༢༠༡༠ ཕྱི་ཟླ་ ༣ ཚེས་ ༢༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༢༧ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་དགོངས་དོན་ལྟར་རང་རེའི་གནའ་བོའི་ལྷ་མོའི་རིག་གཞུང་དེ་དག་བོད་མི་གཞོན་སྐྱེས་ཚོར་དོ་དབྱིངས་སླེབས་ཆེད་བོད་གཞུང་ཟློས་གར་ཚོགས་པ་དབུ་བརྙེས་ནས་མི་ལོ་ཧྲིལ་པོ་ ༥༠ འཁོར་བའི་དུས་དྲན་དང་སྟབས་བསྟུན་བོད་ཀྱི་ཞོ་སྟོན་རྒྱས་པ་ཐེངས་ ༡༥ སྲུང་བརྩི་ཞུས་ཡོད།དེ་ཉིན་སྔ་དྲོ་ཆུ་ཚོད་ ༩།༠༠ ཐོག་ཇི་ལྟར་གསོལ་འདེབས་ཞུས་དོན་བཞིན་སྐུ་མགྲོན་གཙོ་བོ་སྒྲུབ་རྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་རིན་པོ་ཆེ་མཆོག་དང་། བཙན་བྱོལ་བོད་གཞུང་མང་གཙོའི་ཀ་བ་གསུམ་གྱི་མཛད་གཙོ་ལས་ཟུར་རྣམ་པ། རང་དབང་ཅན་གྱི་འགན་འཛིན་རྣམ་པ། ལྷན་ཁང་ཁག་གི་དྲུང་ཆེ་རྣམ་པ། ཕྱི་རྒྱལ་སྐུ་མགྲོན་རྣམ་པ། གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན་ལས་ཟུར་རྣམ་པ། ས་གནས་ཁག་ནས་ཕེབས་པའི་ལྷ་མོ་ཚོགས་པ་ཁག་གི་འཁྲབ་སྟོན་རྣམ་པ།བཞུགས་སྒར་ཁུལ་དང་གློ་བུར་དུ་ལྷག་པའི་རྒྱ་ཆེའི་མི་མང་བཅས་སྟོང་ཕྲག་བརྒལ་བའི་དབུས་སུ་བོད་གཞུང་ཟློས་གར་གྱི་སྤྱི་ཁྱབ་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ཀྱིས་རྒྱལ་བ་ཀརྨ་པ་རིན་པོ་ཆེ་མཆོག་ལ་མཎྜལ་རྟེན་འབྱུང་འདེགས་འབུལ་དང་སྦྲགས་བོད་ཀྱི་ལྷ་མོའི་སྲོལ་འབྱེད་གྲུབ་ཐོབ་ཐང་སྟོང་རྒྱལ་པོའི་སྐུ་བརྙན་དོ་རའི་ནང་དུ་གདན་འདྲེན་ཞུས།
གྲུབ་ཐོབ་ཐང་སྟོང་རྒྱལ་པོའི་སྐུ་བརྙན་དོ་རའི་ནང་དུ་གདན་འདྲེན་ཞུ་བཞིན་པ།
དེ་རྗེས་ཟློས་གར་འགན་འཛིན་གྱིས་ལས་བསྡོམས་མདོར་བསྡུས་སྙན་སེང་དང་འབྲེལ་ཞོ་སྟོན་གྱི་དུས་ཆེན་ངོ་སྤྲོད་གནང། དེ་ནས་བོད་གཞུང་ཟློས་གར་ཚོགས་པས་གཙོས་ཕྱོགས་མཐའ་ཁག་ནས་ཕེབས་པའི་ལྷ་མོའི་ཚོགས་པ་རྣམས་ནས་རིམ་པ་བཞིན་དུ་སྐར་མ་ ༣༠ རེ་ལྷ་མོའི་འཁྲབ་གཞུང་གཟིགས་ཕུད་འཁྲབ་སྟོན་གྲུབ་རྗེས་སྐུ་མགྲོན་གཙོ་བོ་མཆོག་གིས་བཀའ་སློབ་གནང་དོན།
དེ་རིང་ནི་ང་ཚོ་བོད་གངས་ཅན་ལྗོངས་ཀྱི་སྲོལ་རྒྱུན་གྱི་ཆ་ཤས་གལ་ཆེན་པོ་ཞིག་ཆགས་ཡོད་པ་རེད། བོད་ཀྱི་ཞོ་སྟོན་དུས་ཆེན་འདི་བཞིན་རྒྱས་འཛོམས་ཐོག་བོད་གཞུང་ཟློས་གར་ཚོགས་པ་དང་། གཞིས་ཆགས་ཁག་ནས་ཕེབས་པའི་ལྷ་མོའི་ཚོགས་པ་ཁག དེ་བཞིན་མ་སུ་རི་བོད་ཁྱིམ་བཅས་ཚོགས་པ་ཁག་མང་པོ་ཞིག་འདི་གར་འདུ་འཛོམས་ཀྱིས་བོད་ཀྱི་སྲོལ་རྒྱུན་གྱི་ལྷ་མོའི་སྒྱུ་རྩལ་ཐོག་ཚང་མས་སོ་སོའི་སྐུ་ངལ་དང་ཕྱག་ལས་མང་པོ་ཞིག་གནང་སྟེ་བོད་ཀྱི་སྲོལ་རྒྱུན་གྱི་རིག་གཞུང་གལ་ཆེན་ཞིག་སྲུང་སྐྱོབ་གནང་བ་དེར་ཧ་ཅང་དགའ་པོོ་བྱུང་བས་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་དེ་རིང་འདིར་སྐུ་མགྲོན་དང་། མང་ཚོགས་མང་དག་ཅིག་ཕེབས་ཡོད་པ་ཁོང་ཚོ་བརྒྱུད་ནས་ལྷ་མོ་འཁྲབ་སྟོན་གནང་མཁན་ཚོར་སྐུལ་ལྕག་དང་། ཕྱོགས་གཅིག་ནས་ང་ཚོ་བོད་མི་རིགས་ཤིག་ཡིན་པའི་ཆ་ནས་སོ་སོའི་མི་རིགས་ཀྱི་རིག་གཞུང་དང་། སྲོལ་རྒྱུན་གྱི་གོམས་སྲོལ་དེ་དག་ལ་ང་ཚོས་དུས་རྒྱུན་དུ་སྤོབས་པ་དང་། གུས་བཀུར། རྩིས་མཐོང་བྱས་པ་ཞིག་མཚོན་ཐུབ་ཀྱི་རེད་བསམ་གྱི་འདུག
མང་ཚོགས་ངོས་ནས་ཀྱང་རང་མི་རིགས་ཀྱི་གོམས་སྲོལ་ཐོག་ལ་ལས་འགུལ་གང་འདྲ་ཞིག་ཡིན་ནའང་ཕྱར་གྲུ་མཉམ་འདེགས་གནང་རྒྱུ་དང་། ལྷག་པར་དུ་ང་རང་ཚོ་གཞོན་སྐྱེས་ཚོས་རང་གི་མི་རིགས་ཀྱི་རིག་གཞུང་དང་བོད་ཀྱི་སྲོལ་རྒྱུན་གོམས་གཤིས་ལ་ངོས་འཛིན་གསལ་པོ་བྱེད་ཐུབ་པ་བྱུང་ན། ཏན་ཏན་བོད་མི་རིགས་ཡིན་པའིི་བག་ཆགས་བཟང་པོ་ཞིག་འཇོག་ཐུབ་ཀྱི་རེད་བསམ་གྱི་འདུག ང་རང་ཚོ་ཚང་མས་མགོན་སྐྱབས་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་ཕྱི་བར་གསུམ་དུ་བོད་ཀྱི་རིག་གཞུང་དང་། བོད་ཀྱི་སྲོལ་རྒྱུན་དེ་དག་ལ་བདག་ཉར་དགོས་སྐོར་དུས་རྒྱུན་དུ་ལམ་སྟོན་བཀའ་སློབ་ཕེབས་ཀྱི་ཡོད།
ང་རང་ཚོ་བོད་མི་རིགས་ཀྱི་རིགས་རྒྱུད་དུ་སྐྱེས་པའི་བོད་མི་ཞིག་ཡིན་ན་ག་ཚོད་ཐུབ་ཐུབ་སོ་སོའི་ལུང་པའི་ནང་དུ་བོད་ཀྱི་རིག་གཞུང་སྲུང་སྐྱོབ་བྱ་རྒྱུའི་ཆ་ཤས་བླང་སྟེ་དུས་དང་རྣམ་པ་ཀུན་ཏུ་རང་ཉིད་བོད་མི་རིགས་ཡིན་པ་དང་། དེ་བཞིན་བོད་མི་རིགས་ཀྱི་གཉན་འཕྲང་ཅན་གྱི་དུས་ཚོད་དེ་འདྲ་ཞིག་ཏུ་སླེབས་ཡོད་སྟབས། ཚང་མས་དགོངས་པ་ཆེ་བཞེས་དང་། ཐུགས་བསམ་ཏན་ཏན་བཞེས་གནང་དགོས་རྒྱུ་གལ་ཆེན་པོ་ཆགས་ཡོད། སྤྱིར་བོད་གཞུང་གི་དབུ་ཁྲིད་རྣམ་པའི་ལམ་སྟོན་བཀའ་སློབ་མང་པོ་ཞིག་གནང་གི་ཡོད། ཡང་སྒོས་༸གོང་ས་༸སྐྱབས་མགོན་ཆེན་པོ་མཆོག་གཙོ་བོར་གྱུར་པའི་བླ་ཆེན་རྣམ་པས་རྒྱུན་དུ་བཀའ་སློབ་ཕེབས་ཀྱི་ཡོད། དེ་ལས་ལྷག་པ་ཞིག་ང་ལ་ཞུ་རྒྱུ་མི་འདུག ད་ལྟ་འདིར་ངས་མར་ལྟ་སྐབས་ལྷ་མོའི་འཁྲབ་སྟོན་ཚོགས་པ་འགའ་ཤས་ནང་སྐུ་བགྲེས་པ་མང་པོ་འདུག ཁོང་ཚོ་བོད་ཀྱི་སྲོལ་རྒྱུན་རིག་གཞུང་གི་སྲོག་རྩ་མཐུད་མཁན་ཡིན་སྟབས། བོད་ཀྱི་ཆོས་དང་། རིག་གཞུང་། གོམས་སྲོལ་བཅས་ལ་ཧ་ཅང་ལེགས་སྐྱེས་མང་པོ་ཕུལ་ཡོད་པར་བརྟེན་བོད་མི་རིགས་ཡོངས་རྫོགས་ལ་ཁོང་རྣམ་པ་བཀའ་དྲིན་ཆེན་པོ་ཡིན། དེར་བརྟེན་ང་ཚོས་རྗེས་སུ་ཡི་རང་ཞུ་རྒྱུ་དང་ཆབས་ཅིག་མིག་དཔེ་ལྟ་དགོས་པ་ཆགས་ཡོད་པས། ཁོང་ཚོར་དམིགས་བསལ་ཐུགས་རྗེ་ཆེ་ཞུ་རྒྱུ་ཡིན། སྤྱིར་འཛམ་གླིང་སྤྱི་ཡོངས་ཀྱི་གནས་ཚུལ་མགོ་རྙོག་པོ་དང་། ཕྱི་ནང་གི་རྐྱེན་ཆག་མང་པོ་ཞིག་ཡོང་གི་ཡོད། ཡིན་ནའང་ང་ཚོས་མང་ཚོགས་ལ་རེ་བ་བརྒྱབ་པ་ལྟར། དོན་དག་ཐོག་མང་ཚོགས་ནས་སོ་སོས་ལུས་ངག་ཡིད་གསུམ་གྱི་སྒོ་ནས་འབད་བརྩོན་ཐུབ་པ་བྱུང་ན། སྤྱིར་འཛམ་བུ་གླིང་དང་ཡང་སྒོས་སུ་བོད་གང་ཅན་ཆོས་ལྡན་གྱི་ཞིང་ཁམས་ལ་སྐྱིད་པའི་ཉི་མ་འཆར་རྒྱུའི་དུས་ཚོད་ཅིག་ཏན་ཏན་ཡོང་གི་རེད།
ཅེས་སོགས་ཀྱི་བཀའ་སློབ་གྲུབ་རྗེས་བཀྲིས་མཆོད་མཚམས་བཅས་གནང་སྟེ་གཟིགས་མོ་གྲུབ། དེ་ཡང་ལྷ་མོའི་ཚོགས་པ་ཁག་དགུ་ནས་ཉིན་བཅུའི་རིང་ཞོ་སྟོན་གྱི་ལྷ་མོ་འཁྲབ་སྟོན་གནང་མུས་ཡིན་འདུག ཞོ་སྟོན་ནི་རྗེ་ཙོང་ཁ་པའི་དངོས་སློབ་འཇམ་དབྱངས་ཆོས་རྗེས་དཔལ་ལྡན་འབྲས་སྤུངས་དགོན་པ་ཕྱག་བཏབ་པའི་ཞལ་གྲོའི་མཛད་ཆེན་དེ་དབྱར་གནས་བོད་ཟླ་དྲུག་པའི་གནམ་གང་ཉིན་ཉེ་འཁོར་འབྲོག་པ་རྣམས་དཀར་ཆུ་བཟང་ཞིང་རྒྱས་པ་དང་། ཞོ་ཁ་དཀར་པོ་ཡིན་པས་རྟེན་འབྲེལ་དུ་བསྒྲིགས་ཏེ་དགེ་འདུན་རྣམས་ལ་ཞོ་ཡི་སྟོན་མོ་འབུལ་སྲོལ་ཡོད་པར་འབྲས་སྤུངས་ཞོ་སྟོན་ཞེས་པ་བྱུང་ཞིང་དེ་ནས་རིམ་པས་༸རྒྱལ་མཆོག་ལྔ་པ་ཆེན་པོའི་སྐབས་ལྷ་གཞུང་འཁྲབ་སྲོལ་དར་བ་བཅས་སོ།།
