༢༠༡༠ ཕྱི་ཟླ་ ༢ ཚེས་ ༡༩ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༢ ཚེས་ ༡༨ ཉིན་ཨ་རིའི་ཕོ་བྲང་དཀར་པོའི་ནང་སྲིད་འཛིན་ཨོ་བྷ་མ་མཆོག་དང་༸གོང་ས་མཆོག་མཇལ་འཕྲད་གནང་བའི་ཐོག་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་ (Nancy Pelosi) མཆོག་གིས་གཏམ་བཤད་གནང་དོན། ངས་སྲིད་འཛིན་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་གནང་བར་བསྔགས་བརྗོད་ཞུ་རྒྱུ་ཡིན། ༸གོང་ས་ཏཱ་ལའི་བླ་མ་མཆོག་ནི་ཞི་བདེ་དང་འཚེ་བ་མེད་པར་རྒྱབ་སྐྱོར་གནང་མཁན་ཞིག་དང། འགྲོ་བ་མིའི་རིགས་སྤྱི་ཡོངས་ཀྱི་ཆེ་མཐོང་དང་དྲང་བདེན་ཆེད་རྒྱབ་སྐྱོར་གནང་མཁན་དང་གུས་བརྩི་ཞུ་མཁན་ཞིག་ཡིན། ༸གོང་ས་ཏཱ་ལའི་བླ་མ་མཆོག་ནི་བྱམས་བརྩེ་དང་རིག་པའི་བྱུང་གནས་ཤིག་ཡིན། མི་ཚང་མའི་ལྷན་སྐྱེས་སུ་ཡོད་པའི་རིན་ཐང་ཞིག་མཚོན་པ་དང་། བཟང་སྤྱོོད་ཀྱི་འོས་འགན་ཐོག་བཀའ་སློབ་གནང་མཁན་གྱི་རླབས་ཆེན་གྱི་མགྲིན་ཚབ་པ་ཞིག་དང་། འཛམ་གླིང་ཁྱོན་ཡོངས་ལ་འགྲོ་བ་མིའི་ཐོབ་ཐང་གི་ནུས་ཤུགས་གོང་འཕེལ་གཏོང་གནང་མཛད་མཁན་ཞིག་ཀྱང་ཡིན། སྲིད་འཛིན་ཨོ་བྷ་མས་༸གོང་ས་ཏཱ་ལའི་བླ་མ་མཆོག་དང་ལྷན་མཇལ་འཕྲད་གནང་བ་དེས་ཨ་རི་དང་བོད་མི་ཚོའི་དབར་ཡུན་རིང་ནས་ཡོད་པའི་སེམས་ཐག་ཉེ་བའི་མཛའ་བརྩེའི་འབྲེལ་ལམ་ཐོག་ལེའུ་གསར་པ་ཞིག་ཁ་སྣོོན་གནང་ཡོེད། ཨ་རི་བ་ཞིག་ཡིན་པའི་ཆ་ནས་ང་ཚོས་འགྲོ་བ་མིའི་ཐོབ་ཐང་སྲུང་སྐྱོབ་བྱེད་རྒྱུ་དང་། གོང་མཐོར་གཏོང་རྒྱུ། དེ་བཞིན་བདག་གཅེས་ཡོང་རྒྱུར་༸གོང་ས་ཏཱ་ལའི་བླ་མ་མཆོག་ལ་མུ་མཐུད་རྒྱབ་སྐྱོར་ཞུ་དགོས་པ་རེད་ཅེས་གཏམ་བཤད་གནང་ཡོད།
