༢༠༡༠ ཕྱི་ཟླ་ ༣ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༢༡ ཉིན་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་རྒྱལ་སྤྱིའི་བསྟི་གནས་ཁང་ India International Centre དང་ལྡི་ལི་སྐུ་ཚབ་དོན་གཅོད་ཁང་ཐུན་མོང་ནས་གོ་སྒྲིག་ཐོག་བོད་མི་རྣམས་རྒྱ་གར་ནང་ལོ་ངོ་ལྔ་བཅུ་བཙན་བྱོལ་དུ་འདས་པའི་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་རིམ་གྱི་མཇུག་བསྡོམས་མཛད་སྒོ་དེ་བཞིན་རྒྱ་གར་རྒྱལ་སྤྱིའི་བསྟི་གནས་ཁང་གི་ Fountain lawn ཕོན་ཊི་ལོན་ཞེས་པའི་སྤྱི་གླིང་ནང་གོ་སྒྲིག་ཞུས་པའི་ཚོགས་མགོན་དུ་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱངས་ཏེ། ཧིན་རྡུ་དང་། ཡེ་ཤུ། ཁ་ཆེ། སིག ཇེའུ་སོགས་ཆོས་ལུགས་འདྲ་མིན་ཁག་གི་བླ་ཆེན་དང་གནད་ཡོད་ཀྱི་སྐུ་མགྲོན་ཆེད་ཕེབས་ཀྱིས་ཐོག་མར་རྒྱ་གར་རྒྱལ་སྤྱིའི་བསྟི་གནས་ཁང་གི་གཙོ་འཛིན་སློབ་དཔོན་ Professor Menon མེ་ནོན་མཆོག་གིས་ངོ་སྤྲོད་གསུང་བཤད་གྲུབ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ཆོས་ལུགས་འདྲ་མིན་གྱི་སྐུ་ཚབ་ལྷན་དུ་དེ་རིང་འདིར་མཉམ་དུ་འཛོམས་རྒྱུ་བྱུང་བར་ངོས་རང་ཧ་ཅང་དགའ་པོ་བྱུང་། སྤྱིར་བཏང་ང་ཚོ་བོད་མི་རྣམས་བཙན་བྱོལ་བ་ཆགས་ཡོད། དེ་རིང་འདིར་ཡོད་པའི་བོད་པའི་ན་གཞོན་ཚོས་སོ་སོའི་རྒྱལ་ཁབ་བོད་མཐོང་མྱོང་མེད་པར་རྒྱ་གར་ལུང་པའི་ནང་སྐྱེས་ཏེ་འཚར་ལོངས་བྱུང་བའི་མི་རབས་ཤིག་ཆགས་ཡོད། འོན་ཀྱང་བོད་པའི་སྙིང་སྟོབས་དང་ལྷག་བསམ་དེ་ཁྱེད་རང་ཚོས་གསོན་པོར་གནས་པ་བྱས་ཡོད། ཕྱོགས་གཅིག་ནས་བསམ་བློ་བཏང་ན་ཁྱེད་རང་ཚོར་དེང་དུས་སློབ་སབྱོང་གི་གོ་སྐབས་ཐོབ་པ་ནི་བསོད་ནམས་ཆེན་པོ་རེད། གལ་ཏེ་བོད་དུ་སྐྱེས་ཡོད་ན་གོ་སྐབས་དེ་ཐོབ་མེད་པ་རེད་བསམ་གྱི་འདུག གང་ལྟར་ང་ཚོ་སོ་སོའི་རྒྱལ་ཁབ་བྲལ་ཏེ་བཙན་བྱོལ་བ་ཆགས་ཡོད་པ་དེ་སེམས་སྐྱོ་དགོས་པ་ཡིན་ནའང་། ཕྱོགས་གཞན་ཞིག་ནས་ང་ཚོར་གོ་སྐབས་བཟང་པོ་ཞིག་ཐོབ་ཡོད་པ་དེ་དག་ནི་རྒྱ་གར་གཞུང་མང་གཉིས་ཀྱི་བཀའ་དྲིན་རེད། དེ་ཡང་འཆར་གཞི་དེ་དག་ཕྱི་ལོ་ ༡༩༦༠ འགོ་སྟོད་ནས་རྒྱ་གར་གྱི་སྲིད་བློན་ནེ་རུ་མཆོག་དང་རྒྱ་གར་གཞུང་ནས་འགྲོ་སོང་བཏང་སྟེ་བོད་མིའི་གཞིས་ཆགས་དང་བོད་གཞུང་སློབ་གྲྭ་ཟུར་དུ་བཙུགས་པའི་བཀའ་དྲིན་ཡིན།
དེར་བརྟེན་རྒྱ་གར་གཞུང་མང་ལ་ཐུགས་རྗེ་ཆེ་ཞུ་རྒྱུ་ནི་ང་ཚོའི་ལས་འགན་ཞིག་ཀྱང་ཆགས་ཡོད། དེ་བཞིན་༸གོང་ས་མཆོག་གིས་རྒྱ་གར་གཞུང་མང་གཉིས་ཀྱི་བཀའ་དྲིན་རྗེས་དྲན་ཚུལ་དུ་རྒྱ་གར་དང་བོད་གཉིས་བླ་སློབ་ཀྱི་ཐུན་མིན་འབྲེལ་བའི་སྐོར་བཀའ་སློབ་སྩལ་དོན། བོད་ཀྱི་ཤེས་རིག་གི་གཞི་རྩ་ཀ་མད་སུམ་ཅུའི་ཡི་གེ་དེ་ཡང་རྒྱ་གར་ནས་དཔེ་བླངས་པ་ཞིག་ཡིན་སྐོར་བཀའ་ཕེབས་པ་དང་འབྲེལ་ལོ་ངོ་ལྔ་བཅུ་ལྷག་མགོན་པོ་གང་ཉིད་རྒྱ་གར་ནང་བཙན་བྱོལ་དུ་བཞུགས་རིང་དེང་དུས་ཀྱི་ཚན་རིག་དང་ཆོས་ལུགས་རིས་མེད་ཀྱི་ལྟ་གྲུབ་སོགས་གང་སྤྱིའི་མཐོང་རྒྱ་ཐོས་རྒྱ་ཆེ་རུ་ཕྱིན་ཡོད་པ་དེ་ནི་རང་དབང་ཅན་གྱི་མང་གཙོའི་རྒྱལ་ཁབ་འདིའི་བཀའ་དྲིན་ཡིན། དེ་བཞིན་ཆོས་དང་རིག་གཞུང་གཉིས་ཀའི་ཐོག་ནས་འཛམ་གླིང་ལ་ཕན་རླབས་ཐུབ་པའི་ནུས་པ་དེ་རྒྱ་གར་ཡོད་སྟབས། མགོན་པོ་གང་ཉིད་མཆོག་རྒྱུན་ལྡན་ཕྱི་རྒྱལ་ཁག་ཏུ་རྒྱ་གར་བ་ཐུག་འཕྲད་སྐབས་བཟང་པོའི་གོམས་གཤིས་དེ་དག་སོ་སོའི་སྤྱི་ཚོགས་ཙམ་མིན་པར་མི་གཞན་ལ་འཕེལ་རྒྱས་གཏོང་དགོས་སྐོར་འབོད་སྐུལ་གནང་བཞིན། ཞེས་བཀའ་སློབ་ཕེབས་ཡོད། སྐབས་དེའི་མཛད་སྒོར་མི་གྲངས་ ༡༠༠༠ བརྒལ་བ་འདུ་འཛོམས་བྱུང་བའི་ཁོངས་སུ་བོད་རིགས་གཞོན་སྐྱེས་མང་དག་ཅིག་བཅར་ཡོད་པ་རྣམས་ལ་༸གོང་ས་མཆོག་གིས་བཀའ་སློབ་སྩལ་དོན། ང་ཚོར་ཕ་མེས་ནས་བརྒྱུད་པའི་དྲང་བདེན་དང་ཕྱི་གསལ་ནང་གསལ་བྱེད་རྒྱུའི་བཟང་པོའི་རིན་ཐང་ཞིག་ཡོད་པ་དེ་སྣང་མེད་དུ་མ་བཞག་པར་མི་ཉམས་རྒྱུན་འཛིན་བྱེད་དགོས། ངོས་ཀྱིས་གོ་ཐོས་ལ་བོད་དུ་ཡུལ་སྐོར་སྤྲོ་འཆམ་ལ་འགྲོ་མཁན་ཚོས་བོད་མི་རྣམས་རྩ་བའི་རྒྱ་ནག་གིས་བཙན་གནོན་འོག་གནས་ཡོད་ཀྱང་ཕྱིའི་རྣམ་འགྱུར་དང་གཤིས་ཀ་ཡག་པོ་འདུག རྒྱ་གཞུང་གི་དཔོན་རིགས་དེ་དག་དབང་འཛིན་པ་ཡིན་རུང་རྣམ་འགྱུར་རྩབ་པ་ཡོད་པའི་འགྲེལ་བརྗོད་བྱེད་ཀྱི་འདུག དེར་བརྟེན་བོད་མི་རྣམ་འགྱུར་ཡག་པ་དེར་མི་ཚང་མས་དགའ་མོས་ཆེ་བ་བྱེད་ཀྱི་ཡོད། རྩ་བའི་ང་ཚོ་གནས་སྟངས་ཁག་པོ་ཞིག་གིས་འོག་འཛམ་གླིང་གི་ས་ཕྱོགས་གང་སར་གནས་ཡོད་རུང་། སོ་སོའི་གཟུགས་པོའི་ནང་ཟུངས་ཁྲག་རྒྱུགས་འགྲོ་བཞིན་པ་དེ་བོད་པའི་ཁྲག་གཅིག་ཡིན་ཕྱིན་ཆད། བོད་མིའི་ཐུན་མིན་སྲོལ་རྒྱུན་གྱི་རིན་ཐང་དམ་འཛིན་བྱས་པའི་ཐོག དེང་དུས་ཤེས་ཡོན་ལ་སློབ་སབྱོང་བྱེད་དགོས། དེ་ལྟར་བྱས་ན་བོད་མི་ཆ་ཚང་བ་ཞིག་དང་། གལ་ཏེ་བཟང་པོའི་ཡོན་ཏན་དེ་མེད་ཚེ་བོད་པ་ཕྱེད་ཀ་ལྟ་བུ་ཞིག་ཆགས་ཀྱི་རེད། ཅེས་སོགས་ཀྱི་བཀའ་སློབ་ཟབ་མོ་ཕེབས་ཡོད། དེ་བཞིན་ཆོས་ལུགས་སོ་སོའི་སྐུ་ཚབ་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་ཁག་ལ་ཡི་རང་བསྔགས་བརྗོད་ཞུས་ཡོད་པ་མ་ཟད། བོད་དོན་བདེན་མཐའ་མྱུར་ནས་མྱུར་དུ་གསལ་བའི་ཆེད་རང་རང་གི་ལྷ་བླ་མ་དཀོན་མཆོག་སོགས་ལ་རིམ་བཞིན་ཐུགས་སྨོན་རྒྱ་ཆེན་པོ་གནང་ཡོད། དེ་རྗེས་ལྡི་ལི་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་གིས་རྒྱ་གར་གཞུང་མང་གཉིས་དང་དམིགས་བསལ་རྒྱ་གར་རྒྱལ་སྤྱིའི་བསྟི་གནས་ཁང་ནས་མཐུན་འགྱུར་རོགས་རམ་གནང་བར་ཐུགས་ཆེ་ཞུས་ཏེ་མཛད་སྒོ་ཡོངས་སུ་ལེགས་གྲུབ་ངང་ནས་གྲོལ་བ་བཅས་སོ།
