༢༠༡༠ ཕྱི་ཟླ་ ༢ ཚེས་ ༥ རེས་གཟའ་པ་སངས།

——————————————————————————–

ཕྱི་ལོ་ ༢༠༡༠ ཟླ་ ༡ ཚེས་ ༡༢ ཉིན་ཧེ་ཊིར་(Haiti)ས་ཡོམ་གྱི་གོད་ཆག་ཤུགས་ཆེ་ཕོག་པའི་མི་མང་ཚོར་གདུང་སེམས་མཉམ་སྐྱེ་མཚོན་ཆེད་༸གོང་ས་མཆོག་གིས་རྒྱལ་ སྤྱིའི་རྒྱ་གྲམ་དམར་པོ་བརྒྱུད་ཧེ་ཊི་མི་མང་ཚོར་སུད་སྒོར་ ༡༠༠༠༠༠ ཞལ་འདེབས་གསོལ་རས་སྩལ་བར་རྒྱལ་སྤྱིའི་རྒྱ་གྲམ་དམར་པོའི་སྤྱི་ཁྱབ་དྲུང་ཆེ་སྦེ་ཀེ་ལེ་ཇེ་ལེ་ཊ་(Bekele Geleta)མཆོག་ནས་༸གོང་ས་མཆོག་གིས་ཞལ་འདེབས་གསོལ་རས་སྩལ་བར་ཐུགས་རྗེ་ཆེ་ཞུའི་འཕྲིན་ཡིག་གཅིག་ཕུལ་བའི་ནང་འཁོད་དོན། རྒྱལ་སྤྱིའི་རྒྱ་གྲམ་དམར་པོའི་མཐུན་ཚོགས་(International Federation of Red Cross)དང་ཟླ་གམ་དམར་པོའི་ཚོགས་པ་(Red Crescent Socities) གཉིས་ཀྱི་ཚབ་ཞུས་ནས་ངས་སྐུ་ཉིད་ཀྱིས་ང་ཚོའི་ཧེ་ཊིའི་ནང་རོགས་སྐྱོར་གྱི་ལས་གཞིར་རྒྱབ་སྐྱོར་དང་གདུང་སེམས་མཉམ་སྐྱེ་མཛད་པར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། སྐུ་ཉིད་ཀྱིས་ཧེ་ཊིའི་ནང་ང་ཚོའི་རོགས་རམ་གྱི་ལས་གཞིར་རྒྱབ་སྐྱོར་གནང་རྒྱུའི་ཆོད་སེམས་དེར་ང་ཚོས་རྗེས་སུ་ཡིད་རང་ཞུ་རྒྱུ་དང་། སྐུ་ཉིད་ཀྱི་གདུང་སེམས་མཉམ་སྐྱེ་མཛད་པ་དེ་ཧེ་ཊིར་རྟེན་གཞི་བྱས་པའི་རྒྱལ་སྤྱིའི་རྒྱ་གྲམ་དམར་པོ་དང་དེར་ང་ཚོའི་ཚོགས་མི་ལས་རོགས་རྣམས་ལ་གསལ་བཤད་བྱས་ཡོད་ཅེས་སོགས་འཁོད་ཡོད།