༢༠༡༠ ཕྱི་ཟླ་ ༢ ཚེས་ ༣ རེས་གཟའ་ལྷག་པ།
བོད་རྒྱ་འབྲེལ་མོལ་ཐེངས་དགུ་པའི་༸གོང་ས་མཆོག་གི་སྐུ་ཚབ་རྣམ་པས་རྡ་སར་གསར་འགོད་གསལ་བསྒྲགས་གནང་བཞིན་པ།
སྐུ་ཚབ་སྐལ་བཟང་རྒྱལ་མཚན་ལགས་ང་གཉིས་དང་མཉམ་དུ་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་མི་ཨ་ཏི་ཤ་བསྟན་འཛིན་ཕུན་ཚོགས་ལགས་དང་བུ་ཆུང་ཚེ་རིང་ལགས། (བཀའ་ཡིག་)བོད་རྒྱ་ཞི་མོལ་སྡེ་ཚན་གྱི་འཇིགས་མེད་པ་སངས་ལགས་བཅས་ང་ཚོ་རྒྱ་ནག་གཞུང་གི་སྐུ་ཚབ་རྣམས་དང་འབྲེལ་མོལ་ཐེངས་དགུ་པ་བྱེད་ཆེད་ཕྱི་ལོ་ ༢༠༡༠ ཟླ་ ༡ ཚེས་ ༢༦ ནས་ ༣༡ བར་རྒྱ་ནག་ཏུ་བསྐྱོད་པ་ཡིན། ཐེངས་འདིའི་འབྲེལ་མོལ་ནི་འབྲེལ་མོལ་སྔ་མ་བསྐྱངས་ཏེ་དུས་ཡུན་ཟླ་གྲངས་ ༡༥ སོང་བའི་རྗེས་སུ་བྱུང་བ་ཞིག་རེད། ང་ཚོ་བཞུགས་སྒར་རྡ་རམ་ས་ལར་ཕྱི་ལོ་ ༢༠༡༠ ཟླ་ ༢ ཚེས་ ༡ ཉིན་ཕྱིར་འཁོར་བྱུང་བ་དང་། དེ་འཕྲལ་༸གོང་ས་༸སྐྱབས་མགོན་ཆེན་པོ་མཆོག་དང་། བཀའ་ཁྲི་ཟམ་གདོང་རིན་པོ་ཆེ་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ་བཅས་ལ་རིམ་བཞིན་ཐེངས་འདིའི་འབྲེལ་མོལ་སྐོར་གནས་ཚུལ་སྙན་གསོལ་ཞུས་པ་ཡིན།
ང་ཚོས་པེ་ཅིང་དུ་ཕྱི་ཟླ་ ༡ ཚེས་ ༣༠ ཉིན་རྒྱ་ནག་རྒྱལ་ཡོངས་ཆབ་སྲིད་གྲོས་མོལ་ཚོཌ་འདུའི་གཙོ་འཛིན་གཞོན་པ་དང་། དབུས་འཐབ་ཕྱོགས་གཅིག་གྱུར་ལས་ཁང་གི་བློན་ཆེན་ཏུའུ་ཆིང་ལིན་མཉམ་ཟུར་ཚོགས་དང་། ཕྱི་ཚེས་ ༣༡ ཉིན་འཁྱོངས་དབུས་(འཐབ་ཕྱོགས་གཅིག་གྱུར་ཁང་གི་)རྒྱུན་ལས་བློན་ཆེན་གཞོན་པ་ཀྲུའུ་འེ་ཆུན་དང་བློན་ཆེན་གཞོན་པ་སྲི་ཐར་ལྷན་གྲོས་བསྡུར་བྱས་ཤིང་། སྐབས་དེ་དག་ཏུ་བོད་རང་སྐྱོང་ལྗོངས་ཟེར་བའི་མི་དམངས་འཐུས་མིའི་ཚོགས་འདུའི་འགོ་འཛིན་གཞོན་པ་ཉི་མ་ཚེ་རིང་ཡང་མཉམ་ཞུགས་བྱས་ཡོད།
ང་ཚོ་ཐོག་མར་ཧུའི་ནན་ཞིང་ཆེན་གྱི་རྒྱལ་ས་ཁྲང་ཧྲར་ཕྱི་ཟླ་ ༡ ཚེས་ ༢༦ ཉིན་འབྱོར་བ་དང་། དེར་ང་ཚོའི་ལས་དོན་ཞུ་སྒོ་ཁག་འགོ་འཛུགས་མ་ཞུས་གོང་དེ་སྔ་ཕྱི་ལོ་ ༢༠༠༨ ཟླ་ ༡༡ པར་འབྲེལ་མོལ་ཐེངས་བརྒྱད་པ་བསྐྱངས་སྐབས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཕུལ་བ་དང་འབྲེལ་ཆགས་འགྲེལ་བརྗོད་ཡིག་ཆ་ཞིག་དབུས་འཐབ་ཕྱོགས་གཅིག་གྱུར་ལས་ཁང་ལ་འབུལ་ལམ་ཞུས་ཤིང་། འགྲེལ་བརྗོད་དེའི་ནང་དོན་ཚན་བདུན་འཁོད་ཡོད་པ་དེ་དག་གིས་འབྲེལ་མོལ་ཐེངས་བརྒྱད་པའི་སྐབས་རྒྱ་ནག་གི་འགོ་ཁྲིད་ཚན་ཁག་ནས་བཏོན་པའི་གཞི་རིམ་གྱི་གནད་དོན་ཁག་གི་ཐོག་གསལ་བཤད་དང་སྦྲགས།
(ད་ཡོད་)འབྲེལ་མོལ་གྱི་ལས་རིམ་འདི་དག་འབྱུང་འགྱུར་ལམ་ཕྱོགས་གང་འདྲ་ཞིག་ཏུ་བསྐྱོད་དགོས་བརྡ་སྟོན་བྱེད་པའི་སྒྲུབ་ཕྱོགས་ཀྱི་བསམ་འཆར་འགའ་ཤས་བཏོན་ཡོད། དོན་ཚན་བདུན་པོ་དེ་དག་ནི། ༡ རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བདག་དབང་དང་ས་ཁྱོནགཅིག་གྱུར་ལ་ཆ་འཛིན། ༢ རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ལ་ཆ་འཛིན། ༣རྒྱུན་འཁྱོངས་གསུམ་ལ་ཆ་འཛིན། ༤ རྒྱ་ནག་དབུས་གཞུང་གི་དབང་ཚད་དང་གོ་རིམ་ལ་ཆ་འཛིན། ༥བསམ་འཆར་ནང་གསལ་བའི་གནད་དོན་བྱེ་བྲག་པ་དང་འབྲེལ་བའི་རྒྱ་ནག་དབུས་གཞུང་གི་ཐུགས་འཚབ་ཁག ༦ ངོས་འཛིན་དགོས་པའི་གཞི་རྩའི་གནད་དོན། ༧༸གོང་ས་མཆོག་གི་མཐུན་འགྱུར་སོགས་ཚུད་ཡོད། གོང་གསལ་ཚིག་ཐོའི་ནང་༸གོང་ས་༸སྐྱབས་མགོན་ཆེན་པོ་མཆོག་དང་། བཙན་བྱོལ་གཞུང་གི་འགོ་ཁྲིད་མི་སྣ་གཞན་དག་ལ་སྒེར་གྱི་དགོས་འདུན་ཞུ་འཆར་གང་ཡང་མེད་པ་གསལ་སྟོན་བྱས་ཡོད། ༸གོང་ས་མཆོག་གི་ཐུགས་འཚབ་གནང་གཞི་(གཙོ་བོ་)ནི་བོད་རྒྱ་ཆེའི་མི་མང་གི་ཐོབ་ཐང་དང་བདེ་དོན་ཡིན། དེར་བརྟེན་ཐག་གཅོད་བྱེད་དགོས་པའི་གཞི་རིམ་གྱི་གནད་དོན་ནི་ཁ་ཞེ་གཉིས་མེད་ཀྱི་སྒོ་ནས་དོན་དམ་གྱི་རང་སྐྱོང་ལག་ལེན་དོན་འཁྱོལ་བྱེད་དགོས་པ་དེ་ཡིན་ཞིང་། དེས་བོད་མི་ཚོར་སོ་སོའི་རྣམ་དཔྱོད་དང་། དགོས་མཁོར་བསྟུན་ཏེ་རང་གིས་རང་ལ་འཛིན་སྐྱོང་བྱེད་ཐུབ་པ་ཞིག་ཡོང་རྒྱུ་རེད།༸གོང་ས་༸སྐྱབས་མགོན་ཆེན་པོ་མཆོག་གིས་
བོད་རྒྱ་འབྲེལ་མོལ་ཐེངས་དགུ་པའི་སྐབས་༸གོང་ས་མཆོག་གི་སྐུ་ཚབ་རྣམ་པ་དང་རྒྱ་ནག་གི་དཔོན་རིགས།
བོད་མི་མང་གི་ངོ་ཚབ་གནང་སྟེ་བཀའ་མོལ་གནང་གི་ཡོད། ཁོང་དང་བོད་རྒྱ་ཆེའི་མི་མང་བར་ལོ་རྒྱུས་ཀྱི་འབྲེལ་བ་གཏིང་ཟབ་ཅིག་ཡོད་པ་དེ་དག་ཡོངས་སུ་ཡིད་ཆེས་ལ་གཞི་རྟེན་བྱས་ཡོད་པ་ཡིན། ༸གོང་ས་མཆོག་གིས་བོད་མི་མང་གི་ཁྲིམས་མཐུན་གྱི་ངོ་ཚབ་མཚོན་ཐུབ་ཀྱི་ཡོད་པ་དེ་ནི་རྩོད་དུ་མེད་པའི་གནས་ཚུལ་ཞིག་ཡིན་ལ། བོད་མི་རྣམས་ཀྱིས་ཀྱང་ཁོང་ཉིད་བོད་རྒྱ་ཆེའི་མི་མང་གི་སྐུ་ཚབ་བམ། མགྲིན་ཚབ་པ་དངོས་དེ་ཡིན་པའི་ལྟ་ཚུལ་འཛིན་གྱི་ཡོད། དེར་བརྟེན་བོད་ཀྱི་གནད་དོན་ཐག་གཅོད་ཐུབ་པར་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་མོལ་ཞུ་བའི་ཐབས་ཤེས་འདི་ཁོ་ན་མ་བརྟེན་མཐུ་མེད་ཡིན་པའི་དངོས་དོན་འདི་ངོས་འཛིན་ཐུབ་པ་དགོས་རྒྱུ་གལ་ཆེན་པོ་ཡིན།
(ད་རེས་)ང་ཚོས་དོན་ཚན་འདི་ནན་བཤད་བྱས་པ་སྟེ། ༸གོང་ས་མཆོག་གིས་བོད་ཀྱི་རྩ་དོན་ཐོག་ཐུགས་ཁུར་བསྐྱེད་བཞེས་གནང་བ་ནི་གང་ཉིད་༧སྐུ་སྒེར་གྱི་ཐོབ་ཐང་དང་། ཆབ་སྲིད་ཀྱི་གོ་གནས་རྩོད་ཆེད་དམ། ཡང་ན་བཙན་བྱོལ་བོད་གཞུང་གི་ཁེ་ཕན་རྩོད་རྒྱུའི་ཐབས་ཤེས་བྱས་པ་ཞིག་མིན་པ་དེ་ཡིན། (དེ་བཞིན་)རྒྱ་ནག་གཞུང་གི་ཕྱོགས་ནས་༸གོང་ས་མཆོག་ལ་ཁ་བྲལ་བ་ཞེས་མཚན་འདོགས་ཞུ་རྒྱུས་མཚོན་གཞི་མེད་ཁུངས་བྲལ་གྱི་སྐྱོན་བརྗོད་ཞུ་རྒྱུ་མཚམས་འཇོག་བྱེད་དགོས་པ་དང་། བོད་ཀྱི་དཀའ་རྙོག་ཐད་(རང་སྐྱོང་སྐོར་གྱི་)བསམ་འཆར་གཞིར་བཟུང་གཉིས་མོས་ཀྱི་འགྲིགས་ཐབས་ཤིག་འཚོལ་སླད་ཁོང་དང་མཉམ་ལས་གནང་དགོས་པའི་རེ་སྐུལ་ཞུས་པ་ཡིན།
འདིས་བརྟན་ལྷིང་དང་། ཆིག་བསྒྲིལ། འཆམ་མཐུན་གྱི་སྤྱི་ཚོགས་འཛུགས་སྐྲུན་བྱ་རྒྱུ་བཅས་འགན་སྲུང་བྱེད་ཐུབ་པ་ཡོང་རྒྱུ་ཡིན། རྒྱ་ནག་གཞུང་གི་ཕྱོགས་ནས་ཁོང་ཚོའི་ལངས་ཕྱོགས་གསལ་སྟོན་ཆེད་”བྱེད་མི་རུང་བ་བཞི་”ཞེས་པ་ཞིག་བཏོན་པར་མ་ཟད། བོད་དང་འབྲེལ་ཡོད་ཉེ་ལམ་གྱི་འགྱུར་འགྲོས་སྤྱི་དང་། ལྷག་པར་གལ་ཆེའི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་སྐོར་ཞིབ་ཕྲའི་འགྲེལ་བཤད་གནང་སྐབས་བཞུགས་མོལ་ཚོགས་འདུས་བོད་རང་སྐྱོང་ལྗོངས་ཟེར་བ་དང་། བོད་རིགས་ས་ཁུལ་གཞན་དག་ཏུ་ཡོད་པའི་བོད་མིའི་འཚོ་ཐབས་སྤྱི་དང་། ལྷག་པར་ཤེས་ཡོན་དང་། སྨན་བཅོས་འཕྲོད་བསྟེན། ཁོར་ཡུག་སྲུང་སྐྱོབ་སོགས་མང་ཚོགས་ཀྱི་ཞབས་ཞུའི་ལས་རིགས་ཁག་ཡར་རྒྱས་གཏོང་རྒྱུའི་ཐག་གཅོད་བྱུང་སྐོར་བརྗོད་བྱུང་། ང་ཚོས་བཞུགས་མོལ་ཚོགས་འདུའི་སྐོར་ཐོག་མའི་གནས་ཚུལ་ཐོས་པར་གཞིགས་ནས་བོད་མི་སྤྱི་དང་། ལྷག་པར་གྲོང་གསེབ་ཁུལ་གྱི་བོད་མིའི་འཚོ་བའི་གནས་སྟངས་ཡར་རྒྱས་གཏོང་རྒྱུའི་གནད་དོན་བཀའ་བསྡུར་བྱུང་ཡོད་པ་དེར་དགའ་བསུ་ཞུས་པ་ཡིན། དོན་དངོས་ཐོག་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་ཐོག་བོད་རང་སྐྱོངས་ལྗོངས་དང་། བོད་རིགས་ས་ཁུལ་གཞན་དག་བཅས་བོད་ཀྱི་ས་ཁུལ་ཡོངས་སུ་རྫོགས་པའི་ནང་འཛུགས་སྐྲུན་ཡར་རྒྱས་གཏོང་རྒྱུའི་གནད་དོན་སྐོར་བསམ་ཞིབ་གྲོས་བསྡུར་བྱས་ཡོད་པར་དགའ་བསུ་ཞུ་རྒྱུ་དང་། བོད་ཀྱི་ས་ཁུལ་ཡོངས་རྫོགས་ངེས་པར་དུ་འཛིན་སྐྱོང་གོང་བུ་གཅིག་གི་འོག་བཅུག་སྟེ་དེ་དག་ཐོག་གཅིག་གྱུར་གྱི་སྲིད་བྱུས་ཤིག་ལག་བསྟར་བྱེད་དགོས་པ་དེར་ང་ཚོས་ཡིད་ཆེས་བརྟན་པོ་བྱེད་ཀྱི་ཡོད། གལ་སྲིད་ཆབ་སྲིད་ཀྱི་འབོད་ཚིག་ཁག་དོར་ཚེ། བཞུགས་མོལ་ཚོགས་འདུའི་ཐོག་བཀའ་བསྡུར་བྱུང་བའི་གནད་དོན་གལ་ཆེ་མང་པོ་ཞིག་ང་ཚོས་(རང་སྐྱོང་གི་)བསམ་འཆར་ནང་གསལ་སྟོན་བྱས་པའི་གཞི་རྩའི་བོད་མི་མང་གི་དགོས་མཁོ་ཁག་དང་གཅིག་མཚུངས་ཡིན་འདུག
བོད་རྒྱ་འབྲེལ་མོལ་ཐེངས་དགུ་པའི་སྐབས་༸གོང་ས་མཆོག་གི་སྐུ་ཚབ་རྣམ་པ་དང་རྒྱ་ནག་གི་དཔོན་རིགས།
ཕྱོགས་གཉིས་བར་གྱི་འགལ་ཟླ་ཆེ་གྲས་ཤིག་ནི་ད་ལྟའི་བོད་ནང་གི་གནས་སྟངས་ཐད་ལྟ་ཚུལ་མི་མཐུན་པ་ཡོང་གི་ཡོད་པ་དེ་ཡིན།
དེར་བརྟེན་དངོས་ཡོད་ཀྱི་གནས་སྟངས་ཐད་ཐུན་མོང་གི་ཤེས་རྟོགས་ཤིག་ཡོང་ཆེད་ང་ཚོས་དངོས་ཐོག་བདེན་འཚོལ་གྱི་བསམ་བློའི་ཐོག་ནས་ཐུན་མོང་གི་འབད་བརྩོན་བྱས་པ་བརྒྱུད་ས་གནས་ས་ཐོག་གི་གནས་སྟངས་ལ་བལྟ་ཞིབ་བྱེད་དགོས་པའི་བསམ་ཚུལ་བཏོན་པ་ཡིན། འདིས་ཕྱོགས་ཕན་ཚུན་གཉིས་ཀར་རང་རང་གི་རྩོད་གཞི་ལས་བརྒལ་ཏེ་འགྲོ་ཐུབ་པའི་ཕན་གྲོགས་བྱ་རྒྱུ་ཡིན།
ཡོང་རྒྱུའི་ཉིན་ཟླའི་ནང་ང་ཚོས་རྒྱ་ནག་གཞུང་གིས་གླེང་སློང་བྱས་པའི་གནད་དོན་སྤྱི་དང་། ལྷག་པར་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་གྲོས་རིམ་ཁག (དེ་བཞིན་)བྱེད་མི་རུང་བ་བཞི་ བཅས་ལ་སློབ་སྦྱོང་བྱ་རྒྱུ་ཡིན། ཚོགས་གྲོས་སྐབས་ནན་ཞུ་བྱས་པ་ལྟར། རྒྱ་ནག་གི་དབུ་ཁྲིད་རྣམས་ཀྱིས་ཀྱང་ང་ཚོས་གླེང་སློང་བྱས་པའི་གནད་དོན་ཁག་གི་ཐོག་བསམ་ཞིབ་ནན་ཏན་གནང་བའི་རེ་བ་ལྷག་བསམ་རྣམ་དག་གིས་བྱེད་ཀྱི་ཡོད།
༸གོང་ས་མཆོག་གིས་སྔ་ཕྱི་བར་གསུམ་དུ་མ་འོངས་པའི་བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་གནས་རྒྱུའི་བཞེངས་ཕྱོགས་གསལ་སྟོན་གནང་ཡོད་པར་བརྟེན། རྒྱ་ནག་གི་དབུ་ཁྲིད་རྣམས་ལ་ཆབ་སྲིད་ཀྱི་ཆོད་སེམས་ཡོད་ཚེ། གནད་དོན་འདི་དག་ཐོག་ཐུན་མོང་གི་གཞི་རྟེན་ཞིག་འཚོལ་མི་ཐུབ་པའི་རྒྱུ་མཚན་གང་ཡང་མེད་པར་ང་ཚོས་མཐོང་གི་ཡོད།
འདིར་བསྐྱར་ནན་བརྗོད་རྒྱུ་ཞིག་ལ། ༸གོང་ས་མཆོག་གིས་བོད་མི་རིགས་ཚོར་བློ་སྤོབས་དང་ཆེ་མཐོངས་བཅས་སླར་གསོ་ཐུབ་པ་དང་། དེ་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བརྟན་ལྷིང་དང་ཆིག་བསྒྲིལ་འགན་སྲུང་བྱེད་ཐུབ་པའི་ཆེད་དུ་རྒྱ་ནག་དབུས་གཞུང་དང་མཉམ་དུ་མུ་མཐུད་དེ་ཕྱག་ལས་གནང་རྒྱུའི་ཐུགས་འདུན་རྒྱུན་བཅངས་གནང་གི་ཡོད། ཐེངས་འདིའི་ང་ཚོའི་མགྲོན་བདག་ཧུའེ་ནན་འཐབ་ཕྱོགས་གཅིག་གྱུར་ལས་ཁང་དང་། པེ་ཅིང་འཐབ་ཕྱོགས་གཅིག་གྱུར་ལས་ཁང་། དེ་བཞིན་(རྒྱ་ནག་)དབུས་འཐབ་ཕྱོགས་གཅིག་གྱུར་ལས་ཁང་བཅས་ཀྱིས་ང་ཚོར་སྐབས་བསྟུན་སྣེ་ལེན་མཐུན་འགྱུར་དམ་ཟབ་གནང་བར་ཐུགས་རྗེ་ཆེ་ཞུ་རྒྱུ་བཅས། རྡ་རམ་ས་ལ་ནས་ཕྱི་ལོ་ ༢༠༡༠ ཟླ་ ༢ ཚེས་ ༢ ལ།།
སྒྱུར་མཆན། གསལ་བསྒྲགས་ངོ་མ་དབྱིན་ཡིག་ཐོག་སྤེལ་ཡོད་པ་ནས་བོད་སྒྱུར་ཞུས། རྩ་འགྱུར་བར་ཚིག་དོན་ལ་ཧེ་བག་ཡོད་ཚེ་མ་ཕྱི་དབྱིན་ཡིག་རང་ལ་རྩ་འཛིན་ཡོང་བ་ཞུ།
