༢༠༡༠ ཕྱི་ཟླ་ ༢ ཚེས་ ༡༩ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༢ ཚེས་ ༡༨ ཉིན་ཨ་རིའི་ཕོ་བྲང་དཀར་པོས་གསར་འགོད་དྲུང་ཆེ་མཆོག་གིས་ཨ་རིའི་སྲིད་འཛིན་དང་༸གོང་ས་མཆོག་མཇལ་འཕྲད་མཛད་རྗེས་གསར་འགོད་གསལ་བསྒྲགས་ཤིག་སྤེལ་ཡོད་པའི་ནང་དོན། སྲིད་འཛིན་མཆོག་ད་རང་སྔ་དྲོ་ཕོ་བྲང་དཀར་པོའི་ནང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་གནང་ཡོད། སྲིད་འཛིན་མཆོག་གིས་བོད་ཀྱི་ཆོས་དང་རིག་གཞུང་སྐད་ཡིག་བཅས་བོད་མིའི་ཐུན་མོང་མིན་པའི་ངོ་བོ་དང་། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ནང་ཡོད་པའི་བོད་མིའི་འགྲོ་བ་མིའི་ཐོབ་ཐང་བདག་གཅེས་བྱེད་རྒྱུར་རྒྱབ་སྐྱོར་ཤུགས་ཆེ་ཡོད་སྐོར་གསུངས་ཡོད། སྲིད་འཛིན་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མས་བཏོན་གནང་མཛད་པའི་དབུ་མའི་ལམ་དེར་རྒྱབ་སྐྱོར་གནང་བ་དང་སྦྲགས་བོད་ཀྱི་༸སྐྱབས་མགོན་ཏཱ་ལའི་བླ་མས་རྒྱ་ནག་གཞུང་དང་ལྷན་འཚེ་མེད་ཞི་བའི་ལམ་ནས་གྲོས་མོལ་ཡོང་རྒྱུར་འབད་བརྩོན་གནང་བ་དེར་བསྔགས་བརྗོད་ཞུས་ཡོད། སྲིད་འཛིན་མཆོག་གིས་དམིགས་ཀར་ཐོག་བོད་རྒྱའི་དབར་མི་མཐུན་པ་དེ་དག་ཐད་ཀར་གྲོས་མོལ་གྱི་ལམ་ནས་སེལ་ཐབས་དགོས་པ་ཕྱོགས་གཉིས་ཀར་རྒྱུན་སྲིང་ནས་རྒྱབ་སྐྱོར་ཞུས་ཡོད་པ་དང་། ཉེ་ལམ་བོད་རྒྱ་གྲོས་མོལ་བསྐྱར་གསོ་བྱུང་བའི་གནས་ཚུལ་གོ་ཐོས་བྱུང་བར་སྲིད་འཛིན་མཆོག་ཐུགས་དགྱེས་ཚོར་ཆེན་པོ་བྱུང་ཡོད་སྐོར་གསུངས་ཡོད། ཨ་རི་དང་རྒྱ་ནག་དབར་བཟང་ཕྱོགས་ཀྱི་མཐུན་ལམ་དེ་གལ་ཆེ་ཡིན་པར་བོད་ཀྱི་༸སྐྱབས་མགོན་ཏཱ་ལའི་བླ་མ་དང་སྲིད་འཛིན་རྣམ་གཉིས་ཀྱིས་མོས་མཐུན་གནང་ཡོད།
