༢༠༡༠ ཕྱི་ཟླ་ ༢ ཚེས་ ༢༤ རེས་གཟའ་ལྷག་པ།

༄༅། །ཕྱི་ལོ་ ༢༠༡༠ ཟླ་ ༢ ཚེས་ ༢༣ ཉིན་༸གོང་ས་མཆོག་གིས་ཨ་རིའི་མངའ་སྡེ་ཕོ་ལོ་རི་ཌའི་མཛད་འཆར་གྱི་ཉིན་དང་པོར་གོ་ལའི་སྤྱི་ཚོགས་ནང་བྱམས་བརྩེའི་ནུས་པ་ (The Effect of Compassion on the Global Community) ཞེས་པའི་བརྗོད་གཞིའི་ཐོག་མང་ཚོགས་བཀའ་སློབ་སྩོལ་ཆེད་ཚོགས་ཁང་ཆེན་མོར་ཆིབས་སྒྱུར་སྐྱོང་སྐབས་ནོ་་ལྷོ་ཤར་གཙུག་ལག་སློབ་གཉེར་ཁང་ (Nova Southeastern University) གི་རིགས་བདག་ (Chancellor) སྐུ་ཞབས་རེ་ཕེར་རེ་རོ་ (Ray Ferrero) ལགས་ཀྱིས་༸གོང་ས་མཆོག་ལ་ཕེབས་བསུའི་གསུང་བཤད་གནང་། དེ་རྗེས་མགོན་པོ་གང་ཉིད་མཆོག་གིས་མང་ཚོགས་ལ་འཚམས་འདྲི་མཛད་པ་དང་སྦྲགས་བཀའ་སློབ་བཀའ་དྲིན་སྩལ་ཡོད། སྐབས་དེར་མགོན་པོ་གང་ཉིད་བཙན་བྱོལ་དུ་ལོ་ ༥༠ ཙམ་བཞུགས་རིང་འཛམ་གླིང་གི་མི་སྣ་འདྲ་མིན་དང་ཐུག་རྒྱུའི་གོ་སྐབས་གསར་པ་ཞིག་ཐོབ་ཡོད་པ་དང་དཀའ་ངལ་གྱི་དུས་སྐབས་དེས་གོ་སྐབས་གསར་པ་ཞིག་བསྐྲུན་ཡོད་སྐོར་བཀའ་སྩལ། སྐབས་དེར་༸གོང་ས་མཆོག་གིས་རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་ནང་། གལ་ཏེ་བཅོས་སུ་ཡོད་ན་ནི་དེ་ལ་མི་དགའ་སུ་ཞིག་ཡོད། ཅི་སྟེ་བཅོས་སུ་མེད་ན་ནི་དེ་ལ་མི་དགའ་བྱེད་ཅི་ཕན། ཞེས་པའི་ཚིགས་བཅས་དེ་ལུང་འདྲེན་མཛད། དེ་བཞིན་དཀའ་ངལ་མང་པོ་ཞིག་ང་ཚོ་རང་གིས་བཟོས་པ་ཞིག་ཡིན་པ་དང་དཀའ་ངལ་དེ་དག་གི་གཉེན་པོ་དེ་ཡང་བྱམས་བརྩེའི་བསམ་པ་བཟང་པོས་བསྟེན་ཐུབ་ཀྱི་ཡོད་སྐོར་བཀའ་སྩལ། དེ་བཞིན་༸གོང་ས་མཆོག་གིས་གོ་མཚོན་ཕྱིར་བསྡུ་བྱེད་རྒྱུ་དེ་གལ་ཆེ་ཡིན་པ་དང་ཕྱིའི་གོ་མཚོན་ཕྱིར་བསྡུ་བྱེད་པར་དང་པོ་ནང་གི་གོ་མཚོན་ཕྱིར་བསྡུ་དགོས་སྐོར་བཀའ་སྩལ། དེ་མཚུངས་༸གོང་ས་མཆོག་གིས་དངོས་ཡོད་གནས་ཚུལ་གང་ཡིན་གསལ་པོ་ཤེས་རྒྱུར་སེམས་ཉོན་མོངས་ཀྱིས་གཞན་དབང་དུ་མ་སོང་བར་ཞི་བདེ་བག་ཕེབས་ཀྱི་བསམ་བློ་ཞིག་དགོས་པ་དེ་གལ་ཆེན་པོ་ཡིན་སྐོར་གྱི་བཀའ་སློབ་སྩལ། ཕྱི་ཚེས་ ༢༤ ཉིན་༸གོང་ས་མཆོག་གི་ཨ་རིའི་མཛད་འཆར་གྱི་ཉིན་མཐའ་མར་ཕོ་ལོ་རི་ཌའི་ཨེཊ་ལེན་ཊེའི་གཙུག་ལག་སློབ་ཁང་ Florida Atlantic University དུ་སྔ་དྲོ་ཆུ་ཚོད་ ༡༠ ནས་ ༡༡།༣༠ བར་བྱམས་བརྩེ་ནི་འཛམ་གླིང་ཞི་བདེའི་ཀ་བ་ལྟ་བུ་ཡིན། ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་གནང་མཛད་རྒྱུ་ཡིན་པ་བཅས།།