༢༠༡༠ ཕྱི་ཟླ་ ༢ ཚེས་ ༢༢ རེས་གཟའ་ཟླ་བ།
༄༅། །ནང་སྲིད་ལས་ཁུངས་ནས་བཏང་གནས་ནང་འཁོད་དོན། བོད་མིའི་བཅའ་ཁྲིམས་ལེའུ་བདུན་པའི་ནང་གསེས་ལྔ་པའི་ནང་ས་གནས་འགོ་འཛིན་ས་གནས་མང་ཚོགས་ནས་འོས་འདེམས་བསྐོ་གཞག་བྱ་རྒྱུ་ནི་དགོངས་གཞི་བླ་ན་མེད་པ་ཞིག་ཡིན་པ་ལྟར། ད་ལམ་ལ་དྭགས་སླེ་བྱང་རང་གཞུང་ས་གནས་འགོ་འཛིན་ས་གནས་མི་མང་ནས་འདེམས་བསྐོ་བྱེད་རྒྱུའི་ལས་རིམ་མཐའ་མ་ཕྱི་ལོ་ ༢༠༠༩ ཟླ་ ༡ ཚེས་ ༡༥ ཉིན་དངོས་གཞིའི་འོས་འཕེན་དོན་འབྲས་སུ་དོན་གྲུབ་བཀྲིས་ལགས་འོས་འདེམས་བསྐོ་གཞག་བྱུང་བར་ཕྱི་ལོ་ ༢༠༡༠ ཟླ་ ༡ ཚེས་ ༡༥ ནས་དངོས་སུ་ལས་འགན་འགོ་འཛུགས་ཞུས་ཡོད།
ཁོང་གི་ལོ་རྒྱུས་སྙིང་བསྡུས་ནི། ཁོང་དེ་སྔ་ལ་དྭགས་བོད་ཁྱིམ་ནས་གཞི་རིམ་འཛིན་གྲྭ་བཅུ་པ་བར་སློབ་སྦྱོང་གནང་བ་དང་། དེ་ནས་རྡ་ས་བོད་ཁྱིམ་དུ་འཛིན་གྲྭ་བཅུ་གཉིས་བར་སློབ་སྦྱོང་གནང་འདུག དེ་རྗེས་ཅན་ལྡི་སྒར་མཐོ་སློབ་ཏུ་འཛིན་གྲྭ་བཅུ་བདུན་བར་སློབ་སྦྱོང་གནང་འདུག་པ་མ་ཟད། དགེ་རྒན་འོས་སྦྱོང་ཡང་ཐོན་འདུག དེ་ནས་བྷོམ་བྷེ་ནས་གསར་འགོད་པའི་སློབ་སྦྱོང་ཐོན་འདུག ལས་རིགས་ཀྱི་ཉམས་མྱོང་ནི། ཅན་ལྡི་སྒར་ས་གནས་གཞོན་ནུའི་རྒྱུན་ལས་ལོ་གཅིག་དང་། དེ་ནས་ལ་དྭགས་ས་གནས་གཞོན་ནུའི་ཚོགས་གཞོན་ལོ་གསུམ། བོད་ཁྱིམ་སྤྱི་ཚོགས་ཞབས་ཞུ་ཚོགས་ཆུང་གི་ཚོགས་གཙོ་དང་བདེ་འཇགས་ཚོགས་གཙོ་ལོ་གཅིག བོད་ཁྱིམ་དབྱིན་སྐད་དུས་དེབ་ (Our Voice) གསར་འདོན་བྱས་ནས་ལོ་དྲུག་རིང་རྩོམ་སྒྲིག་འགན་ཁུར་བྱས་པ་དང་། དེ་རྗེས་ལ་དྭགས་བོད་ཁྱིམ་སློབ་གྲྭ་ཆེ་བའི་ནང་དགེ་རྒན་ལོ་བཅུ་བཞི་རིང་གནང་མྱོང་བ་མ་ཟད། ལམ་སྒྲོན་སློབ་གྲྭ་ཆེ་བའི་ནང་ལོ་གཉིས་རིང་སློབ་དཔོན་གྱིས་ཕྱག་ལས་གནང་འདུག ལམ་སྒྲོན་སློབ་གྲྭའི་དགེ་རྒན་རྣམས་ལ་རྒྱ་གར་རྒྱལ་ཡོངས་ཤེས་ཡོན་སྲིད་བྱུས་གསར་པའི་ཟབ་སྦྱོང་སྤྲད་པ་སོགས་ཀྱི་ཉམས་མྱོང་བསགས་གནང་འདུག་པ་བཅས།
