༢༠༡༠ ཕྱི་ཟླ་ ༢ ཚེས་ ༢༤ རེས་གཟའ་ལྷག་པ།

༄༅། །ཕྱི་ལོ་ ༢༠༡༠ ཟླ་ ༢ ཚེས་ ༢༡ ཉིན་གྲོང་ཁྱེར་ལོ་སི་ཨེན་ཇེ་ལི་སིར་ (Los Angeles) སྔ་དྲོ་ཆུ་ཚོད་ ༨།༤༥ ཐོག་རྒྱལ་སྤྱིའི་དྭ་ཕྲུག་གཅེས་སྐྱོང་ཚོགས་པའི་ (Whole Child International) འཛིན་སྐྱོང་གི་ཚོགས་མི་ཚོ་དང་ལས་བྱེད་ཁག་གཅིག་ལ་ཟུར་མཇལ་སྩལ་རྗེས་མགོན་པོ་གང་ཉིད་མཆོག་བྷི་ཝར་ལི་ཧིལ་ (Beverly Hills) དུ་ཆིབས་སྒྱུར་བསྐྱངས་ཏེ་ཨ་རིའི་གྲགས་ཅན་བརྙན་འཕྲིན་སི་ཨན་ཨན་ (CNN) ཞེས་པའི་གསར་འགྱུར་གཙོ་སྐྱོང་བ་སྐུ་ཞབས་ལེ་རི་ཀིང་ (Larry King) ལགས་ཀྱིས་གཙོ་སྐྱོང་གནང་བའི་ཆེད་དོན་དྲི་བར་སྐར་མ་ ༤༥ ཙམ་གྱི་རིང་བཀའ་ལན་མཛད་ཡོད། ཕྱེད་ཡོལ་རྒྱལ་སྤྱིའི་དྭ་ཕྲུག་གཅེས་སྐྱོང་ཁང་ (Whole Child International) གིས་གོ་སྒྲིག་ཞུས་ཏེ་འཁྲབ་སྟོན་ཚོགས་ཁང་ཆེན་མོ་ (Gibson Amphitheater) ཞེས་པའི་ནང་མགོན་པོ་གང་ཉིད་མཆོག་ཆིབས་སྒྱུར་བསྐྱངས་ཏེ་བྱམས་བརྩེ་ལྡན་པའི་སྤྱི་ཚོགས་ཤིག་བསྐྲུན་ཐབས་དང་མགོན་མེད་བྱིས་པ་ཚོའི་དགོས་མཁོ། ཞེས་པའི་བརྗོད་གཞིའི་ཐོག་བྱམས་བརྩེ་དང་ནང་གི་ཞི་བདེ་བསྐྲུན་ཐབས་སྐོར་མང་ཚོགས་ ༦༠༠༠ བརྒལ་བར་བཀའ་སློབ་སྩལ་དོན། དུས་རབས་ ༢༠ པ་དེ་འགྲོ་བ་མིའི་བྱུང་རབས་ཀྱི་ཁྲོད་དུས་རབས་གལ་ཆེ་ཞིག་ཆགས་ཡོད།

དུས་རབས་ ༢༠ པའི་ནང་མི་རྣམས་ནས་འཕྲུལ་ཆས་ཀྱི་འཛུགས་བསྐྲུན་ངོ་མཚར་ལྡན་པ་གསར་བསྐྲུན་ཐུབ་པར་བརྟེན། མིའི་སྤྱི་ཚོགས་འདི་ཕྱོགས་གཅིག་ནས་བལྟས་ན་ཡར་རྒྱས་ཧ་ཅང་ཆེན་པོ་ཕྱིན་ཡོད། འོན་ཀྱང་ཕྱོགས་གཞན་ཞིག་ནས་བཤད་ན་དུས་རབས་ ༢༠ པའི་ནང་མི་གྲངས་ས་ཡ་ ༢༠༠ ཙམ་དམར་གསོད་བཏང་ཡོད། གདོད་མའི་དུས་སྐབས་སུ་རང་གི་དགྲ་བོར་ཕམ་ཉེས་བཏང་བ་དེ་རྒྱལ་ཁ་ཐོབ་པ་ཞིག་ཏུ་ངོས་འཛིན་བྱེད་ཆོག་པའི་གནས་སྟངས་ཤིག་ཆགས་ཡོད་ཀྱང་། ད་ལྟའི་ཆར་གནས་སྟངས་དེ་ལྟ་བུ་མིན་པར་རང་གི་དགྲ་བོ་གཏོར་བཅོམ་གཏོང་བ་དེས་སོ་སོ་རང་ཉིད་ཀྱང་ཐོར་ཞིག་འགྲོ་ངེས་ཡིན་པའི་གནས་སྟངས་ཤིག་ཆགས་ཡོད། དེར་བརྟེན་གོ་མཚོན་ཕྱིར་བསྡུ་བྱེད་རྒྱུ་དེ་ཧ་ཅང་གལ་ཆེ་ཆགས་ཡོད་ཅེས་བཀའ་སྩལ། དེ་ཡང་གོ་མཚོན་ཕྱིར་བསྡུ་བྱེད་སྟངས་ཐོག་བཀའ་སློབ་སྩལ་དོན། ནང་གི་གོ་མཚོན་ཕྱིར་འཐེན་མ་བྱས་པར་རྒྱུན་སྲིང་ཐུབ་པའི་འགྱུར་བ་ཞིག་གཏོང་མི་ཐུབ། དེ་ནི་བྱམས་བརྩེའི་བསམ་པ་བསྐྲུན་པའི་སྒོ་ནས་ཡོང་དགོས། ཤེས་ཡོན་གྱི་ཐབས་ལམ་ཐོག་ནས་བྱམས་བརྩེ་བསྐྲུན་པ་ཡིན་ན་རྣམ་དཔྱོད་དང་བཟང་དཔྱོད་གཉིས་ཟུང་འབྲེལ་ཐོག་ཡར་རྒྱས་འགྲོ་ཐུབ་ཅེས་བཀའ་སྩལ། ཡང་༸གོང་ས་མཆོག་གིས་བཀའ་སློབ་ཕེབས་དོན། ཕྲུ་གུ་ཚོར་ཆུང་དུས་ནས་བྱམས་བརྩེའི་རིན་ཐང་དེ་གང་ཡིན་སློབ་གསོ་སྤྲོད་དགོས་པ་དང་། བོད་པའི་ཕ་མ་ཚོས་ཕྲུ་གུར་འབུ་སྲིན་གསོད་རྒྱུ་མེད་པའི་སློབ་གསོ་རྒྱག་གི་ཡོད་པར་བརྟེན། ཕྲུ་གུ་ཚོས་ཀྱང་སྲོག་ལྡན་ཚང་མར་རིན་ཐང་ཡོད་པ་ཤེས་པའི་ཐོག་འཚར་ལོངས་ཡོང་གི་ཡོད། གལ་ཏེ་ཕྲུ་གུ་ཚོས་འབུ་སྲིན་གྱི་ཚེ་སྲོག་ལ་རིན་ཐང་མ་མཐོང་ཚེ་སྲོག་ལྡན་ཚང་མའི་རིན་ཐང་བརླག་རྒྱུའི་ངན་པ་ལང་ཤོར་གྱི་འགོ་རྩོམ་གྱི་ཡོད། བྱམས་བརྩེའི་བསམ་པས་སེམས་ཁྲལ་དང་། དངངས་འཚབ། ཕྲག་དོག་སོགས་འཇོམས་ཀྱི་ཡོད་པ་མ་ཟད། གཉིད་ཡག་པོ་ཁུག་ཐུབ་པ་དང་ལྟོ་ཆས་འཇུ་བ་སོགས་ལ་ཕན་གྱི་ཡོད། དེ་བཞིན་དགའ་སྐྱིད་ལྡན་པའི་འཚོ་བ་ཞིག་ཡོང་དགོས་ན། ང་ཚོའི་ནང་སེམས་ཀྱི་ཞི་བདེ་དང་འབྲེལ་བ་ཆེན་པོ་ཆགས་ཀྱི་ཡོད།

དེ་ནས་རིམ་བཞིན་ཁྱིམ་ཚང་དང་། སྤྱི་ཚོགས། རྒྱལ་ཁབ། འཛམ་གླིང་བཅས་ཀྱི་ནང་ཞི་བདེ་དང་དགའ་སྐྱིད་ལྡན་པའི་འཛམ་གླིང་ཞིག་ཡོང་བར་མི་ཚང་མའི་བསམ་བློའི་བཞག་ཕྱོགས་དང་འབྲེལ་བ་ཆགས་ཀྱི་ཡོད། ད་རེས་ངོས་རང་འདིར་ཡོང་ཐུབ་པར་ཧ་ཅང་དགའ་པོ་བྱུང་། དེ་བཞིན་རྒྱལ་སྤྱིའི་བྱིས་པའི་ཐེབས་རྩ་ལྷན་ཚོགས་ཀྱི་ལས་དོན་ལ་བསྔགས་བརྗོད་ཞུ་རྒྱུ་དང་ཆབས་ཅིག་ཚོགས་པ་དང་མི་སྒེར་པ་སོགས་གཞན་ཕན་གྱི་ལས་ཀ་བྱེད་མཁན་ཚང་མར་བསྔགས་བརྗོད་ཞུ་གི་ཡོད། ཕྱོགས་མཚུངས་ལས་ཀ་དེ་རིགས་ལ་དེ་ལས་མང་བ་མཉམ་ཞུགས་གནང་དགོས། ཕྲུ་གུ་མང་པོར་ད་དུང་ཡང་རོགས་རམ་དགོས་ཀྱི་ཡོད། ཡུ་རོབ་ནང་ཏོག་ཙམ་དྲག་པ་ཡོད། འོན་ཀྱང་ཤར་ཕྱོགས་ཁུལ་དང་ལྷོ་ཨ་ཕི་རི་ཀ་སོགས་ལྷག་པར་རྒྱ་གར་དང་རྒྱ་ནག་ནང་ཉམ་ཐག་གི་བྱིས་པ་ཧ་ཅང་མང་པོ་ཡོད། ཕྲུ་གུ་བུ་མོ་ཚོར་མཐོང་ཆུང་གི་རྣམ་པ་དེ་ད་དུང་ཡང་གནས་ཡོད། ཕྲུ་གུ་བུ་དང་བུ་མོ་གཉིས་ཀ་གཅིག་པ་ཡིན་པར་བརྟེན་ཕྲུ་གུ་བུ་མོར་མཐོང་ཆུང་གི་ལྟ་བ་དོར་དགོས། ཞེེས་བཀའ་སློབ་གྲུབ་མཚམས་དྲི་བ་ཕུལ་རྒྱུའི་གོ་སྐབས་ཤིག་སྩལ་ཡོད་པར་གསར་འགོད་པས་དམིགས་བསལ་མགོན་པོ་གང་ཉིད་མཆོག་བོད་ལ་ཆིབས་སྒྱུར་བསྐྱང་རྒྱུའི་སྐོར་ལ་བཀའ་འདྲི་ཞུས་པའི་བཀའ་ལན་ཕེབས་དོན། བཙན་བྱོལ་ནང་གི་བོད་མི་ཚང་མ་རང་ཡུལ་དུ་ཕྱིར་ལོགས་བྱེད་འདོད་ཡོད་པ་རེད། ལྷག་པར་དུ་རྒྱ་རིགས་དང་ནང་པ་མང་པོས་ཀྱང་རེ་བ་ཆེན་པོ་བྱེད་ཀྱི་ཡོད་ལ་༸གོང་ས་མཆོག་གིས་ཀྱང་ཁོང་རྣམ་པ་ཐུགས་ལ་ཡོད་ཅེས་དང་། འོན་ཀྱང་རྒྱ་ནག་གཞུང་ཕྱོགས་ནས་མགོན་པོ་གང་ཉིད་མཆོག་རྒྱལ་ཁབ་དང་མི་མང་ལ་རྒྱབ་ལྟོས་ཞུ་མཁན་ཞིག་ལ་ངོས་འཛིན་བྱེད་ཀྱི་ཡོད་པ་སོགས་ད་ལྟའི་སྐབས་འདིར་ལས་སླ་པོ་ཞིག་མེད། ཕྱི་རྒྱལ་གྱི་མི་རིགས་རྣམས་བོད་ནང་བསྐྱོད་དགོས་པ་དང་ལྷག་པར་བོད་ཀྱི་ཞིང་འབྲོག་ཁུལ་དུ་བསྐྱོད་ནས་བོད་ནང་གི་དངོས་ཡོད་གནས་སྟངས་གང་ཡིན་པ་དེ་ཤེས་རྟོགས་བྱེད་རྒྱུ་དེ་ནི་གནད་འགག་ཆེན་པོ་ཡིན་པའི་སྐོར་བཀའ་སློབ་ཕེབས་ཡོད།