༢༠༡༠ ཕྱི་ཟླ་ ༢ ཚེས་ ༡༩ རེས་གཟའ་པ་སངས།
ཕྱི་ལོ་ ༢༠༡༠ ཟླ་ ༢ ཚེས་ ༡༨ ཉིན་༸གོང་ས་མཆོག་དང་ཨ་རིའི་སྲིད་འཛིན་སྐུ་ཞབས་བྷ་རཀ་ཨོ་བྷ་མ་མཆོག་མཇལ་འཕྲད་སྐབས།
༄༅། །ཕྱི་ལོ་ ༢༠༡༠ ཟླ་ ༢ ཚེས་ ༡༨ ཉིན་༸གོང་ས་མཆོག་དང་ཨ་རིའི་སྲིད་འཛིན་སྐུ་ཞབས་བྷ་རཀ་ཨོ་བྷ་མ་ (Barack Obama) མཆོག་ཨ་རིའི་ཕོ་བྲང་དཀར་པོའི་ནང་སྔ་དྲོའི་ཆུ་ཚོད་ ༡༡།༢༠ ནས་ ༡༢།༣༠ བར་སྐར་མ་ ༧༠ ཙམ་གྱི་རིང་མཇལ་འཕྲད་དང་གསུང་མོལ་མཛད་ཡོད། སྐབས་དེར་སྲིད་འཛིན་ཨོ་བྷ་མ་མཆོག་གིས་བོད་ཀྱི་ཆོས་དང་རིག་གཞུང་། སྐད་ཡིག་བཅས་བོད་མིའི་ཐུན་མོང་མིན་པའི་ངོ་བོ་དང་། བོད་མིའི་འགྲོ་བ་མིའི་ཐོབ་ཐང་བདག་གཅེས་བྱེད་རྒྱུར་རྒྱབ་སྐྱོར་ཤུགས་ཆེ་ཡོད་སྐོར་༸གོང་ས་མཆོག་ལ་ཞུས་ཡོད་པ་མ་ཟད། སྲིད་འཛིན་ཨོ་བྷ་མ་མཆོག་གིས་༸གོང་ས་མཆོག་གིས་བཏོན་གནང་མཛད་པའི་དབུ་མའི་ལམ་དེར་རྒྱབ་སྐྱོར་གནང་བ་དང་སྦྲགས་མགོན་པོ་གང་ཉིད་མཆོག་གིས་རྒྱ་ནག་གཞུང་དང་ལྷན་དུ་འཚེ་མེད་ཞི་བའི་ལམ་ནས་གྲོས་མོལ་ཡོང་རྒྱུར་ཐུགས་བརྩོན་མཛད་པ་དེར་བསྔགས་བརྗོད་ཞུས་ཡོད། དེ་བཞིན་སྲིད་འཛིན་ཨོ་བྷ་མ་མཆོག་གིས་བོད་རྒྱའི་དབར་མི་མཐུན་པ་དེ་དག་ཐད་ཀར་གྲོས་མོལ་གྱི་ལམ་ནས་སེལ་ཐབས་དགོས་པ་ཕྱོགས་གཉིས་ཆར་རྒྱུན་སྲིང་ནས་རྒྱབ་སྐྱོར་ཞུས་ཡོད་སྐོར་དང་། ཉེ་ལམ་བོད་རྒྱ་གྲོས་མོལ་བསྐྱར་གསོ་བྱུང་བའི་གནས་ཚུལ་གོ་ཐོས་བྱུང་བར་སྲིད་འཛིན་མཆོག་ཐུགས་དགྱེས་ཚོར་ཆེན་པོ་བྱུང་ཡོད་སྐོར་སོགས་ཞུས་ཡོད། མཇལ་འཕྲད་དེའི་སྐབས་༸གོང་ས་མཆོག་གིས་སྲིད་འཛིན་མཆོག་ལ་འགྲོ་བ་མིའི་རིན་ཐང་གོང་མཐོར་གཏོང་རྒྱུ་དང་། ཆོས་ལུགས་མཐུན་སྒྲིལ། བོད་ཀྱི་གནད་དོན་ཐོག་ཐུགས་འཚབ་ཡོད་སྐོར་བཀའ་སྩལ། ༸གོང་ས་མཆོག་དང་སྲིད་འཛིན་རྣམ་གཉིས་མཇལ་འཕྲད་གྲུབ་མཚམས་མགོན་པོ་གང་ཉིད་མཆོག་གིས་གསར་འགོད་པ་ཁག་གཅིག་ལ་སྲིད་འཛིན་མཆོག་དང་མཇལ་འཕྲད་སྐབས་སྲིད་འཛིན་མཆོག་གིས་༸གོང་ས་མཆོག་ལ་རྒྱབ་སྐྱོར་ཤུགས་ཆེ་ཡོད་པའི་རྣམ་པ་བསྟན་ཡོད་སྐོར་བཀའ་སྩལ། དེ་ཡང་༸གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས་༸གོང་ས་མཆོག་དང་སྲིད་འཛིན་ཨོ་བྷ་མ་རྣམ་གཉིས་མཇལ་འཕྲད་བྱུང་བའི་ཐོག་གསུང་དོན། ད་རེས་སྲིད་འཛིན་ཨོ་བྷ་མ་མཆོག་གིས་༸གོང་ས་མཆོག་དང་མཇལ་འཕྲད་གནང་བ་དེ་སྲིད་འཛིན་མཆོག་ནས་༸གོང་ས་མཆོག་གིས་བོད་ཀྱི་གནད་དོན་སེལ་རྒྱུའི་ཐུགས་བརྩོན་མཛད་པ་དེར་རྒྱབ་སྐྱོར་དང་སྲིད་འཛིན་སྐུ་སྒེར་གྱི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་གུས་བཀུར་ཡོད་པའི་རྣམ་པ་གསལ་པོ་བསྟན་པ་རེད། ཅེས་གསུངས་ཡོད་པའི་གནས་བསྡུས་སུ།
