༢༠༡༠ ཕྱི་ཟླ་ ༢ ཚེས་ ༢༣ རེས་གཟའ་མིག་དམར།
༸གོང་ས་མཆོག་དང་སྐུ་ཞབས་ལེར་རི་ཀིང་ལྷན་དུ།
༄༅། །ཕྱི་ལོ་ ༢༠༡༠ ཟླ་ ༢ ཚེས་ ༢༡ ཉིན་ཨ་རིའི་གྲོང་ཁྱེར་ལོ་སི་ཨེན་ཇེ་ལི་སིའི་ (Los Angeles) ནང་ཡོད་པའི་ཨ་རིའི་གྲགས་ཅན་བརྙན་འཕྲིན་ (CNN) ཞེས་པའི་གསར་འགྱུར་གཙོ་སྐྱོང་བ་སྐུ་ཞབས་ལེར་རི་ཀིང་ (Larry King) ལགས་ཀྱིས་༸གོང་ས་མཆོག་ལ་སྐར་མ་ ༤༥ ཙམ་གྱི་རིང་ཆེད་དོན་དྲི་བ་ཞུས་པར་བཀའ་ལན་ཕེབས་པ་སྙིང་བསྡུས་ཤིག་ཟུར་འདོན་ཞུས་ཡོད་པ་གཤམ་གསལ།
དྲི་བ། སྲིད་འཛིན་ཨོ་བྷ་མ་དང་མཇལ་འཕྲད་དེ་ག་འདྲ་བྱུང་ཡོད་དམ།
བཀའ་ལན། ཁོ་རང་གྲོས་ཚོགས་གོང་མའི་ཚོགས་མི་ཡིན་པའི་སྐབས་ནས་ངོས་དང་ཐུག་མྱོང་ཡོད། དངོས་གནས་གཞོན་སྐྱེས་ཡིད་ལ་བབ་པོ་ཞེ་དྲག་འདུག སྲིད་འཛིན་འོས་བསྡུའི་སྐབས་སུའང་ཁོང་གིས་ངོས་ལ་ཁ་པར་བཏང་སྟེེ་བོད་ཀྱི་གནད་དོན་སྐོར་ལ་བཀའ་འདྲི་གནང་བྱུང་། ད་ཆ་སྐུ་ཞབས་ཨོ་བྷ་མ་མཆོག་སྲིད་འཛིན་ཞིག་ཡིན་པའི་ཆ་ནས་ཀྱང་ངོས་རང་དང་འབྲེལ་བ་ཕྲན་བུ་ཡོད། ལོ་སྔོན་མར་མཇལ་འཕྲད་ཞུ་རྒྱུའི་གོ་སྐབས་བྱུང་ཡོད་ཀྱང་མཇལ་ཐུབ་མེད། སྲིད་འཛིན་མཆོག་པེ་ཅིང་ (Peking) དུ་རྒྱལ་དོན་འཚམས་གཟིགས་ལ་མ་ཕེབས་གོང་མཇལ་འཕྲད་བྱ་རྒྱུ་ངོས་རང་ཉིད་ནས་ཀྱང་ཡག་པོ་ཞིག་མཐོང་མ་བྱུང་ལ་སྲིད་འཛིན་མཆོག་ལ་ཡང་བསམ་ཚུལ་དེ་མཚུངས་འདུག ངོས་ནས་སྲིད་འཛིན་མཆོག་གི་ཐག་གཅོོད་དེར་རྒྱབ་སྐྱོར་ཞུས་ཡོད། སྐབས་དེར་སྲིད་འཛིན་མཆོག་དང་མཇལ་འཕྲད་མ་བྱས་པ་དེས་བཟང་ཕྱོགས་ཀྱི་ཁོར་ཡུག་བསྐྲུན་རྒྱུར་ཕན་ཐོགས་ཡོད་པས་མཇལ་འཕྲད་བྱས་མེེད། འོན་ཀྱང་ཐེངས་འདིར་མཛད་དཀའ་ཡོད་མིན་ལ་མ་ལྟོས་པར་སྲིད་འཛིན་མཆོག་དང་མཇལ་འཕྲད་བྱས་ཐུབ་པར་ངོས་རང་དགའ་པོ་བྱུང་། ང་ཚོས་བོད་རང་བཙན་རྩོད་ཀྱི་མེད། ང་ཚོས་དབུ་མའི་ལམ་ཞེས་བརྗོད་ཀྱི་ཡོད། ང་ཚོས་ད་ལྟའི་བོད་ནང་འཛིན་པའི་སྲིད་བྱུས་དེ་འགྲིག་གི་མེད་སྐོར་བརྗོད་བཞིན་ཡོད། སྲིད་བྱུས་དེས་བོད་མིའི་ཆོས་དང་རིག་གཞུང་ཐོག་གནོད་སྐྱོན་ཆེན་པོ་ཡོད་པ་མ་ཟད། བོད་ཀྱི་ཁོར་ཡུག་ལའང་གནོད་སྐྱོན་ཆེན་པོ་ཡོང་གི་ཡོད། དེ་དང་ཆབས་གཅིག་ང་ཚོས་བོད་འདི་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་ཁ་བྲལ་རྩོད་ཀྱི་མེད། དེ་སྔ་བོད་ལུང་ཁུག་ནང་དངོས་པོའི་ཡར་རྒྱས་ཐོག་རྗེས་ལུས་ཤོར་ཡོད། བོད་མི་ཚང་མས་དེང་རབས་ཅན་གྱི་བོད་གཅིག་འདོད་ཀྱི་ཡོད། དེ་ཡོང་བར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་སུ་སྡོད་རྒྱུ་དེ་རེད།
དྲི་བ། དེང་སྐབས་རྒྱ་ནག་གཞུང་དང་༸གོང་ས་མཆོག་གཉིས་དབར་འབྲེལ་ལམ་གྱི་གནས་སྟངས་ག་འདྲ་ཡོད་དམ།
བཀའ་ལན། རྒྱ་ནག་གཞུང་ནས་བོད་ནང་དཀའ་ངལ་ཡོད་པར་ངོས་ལེན་མ་བྱས་པར། ད་དུང་བོད་ནང་གནས་པའི་བོད་མི་ཚོ་སྐྱིད་པོ་དང་ཡར་རྒྱས་གོང་འཕེལ་ཡོད་སྐོར་དང་། སྤྱི་ཚོགས་རྙིང་པའི་སྐབས་ལས་ཡག་པ་ཡོད་སྐོར་བརྗོད་ཀྱི་ཡོད། འོན་ཀྱང་ ཕྱོགས་གཅིག་ནས་དངོས་པོའི་ཡར་རྒྱས་ཕྱིན་ཡོད་ཀྱང་བོད་ཀྱི་ཆོས་དད་རང་དབང་དང་རིག་གཞུང་སོགས་ལ་དམ་བསྒྲགས་དང་བཙན་གནོན་ཤུགས་ཆེ་གཏོང་བཞིན་ཡོད་སྐོར་ང་ཚོར་བོད་ནས་གནས་ཚུལ་འབྱོར་གྱི་འདུག་ཅེས་སོགས་ཀྱི་བཀའ་ལན་སྩལ་ཡོད།
