༢༠༡༠ ཕྱི་ཟླ་ ༢ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༢༨ ཚེས་ ༣༠ བར་ཉིན་གྲངས་གསུམ་རིང་བོད་གཞུང་ཤེས་རིག་ལས་ཁུངས་ནས་གོ་སྒྲིག་ཐོག་སློབ་གྲྭའི་འགན་འཛིན་ཁག་གཅིག་ལ་དམིགས་བསལ་ཤེས་ཡོན་གྱི་ཟབ་སྦྱོང་ཞིག་ས་ར་མཐོ་སློབ་ཏུ་ཚོགས་ཡོད། དེ་ཡང་ཚེས་ ༣༠ ཉིན་རྒྱབ་མཇུག་བསྡོམས་མཛད་སྒོའི་སྐུ་མགྲོན་གཙོ་བོ་འཕྲོད་བསྟེན་བཀའ་བློན་མཆོག་དང་། དེ་བཞིན་ཟབ་སྦྱོང་བ་རྣམས་ཚོགས་ཁང་དུ་ལྷན་འཛོམས་ཀྱི་ཐོག་མར་ཤེས་ཡོན་འགན་འཛིན་ཚེ་རིང་ཕུན་ཚོགས་ལགས་ན
ས་ཟབ་སྦྱོང་ལྷུག་པོ་བྱུང་བའི་སྐོར་ངོ་སྤྲོད་གནང་བ་དང་། དེ་རྗེས་སེ་ལ་ཀུ་བོད་ཁྱིམ་སློབ་སྤྱི་འབྲུག་ཚེ་རིང་ལགས་དང་། ཅོན་ཏ་ར་སམ་བྷོ་ཊའི་སློབ་སྤྱི་དོན་གྲུབ་རྡོ་རྗེ་ལགས་ནས་ཟབ་སྦྱོང་ཇི་ལྟར་བྱུང་ཡོད་པའི་སྐོར་བརྗོད་པ་དང་། དེ་ནས་སློབ་ཁྲིད་གནང་མཁན་དབྱིན་ཡུལ་ནས་ཡིན་པ་དམིགས་བསལ་ཤེས་ཡོན་ཐད་ཉམས་མྱོང་ཅན་ལྕམ་སྐུ་ནི་ཀོ་ལ་ལགས་ཀྱིས་མཐུན་རྐྱེན་འཛོམས་པའི་ཕྱི་རྒྱལ་སྤྱི་ཚོགས་ལས་སྐྱབས་བཅོལ་གྱི་སྤྱི་ཚོགས་འདི་ནས་ཁོང་རང་ཉིད་ལ་ཉམས་མྱོང་ཕུན་སུམ་ཚོགས་པ་ཐོབ་སྐོར་སོགས་ཀྱི་གསུང་བཤད་གནང་། དེ་རྗེས་འཕྲོད་བསྟེན་བཀའ་བློན་མཆོག་གིས་ཟབ་སྦྱོང་བ་རྣམས་ལ་ཕྱག་འཁྱེར་གནང་གྲུབ་རྗེས་གསུང་བཤད་གནང་དོན། སློབ་གྲྭའི་སློབ་སྤྱི་རྣམ་པ་དང་ལྕམ་སྐུ་ནི་ཀོ་ལ། བོད་ཁྱིམ་གྱི་འགན་འཛིན་རྣམ་པ་བཅས་ཚང་མར་ངས་འཚམས་འདྲི་ཞུ་གི་ཡིན། དེ་རིང་ཁྱེད་རྣམ་པ་ཚོས་འདིར་དབྱིན་སྐད་ནང་ གྲརྣཏྲརྡསྤྱཔྲདྲསྤྲྟབྱ ྟརྟསྤྱཏྲཌྷྤདྲྣརྣ ཟེར་གྱི་ཡོད། བོད་སྐད་ནང་གང་ལྟར་སློབ་ཕྲུག་ཚོའི་ཆེད་ཚང་མ་ཚུད་པའི་ཟབ་སྦྱོང་ལ་རྣམ་པ་ཚོས་མཉམ་ཞུགས་གནང་སྟེ་ཆ་ཤས་ལེན་རྒྱུའི་གོ་སྐབས་ལེན་གནང་ཡོད། གོང་དུ་ལྕམ་སྐུ་ནི་ཀོ་ལས་གསུང་བཤད་གནང་བ་དང་རྣམ་པ་ཚོས་ཉམས་མྱོང་གསུངས་བ་རྣམས་ལ་ལྟ་སྐབས་ཚད་ཚུགས་པོ་བྱུང་འདུག ང་རང་སྔོན་མ་དགེ་རྒན་ཡིན་ལ་ངས་བདམས་པའི་སློབ་ཚན་ཡང་དགེ་རྒན་རེད། དེ་བཞིན་ས་མཚམས་ཁག་གི་སློབ་གྲྭའི་ནང་དགེ་རྒན་དང་དགེ་ཆེའི་འགན་ཁུར་མྱོང་ཡོད། དེར་བརྟེན་རྣམ་པ་ཚོས་ལས་ཀ་བྱེད་སྐབས་དཀའ་ངལ་དང་རེ་བ། ཕྱོགས་མཚུངས་དམིགས་ཡུལ་རྣམས་ངས་རོབ་ཙམ་ཞིག་རྟོགས་ཐུབ་ཀྱི་འདུག དེ་རིང་གི་གོ་སྐབས་འདི་ཟིན་ནས་སྤྱིར་བཏང་གི་ཤེས་ཡོན་ཐོག་ཚིག་ཁ་ཤས་ཤིག་ཞུ་འདོད་བྱུང་། ང་ཚོ་བོད་མི་རིགས་འདི་གསོན་པོར་གནས་དགོས་ཀྱི་ཡོད་ན། གསོན་པོར་གནས་རྒྱུར་བོད་མི་ཤེས་ཡོན་དང་ལྷག་བསམ་ལྡན་པའི་མི་ཐོག་དེ་འདྲ་འཚར་ལོངས་བྱེད་དགོས་ཀྱི་ཡོད་པར་བརྟེན། ཁྱེད་རྣམས་སློབ་གྲྭའི་དགེ་རྒན་དང་དབུ་འཛིན་ཡིན་པའི་ཆ་ནས་མ་འོངས་པའི་ན་གཞོན་དེ་དག་ལ་མི་རིགས་ཀྱི་ཞེན་ཁོག་དང་སྙིང་སྟོབས། དེ་བཞིན་ཤེས་ཡོན་གྱི་ཆུ་ཚད་ལྷག་བསམ་དང་རྣམ་དཔྱོད་དེ་དག་ཡོང་རྒྱུ་ནི་སློབ་གྲྭའི་དབུ་འཛིན་དང་དགེ་རྒན་ལ་རག་ལུས་ཡོད་སྟབས་ཁྱེད་རྣམ་ཧ་ཅང་གལ་འགངས་ཆེན་པོ་ཆགས་ཡོད།
ང་རང་ལ་ཆ་མཚོན་ན། སྔོན་མ་སློབ་གྲྭའི་དགེ་རྒན་བྱེད་སྐབས་ཤེས་ཡོན་ནི་གང་འདྲ་ཞིག་ལ་ཟེར་གྱི་ཡོད་པ་དེ་དོ་སྣང་བྱས་ཏེ་བསམ་བློ་གཏོང་མྱོང་ཡོད། ཤེས་ཡོན་ཟེར་བ་དེ་རྒྱལ་ཁབ་དང་མི་རིགས་ཀྱི་སྐབས་དང་དུས་ལ་དགོས་མཁོ་དང་བསྟུན་པའི་སློབ་སྦྱོང་ཐོབ་པ་ཞིག་ཤེས་ཡོན་ཆགས་ཀྱི་འདུག དཔེར་ན། ཇར་མན་གྱི་དམག་ཆེན་གཉིས་པའི་གཡས་གཡོན་ལ་ཤེས་ཡོན་དེ་དག་དམག་དོན་གྱི་སྒྱུ་རྩལ་ལ་ཧ་ཅང་མཁས་པོ་དང་གཞན་སྡེ་རྣམ་པར་གནོན་པའི་ཐབས་ལམ་ཡོད་པ་ཞིག་ལ་ཤེས་ཡོན་ལྡན་པའི་རྣམ་དཔྱོད་ཅིག་ཆགས་ཀྱི་ཡོད། དམག་ཆེན་གཉིས་པའི་རྗེས་ལ་ཇར་མན་ལ་ཆ་བཞག་ན། རྒྱལ་ཁབ་ཕལ་ཆེར་ཉམས་རྒུད་འགྲོ་རྒྱུ་གཞི་རྩ་ཆགས་པའི་གནས་སྐབས་ལ་དེར་དེ་གསོ་རྒྱུའི་ཆ་རྐྱེན་ལ་གནའ་དེང་གི་ཤེས་ཡོན་ཟུང་འབྲེལ་ཐོག་དེང་དུས་ཀྱི་ཚན་རིག་དང་འཕྲུལ་རིགས་ལ་ཤུགས་བརྒྱབ་སྟེ་ད་ལྟའི་རྒྱལ་ཁབ་གང་ཡིན་པ་འདི་ཆགས་ཡོད། དེར་བརྟེན་སློབ་གྲྭའི་དགེ་རྒན་དང་འགན་འཛིན་རྣམ་པ་ཚོས་མི་རིགས་གང་དང་གང་ཡིན་རུང་དེའི་སྒྲོམ་གཞི་འཛུགས་སྐྲུན་བྱེད་མཁན་གྱི་མི་སྣ་ཆགས་ཡོད་རྐྱེན་ཁྱེད་རྣམ་པའི་ལས་ཀ་དེ་ཧ་ཅང་གལ་ཆེན་པོ་འདི་ཆགས་ཡོད། བོད་མི་རིགས་གསོན་པོར་གནས་དགོས་པ་ཙམ་མ་ཡིན་པར་འཛམ་གླིང་འདིའི་ནང་འགྲན་བསྡུར་གཏོང་ཐུབ་མཁན་གྱི་མི་རིགས་ཤིག་འཚར་ལོངས་བྱེད་དགོས་ཀྱི་ཡོད་ན། སློབ་གྲྭ་ཁག་གི་ནང་ནས་འཚར་ལོངས་བྱེད་དགོས་ཀྱི་ཡོད་པ་རེད། སློབ་གྲྭའི་ནང་ནས་འཚར་ལོངས་བྱེད་དགོས་སྐབས་དེའི་ནང་ལ་ཐུགས་འགན་བཞེས་མཁན་ཁྱེད་རྣམས་ཆགས་ཡོད། ང་ཚོས་བོད་མི་ཤེས་ཡོན་ཅན་ཟེར་མཁན་དེ་ཤེས་རབ་ཀྱི་རྩལ་རྒྱས་པ་དང་གཞན་ཕན་བསྒྲུབ་རྒྱུའི་ལག་ཆ་ཚང་ཡོད་མཁན་ཞིག་ལ་གོ་དགོས་ཀྱི་འདུག ད་ལྟའི་གནས་སྐབས་ང་ཚོ་བོད་མི་རིགས་ལ་ཛ་དྲག་གི་དཀའ་ངལ་འཕྲད་ཡོད་པར་བརྟེན། གོང་དུ་ཞུས་པ་ལྟར་ཐབས་ཤེས་ཟུང་འབྲེལ་གྱི་བསམ་བློའི་ཐོག་དེང་དུས་ཀྱི་ཆ་རྐྱེན་ཆ་ཚང་བ་ཞིག་དགོས་ཀྱི་ཡོད་སྟབས། མིའི་ནུས་པ་དང་ཤེས་ཡོན་ལ་རྟེན་ནས་ང་ཚོ་ཡར་རྒྱས་འགྲོ་དགོས་རྒྱུ་དེ་ཧ་ཅང་གལ་ཆེན་པོ་ཆགས་ཡོད་པ་རེད་སྙམ་གྱི་ཡོད། ང་རང་ཚོ་བོད་པའི་ཤེས་ཡོན་གྱི་གཞི་འཇོག་ས་དེ་ནང་ཆོས་ཆགས་ཡོད། བཅོམ་ལྡན་འདས་ཀྱིས་གདུལ་བྱ་རྣམས་ལ་བཀའ་སྩོལ་སྐབས་ཐེག་པ་རིམ་པ་གསུམ་སྐོར་གནང་བ་དེ་མིའི་ཁམས་དང་མོས་པར་བརྟེན་ནས་བཀའ་ཆོས་གསུངས་ཡོད་པ་མ་ཟད། ཀུན་ལ་ཕན་རྒྱུའི་ཆེད་བཀའ་སྩལ་ཡོད་པ་བརྟེན་ གྲརྣཏྲརྡསྤྱཔྲདྲསྤྲྟ ཞེས་པ་དེ་དེའི་ནང་ཏན་ཏན་ཚུད་ཡོད་པ་རེད་སྙམ་གྱི་འདུག ད་ལྟ་ནི་ཀོ་ལ་ལགས་ཀྱིས་ལམ་སྟོན་གནང་བ་དེ་དག་ང་ཚོའི་སློབ་གྲྭའི་ནང་གནད་འགག་ཆེན་པོ་ཆགས་ཡོད། དཔེར་ན། སློབ་ཕྲུག་གཅིག་སློབ་གྲྭའི་ནང་སློབ་མ་གཞན་ལས་སྐྱོ་བ་མེད་ཀྱང་ལུས་པོའི་གནས་སྟངས་ཀྱི་ཆ་ནས་དཀའ་ངལ་འཕྲད་དེ་ང་ཚོའི་སློབ་གྲྭའི་སྤྱི་ཚོགས་ནང་མ་ཚུད་པ་ཡིན་ན་སེམས་ཕངས་པོ་རེད། རིགས་དེ་དག་ད་ལྟ་ཐབས་ལམ་དེ་འདྲའི་ལམ་ནས་སློབ་གྲྭའི་ནང་འདྲ་མཉམ་གྱི་ཐོག་ནས་འགྲན་བསྡུར་གཏོང་ཐུབ་རྒྱུ་དང། ལྷག་པར་ལུས་ལ་ཞན་ཆ་ཡོད་ནའང་སེམས་བབ་ཆ་ནས་གཞན་ལ་འགྲན་བསྡུར་བཏང་བ་མ་ཟད། རྒྱལ་ཁ་ཐོབ་རྒྱུའི་ཆ་རྐྱེན་སྐྲུན་ཐུབ་པ་ཡིན་ན། ཕྲུ་གུ་དེ་དག་གི་སེམས་ལ་དགའ་ཚོར་དང་སྤོབས་པ་ཡོང་ངེས་ཡིན། ང་རང་ལ་སློབ་གྲྭའི་དགེ་རྒན་གྱི་ཉམས་མྱོངས་ཕྲན་བུ་ཡོད། ཕྲུ་གུ་ཁ་ཤས་གཟུགས་པོ་གནས་སྟངས་ཡག་པོ་ཡོད་ཀྱང་འཛིན་གྲྭའི་ནང་དོ་སྣང་སྤྲོད་ཐུབ་ཀྱི་མེད་པ་ཡིན་ན། ཁྱིམ་ཚང་ནང་དཀའ་ངལ་ཡོད་པ་ཡིན་ནའང་འདྲ། གང་ལྟར་འཛིན་གྲྭའི་ནང་དགེ་རྒན་གྱི་སློབ་ཁྲིད་བྱས་པ་དེ་དག་ཀླད་པའི་ནང་འཇུག་མ་ཐུབ་པ་དེ་འདྲ་ཡོང་གི་ཡོད། དེའི་རིགས་ཡན་ལག་དང་གཟུགས་པོ་ལ་སྐྱོན་ཆ་ཡོད་པ་ཞིག་མ་རེད། ནང་དོན་སྟེས་དབང་གི་རྐྱེན་བྱས་ཏེ་སློབ་སྦྱོང་སེམས་རྒྱུད་ལ་གནས་རྒྱུའི་དཀའ་ངལ་ཞིག་འཕྲད་ཀྱི་ཡོད་ཙང་། དེའི་རིགས་ལ་དགེ་རྒན་རྣམས་ནས་དམིགས་བསལ་གྱི་དོ་སྣང་བྱ་རྒྱུར་སློབ་སྤྱི་རྣམས་ཀྱིས་ནན་སྐུལ་བྱེད་དགོས་པ་ཞིག་ཡིན། ནི་ཀོ་ལ་ལྟ་བུར་ཆ་བཞག་ན་མངོན་དགའ་སློབ་གྲྭར་རོགས་པ་གནང་གི་ཡོད་པ་དེ་བཀའ་དྲིན་ཆེན་པོ་དང་ཡག་པོ་ཞེ་དྲག་ཡིན། ངས་ཁོང་ལ་ཐུགས་རྗེ་ཆེ་ཞུ་རྒྱུ་དང་ཆབས་ཅིག་ད་རེས་རྣམ་པ་ཚོས་ཟབ་སྦྱོང་ཡག་པོ་བྱུང་བའི་རྣམ་འགྱུར་མངོན་གྱི་འདུག གང་ལྟར་ཁྱེད་རྣམས་ཀྱིས་བོད་མི་རིགས་ཀྱི་རྩ་དོན་ཐོག་ལ་ཞབས་འདེགས་ཆེན་པོ་སྒྲུབ་ཀྱི་ཡོད་པར་བརྟེན། བོད་རིགས་གཞོན་སྐྱེས་ཚོའི་བསམ་བློའི་ནང་བོད་པ་ཡིན་བསམ་པའི་སྤོབས་པ་སླེབས་ཐུབ་རྒྱུ་ཞིག་དང་བོད་མི་རིགས་ཀྱི་ཆེད་དུ་ཞབས་འདེགས་སྒྲུབ་དགོས་བསམ་པའི་སེམས་ཤུགས་སླེབས་རྒྱུར་སྐུལ་ལྕག་གནང་རོགས་ཞེས་ཞུ་རྒྱུ་ཡིན། ཞེས་གསུང་བཤད་གནང་ཡོད། དེ་རྗེས་དྲུང་ལས་སྐལ་བཟང་རིན་ཆེན་ལགས་ནས་ཐུགས་རྗེ་ཆེ་ཞུས་གནང་ཡོད་པ་བཅས་སོ།། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
