༢༠༡༠ ཕྱི་ཟླ་ ༣ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༦ ཉིན་བཙན་བྱོལ་བོད་གཞུང་ནང་སྲིད་ལས་ཁུངས་དང་། འཆར་འགོད་ལྷན་ཁང་ཐུན་མོང་གིས་གོ་སྒྲིག་ཐོག་གངས་སྐྱིད་གསོལ་ཐབ་ཚོགས་ཁང་དུ་བོད་ཀྱི་བལ་བསླས་བཟོ་སྐྲུན་ལས་གཞི་དབུ་འབྱེད་གནང་བའི་མཛད་སྒོ་ཞིག་ཚོགས་ཡོད། དེ་ཡང་ཉིན་རྒྱབ་ཆུ་ཚོད་ ༢།༣༠ ཐོག་བཀའ་ཁྲི་ཟམ་གདོང་རིན་པོ་ཆེ་མཆོག་གིས་དབུས་ཕྱག་སྦྲེལ་བཀའ་བློན་རྣམ་པ་དང་། དྲུང་ཆེ་རྣམ་པ། དེ་བཞིན་རྡ་ས་ས་གནས་འགོ་འཛིན་དང་། མཉམ་འབྲེལ་གྱི་དྲུང་ཆེ་། ནང་སྲིད་དང་འཆར་འགོད་ཀྱི་ལས་བྱེད། ལས་གཞི་སྦྱོང་བརྡར་ནང་མཉམ་ཞུགས་གནང་མི་ཁག་གཅིག་བཅས་ཚང་འཛོམས་ཐོག་ནང་སྲིད་དྲུང་ཆེ་དངོས་གྲུབ་རྡོ་རྗེ་ལགས་ནས་ལས་གཞི་ངོ་སྤྲོད་ཀྱི་གསུང་བཤད་གནང་བ་དང་། དེ་ནས་འཆར་འགོད་ལས་ཁུངས་ཀྱི་སྤྱི་ཁྱབ་འགན་འཛིན་གྱིས་ལས་གཞིའི་དམིགས་ཡུལ་དང་། མ་འོངས་བྱེད་འཆར་སྐོར་གསུང་བཤད་གྲུབ་མཚམས་འཆར་འགོད་ལས་ཁུངས་ཀྱི་དྲུང་ལས་ཤེས་རབ་ལགས་ཀྱིས་ལས་གཞིའི་ཚན་རིག་ལག་རྩལ་ཐོག་ངོ་སྤྲོད་མདོར་བསྡུས་གནང་གྲུབ་བསྟུན་འཆར་འགོད་སྤྱི་ཁྱབ་འགན་འཛིན་གྱིས་ཚོང་ལས་དང་འབྲེལ་བའི་ཞིབ་འཇུག་སྙན་ཐོ་གསལ་བཤད་གནང་བ་དང་། དེ་རྗེས་ལས་གཞི་ལག་བསྟར་བྱེད་མིའི་འཐུས་མི་གཉིས་ནས་སོ་སོའི་མྱོང་ཚོར་དང་། འཚོ་ཐབས་ལ་ཕན་ཐོགས་ཇི་ཡོད་ཀྱི་བསམ་ཚུལ་སྙན་སྒྲོན་ཞུས་རྗེས་བོད་ཀྱི་བལ་ལས་ཐོན་སྐྱེད་ཕུད་མཚོན་རེ་བཀའ་བློན་རྣམ་པར་ཕུལ། དེ་ནས་བཀའ་ཁྲི་མཆོག་གིས་ལས་གཞི་སྦྱོང་བརྡར་ནང་མཉམ་ཞུགས་གནང་མི་གཟེངས་སུ་ཐོན་པ་རྣམས་ལ་ཕྱག་འཁྱེར་དང་བཟོ་ལས་འཕྲུལ་འཁོར་རེ་གནང་མཚམས་ནང་སྲིད་ཀྱི་ཟུང་དྲུང་ཚེ་རིང་རྡོ་རྗེ་ལགས་ཀྱིས་ཐུགས་རྗེ་ཆེ་ཞུས་རྗེས་རྟེན་འབྱུང་གསོལ་ཇ་ཞལ་ཏོག་ཕུལ་བ་དང་། དེ་རྗེས་ནང་སྲིད་དོ་ཁང་དུ་ལས་གཞི་དཔེ་མཚོན་ཐོན་སྐྱེད་དང་། བལ་ལས་འཕྲུལ་འཁོར་རྣམས་ལ་གཟིགས་ཞིབ་གནང་ཡོད་པ་བཅས་ཀྱི་གནས་བསྡུས་སུ།།
