༢༠༡༠ ཕྱི་ཟླ་ ༣ ཚེས་ ༢༦ རེས་གཟའ་པ་སངས།
༄༅། །སུད་སིའི་སྐུ་ཚབ་དོན་གཅོད་ཆོས་སྐྱབས་པ་ཚེ་བརྟན་བསམ་གྲུབ་ལགས་ཀྱིས་འདི་གར་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༤ ཚེས་ ༨ ཉིན་སུད་སི་ (Swiss) དང་ལེཀ་ཌེན་སྤྲཡན་ (Liechtenstien) བོད་རིགས་མི་མང་ཚོགས་པ་དང་། སུད་བོད་མཛའ་འབྲེལ་ཚོགས་པ་ཐུན་མོང་ནས་གོ་སྒྲིག་ཐོག་སུད་སི་གཞུང་མང་ནས་འདས་པའི་ལོ་ངོ་ ༥༠ རིང་བཙན་བྱོལ་བོད་མིར་གདུང་སེམས་མཉམ་སྐྱེ་མཐུན་འགྱུར་གནང་བར་བཀའ་དྲིན་རྗེས་དྲན་དང་ཐུགས་རྗེ་ལེགས་འབུལ་ཞུ་བའི་མཛད་སྒོ་ཞིག་ཚུགས་རྒྱུ་ཡིན་འདུག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་པ་བཞིན་ཆིབས་སྒྱུར་བསྐྱང་སྟེ་བཀའ་སློབ་བཀའ་དྲིན་སྩལ་གནང་མཛད་རྒྱུ་ཡིན་འདུག དེ་བཞིན་མཛད་སྒོ་དེར་སུད་སི་དབུས་གཞུང་དང་། མངའ་སྡེ། གྲོང་སྡེ་ལས་ཁུངས་བཅས་ཀྱི་སྐུ་ཚབ། ཕྱོགས་མཚུངས་འདས་པའི་ལོ་ངོ་ ༥༠ རིང་བོད་མིར་གཞིས་སྤོས་མཐུན་འགྱུར་གནང་མཁན་ཁྱིམ་བདག་དང་འབྲེལ་ཡོད་རྗེས་ཤུལ་རྣམས་མགྲོན་འབོད་གནང་རྒྱུ་ཡིན་འདུག ཕྱི་ལོ་ ༡༩༦༢ ལོར་སུད་སི་དབུས་གཞུང་གི་ཁྲིམས་དང་སྐོར་སྲུང་ལྷན་ཁང་ནས་རྒྱ་གར་དང་བལ་ཡུལ་ནས་བོད་མི་ ༡༠༠༠ ལེན་རྒྱུར་རྒྱབ་གཉེར་ཞུ་རྒྱུའི་ཁས་ལེན་གནང་ཡོད། ཕྱི་ལོ་ ༡༩༦༣ ཟླ་ ༣ ཚེས་ ༢༩ ཉིན་སུད་སི་དབུས་གཞུང་གི་ཁྲིམས་དང་སྐོར་སྲུང་ལྷན་ཁང་ནས་རྒྱབ་གཉེར་གནང་བ་ལྟར་སུད་སི་དབུས་གཞུང་གིས་བཀའ་འཁྲོལ་གནང་ཡོད།
ཕྱི་ལོ་ ༡༩༦༡ ཟླ་ ༣ ནས ༡༩༦༤ ཟླ་ ༨ བར་བོད་ཕྲུག་ཁྱོན་བསྡོམས་ ༡༥༨ སུད་སི་མི་མང་གི་ཁྱིམ་ཚང་ནང་བདག་ཉར་གནང་ཡོད་པ་དང་། ད་ལྟའི་ཆར་སུད་སི་ནང་བོད་རིགས་མི་གྲངས་ ༤༠༠༠ ཙམ་ཡོད་པ་མ་ཟད། མི་རབས་གསུམ་པའི་བོད་རིགས་ན་གཞོན་རྣམས་འཚར་ལོངས་བྱེད་བཞིན་ཡོད་པ་བཅས།།
