༢༠༡༠ ཕྱི་ཟླ་ ༢ ཚེས་ ༨ རེས་གཟའ་ཟླ་བ།

་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་

ཕྱི་ལོ་ ༢༠༡༠ ཟླ་ ༢ ཚེས་ ༥ རེས་གཟའ་པ་སངས་ཉིན་ཨ་རིའི་མངའ་སྡེ་སིན་སིན་ནེ་ཊིའི་(Cincinnati)གྲོང་ཁྱེར་ཨོ་ཧ་ཡོ་Ohio)ནང་རྟེན་གཞི་བྱས་པའི་རྒྱལ་ཡོངས་རང་དབང་བསྟིེ་གནས་ཁང་( The National Underground Railroad Freedom Center)གིས་ཕྱི་ལོ་ ༢༠༡༠ ཟླ་ ༡༠ ཚེས་ ༢༠ ཉིན་(International Freedom Conductor Award) ཞེས་རྒྱལ་སྤྱིའི་རང་དབང་གི་གཟེངས་རྟགས་དེ་༸གོང་ས་མཆོག་ལ་འབུལ་གཏན་འཁེལ་ཡོད་པ་རང་དབང་བསྟིེ་གནས་ཁང་གི་ཚོགས་གཙོ་སྐུ་ཞབས་ཌོ་ནལ་ཌ་མར་ཕེ་(Donald Murphy)ལགས་ཀྱིས་གསལ་བསྒྲགས་གནང་ཡོད། དེ་ཡང་ཚོགས་གཙོ་ཌོ་ནལ་ཌ་མར་ཕེ་ལགས་ཀྱིས་གཟེངས་རྟགས་དེ་༸གོང་ས་མཆོག་ལ་འབུལ་ལམ་ཞུ་རྒྱུའི་ཐོག་འབྲེལ་བརྗོད་གནང་དོན། བོད་ཀྱི་༸སྐྱབས་མགོན་ཏཱ་ལའེ་བླ་མ་མཆོག་གིས་རྒྱལ་སྤྱིའི་རང་དབང་གི་གཟེངས་རྟགས་འདི་བཞེས་རྒྱུའི་ཞལ་བཞེས་མཛད་པར་ང་ཚོར་ཧ་ཅང་ཡིད་རང་དང་ཆེ་མཐོང་ཆེན་པོ་ཐོབ་བྱུང་། གཟེངས་རྟགས་འདི་ནི་རང་དབང་སྲུང་སྐྱོབ་ཆེད་དུ་ཕྱག་ལས་གནང་མཁན་གྱི་ཚོགས་པ་དང་མི་སྒེར་པ་ཚོར་ཕུུལ་བཞིན་ཡོད། བོད་ཀྱི་༸སྐྱབས་མགོན་ཏཱ་ལའེ་བླ་མ་མཆོག་གིས་སྐུ་ངལ་འཛད་མེད་ཐོག་བོད་དོན་ཆེད་དུ་མཛད་འཕྲིན་རྒྱ་ཆེ་བསྐྱངས་པ་དང་། མཆོག་གང་ཉིད་ཀྱི་སྐུ་ཚེ་ཧྲིལ་པོར་འགྲོ་བ་མི་རིགས་ཡོངས་ཀྱི་རང་དབང་དང་ཞི་བདེ་གོང་སྤེལ་མཛད་པ་དེ་ནི་དུས་རབས་ ༡༨ དང་ ༡༩ ནང་བྲན་གཡོག་ལམ་ལུགས་མེད་པ་བཟོ་མཁན་གྱི་ཐབ་རྩོད་པའི་བྱས་རྗེས་དང་ཡང་དག་པར་མཚུངས་པ་ཞིག་རེད་ཅེས་གསུངས། དེ་སྔ་རང་དབང་གཟེངས་རྟགས་དེ་བཞེས་མྱོང་མཁན་གྲགས་ཅན་མི་སྣའི་གྲས་སུ་ལྷོ་ཨ་ཕི་རི་ཀའི་ཡི་ཤུའི་བླ་ཆེན་སྐུ་ཞབས་ཌེ་སི་མོན་ཊ་ཊ་མཆོག་(Bishop Desmond Tutu)དང་། ཨ་རིའི་སྲིད་འཛིན་ཟུར་པ་སྐུ་ཞབས་བྷིལ་ཁི་ལིན་ཊོན་(Bill Clinton)མཆོག་དེ་བཞིན་ཇོར་ཇི་བྷུ་ཤི།(Georg H.W.Bush)མཆོག་བཅས་ཡིན་པ་རེད།