༢༠༡༠ ཕྱི་ཟླ་ ༢ ཚེས་ ༡༢ རེས་གཟའ་པ་སངས།

ཕྱི་ལོ་ ༢༠༡༠ ཟླ་ ༢ ཚེས་ ༡༡ རེས་གཟའ་ཕུར་བུའི་ཉིན་ཨ་རིའི་ཕོ་བྲང་དཀར་པོའི་མགྲིན་ཚབ་པ་སྐུ་ཞབས་རོ་བཌ་ཇིབ་སི་ (Robert Gibbs) ལགས་ཀྱིས་གསལ་བསྒྲགས་གནང་དོན། ཕྱི་ཟླ་ ༢ ཚེས་ ༡༨ ཉིན་ཨ་རིའི་སྲིད་འཛིན་སྐུ་ཞབས་བྷ་རཀ་ཨོ་བྷ་མ་མཆོག་ (Barack Obama) དང་༸གོང་ས་མཆོག་མཇལ་འཕྲད་མཛད་གཏན་འཁེལ་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་རྒྱལ་སྤྱིའི་ནང་གུས་སྐུར་འོས་པའི་ཆོས་ཀྱི་དབུ་ཁྲིད་གཅིག་དང་བོད་མིའི་ཐོབ་ཐང་གི་མགྲིན་ཚབ་པ་ཞིག་ཀྱང་ཡིན། སྲིད་འཛིན་མཆོག་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་གནང་ནས་དོན་ཕན་ལྡན་པའི་གྲོས་མོལ་གནང་རྒྱུའི་ཐུགས་རེ་གནང་བཞིན་ཡོད་ཅེས་གསར་འགོད་གསལ་བསྒྲགས་སྤེལ་ཡོད། དེ་ཡང་སྔ་ལོ་ཕྱི་ཟླ་ ༡༡ ནང་སྲིད་འཛིན་ཨོ་བྷ་མ་མཆོག་རྒྱ་ནག་ཏུ་རྒྱལ་དོན་འཚམས་གཟིགས་སྐབས་སྲིད་འཛིན་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་གནང་འདོད་ཡོད་སྐོར་རྒྱ་ནག་གི་དབུ་ཁྲིད་ཚོར་གསུངས་ཡོད་པ་བཅས།།