༢༠༡༠ ཕྱི་ཟླ་ ༣ ཚེས་ ༢༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༢༣ ཉིན་བཞུགས་སྒར་བོད་གཞུང་དབུས་སྨན་རྩིས་ཁང་གི་ཚོགས་ཁང་དུ་བོད་གཞུང་སྨན་རྩིས་ཁང་དབུ་བརྙེས་ནས་ལོ་ངོ་ཞེ་དགུ་འཁོར་བའི་དུས་ཆེན་སྲུང་བརྩི་ཞུས་པ། དེ་ཉིན་སྔ་དྲོ་ཆུ་ཚོད་ ༡༠།༣༠ ཐོག་སྐུ་མགྲོན་གཙོ་བོ་བོད་གཞུང་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་དང་། སྨན་རྩིས་ཁང་གི་འགན་འཛིན་ཟླ་བ་ལགས། སྐུའི་སྨན་ཞབས་པ་རྟ་མགྲིན་ལགས། སྨན་རྩིས་ཁང་གི་འགན་འཛིན་གཞོན་པ་སྐུའི་སྨན་ཞབས་རྣམ་རྒྱལ་ཚེ་རིང་ལགས། སྨན་པའི་ལྷན་ཚོགས་ཀྱི་འགན་འཛིན་ཚེ་རིང་ཐག་གཅོད་ལགས། དེ་བཞིན་སྐུའི་སྨན་ཞབས་རྣམས་དང། བགྲེས་ཡོལ་དུ་ཕེབས་པའི་ལས་བྱེད་རྣམ་པ། སྡེ་ཚན་ཁག་གི་འགན་འཛིན་རྣམ་པ། ལས་བྱེད་དང་སྨན་རྩིས་སློབ་གཉེར་བ་བཅས་མི་གྲངས་ ༢༠༠ བརྒལ་བ་འདུ་འཛོམས་ཀྱིས་ཐོག་མར་མཛད་སྒོ་དབུ་འཛུགས་དང་སྦྲགས་གཡུ་ཐོག་གསོལ་འདེབས་འདོན་སྐུལ་དང་འབྲེལ་གསོལ་ཇ་འབྲས་སིལ་ཕུལ། དེ་རྗེས་སྨན་རྩིས་ཁང་གི་འགན་འཛིན་ཟླ་བ་ལགས་ནས་སྨན་རྩིས་ཁང་གི་བྱུང་རིམ་ངོ་སྤྲོད་ཞིབ་རྒྱས་གསུང་བཤད་གནང་གྲུབ་མཚམས་ཞབས་ལོ་སུམ་ཅུ་དང་ཉི་ཤུ་འཁོར་བའི་ལས་བྱེད་ཁག་གཅིག་ལ་སྐུ་མགྲོན་གཙོ་བོ་མཆོག་གིས་ལེགས་སྐྱེས་དང་ཕྱག་འཁྱེར་གནང་། དེ་རྗེས་སྐུ་མགྲོན་གཙོ་བོ་མཆོག་གིས་སྨན་རམས་པ་དང་རྩིས་རམས་ཆུང་བའི་གནས་སྤར་ཡིག་རྒྱུགས་ཨང་རིམ་བཞིན་ཕྱག་འཁྱེར་གནང་གྲུབ་བསྟུན་སྨན་རྩིས་ཁང་གི་འགན་འཛིན་ནས་སྨན་སློབ་སྐབས་བཅོ་ལྔ་དང་བཅུ་དྲུག་པ་རྩིས་སློབ་སྐབས་བརྒྱད་པ་བཅས་ཀྱི་ལོ་འཁོར་ཡིག་རྒྱུགས་ཨང་དང་པོ་དང་། གཉིས་པ། གསུམ་པ་བཅས་དང་སློབ་མ་ཡོངས་ཀྱི་བརྒྱ་ཆ་མཐོ་ཤོས་སོན་པ་སློབ་མ་ལྷག་པ་སྒྲོལ་མ་དང་། སྤྱི་པའི་རྒན་བདག་བུ་གཅིག་དང་བུ་མོ་གཅིག་ཁག་སོ་སོར་གཟེངས་བསྟོད་བྱ་དགའ་གནང་རྗེས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། དེ་རིང་སྨན་རྩིས་ཁང་གི་རྟེན་འབྲེལ་མཛད་སྒོ་འདིར་ཕེབས་པའི་རྣམ་པ་ཚོ་ཚང་མར་འཚམས་འདྲི་ཞུ་གི་ཡོད།
སྨན་རྩིས་ཁང་གི་མཛད་སྒོར་ན་ནིང་ནས་བཅར་རྒྱུའི་གོ་སྐབས་རགས་སོང་བས་སྐབས་དེ་དུས་རང་ཉིད་ཀྱི་བསམ་ཚུལ་རྣམས་ཞུས་པ་ཡིན་ཟིན་ཡང་འཆར་ཅན་བསྐྱར་ལྡབ་ཅིག་ཞུས་ན་བསམ་བྱུང་། དེ་རིིང་ཚོགས་ཁང་འདིར་ཡོད་པ་དང་། འདིར་ཕེབས་ཐུབ་མེད་ནའང་གཞིས་ཆགས་ཁག་དང་། ས་གནས་སྨན་ཁག དེ་མིན་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་སྨན་རྩིས་ཁང་འདིའི་ཐོག་ཐུགས་འཁུར་དང་སྐུ་ངལ་སྐྱོན་མཁན་ང་རང་ཚོ་ཚང་མ་སྐལ་པ་བཟང་པོ་རེད་བསམ་པ་དྲན་གྱི་ཡོད། གཅིག་ནས་༸གོང་ས་༸སྐྱབས་མགོན་ཆེན་པོ་མཆོག་གིས་ཐོག་མ་ཉིད་ནས་བླ་ན་མེད་པའི་དགོངས་པ་བཞེས་ཏེ་སྨན་པ་གཅིག་དང་སློབ་ཕྲུག་གཉིས་ནས་འགོ་འཛུགས་གནང་ནས་ད་ལྟའི་ཆར་མི་གྲངས་ལྔ་བརྒྱ་བརྒལ་བའི་ཕྱག་ལས་གནང་ཐུབ་རྒྱུའི་ནུས་པ་དེ་༸གོང་ས་༸སྐྱབས་མགོན་ཆེན་པོར་བཀའ་དྲིན་སྙིང་བཅངས་ཚད་མེད་ཞུ་དགོས་པ་དང་། ཆབས་ཅིག་བླ་མེད་དགོངས་བཞེས་ཐབས་ལམ་ཞིག་གི་སྟེང་སྐྱེ་འགྲོ་སྤྱི་དང་བྱེ་བྲག་མིའི་རིགས་ནད་ཀྱི་སྡུག་བསྔལ་ལས་མནར་བའི་གང་ཟག་རྣམས་ལ་ཕན་ཐོགས་ནུས་པ་ཡོད་པའི་སྒྲིག་འཛུགས་ཤིག་ཆགས་ཡོད་པས་ཞེ་དྲག་གི་སྐལ་པ་བཟང་པོ་རེད་དྲན་གྱི་ཡོད། དེ་ནས་འཇིག་རྟེན་འདིའི་སྟེང་མེད་ན་མི་འགྲིགས་པ་གཞན་ཕན་ལྷག་བསམ་དེ་རེད། ང་ཚོའི་གསོ་བ་རིག་པའི་སྨན་སྦྱོར་གཉིས་ཀའི་གཞུང་ལུགས་ནང་ཕན་སེམས་རྩ་བར་འཛིན་ཏེ་ཕྱག་ལས་གནང་གི་ཡོད་པ་ཡིན་དུས་ཁྱེད་རང་ཚོ་མཐོ་རིམ་སློབ་ཕྲུག་ཚོ་དང་། ཕྱག་ལས་གནང་བཞིན་པའི་ལས་བྱེད་ཚོར་ངས་དྲན་གསོ་ཞིག་ཞུས་ན་གཅིག་བྱས་ན་ཐུགས་ཕན་གསོས་ཡོང་བསམས་བྱུང། ང་རང་ཚོ་སྨན་དང་རྩིས་གཉིས་ཀྱི་ཐོག་ཕྱག་ལས་གནང་མཁན་དང་སྒེར་པ་ཚུན་ཆད་སྒྲིག་འཛུགས་འདིའི་ནང་མེད་དུ་མི་རུང་བའི་ལས་ཀྱི་སྣེ་མོར་ཆགས་ཡོད་དུས་ཕྱག་ལས་ག་རེ་གནང་བ་དེ་དག་རླབས་ཆེན་ཆགས་ཡོད་བསམ་གྱི་འདུག མི་རིགས་ཀྱི་ལ་རྒྱའི་ཆ་ནས་བཤད་པ་ཡིན་ནའང་སྨན་རྩིས་རིག་པ་འདི་ང་རང་ཚོའི་ཐུན་མོང་མ་ཡིན་པའི་རིག་གཞུང་འཛིན་སྐྱོང་སྡེ་ཚན་ནང་ཚུད་པ་ཡིན་དུས་ང་ཚོ་བོད་མི་རིགས་ཀྱི་སྒྲིག་འཛུགས་འདི་འདྲའི་ནང་ལྷག་བསམ་རྣམ་དག་གི་ཞུགས་པ་ཡིན་ན་འཇིག་རྟེན་སྤྱི་ལ་ཕན་ཐོགས་ཡོད་པ་མ་ཟད། མི་རིགས་འཐབ་རྩོད་ཀྱི་ཆ་ལའང་སྒྲིག་འཛུགས་འདི་མེད་དུ་མི་རུང་བ་ཞིག་དང་། རང་ཉིད་སྒེར་གྱི་ཚེ་འདི་ཕྱི་ལའང་ཕན་རླབས་ཆེ་བས་མདུན་ནས་མདུན་དུ་བསྐྱོད་རྒྱུར་ཚང་མས་ཕྱར་བ་གྲུ་འདེགས་གནང་རོགས། ཞེས་སོགས་ཀྱི་གསུང་བཤད་གནང་ཡོད། དེ་རྗེས་སློབ་ཕྲུག་ནང་ཁུལ་ལག་རྩེད་པོ་ལོའི་འགྲན་བསྡུར་བྱས་ཡོད་པར་བུ་དང་བུ་མོ་ཁག་སོ་སོར་བྱ་དགའ་གནང་མཚམས་སྨན་རྩིས་ཁང་གི་འགན་འཛིན་གཞོན་པ་རྣམ་རྒྱལ་ཚེ་རིང་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཁྱེན་པའི་རང་གཟུགས་བཏོན་རྗེས་མཛད་སྒོ་གྲོལ། ད་ལྟའི་ཆར་སྨན་རྩིས་ཁང་གི་འཛིན་སྐྱོང་སྡེ་ཚན་ཁོངས་སུ་རྒྱ་བལ་འབྲུག་གསུམ་ནང་ཡན་ལག་སྨན་ཁང་ ༥༤ དང་ལས་བྱེད་ལས་མི་བསྡོམས་ ༥༠༩ རིག་གཞུང་སྡེ་ཚན་ཁོངས་སྨན་རྩིས་སློབ་མ་ད་ཡོད་གྲངས་ ༥༡ དང་རིགས་གཅིག་རྐང་འཛིན་སྨན་པ་གྲངས་ ༢༤༦ དང་རྩིས་པ་གྲངས་ ༤༩ ཐོན་ཡོད་འདུག་པ་བཅས།།
