༢༠༡༠ ཕྱི་ཟླ་ ༢ ཚེས་ ༡༩ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༢ ཚེས་ ༡༨ སྔ་དྲོ་ཆུ་ཚོད་ ༡༡།༣༠་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་བྷ་རཀ་ཨོ་བྷ་མ་རྣམས་གཉིས་ཨ་རིའི་ཕོ་བྲང་དཀར་པོའི་ནང་མཇལ་འཕྲད་མཛད་ཡོད་པ་དང་། དེ་རྗེས་༸གོང་ས་མཆོག་བཞུགས་གནས་མགྲོན་ཁང་དུ་༸ཞབས་སོར་འཁོད་སྐབས་བོད་མི་རྣམས་ནས་དཀར་གཙང་གི་མཇལ་དར་དང་ལག་ཏུ་སྤོས་སྣེ་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད། ཉིན་རྒྱབ་ཨ་རིའི་ཕྱི་སྲིད་ལྷན་ཁང་གི་དྲུང་ཆེ་ལྕམ་སྐུ་ཧི་ལེ་རི་ཁི་ལིན་ཊོན་ (Hillary Clinton) དང་མཇལ་འཕྲད་མཛད་རྗེས་གསར་འགོད་ལྷན་ཚོགས་ཤིག་ལ་བཀའ་སློབ་ཕེབས་དོན། དེ་རིང་ཨ་རིའི་སྲིད་འཛིན་མཆོག་མཇལ་རྒྱུའི་གནས་ཚུལ་དེ་བོད་ནང་གོ་དུས་བོད་ཀྱི་ས་ཁུལ་མང་པོ་ཞིག་ལ་དེ་རིང་བསང་གསོལ་བྱེད་པ་སོགས་ཀྱི་དགའ་སྣང་གི་ཚོར་བ་ཤུགས་ཆེན་པོ་བྱུང་ཡོད་པ་གོ་རྒྱུ་འདུག དེ་རིང་ཨ་རིའི་སྲིད་འཛིན་དངོས་སུ་མཇལ་ནས་བཀའ་མོལ་ཞུས་པའི་སྐབས་ཐོག་མར་སྲིད་འཛིན་རང་ཉིད་འོས་ལངས་གནང་སྐབས་ནས་ངོས་ལ་ཁ་པར་ཡང་བཏང་བྱུང་། དེ་རྗེས་ཕྱག་འབྲི་འབུལ་རྒྱུ་དང་ཡིག་འགྲུལ་བྱུང་ཡོད། ཁོང་ནི་ཞེ་དྲག་སེམས་ཁུར་བཞེས་མཁན་ཞིག་རེད། ཁོང་རང་སྲིད་འཛིན་གནང་རྗེས་ཁ་སྔོན་རྒྱ་ནག་ལ་ཕེབས་སྐབས་མཛད་དཀའ་ཡོད་ཀྱང་བོད་ཀྱི་སྐོར་ལ་དམིགས་བསལ་བྱས་ཏེ་ཤུགས་ཆེན་པོ་གསུངས་འདུག ན་ནིང་ངོས་རང་སྲིད་འཛིན་ཨོ་བྷ་མ་མཆོག་མཇལ་འཕྲད་ཐུབ་མེད། དེར་རྒྱུ་མཚན་ཡོད། ཨ་རིའི་སྲིད་གཞུང་ནས་ཀྱང་རྒྱུ་མཚན་གཟིགས་ཀྱི་ཡོད། ང་ཚོའི་ངོས་ནས་ཆ་བཞག་ན། སྲིད་འཛིན་མཆོག་རྒྱ་ནག་ནང་མ་ཕེབས་གོང་རྒྱ་ནག་གཞུང་ཁོང་ཁྲོ་ལངས་པ་སོགས་བྱུང་བ་ཡིན་ན། རྗེས་སུ་བཀའ་མོལ་གནང་སྐབས་བཀའ་མོལ་དེ་ནུས་པ་ཐོན་པ་ཡོང་རྒྱུར་ཕལ་ཆེར་འགལ་རྐྱེན་ཆགས་སྲིད་ཀྱི་རེད། དེར་བརྟེན་ཁ་སྔོན་གྱི་མཇལ་འཕྲད་དེར་ང་ཚོའི་ངོས་ནས་ཨུ་ཚུགས་ཞུས་མེད། རྒྱ་ནག་གཞུང་གིས་དགག་ཆ་ཡོང་གི་ཡོད་ཀྱང་མཇལ་འཕྲད་བྱུང་བ་རེད། རྩ་བའི་བོད་དོན་ཐོག་ཐུགས་ཁུར་དང་གདུང་སེམས་མཉམ་སྐྱེའི་དགོངས་པ་ཤུགས་ཆེན་པོ་ཞེ་དྲག་རེད་འདུག ད་ལྟ་ཡོངས་བསྒྲགས་བྱས་ནས་གསུང་གསལ་ལ་ང་ཚོས་དབུ་མའི་ལམ་ལ་འབད་བརྩོན་བྱས་པར་རྒྱབ་སྐྱོར་ཡོད། མུ་མཐུད་རྒྱ་ནག་གཞུང་དང་འབྲེལ་བ་བྱས་ནས་སྐད་ཆ་ཤོད་རྒྱུ་གལ་ཆེན་པོ་རེད། དེར་ཡང་རྒྱབ་སྐྱོར་ཡོད་ཅེས་གསུང་གི་འདུག དེ་རིང་ཡག་པོ་ཞེ་དྲག་བྱུང་སོང་། ཡིན་ཡང་ང་རང་ཚོ་ཚང་མས་ཤེས་དགོས་པ་ཞིག་ལ་རྩ་བའི་བོད་དོན་གནས་ཚུལ་དེ་ལས་སླ་པོ་ཞིག་མ་རེད། གང་ལྟར་ང་ཚོའི་བོད་སྐད་ནང་ཆ་བཞག་ན་དབང་ཆེན་དབང་མེད་ཅེས་པའིི་སྐད་ཆ་ཆགས་ཀྱི་ཡོད། དེ་འདྲ་ཡིན་དུས་ལས་སླ་པོ་མེད། ཡིན་ཡང་ང་ཚོར་སྤྲོ་བ་སྐྱེ་རྒྱུ་གཅིག་ལ་རྒྱ་ནག་ནང་གི་རྒྱ་རིགས་ཤེས་ཡོན་ཅན་མང་པོ་ཞིག་གིས་བོད་དོན་ཐོག་ལ་དམིགས་བསལ་གྱི་དོ་སྣང་བྱས་པ་གཅིག་དང་། དོ་སྣང་བྱས་པའི་ལག་རྗེས་ལ་བོད་པར་བདེན་པ་འདུག རྒྱ་ནག་གུང་ཁྲན་གཞུང་གི་སྲིད་བྱུས་འཁྱེར་སྟངས་རིགས་གཅིག་ནོར་གྱི་འདུག་ཅེས་པའི་བསམ་ཚུལ་ཞིག་དེ་རིང་ཁ་སང་རྒྱ་རིགས་ཤེས་ཡོན་ཅན་ནང་ཤུགས་ཆེ་རུ་འགྲོ་གི་འདུག གཙོ་ཆེ་ཤོས་བོད་རྒྱ་ཆེའི་མི་མང་གི་དངོས་གནས་དྲང་གནས་ཀྱི་ལྷག་བསམ་འགྱུར་བ་མེད་པ་སོ་སོའི་བདེན་པའི་དོན་ལ་འཐབ་རྩོད་བྱ་རྒྱུ་ཚང་མས་སེམས་ཤུགས་ཧ་ལས་པ་ཡོད་པ་དེ་ཞེ་དྲག་ཡག་པོ་རེད། ད་ལྟའི་དུས་འདིར་གལ་ཆེ་ཤོས་ང་ཚོ་ཚང་མས་སློབ་སྦྱོང་བྱེད་རྒྱུའི་ཐོག་ལ་ངོས་ཀྱི་རྟག་པར་ཤོད་ཀྱི་ཡོད། སློབ་སྦྱོང་ལ་ཤུགས་རྒྱག་རྒྱུ་ནི་ཧ་ཅང་གལ་ཆེན་པོ་ཡིན། དེང་དུས་ཀྱི་ཤེས་ཡོན་སློབ་སྦྱོང་བྱ་རྒྱུ་དང་། དེ་བཞིན་བོད་རང་ཉིད་ཀྱི་སངས་རྒྱས་ཀྱི་ཆོས་དང་འདྲེས་པའི་རིག་གཞུང་གཏིང་ཟབ་ཡོད་པ་དེ་དད་པ་བྱེད་སའི་ཡུལ་ཙམ་དུ་མ་བཞག་པར་སློབ་སྦྱོང་བྱེད་རྒྱུ་དེ་ཧ་ཅང་གལ་ཆེན་པོ་རེད། དཔེར་ན། བཀའ་འགྱུར་བསྟན་འགྱུར་པུ་ཏི་ ༣༠༠ ཙམ་ཡོད་པ་རེད། དེ་དག་ཕྱག་མཆོད་འབུལ་བྱེད་ས་ལྟ་བུར་མ་བཞག་པར་སློབ་དེབ་ཡིན་བསམས་ནས་སློབ་སྦྱོང་བྱེད་རྒྱུ་དེ་ཧ་ཅང་གལ་ཆེན་པོ་ཡིན་འདུག འདི་དེ་རིང་ངོས་ཀྱི་གོ་སྐབས་འདི་བཟུང་ནས་འབོད་སྐུལ་ཞུ་འདོད་བྱུང་། ཞེས་བཀའ་སློབ་ཟབ་མོ་སྩལ་ཡོད།།
