༢༠༡༠ ཕྱི་ཟླ་ ༢ ཚེས་ ༢༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༢ ཚེས་ ༢༥ ཉིན་གྱི་སྔ་དྲོ་བོད་གཞུང་ཟློས་གར་ཚོགས་པས་རྔ་རོལ་དང་བཅས་བཙན་བྱོལ་བོད་གཞུང་གི་མང་གཙོའི་ཀ་བ་གསུམ་གྱི་མཛད་གཙོ་རྣམས་ཕེབས་བསུ་དང་སྦྲགས་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བའི་བཞུགས་གྲལ་དུ་འཁོད་མཚམས་བོད་གཞུང་མང་ནས་ཕྱི་ལོ་ ༡༩༡༠ ནས་
མཛད་སྒོའི་སྐབས་བཀའ་བློན་ཁྲི་པ་མཆོག་གིས་བཀའ་ཤག་གི་གསུང་བཤད་གནང་བཞིན་པ།
༢༠༡༠ བར་༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་རྒྱ་གར་ནང་བཙན་བྱོལ་དུ་༸ཞབས་སོར་འཁོད་དེ་ལོ་ ༡༠༠ འཁོར་བའི་གཞུང་འབྲེལ་རྗེས་དྲན་གྱི་དུས་སྟོན་མཛད་སྒོ་ཚུགས་ཡོད།
དུས་དྲན་མཛད་སྒོའི་ཐོག་ཆེས་མཐོའི་ཁྲིམས་ཞིབ་པ་ཆེ་བས་དབུས་ཁྲིམས་ཞིབ་པ་གཞན་དང་། བཀའ་བློན་ཁྲི་པ་མཆོག་གིས་དབུས་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཙོ་ཚོགས་གཞོན་མཆོག་གིས་དབུས་སྤྱི་འཐུས་རྒྱུན་ལས་རྣམ་པ། རང་དབང་ཅན་གྱི་འགན་འཛིན་རྣམ་པ། ལས་ཁུངས་ཁག་གི་དྲུང་ཆེ་ཆུང་དང་ལས་བྱེད། གསར་འགོད་པ་དང་རང་རིགས་སེར་སྐྱ་མི་མང་། དེ་བཞིན་སློབ་ཕྲུག་སོགས་ཁྱོན་མི་གྲངས་སྟོང་ཕྲག་བརྒལ་བ་མཉམ་འཛོམས་ཀྱིས་དུས་དྲན་མཛད་སྒོ་ཚུགས་ཡོད།
ཐོག་མར་བཀའ་དྲུང་དྲུང་འཕར་ཚེ་རིང་དབང་ཕྱུག་ལགས་ཀྱིས་དུས་དྲན་མཛད་སྒོ་དབུ་ཚུགས་པའི་ཁྱབ་བསྒྲགས་གནང་བ་དང་སྦྲགས་ཐོག་མར་བོད་གཞུང་མང་གཙོའི་ཀ་བ་གསུམ་གྱི་མཛད་གཙོ་རྣམས་ནས་༸གོང་ས་༸སྐྱབས་མགོན་སྐུ་ཕྲེང་བཅུ་གསུམ་པ་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས།དེ་རྗེས་བོད་གཞུང་ཟློས་གར་ཚོགས་པའི་འཁྲབ་སྟོན་པ་རྣམས་ནས་རྔ་རོལ་དང་བཅས་རྔམ་བརྗིད་ལྡན་པའི་བོད་རྒྱལ་ཁབ་ཆེན་པོའི་རྒྱལ་གླུ་འབུལ་བཞིན་པར་དཔལ་ལྡན་བཀའ་བློན་ཁྲི་པ་ཟམ་གདོང་བློ་བཟང་བསྟན་འཛིན་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་། སྐབས་དེར་དྲུང་འཕར་ཚེ་རིང་དབང་ཕྱུག་ལགས་ཀྱིས་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་རྒྱ་གར་ལ་ཆིབས་སྒྱུར་བསྐྱངས་དགོས་དོན་སྐོར་འགྲེལ་བརྗོད་གནང་། དེ་ནས་གསོལ་ཇ་བཞེས་འབྲས་ཕུལ་རྗེས་བཀའ་ཁྲི་མཆོག་གིས་བོད་གཞུང་བཀའ་ཤག་གི་གསུང་བཤད་གནང་། དེ་རྗེས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་འཐུས་ལྷན་ཚོགས་ཀྱི་གསུང་བཤད་གནང་སྟེ་༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་རྒྱ་གར་ནང་བཙན་བྱོལ་དུ་༸ཞབས་སོར་འཁོད་དེ་ལོ་ ༡༠༠ འཁོར་བའི་གཞུང་འབྲེལ་རྗེས་དྲན་གྱི་དུས་སྟོན་མཛད་སྒོ་གཟབ་རྒྱས་ཞུས་ཡོད་པ་བཅས།།
