དང་བྱེད་མུས་ཡིན། དེང་སྐབས་བོད་འདི་ཤི་གསོན་གྱི་འགག་རྩའི་དུས་མཚམས་ལ་སླེབས་ཡོད། ང་ཚོའི་འདས་པའི་ལོ་རྒྱུས་ལ་ཕྱིར་མིག་ལྟ་སྐབས། བཙན་བྱོལ་སྤྱི་ཚོགས་ནང་ཚོགས་པ་དང་མི་སྒེར་པ་སོགས་ཀྱི་ལས་རིགས་མང་པོའི་ནང་ནོར་འཁྲུལ་ཡོང་གི་ཡོད་ཀྱང་། མ་འོངས་པར་ལས་དོན་འདི་རིགས་ལ་ལས་ཀྱི་སྣེ་མོ་བ་ཚོས་ལམ་སྟོན་གྱི་ཡོ་བསྲང་གནང་སྟེེ། བོད་མི་རིགས་ཀྱི་རྩ་དོན་སྒྲུབ་ཆེད་ཁ་ཞེ་མེད་གཉིས་བྱ་རྒྱུ་ནི་ང་ཚོར་འཁྲི་པའི་དོར་དུ་མེད་པའི་འོས་འགན་ཞིག་ཡིན། གལ་ཏེ་བོད་མི་རིགས་འདི་རྒྱུན་གནས་ཐུབ་པ་དང་དཀའ་ངལ་སེལ་དགོས་ན། ཕ་མ་དང་དགེ་རྒན་རྣམས་ཀྱིས་བུ་ཕྲུག་ཚོའི་སློབ་སྦྱོང་ལ་ཤུགས་སྣོན་རྒྱག་དགོས་པའི་སྐུལ་ལྕག་གཏོང་དགོས་པ་མ་ཟད། མི་རིགས་རང་གི་ཐུན་མོང་མ་ཡིན་པའི་བཟང་སྤྱོད་ལ་རྒྱུན་གོམས་བྱེད་དགོས་པའི་བསླབ་བྱ་ནན་པོ་གནང་རོགས་ཞེས་དེ་རིང་འདིར་འབོད་སྐུལ་ཞུ་རྒྱུ་ཡིན། ཞེས་གསུང་བཤད་གནང་ཡོད། དེ་རྗེས་སྐུ་མགྲོན་གཙོ་བོ་ཕྱི་དྲིལ་བཀའ་བློན་མཆོག་གིས་དཔེ་དེབ་དབུ་འབྱེད་གནང་བ་དང་འབྲེལ་གསུང་བཤད་གནང་དོན། དེ་རིང་འདི་གར་ཕེབས་པའི་རྣམ་པ་ཚོ་ཚང་མར་བཀྲ་ཤིས་བདེ་ལེགས་ཞུ་རྒྱུ་ཡིན། སྐུ་ཞབས་བག་གྲོ་ལགས་ལ་ཆ་མཚོན་ན། ང་རང་ལོན་ཌོན་དོན་གཅོད་ཡིན་སྐབས་ནས་ཡུ་རོབ་རྒྱལ་ཁབ་མང་པོར་བོད་དོན་དྲིལ་བསྒྲགས་གནང་བར་ཕེབས་མྱོང་ཡོད། བོད་འདི་རྒྱ་མིས་བཙན་འཛུལ་བྱས་པས་ནས་བཟུང་། བོད་ཕྱི་ནང་གང་དུ་ཡིན་ནའང་དཀའ་ངལ་རབ་དང་རིམ་པ་འཕྲད་དང་འཕྲད་མུས་ཀྱི་གནས་ཚུལ་ཞིག་ཆགས་ཡོད། སྐུ་ཞབས་བག་གྲོ་ལགས་ལ་ཆ་བཞག་ན། བོད་རྒྱལ་ཁབ་དང་མི་རིགས་ཀྱི་ཆེད་དུ་རང་སྲོག་ཚུན་ཆད་བློ་གཏོང་གིས་རྒྱ་གཞུང་ནས་བོད་ལ་འཛིན་པའི་གཡོན་ཐལ་ཆེ་བའི་སྲིད་བྱུས་ལ་ཞི་རྒོལ་བྱས་པར་བརྟེན། རྒྱ་གཞུང་གིས་གདུག་རྩབ་དྲག་པོའི་མི་སྤྱོད་ལས་འདས་པའི་བཙོན་ཁང་ནང་བཞུགས་མྱོང་ཡོད་པ་ཞིག་ཡིན། ད་ཆ་ཁོང་རང་དབང་ལུང་པར་སླེབས་ཡོད་ཀྱང་སོ་སོ་སྒེར་གྱི་བདེ་དོན་ལ་མ་གཟིགས་པར་གཞིས་ལུས་བོད་མི་མང་གི་ཆེད་ལོ་ནས་ལོ་བསྟུད་དེ་བོད་དོན་དྲིལ་བསྒྲགས་ཀྱིས་ཕྱག་དེབ་མང་པོ་རྩོམ་གནང་ཡོད། དེ་བཞིན་བོད་པ་མི་རེ་ངོ་རེ་ནས་སྤྱི་དོན་ལ་འགན་ལེན་རྒྱུའི་འབོད་སྐུལ་གནང་བ་འདིར་རང་ཉིད་སྒེར་ངོས་ནས་རྒྱབ་སྐྱོར་ཞུ་གི་ཡོད། ཕྱོགས་མཚུངས་གོང་དུ་ཁོང་གིས་གསུང་པ་ལྟར་བོད་དོན་བདེན་མཐའ་སེལ་ཆེད་གཞོན་སྐྱེས་རྣམ་པས་ངེས་པར་དུ་གནའ་དེང་གི་ཤེས་ཡོན་ལ་སློབ་སྦྱོང་བྱེད་དགོས་པ་ནི་གལ་ཆེན་པོ་ཡིན། ༸གོང་ས་༸སྐྱབས་མགོན་ཆེན་པོ་མཆོག་གིས་རྟག་ཏུ་བོད་པ་མི་རེ་ངོ་རེ་ནས་ཤེས་ཡོན་ཐོག་སྦྱང་བརྩོན་བྱེད་དགོས་པའི་བཀའ་སློབ་རབ་དང་རིམ་པ་ཕེབས་ཡོད། ངས་དེ་རིང་གི་གོ་སྐབས་འདི་བརྒྱུད་དེ་གཞོན་སྐྱེས་ཚོས་ཤེས་ཡོན་ཐོག་ཐུགས་འཁུར་ཆེ་བཞེས་གནང་རྒྱུའི་རེ་བ་ཞུ་གི་ཡོད། ཅེས་གསུངས་ཏེ་སྐུ་ཞབས་བག་གྲོ་ལགས་སུ་བསྔགས་བརྗོད་ཀྱི་མཇལ་དར་ཞིག་གནང་གྲུབ་མཚམས་དཔེ་དེབ་ཞུ་སྒྲིག་གནང་མཁན་ཚོར་ཐུགས་རྗེ་ལེགས་འབུལ་གནང་རྗེས་གཙང་ཕྲུག་སྟོབས་ལགས་ནས་ཐུགས་རྗེ་ཆེ་ཞུ་རྒྱུའི་གཏམ་བཤད་གནང་སྟེ་དབུ་འབྱེད་མཛད་སྒོ་གྲོལ་ཏེ་དཔེ་དེབ་འགྲེམས་སྤེལ་གནང་བ་བཅས། དེབ་འདི་ནི་ཁོང་གིས་རྩོམ་སྒྲིག་གནང་བའི་དེབ་བདུན་པ་དེ་ཆགས་ཡོད།
