༢༠༡༠ ཕྱི་ཟླ་ ༣ ཚེས་ ༨ རེས་གཟའ་ཟླ་བ།

༄༅། །ཕྱི་ལོ་ ༢༠༡༠ ཟླ་ ༣ ཚེས་ ༥ ཉིན་གྱི་སྔ་དྲོ་ཆུ་ཚོད་ ༦ ཐོག་ཐ་ལན་ཌའི་རྒྱལ་ས་བྷེང་ཀོག་ནང་བྷེང་ཀོག་སྒྱུ་རྩལ་དང་རིག་གཞུང་བསྟི་གནས་ཁང་དུ་ (Bangkok`s Art and Culture Centre) ཉིན་ལྔའི་རིང་བོད་ཀྱི་ཆོས་དང་སྒྱུ་རྩལ། ཐུན་མོང་མིན་པའི་རིག་གཞུང་གི་དུས་ཆེན་སྲུང་བརྩི་ཞུ་འགོ་ཚུགས་ཡོོད། སྐབས་དེར་བརྙན་འཕྲིན་ཐོག་སྐར་མ་གསུམ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ཆེན་གོ་སྒྲིག་ཚོགས་ཆུང་དང་ཐ་ལེན་ཌའི་མི་མང་ཚོར་བོད་དོན་རྒྱབ་སྐྱོར་གནང་བར་ཐུགས་རྗེ་ཆེ་ཞུའི་བཀའ་སློབ་སྩལ་བ་དང་སྦྲགས་ཐ་ལན་ཌི་དང་བོད་མི་ཚོ་སྟོན་པ་ཤཱཀྱ་ཐུབ་པའི་རྗེས་འཇུག་གཅིག་པ་ཡིན་སྐོར་བཀའ་སྩལ། དུས་ཆེན་སྐབས་བོད་ཀྱི་རིག་གཞུང་འཁྲབ་སྟོན་ཆེད་བོད་གཞུང་ཟློས་གར་ནས་འཁྲབ་སྟོན་པ་བཅུ་དགུ་ཙམ་མགྲོན་འབོད་ཞུས་ཡོད་པ་མ་ཟད། རྒྱ་གར་ལྷོ་ཕྱོགས་ཧུན་སུར་གཞིས་ཆགས་ནང་རྟེན་གཞི་བྱས་པའི་དཔལ་ལྡན་རྒྱུད་སྨད་གྲྭ་ཚང་ནས་དགེ་འདུན་པ་བདུན་དང་བོད་གཞུང་སྨན་རྩིས་ཁང་ནས་བོད་པའི་སྨན་པ་གཉིས། དེ་བཞིན་ལྡི་ལི་བོད་ཁང་ནས་དགེ་བཤེས་རྡོ་རྗེ་དགྲ་འདུལ་བཅས་མཉམ་ཞུགས་གནང་ཡོད། དུས་ཆེན་སྐབས་བོད་ཀྱི་ནང་ཆོས་ངོ་སྤྲོད་དང་ནང་ཆོས་དང་འབྲེལ་བའི་རྡུལ་མཚོན་དཀྱིལ་འཁོར། མཆོད་པའི་དཀར་རྒྱན། ཞལ་ཐང་འགྲེམས་སྟོན་དང་བོད་དོན་དང་འབྲེལ་བའི་གློག་བརྙན། བོད་ཀྱི་སྒྱུ་སྩལ་དང་ཡུལ་གོམས་གཤིས་ལུགས་ངོ་སྤྲོད། བོད་ཀྱི་གླུ་གཞས་བཅས་འཁྲབ་སྟོན་ཞུས་ཡོད།