༢༠༡༠ ཕྱི་ཟླ་ ༢ ཚེས་ ༡༧ རེས་གཟའ་ལྷག་པ།
༄༅། །བོད་རྒྱལ་ལོ་ ༢༡༣༧ ཕྱི་ལོ་ ༢༠༡༠ ཟླ་ ༢ ཚེས་ ༡༤ ཉིན་རབ་བྱུང་ ༡༧ ལྕགས་སྟག་གནམ་ལོའི་རང་ཞལ་གསར་དུ་བཞད་པའི་རྟེན་འབྱུང་ཉིན་དང་པོའི་སྔ་དྲོ་ཆུ་ཚོད་ ༧ ཐོག་༸གོང་ས་༸སྐྱབས་མགོན་ཆེན་པོ་མཆོག་ཐེག་ཆེན་ཆོས་གླིང་གཙུག་ལག་ཁང་གི་ཡང་སྟེང་དུ་དཔལ་ལྡན་འདོད་ཁམས་དབང་ཕྱུག་མའི་ཚེས་གཏོར་རྟེན་འབུལ་དངོས་གཞིའི་ཐོག་༸ཞབས་སོར་བཀའ་དྲིན་འཁོད་པའི་ཐོག་མར་རྣམ་གྲྭ་མཁན་རིན་པོ་ཆེས་མཎྜལ་རྟེན་གསུམ་འདེགས་འབུལ་ཞུས་པ་དང་། དེ་ནས་ལྷ་མོའི་གསུང་བསྐང་དང་ཚེས་གཏོར་སོགས་གྲུབ་མཚམས་ཆུ་ཚོད་ ༩ པའི་ཐོག་གཙུག་ལག་ཁང་དུ་མཛད་བཅར་བ་རྣམས་གདན་འཛོམས་དང་སྦྲགས་༸གོང་ས་༸སྐྱབས་མགོན་ཆེན་པོ་མཆོག་བཞུགས་ཁྲི་རིན་པོ་ཆེར་༸ཞབས་སོར་འཁོད་པའི་ཐོག་མར་རྣམ་གྲྭའི་གསུང་ཞབས་རྣམས་ནས་ཞལ་འདོན་ཚིག་མཚམས་སོ་སོར་རྣམ་གྲྭ་མཁན་རིན་པོ་ཆེས་རྟགས་བརྒྱད་དང་། རྒྱལ་སྲིད་སྣ་བདུན། རྫས་བརྒྱད་བཅས་རིམ་བཞིན་འདེགས་འབུལ་གྱིས་ཤིས་བརྗོད་དང་བཅས་ལེགས་པར་གྲུབ་མཚམས་ཁྲིམས་ཞིབ་ཆེ་བ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག བཀའ་བློན་ཁྲི་པ་མཆོག་བཅས་ཀྱིས་མཎྜལ་རྟེན་གསུམ་འདེགས་འབུལ་ཞུས། སྐབས་དེར་ཚོགས་ལངས་པ་གཉིས་ནས་ཆོས་ཀྱི་བགྲོ་གླེང་ཚུགས་ཡོད། དེ་ནས་གསོལ་ཇ་དང་པོ་དང་འབྲས་བསིལ་འདེགས་འབུལ་ཞུས་རྗེས་སླར་ཡང་བགྲོ་གླེང་དབུ་ཚུགས་དང་འབྲེལ་གསོལ་ཇ་གཉིས་པ་ཕེབས་རྗེས་བགྲོ་གླེང་པས་ཚིག་བཀྲ་བཅད་དེ་༸གོང་ས་མཆོག་ལ་མཇལ་དར་ཕུལ་བར་ཕྱག་སྲུང་སྩལ། དེ་ནས་ཀ་ཁྲི་སྒྲོག་རྗེས་༸གོང་ས་མཆོག་གིས་ཐེག་ཆེན་ཆོས་གླིང་གཙུག་ལག་ཁང་གི་གསུང་རྭར་ཆིབས་སྒྱུར་བསྐྱངས་ཏེ་རྒྱ་ཆེའི་མི་མང་རྣམས་ལ་བཀའ་སློབ་ཕེབས་དོན།
དེ་རིང་གནམ་ལོ་གསར་ཚེས་ལ་འདི་གར་དངོས་སུ་འདུས་སྡོད་མཁན་སེར་སྐྱ་དེ་བཞིན་རྒན་བྱིས་ཁྱེད་རང་ཚོ་ཚང་མར་ཞུ་རྒྱུར། བོད་གངས་ཅན་ལྗོངས་ལ་ཡོད་པའི་གཞིས་ལུས་རྒྱ་ཆེའི་མི་མང་དང་དེ་བཞིན་ང་ཚོ་འདི་གར་རང་དབང་ལུང་པའི་ནང་བཙན་བྱོལ་དུ་ཡོད་པའི་བོད་རིགས་མཐའ་དབུས་ཡུལ་གྲུ་ཁག་ལ་ཡོད་པ། ང་ཚོ་བོད་གངས་ཅན་པ་དང་ཆོས་དང་རིག་གཞུང་གཅིག་གྱུར་ཡིན་པའི་ཧི་མ་ལའི་རི་རྒྱུད་ཀྱི་ཆོས་གྲོགས་སེར་སྐྱ་ཕོ་མོ་རྣམས་དང་ཆེན་པོ་ཧོར་གྱི་ཡུལ་ཁག་གི་ང་ཚོ་བོད་དང་ཆོས་དང་རིག་གཞུང་གཅིག་གྱུར་ཡིན་པ་སོག་པོ་ཕྱི་ནང་གི་མཚོན་པའི་ཡུལ་གྲུ་ཁག་གི་ཆོས་གྲོགས་ཚང་མར་ལོ་གསར་གྱི་འཚམས་འདྲི་དང་བཀྲིས་བདེ་ལེགས་ཞུ་རྒྱུ་ཡིན། གཞིས་ལུས་རྒྱ་ཆེའི་མི་མང་ནི་ང་ཚོའི་བོད་ཀྱི་དོན་གྱི་བདག་པོ་ཡིན། དེར་བརྟེན་གཞིས་ལུས་རྒྱ་ཆེའི་མི་མང་གིས་ས་ཁུལ་ཁག་མང་པོ་ཞིག་གི་ནང་སྡུག་བསྔལ་ལ་དྲན་གསོ་བྱེད་རྒྱུའི་དུས་ཚིགསཤིག་ལ་ངོས་འཛིན་བྱས་ཏེ་ལོ་གསར་གྱི་དགའ་དགའ་སྐྱིད་སྐྱིད་བྱ་རྒྱུ་དེ་མ་བྱེད་རོགས་ཞེས་བསམ་ཚུལ་ཞིག་ཐོན་བཞིན་ཡོད།གཞིས་ལུས་རྒྱ་ཆེའི་མི་མང་དེ་དག་ང་ཚོ་བོད་ཀྱི་དོན་གྱི་བདག་པོ་ཡིན། ཁོང་ཚོར་དངོས་སུ་དཀའ་ངལ་འཕྲད་དེ་ལོ་ནས་ལོ་བསྟུད་དེ་འགལ་རྐྱེན་མང་པོ་ཞིག་གི་འོག་སྙིང་སྟོབས་དང་སེམས་ཤུགས་འགྱུར་བ་མེད་པར་སྡོད་མཁན་ཚོས་དེ་ལྟ་བུའི་སེམས་ཐག་གཅོད་སྐབས་ང་ཚོ་རང་དབང་ལུང་པའི་ནང་ཡོད་པ་ཚོས་བོད་ནང་གི་གཞིས་ལུས་རྒྱ་ཆེའི་མི་མང་མང་པོ་ཞིག་ལ་བསམ་ཚུལ་དེ་འདྲ་ཡོད་དུས་ང་ཚོས་འདིར་ལོ་གསར་ལ་སྤྱིར་བཏང་ཡིན་ན་དགའ་དགའ་སྤྲོ་སྤྲོའི་དུས་ཚོད་ཅིག་འཁེལ་ཏེ་རྐང་བྲོ་གླུ་གཞས་ཀྱི་མཚོན་པའི་དེ་འདྲ་བྱེད་ཀྱི་ཡོད་པ་རེད། འོན་ཀྱང་དེ་རིང་ང་ཚོ་ཆོས་ཕྱོགས་ཀྱི་ཐོག་ནས་སྨོན་ལམ་རྒྱག་རྒྱུ་རེད་མ་གཏོགས་ལོ་གསར་གྱི་དུས་ཚིགས་དང་འབྲེལ་ནས་རྐང་བྲོ་གླུ་གཞས་འཁྲབ་རྒྱུ་དེ་ཚོའི་གྲས་ཏེ་མ་བྱས་ན་ཞེས་བརྗོད་དེ། དེ་རིང་གི་མཛད་སྒོར་ཆ་བཞག་ན་ཆོས་ཀྱི་མཛད་སྒོ་མ་གཏོགས་གར་འཁྲབ་རྒྱུ་དེ་མི་དགོས་པ་བྱས་པ་རེད།
དེར་བརྟེན་ང་ཚོ་རང་དབང་ལུང་པར་ཡོད་མཁན་ཚང་མ་འཕྲལ་སེལ་ང་རང་ཚོ་རང་དབང་ལུང་པའི་ནང་སླེབས་ཡོད། འོན་ཀྱང་རྩ་བའི་ང་ཚོ་བོད་ཀྱི་གནས་སྟངས་དེ་ཐབས་སྐྱོ་པོ་ཡོད་པ་དེ་མ་བརྗེད་པ་བྱས་ཏེ་ཚང་མས་སེམས་ནང་བཅངས་ཏེ་གཙོ་ཆེ་བོད་ནང་ཡོད་པའི་གཞིས་ལུས་རྒྱ་ཆེའི་མི་མང་དེ་དག་ཧ་ལས་པའི་སྙིང་སྟོབས་དང་ལྷག་བསམ་གཏན་པོ་བྱས་ནས་སྡོད་ཀྱི་ཡོད་པ་རེད། ང་ཚོ་རང་དབང་ལུང་པའི་ནང་ཡོད་མཁན་ཚོ་ཡིན་ནའང་དེ་བཞིན་དུ་ལྷག་བསམ་དང་སྙིང་སྟོབས་ཞུམ་པ་མེད་པ་ཞིག་དགོས་རྒྱུ་ཚང་མས་བྱེད་རོགས་བྱེད་ཟེར་རྒྱུ་ཡིན། ད་ལོའི་ལོ་འདི་ང་རང་ཚོའི་བོད་ནང་ཡོད་པའི་གཞིས་ལུས་རྒྱ་ཆེའི་མི་མང་ཚོ་ཡིན་ནའང་འདྲ། ང་ཚོ་རང་དབང་ལུང་པའི་ནང་ཡོད་མཁན་ཚོ་ཡིན་ནའང་འདྲ། དེ་བཞིན་ཧི་མཱ་ལ་ཡའི་རི་རྒྱུད་ཀྱི་ང་ཚོའི་ཆོས་གྲོགས་ཚོ་དང་སོག་པོ་ཕྱི་ནང་གི་ཆོས་གྲོགས་ཀྱི་མཚོན་པའི་ཚང་མར་རེ་འདུན་བྱེད་རྒྱུ་དེ་ང་རང་ཚོས་སློབ་སྦྱོང་ཐོག་ལ་ཚང་མས་དོ་སྣང་ཆེན་པོ་བྱས་ཏེ་འབད་བརྩོན་བྱེད་རོགས་བྱེད་ཟེར་རྒྱུ་འདི་དེ་རིང་འདིར་ངོས་ཀྱིས་བརྗོད་འདོད་བྱུང་། ང་ཚོས་ཤེས་ཡོན་ལ་སློབ་སྦྱོང་བྱེད་རྒྱུའི་སྡེ་ཚན་ལྟ་བུ་དེ་ཕྱོགས་གཅིག་ནས་དེང་དུས་ཀྱི་ཤེས་ཡོན་ཐོག་ང་ཚོས་ཚང་མས་ཡིད་གཟབ་བྱས་ཏེ་ག་ཚོད་ཐུབ་ཐུབ་ཀྱི་དོ་སྣང་བྱེད་རྒྱུ་དང་ལྷག་དོན་གཞོན་སྐྱེས་ཚོ་ཡིན་ན། སློབ་སྦྱོང་སོ་སོ་རང་སྐྱ་འཕེར་བ་ཞིག་དང་། ཆེད་ལས་པ་རིགས་གཅིག་རྐང་འཛིན་བྱེད་ཐུབ་པ་ཞིག་གི་སེམས་ཤུགས་དང་སྙིང་སྟོབས་སྐྱེད་དེ་འབད་བརྩོན་བྱེད་རོགས་བྱེད་ཟེར་རྒྱུ་གཅིག་དང་། དེ་དང་ཆབས་ཅིག་ང་རང་ཚོར་ཆོས་དང་རིག་གཞུང་གཙོ་བོ་སངས་རྒྱས་པའི་ཆོས་དང་འདྲེས་པའི་དམིགས་བསལ་གྱི་ཕྱུག་པོ་ཞིག་ཡོད། བསྟན་པ་ཡོངས་སུ་རྫོགས་པ་ཐེག་པ་ཆེ་ཆུང་སྔགས་དང་བཅས་པ་ཆ་ཚང་བ་ཞིག་དེ་ཡང་བཤད་སྒྲུབ་ཟུང་དུ་འབྲེལ་བའི་ཐོག་ནས་བསྟན་པ་འཛིན་སྐྱོང་སྤེལ་གསུམ་བྱ་རྒྱུ་གཙོ་བོ་དེ་བོད་ཀྱི་ཆོས་རྒྱལ་བཀའ་དྲིན་ཅན་ཚོ་དང་ལྷག་པར་མཁན་སློབ་ཆོས་གསུམ་གྱིས་ཐུགས་རྗེ་བཀའ་དྲིན་ལ་བརྟེན་ནས། དེ་འདྲའི་བསྟན་པ་ཡོངས་སུ་རྫོགས་པ་བཤད་སྒྲུབ་ཟུང་འབྲེལ་གྱི་ཐོག་ནས་འཛིན་སྐྱོང་སྤེལ་གསུམ་བྱེད་རྒྱུའི་ཕྱག་སྲོལ་བཟང་པོ་ཞིག་ཡོད།དེར་བརྟེན་ང་རང་ཚོ་ཚང་མས་སློབ་སྦྱོང་བྱེད་རྒྱུ་དེ་ཧ་ཅང་གལ་ཆེན་པོ་ཡིན། རྣམ་དཀར་དགེ་སྒྲུབ་ཅེས་ང་ཚོ་ཚང་མས་བརྗོད་ཀྱི་ཡོད། རྣམ་དཀར་དགེ་བ་བསྒྲུབ་རྒྱུའི་དགེ་བའི་ངོ་བོ་དང་དམིགས་ཡུལ་ག་རེ་ཡིན་པ། དམིགས་ཡུལ་བསྒྲུབ་པར་ཀུན་སློང་གང་འདྲ་ཞིག་དགོས་ཀྱི་ཡོད་པ། དེ་ཐམས་ཅད་རྒྱུ་དང་འབྲས་བུའི་རྟེན་འབྲེལ་ཡིན་སྟབས། རྟེན་འབྲེལ་གྱི་རང་བཞིན་གང་འདྲ་ཡིན་པ་དེ་དག་ང་ཚོས་ཤེས་པའི་ཐོག་ནས་དགེ་བ་སྒྲུབ་ན་དགེ་བ་དེ་མིང་དོན་མཚུངས་པ་ཞིག་ཡོང་གི་ཡོད། དམིགས་ཡུལ་དང་དགེ་བའི་ངོ་བོ་གང་ཡིན་པ་མ་ཤེས། ཀུན་སློང་གང་འདྲ་ཞིག་དགོས་ཀྱི་ཡོད་པ་མ་ཤེས་པའི་ཐོག་ནས་ཕྱག་འཚལ་སྐོར་སྦྱོང་བྱས་པ་ཡིན་ནའང་དེ་ཙམ་གྱི་དགེ་བ་རླབས་ཆེ་བ་ཡོང་མི་ཐུབ་པས་ང་རང་ཚོ་ཚང་མས་དགེ་བ་དང་ཆོས་སྒྲུབ་ཅེས་བརྗོད་ཀྱི་ཡོད། ཆོས་འདི་གང་འདྲ་ཞིག་ཡིན་པ་ཤེས་དགོས་པ་དེ་གལ་ཆེན་པོ་འདུག དེར་བརྟེན་ང་ཚོ་བོད་ཀྱི་ཆོས་དང་རིག་གཞུང་གཅིག་གྱུར་ཡིན་མཁན་ང་ཚོའི་ཆོས་གྲོགས་ཚོར་ཡང་ངོས་ཀྱིས་འདིར་འབོད་སྐུལ་བྱེད་འདོད་བྱུང་། སངས་རྒྱས་པའི་ཆོས་ཞེས་པ་འདི་གང་འདྲ་ཡིན་པ་ཚང་མས་དོ་སྣང་བྱེད་རོགས། ང་རང་ཚོ་བོད་ལ་དེ་སྔ་རྒྱ་གར་ནས་སྤྱིར་བཏང་ངོས་འཛིན་བྱེད་སྟངས་དེ་རིག་གནས་ཆེ་བ་ལྔ་དང་ཆུང་བ་ལྔ་བརྗོད་ཀྱི་ཡོད། ཟློས་གར་དང་སྙན་ངག སྡེབ་སྦྱོར་སོགས་རིག་གནས་ཆུང་བའི་གྲས་རེད། རིག་གནས་ཆེ་བའི་ནང་། བཟོ་རིག་པ་དང་གསོ་བ་རིག་པ། ནང་དོན་རིག་པ། ཚད་མ་རིག་པ། སྒྲ་རིག་པ། དེ་རྣམས་ཤོད་ཀྱི་ཡོད། དེ་དག་གི་ནང་ནས་གཙོ་བོ་ནང་དོན་རིག་པ་རེད། ནང་དོན་རིག་པ་དང་ཚད་མ་རིག་པར་ཆ་བཞག་ན། ཧ་ལམ་འཛམ་གླིང་འདིའི་ཁྱད་ནོར་ལྟ་བུར་ངོས་འཛིན་བྱས་ཆོག་གི་རེད། ཡང་སྒོས་ནང་དོན་རིག་པའི་སྐོར་ལ་ཧ་ཅང་ཕྱུག་པོ་ཡོད། རང་ཉིད་ལ་ཧ་ལམ་འཛམ་གླིང་འདིའི་གཅེས་ནོར་རེད་ཅེས་བརྗོད་ཐུབ་རྒྱུའི་ནང་དོན་རིག་པ་གཏིང་ཟབ་པོ་ཞིག་ཡོད་པ་འདི་ང་རང་ཚོ་བོད་མི་སྒེར་པ་མི་རེ་ངོ་རེའི་ཆ་ནས་སློབ་སྦྱོང་བྱས་ཏེ་ཤེས་པ་བྱུང་ན། ཤེས་རིག་ཅེས་པ་འདི་ཕྱི་ལ་སྡོད་རྒྱུ་ཞིག་མིན་པར་སོ་སོའི་གཤིས་རྒྱུད་ལ་ཚང་དགོས་པ་ཡིན། གཤིས་རྒྱུད་ལ་ཚང་རྒྱུ་དེ་སྦྱང་པ་དང་བསླབ་ནས་ཤེས་དགོས་པ་རེད་མ་གཏོགས་སྨོན་ལམ་བརྒྱབ་ནས་ཤེས་རྒྱུ་མེད། དེར་བརྟེན་ཚང་མས་ཤེས་ཡོན་ཐོག་དོ་སྣང་བྱེད་སའི་ཤེས་ཡོན་དེ་དེང་དུས་ཀྱི་ཤེས་ཡོན་གཅིག་དང་། ང་ཚོར་གནའ་རབས་ནས་ཡོད་པའི་ཤེས་ཡོན་རིག་གནས་ཆེ་ཆུང་བཅུ་ཡོད་པའི་ནང་ནས་གཙོ་ཆེ་ཤོས་ནང་དོན་རིག་པ། ནང་དོན་རིག་པའི་རྣམ་གཞག་ཡག་པོ་ཞིག་ཤེས་རྒྱུ་དང་། རིག་གནས་གང་དང་གང་ཡིན་ཡང་ཟུར་ཕྱིན་པ་ཞིག་དབྱེ་མཚམས་ཕྲ་མོ་ནས་ཕྱེ་སྟེ་ཤོད་ཐུབ་རྒྱུ་ཞིག་ཡོང་བར་ཚད་མ་རིག་པ་གལ་ཆེན་པོ་ཡིན། དེ་དག་ཁྱེད་རང་ཚོ་ཚང་མའི་དགོངས་པར་བཅང་སྟེ་གཙོ་ཆེ་ཤོས་གཞིས་ལུས་རྒྱ་ཆེའི་མི་མང་ཡིན་ནའང་འདྲ། དེ་བཞིན་ཧི་མ་ལ་ཡའི་རི་རྒྱུད་དང་སོག་པོ་ཕྱི་ནང་གི་མཚོན་པའི་ང་ཚོ་བོད་དང་རིག་གཞུང་གཅིག་གྱུར་ཡོད་པ་ཚང་མར་དེ་རིང་འདིར་ངོས་ཀྱིས་འབོད་སྐུལ་བྱེད་འདོད་བྱུང་། འཛམ་གླིང་འདིའི་ཐོག་ང་ཚོ་བོད་པའི་གྲོགས་པོ་མང་པོ་ཞིག་ཡོད། ཆོས་ཕྱོགས་ཐོག་ནས་གྲོགས་པོ་མང་པོ་ཞིག་ཡོང་གི་ཡོད། བོད་པའི་བདེན་དོན་འཐབ་རྩོད་བྱེད་རྒྱུའི་ཐོག་ལ་དོ་སྣང་བྱེད་མཁན་གྱི་གྲོགས་པོ་མང་པོ་ཞིག་ཡོད་པ་ཚང་མར་དེ་རིང་གི་གོ་སྐབས་འདི་བཟུང་ནས་དམིགས་བསལ་གྱི་འཚམས་འདྲི་ཞུ་གི་ཡོད། བཀྲིས་བདེ་ལེགས། ཞེས་བཀའ་སློབ་སྩལ།
ཐེངས་འདིའི་མཛད་སྒོར་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་ལས་ཟུར་རྣམ་པ། བོད་མི་མང་སྤྱི་འཐུས་ཚོགས་གཙོ་ལས་ཟུར་རྣམ་པ། བཀའ་བློན་ཁྲི་པའི་གཙོས་བཀའ་བློན་ལས་ཟུར་རྣམ་པ། བོད་མི་མང་སྤྱི་འཐུས་ཚོགས་གཙོ་མཆོག འོས་བསྡུ་ལྷན་ཁང་དང་གཞུང་ཞབས་འདེམས་ལྷན། སྤྱི་ཁྱབ་རྩིས་ཞིབ་ཁང་བཅས་ཀྱི་འགན་འཛིན་ལས་ཟུར་རྣམ་པ། ཆོས་ལུགས་ཆོལ་གསུམ་དང་བཅས་པའི་སྤྱི་འཐུས་ལས་ཟུར་རྣམ་པ། གཞུང་འབྲེལ་སྐུ་བསྟེན་རྣམ་པ། སྐུ་སྒེར་དྲུང་ཆེས་དབུས་དྲུང་ཆེ་ལས་ཟུར་རྣམ་པ། སྐུའི་སྨན་ཞབས་རྣམ་པ། དབུས་སྨན་རྩིས་ཁང་དང་། དཔེ་མཛོད་ཁང་། ཟློས་གར། བདེ་སྲུང་ཉམས་ཞིབ། བདེ་ལེགས་སྨན་ཁང་བཅས་ཀྱི་འགན་འཛིན་རྣམ་པ། རྡ་ས་ས་གནས་འགོ་འཛིན། རྡ་ས་རང་བདེན་ཚོགས་གཙོ། སམ་བྷོ་ཊ་སྤྱི་ཁྱབ་འགན་འཛིན། བོད་ཁྱིམ་སྤྱི་ཁྱབ་འགན་འཛིན། བོད་ཁྱིམ་ཤེས་རིག་འགན་འཛིན། རྡ་ས་བོད་ཁྱིམ་དབུ་འཛིན། བོད་ཁྱིམ་སྟེང་ཤོད་གཉིས་ཀྱི་སློབ་སྤྱི་བཅས་དང་། དེ་བཞིན་སྲི་ཞུའི་ལས་བྱེད་བྱིངས་དང་རང་ཁོངས་ལས་བྱེད། སྡེ་ཁག་གི་ལས་བྱེད་རྣམ་དང་དེ་བཞིན་སེར་སྐྱ་མི་མང་སྟོང་ཕྲག་བརྒལ་བ་བཅར་ཡོད་པ་བཅས།།
