༢༠༡༠ ཕྱི་ཟླ་ ༢ ཚེས་ ༦ རེས་གཟའ་སྤེན་པ།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
ཕྱི་ལོ་ ༢༠༡༠ ཟླ་ ༢ ཚེས་ ༢ ཉིན་གྱི་ཉིན་རྒྱབ་ཚོུད་ ༣ ཐོག་༸གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་དང་སྐལ་བཟང་རྒྱལ་མཚན་མཆོག་རྣམ་གཉིས་ཀྱིས་དབུ་ཁྲིད་པའི་བོད་རྒྱ་འབྲེལ་མོལ་ཐེངས་དགུ་པ་གནང་བའི་སྐོར་གསར་འགོད་གསལ་བསྒྲགས་ཤིག་གངས་སྐྱིད་སྤྱི་ཐབ་ཡང་སྟེང་ཚོགས་ཁང་དུ་གནང་ཡོད། སྐབས་དེར་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས་གསར་འགོད་པ་རྣམས་ལ་འཚམས་འདྲི་གནང་རྗེས་གསར་འགོད་གསལ་བསྒྲགས་དབྱིན་ཡིག་ཐོག་ཡོད་པ་དྲིལ་བསྒྲགས་དྲུང་ཆེ་ཐུབ་བསྟན་བསམ་འཕེལ་ལགས་ཀྱིས་སྒྲོགས་སྱང་གནང་གྲུབ་མཚམས་ཕྱི་ནང་གསར་འགོད་པ་འདུ་འཛོམས་ཡོད་པའི་བཅར་འདྲི་དྭང་ལེན་ཞུས་ཡོད་པ་རེད། དེ་ཡང་གསར་འགོད་པ་ཁག་གཅིག་གིས་མ་འོངས་པར་རྒྱ་ནག་གཞུང་དང་འབྲེལ་ལམ་མུ་མཐུད་གནང་རྒྱུར་སྐུ་ཚབ་རྣམ་པར་གྲ་སྒྲིག་ཡོད་མེད་དྲིས་པར་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས། པེ་ཅིང་དུ་ང་ཚོ་དང་ལྷན་དུ་འབྲེལ་མོལ་གནང་མཁན་རྒྱ་ནག་གཞུང་གི་སྐུ་ཚབ་རྣམ་པས་ང་ཚོའི་གནས་སྟངས་དེ་གསལ་པོ་ཤེས་ཀྱི་ཡོད། ༸གོང་ས་མཆོག་སྐུ་སྒེར་གྱི་གནད་དོན་ཐོག་རྒྱ་ནག་གཞུང་དང་རྩོད་གླེང་བྱེད་རྒྱུ་གང་ཡང་མེད། ང་ཚོའི་གསར་འགོད་གསལ་བསྒྲགས་ནང་དུའང་དེ་གསལ་པོ་བཀོད་ཡོད་པ་མ་ཟད། ད་རེས་འབྲེལ་མོལ་སྐབས་སུ་ཡང་ང་ཚོས་རྒྱ་ནག་གཞུང་གི་སྐུ་ཚབ་རྣམ་པར་མཐའ་གཅིག་ཏུ་གསལ་བཤད་བྱས་ཡོད། ང་ཚོས་གྲོས་མོལ་ཞུ་རྒྱུའི་གནད་དོན་དེ་བོད་མི་ཚོའི་བདེ་དོན་དང་མདུན་ལམ་དེ་ཡིན་པ་ལས་༸གོང་ས་མཆོག་སྐུ་སྒེར་གྱི་གནད་དོན་དང་ཐོབ་གོ་ས་སོགས་ཀྱི་ཐོག་ང་ཚོས་འབྲེལ་མོལ་བྱེད་རྒྱུ་གང་ཡང་མེད། དངོས་འབྲེལ་བྱས་ན་ད་བར་བྱུང་བའི་འབྲེལ་མོལ་ཐེངས་དགུ་པོ་འདི་དང་། དེའི་སྔོན་དུའང་ཕྱི་ལོ་ ༡༩༧༩ ལོར་རྒྱ་ནག་གཞུང་དང་འབྲེལ་བ་འགོ་བཙུགས་པ་ནས་བཟུང་༸གོང་ས་མཆོག་སྐུ་སྒེར་གྱི་ཐོབ་གོ་ས་དང་གནད་དོན་ཐོག་ང་ཚོས་རྒྱ་ནག་གཞུང་དང་འབྲེལ་མོལ་བྱེད་དགོས་པ་ནམ་ཡང་ཆགས་མེད། དེ་ནི་རྒྱ་ནག་གཞུང་གི་ཆབ་སྲིད་ཀྱི་འུད་ཤོབ་བཤད་པ་ཞིག་རེད།
ང་ཚོས་འབྲེལ་མོལ་ཞུ་རྒྱུ་དེེ་བོད་མི་ཚོའི་གནད་དོན་ཐོག་ཡིན་པ་རྒྱ་ནག་གཞུང་ཕྱོགས་ནས་ཤེས་ཀྱི་ཡོད་པ་རྣམ་འགྱུར་ནས་ཀྱང་གསལ་པོ་རེད། རྒྱུ་མཚན་དེར་བརྟེན་ང་ཚོས་མཛུབ་སྟོན་བྱས་ནས་གསལ་བཤད་འདི་འདྲ་ཞུ་རྒྱུ་བྱུང་། སྤྱིར་ང་ཚོ་ཕྱོགས་གཉིས་ཀྱི་ལངས་ཕྱོགས་དེར་ཧེ་བག་ཆེན་པོ་ཡོད་ཀྱང་བོད་ཀྱི་ལས་དོན་བཞུགས་མོལ་ཚོགས་འདུ་ཐེངས་ལྔ་པའི་རྗེས་སུ་བཏོན་པའི་ཡིག་ཆ་དང་རྒྱ་ནག་གཞུང་གིས་བོད་ནང་སྲིད་བྱུས་ལག་སྟར་བྱེད་རྒྱུ་འཁོད་པ་དེ་དག་ཕྲན་བུ་༸གོང་ས་མཆོག་གི་ཐུགས་ཀྱི་བཞེད་དགོངས་ཀྱི་ཆ་ཤས་ཤིག་ཆགས་ཡོད། དེར་བརྟེན་༸གོང་ས་མཆོག་སྐུ་སྒེར་གྱི་ཐོབ་གོ་ས་དང་མ་འོངས་ཀྱི་གནད་དོན་ཐོག་ང་ཚོས་རྒྱ་ནག་གཞུང་དང་གྲོས་མོལ་ཞུ་རྒྱུ་གང་ཡང་མེད་པ་དེ་ཧ་ཅང་གསལ་པོ་རེད། ང་ཚོ་རྒྱ་ནག་གཞུང་དང་འབྲེལ་བ་བྱེད་རྒྱུར་གྲ་སྒྲིག་དང་འདོད་པ་ཡོད།
རྒྱ་ནག་གཞུང་ཕྱོགས་ནས་ཀྱང་ང་ཚོ་དང་གྲོས་མོལ་བྱེད་རྒྱུ་དེ་གལ་ཆེ་ཞིག་འཛིན་གྱི་ཡོད་པ་ད་ཐེངས་སླར་ཡང་གསལ་བཤད་བྱས་བྱུང་། ང་ཚོའི་ངོས་ནས་ད་ལྟའི་བོད་རྒྱ་འབྲེལ་ལམ་དེ་ཐོག་མར་ཏེང་ཞའོ་ཕིང་ (Deng Xiaoping) གིས་ཕྱི་ལོ་ ༡༩༧༩ ལོར་འགོ་འཛུགས་གནང་བ་ཞིག་རེད། འོན་ཀྱང་དེ་ནས་བཟུང་༸གོང་ས་མཆོག་གི་ཐུགས་བརྩོན་ལ་བརྟེན་ནས་འབྲེལ་ལམ་དེ་ད་བར་རྒྱུན་གནས་ཐུབ་ཡོད། ག་དུས་ཡིན་ནའང་༸གོང་ས་མཆོག་དང་བོད་མིའི་དབུ་ཁྲིད་ཚོས་ཡང་ནས་ཡང་དུ་བོད་རྒྱ་འབྲེལ་ལམ་དེ་རྒྱུན་གནས་ཡོང་རྒྱུར་འབད་བརྩོན་བྱེད་བཞིན་ཡོད་ཅེས་བརྗོད་རྒྱུར་ང་ཚོར་འཚེར་སྣང་གང་ཡང་མི་འདུག ང་ཚོས་རྒྱ་ནག་གཞུང་དང་འབྲེལ་ལམ་མུ་མཐུད་བྱེད་འདོད་ཡོད་པ་མ་ཟད། དོན་དངོས་ཐོག་བོད་མིའི་དབུ་ཁྲིད་ཚོས་བོད་ཀྱི་གནད་དོན་ཐག་གཅོད་བྱེད་རྒྱུར་རྒྱ་ནག་གཞུང་དང་ཐད་ཀར་གྲོས་མོལ་བྱེད་རྒྱུའི་ཐབས་ལམ་དེ་ཁོ་ན་ཡིན་པ་བསམ་བཞིན་ཡོད། དེར་བརྟེན་ང་ཚོས་རྒྱ་ནག་གཞུང་དང་འབྲེལ་ལམ་མུ་མཐུད་བྱེད་རྒྱུའི་ཆོད་སེམས་བཅངས་ཡོད་པ་དེ་གསལ་པོ་རེད། འོན་ཀྱང་ང་དང་ངའི་རོགས་པ་སྐལ་བཟང་རྒྱལ་མཚན་ནས་གལ་ཏེ་ང་ཚོ་ཕྱོགས་གཉིས་དབར་མུ་མཐུད་གྲོས་མོལ་དེ་རྒྱུན་འཁྱོང་ཡོང་བ་ཞིག་དགོས་ན་རྒྱ་ནག་གཞུང་གི་ལངས་ཕྱོགས་དེར་ཕྲན་བུ་ཡར་རྒྱས་གཏོང་དགོས་པ་དེ་གསལ་པོའི་ཐོག་ཞུ་རྒྱུ་བྱུང་། གྲོས་མོལ་བྱེད་རྒྱུའི་གནད་དོན་དེ་དག་གལ་གནད་ཆེན་པོ་དང་རྙོག་འཛིང་ཆེན་པོ་རེད། དེར་བརྟེན་ང་ཚོས་གནད་དོན་དེ་དག་ལམ་སེང་ཐག་གཅོད་ཡོང་གི་རེད་བསམ་པ་དང་། གྲོས་མོལ་ཐེངས་རྗེས་མར་ཐག་གཅོད་ཡོང་གི་རེད་བསམ་པའི་འཁྲུལ་སྣང་གང་ཡང་མེད། གནད་དོན་དེ་དག་ཐག་གཅོད་ཡོང་བར་དུས་ཚོད་འགོར་གྱི་རེད། ང་ཚོས་ངང་སྒུག་བྱེད་རྒྱུའི་བཟོད་བསྲན་དགོས། ང་ཚོས་བཟོད་བསྲན་ཐོག་ངང་སྒུག་བྱེད་ཐུབ་ཀྱི་ཡོད་པ་དེ་ཡང་གསལ་སྟོན་བྱས་ཡོད། འོན་ཀྱང་གྲོས་མོལ་དེ་མུ་མཐུད་རྒྱུན་འཁྱོང་ཡོང་བར་རྒྱ་ནག་གཞུང་གི་ལངས་ཕྱོགས་དེར་ཕྲན་བུ་ཡར་རྒྱས་གཏོང་དགོས་ཀྱི་ཡོད་པ་དེ་ང་ཚོས་ཧ་ཅང་གསལ་པོའི་ཐོག་ཞུ་རྒྱུ་བྱུང་། དཔེར་ན་། རྒྱ་ནག་གཞུང་གིས་༸གོང་ས་མཆོག་ལ་ཁ་བྲལ་བ་ཞེས་གཞི་མེད་ཀྱི་སྐྱོན་འཛུགས་དེ་དག་མཚམས་འཇོག་དགོས་པ་ང་ཚོའི་གསལ་བསྒྲགས་ཡིག་ཆ་དེའི་ནང་གསལ་པོར་བཀོད་ཡོད། འོན་ཀྱང་གནད་དོན་དེ་ང་ཚོས་རྒྱ་ནག་གཞུང་དང་གྲོས་མོལ་བྱ་རྒྱུའི་ཆ་རྐྱེན་ཞིག་ལ་ངོས་འཛིན་བྱེད་ཀྱི་མེད། ང་ཚོས་ཕར་ལའང་སྔོན་འགྲོའི་ཆ་རྐྱེན་བཞག་གི་མེད་ལ་ཚུར་ཡང་བཞག་རྒྱུར་ཁས་ལེན་བྱེད་ཀྱི་མེད། ༸གོང་ས་མཆོག་ཁ་བྲལ་བ་མིན་པ་དེ་འཛམ་གླིང་ཚང་མས་ཤེས་གསལ་རེད། རང་དབང་ཅན་གྱི་འཛམ་གླིང་མི་མང་ཚོས་༸གོང་ས་མཆོག་གི་གནས་ཚུལ་དེ་རྒྱ་མིའི་དཔོན་རིགས་ཚོ་ལས་ཡག་པ་ཤེས་ཀྱི་ཡོད། རྒྱ་ནག་མི་མང་ཚོར་རང་དབང་མེད་སྟབས་༸གོང་ས་མཆོག་གི་སྐོར་གོ་རྟོགས་དེ་བས་ཉུང་བ་ཡོད། རྒྱ་ནག་གཞུང་གིས་༸གོང་ས་མཆོག་ལ་གཞི་མེད་སྐྱོན་འཛུགས་བྱས་པ་དེས་རྒྱ་ནག་གཞུང་གི་མཚན་མཐོང་འཛད་ཀྱི་ཡོད། ༸གོང་ས་མཆོག་གིས་ཡང་ཡང་གསལ་པོའི་ཐོག་བོད་ཀྱི་དཀའ་རྙོག་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་སེལ་རྒྱུའི་ཐབས་ལམ་འཚོལ་བཞིན་ཡོད་སྐོར་བཀའ་སློབ་སྩལ་ཡོད་པ་དེ་དག་ང་ཚོས་ཧ་ཅང་གསལ་པོའི་ཐོག་བརྗོད་ཡོད། དེ་དག་གཞིར་བཞག་ཐོག་ང་ཚོ་རྒྱ་ནག་གཞུང་དང་ལྷན་གྲོས་མོལ་བྱེད་རྒྱུའི་ཆོད་སེམས་དེ་མུ་མཐུད་ནས་ཡིད་བཅང་བྱེད་རྒྱུ་ཡིན་ཞེས་བརྗོད་ཡོད། དེ་རྗེས་ཨ་རིའི་གསར་འགོད་པ་གཅིག་གིས་ད་ལན་ཁོང་ཚོའི་རྣམ་འགྱུར་དེ་སྔོན་དང་མི་འདྲ་བ་བཟང་ཕྱོགས་གང་འདུག་ཅེས་དྲིས་པར་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་གིས་ལན་འདེབས་གནང་དོན། རྒྱ་ནག་གཞུང་གི་སྐུ་ཚབ་ཚོས་ཐོག་མའི་རྣམ་འགྱུར་དེ་ང་ཚོར་འདོད་བློ་ཁེངས་པོ་མ་བྱུང་། འོན་ཀྱང་ང་རང་དེར་ཧང་སངས་མ་བྱུང་། གང་ཡིན་ཟེར་ན་ཁོང་ཚོའི་ལས་ཀ་བྱེད་སྟངས་ཀྱི་འཛིན་སྐྱོང་གི་ལམ་ལུགས་དེ་ང་ཚོའི་ལམ་ལུགས་དང་ཐ་དད་རེད། ཁོང་ཚོའི་འཛིན་སྐྱོང་གི་ལམ་ལུགས་དེ་དག་ནི་དེ་ཙམ་ཕྱི་གསལ་ནང་གསལ་མེད། ཁོང་ཚོའི་ཐོག་མའི་རྣམ་འགྱུར་འདོད་བློ་ཁེངས་པོ་དེ་ཙམ་མེད་ནའང་ང་ཚོས་རྒྱ་ནག་གཞུང་གི་སྐུ་ཚབ་ཚོར་འདི་འདྲ་ཞུས་པ་ཡིན། ཁྱེད་ཚོས་བསམ་ཚུལ་གང་བཏོན་པ་ཐེངས་འདིར་རྒྱ་ནག་གཞུང་གིས་བྱེད་མི་རུང་བ་བཞི་ཟེར་བའི་བསམ་ཚུལ་བཏོན་ཡོད། དེ་དག་ལ་ང་ཚོས་དོ་ནན་པོ་དང་ཞིབ་ཚགས་ཐོག་བསམ་བློ་གཏོང་རྒྱུ་དང་། ཁྱེད་ཚོས་ཀྱང་ང་ཚོས་བཏོན་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར།དང་། གྲོས་མོལ་བྱེད་རྒྱུའི་གནད་དོན་ཐོག་བསམ་བློ་ནན་པོ་གཏོང་དགོས་པ་མ་ཟད། རིམ་པ་གོང་མར་སྙན་སེང་ཞུ་དགོས་པ་དེ་གསལ་བཤད་ནན་པོ་ཞུས་རྒྱུ་བྱུང་། ང་ཚོས་རྒྱ་ནག་གཞུང་གི་སྐུ་ཚབ་ཚོར་བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་པ་དང་བོད་མི་རྣམས་སྡུག་བསྔལ་མྱོང་བཞིན་ཡོད་སྐོར་ཤོད་སྐབས་རྒྱ་ནག་གཞུང་གི་སྐུ་ཚབ་རྣམ་པས་རྒྱུན་ལྡན་ལྟར་སྐབས་དེར་བོད་ནང་གི་བོད་མི་ཚོ་བདེ་སྐྱིད་ལྡན་པ་དང་བོད་ཀྱི་གནད་དོན་ཟེར་བ་དེ་འདྲ་གང་ཡང་མེད་སྐོར་བརྗོད་བྱུང་བ་མ་ཟད། རྒྱ་མིའི་སྐུ་ཚབ་ལྷན་དུ་བོད་རང་སྐྱོང་ལྗོང་མི་དམངས་འཐུས་མི་ཚོགས་ཆེན་གྱི་ཚོགས་གཙོ་གཞོན་པ་ཉི་མ་ཚེ་རིང་དང་བོད་རིགས་གཞན་དབུས་འཐབ་ཕྱོགས་གཅིག་གྱུར་བློན་ཆེན་གཞོན་པ་སྲི་ཐར་གྱིས་ཀྱང་ཁ་གཅིག་གྲགས་ཐོག་བོད་ནང་བདེ་སྐྱིད་ཡོད་སྐོར་བརྗོད་བྱུང་། དེར་ངས་གདེང་སྤོབས་ཆེན་པོའི་ཐོག་ང་ཚོ་བཙན་བྱོལ་དུ་སླེབས་ནས་མི་ལོ་ ༥༠ ཙམ་ཕྱིན་པར་བརྟེན་བོད་མི་ཚོའི་གནས་ཚུལ་ངོ་མ་དེ་ཁོང་ཚོ་ལས་ང་ཚོར་རྒྱུས་མངའ་ཆེ་བ་ཡོད་ཚུལ་ཞུ་རྒྱུ་བྱུང་ཞེས་གསུངས་ཡོད། དེ་རྗེས་གསར་འགོད་པ་གཅིག་གིས་བྱེད་མི་རུང་བ་བཞི་པོ་གང་ཡིན་དྲིས་པར་སྐུ་ཚབ་སྐལ་བཟང་རྒྱལ་མཚན་མཆོག་གིས་བྱེད་མི་རུང་བ་བཞི་པོ་རྣམས་རེ་རེ་བཞིན་གསལ་བཤད་གནང་ཡོད་པ་མ་ཟད། ཁོང་གིས་མུ་མཐུད་གསུངས་གསལ། རྒྱ་མིའི་དཔོན་རིགས་ཚོས་བོད་ཀྱི་གནད་དོན་ཐག་གཅོད་བྱེད་རྒྱུར་ད་ལྟའི་ཆར་བཟང་ཕྱོགས་ཀྱི་རྣམ་པ་སྟོན་མིན་ལ་མ་ལྟོས་པར་འབྲེལ་མོལ་བྱུང་བ་དེ་ཙམ་གྱིས་ང་ཚོར་རྒྱ་མིའི་སྐུ་ཚབ་ཚོ་དང་གདོང་ཐུག་སྟེ་སྐད་ཆ་ཤོད་རྒྱུ་དང་། གསལ་བཤད་བྱེད་རྒྱུ། རྒྱུ་མཚན་ཤོད་རྒྱུ་བཅས་ཀྱི་གོ་སྐབས་ཤིག་ཐོབ་ཡོད། ང་ཚོས་རྒྱ་ནག་གཞུང་དང་ཕན་ཚུན་གཉིས་མོས་ཀྱི་ཐབས་ལམ་ཞིག་འཚོལ་གྱི་ཡོད་པ་དེ་གྲོས་མོལ་གྱི་ཐབས་ལམ་ཁོ་ན་ལས་གཞན་མེད་སྟབས་མ་འོངས་པར་ང་ཚོས་གྲོས་མོལ་མུ་མཐུད་བྱེད་མིན་དེ་རྒྱ་མིའི་དཔོན་རིགས་ཚོས་ད་ལྟའི་ཆབ་སྲིད་ཀྱི་རྣམ་པ་བཟང་ངན་ཇི་འདྲ་ཞིག་བཏོན་མིན་ལ་ཁྱད་པར་གང་ཡང་མེད་ཅེས་གསུངས། ཐེངས་འདིའི་གསར་འགོད་གསལ་བསྒྲགས་དེ་སྐུ་ཚབ་རྣམ་གཉིས་ཀྱིས་གཙོ་བོ་དབྱིན་སྐད་ཐོག་གསུངས་ཡོད་སྟབས་བོད་པའི་གསར་འགོད་པ་ཁག་གཅིག་གིས་གསར་འགོད་གསལ་བསྒྲགས་དེ་གྲུབ་མཚམས་སླར་ཡང་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་ལ་དྲི་བ་ཕུལ་བར་ཁོང་ནས་བོད་སྐད་ཐོག་ལན་འདེབས་གནང་དོན།
ད་རེས་གྲོས་མོལ་སྐབས་བོད་རང་སྐྱོང་ལྗོངས་ནས་བོད་རང་སྐྱོང་ལྗོངས་ས་གནས་མི་དམངས་འཐུས་མི་ཚོགས་ཆེན་གྱི་ཀྲུ་ཞི་གཞོན་པ་ཉི་མ་ཚེ་རིང་ལགས་ཕེབས་ཡོད་སྟབས་ངས་གོ་སྐབས་དེ་བཟུང་སྟེ་ཁོང་ལ་རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་སྤྱི་ཚོགས་རྙིང་པ་སླར་གསོ་བྱེད་ཀྱི་ཡོད་པ་དང་། རྡ་སར་ཡོད་པའི་བཙན་བྱོལ་བོད་མིའི་སྒྲིག་འཛུགས་དེ་བོད་ལ་ཕར་ཡོང་ནས་བོད་ནང་དབང་སྒྱུར་བྱེད་ཀྱི་རེད་ཟེར་བའི་འཁྱོག་བཤད་དེ་ཚོ་ང་ཚོའི་རྨི་ལམ་ནང་དུའང་མེད། ༸གོང་ས་མཆོག་གིས་ཐུགས་སྤོབས་པ་དང་ལྡན་པའི་ཐོག་ནས་རྒྱ་གར་ནང་མང་གཙོའི་སྒྲིག་འཛུགས་ཚད་དང་ལྡན་པ་ཞིག་འཛུགས་གནང་མཛད་ཡོད་པ་ཁྱེད་ཚོས་མཐོང་ཐུབ། དེ་དང་ཆབས་ཅིག་ད་ལྟའི་བཙན་བྱོལ་ནང་ཡོད་པའི་བོད་མིའི་དབུ་ཁྲིད་ཚོས་བོད་ནང་ཡོང་ནས་དབང་ཆ་འཛིན་རྒྱུའི་འཆར་གཞི་གང་ཡང་མེད། བོད་ནང་བློ་ཁ་མ་ཚིམས་མཁན་དེ་ཁྱེད་ཚོས་བཅིངས་བཀྲོལ་བཏང་ཡུལ་བོད་ནང་ཡོད་པའི་ཉམ་ཐག་མི་མང་དེ་ཚོ་རེད། བཙན་བྱོལ་ནང་བྲོས་བྱོལ་དུ་ཡོང་མཁན་བོད་མི་བརྒྱ་ཆ་ ༨༠ ཙམ་ཁྱེད་ཚོས་བཅིངས་བཀྲོལ་བཏང་བ་ཡིན་ཟེར་བའི་བོད་མི་ཉམ་ཐག་དེ་ཚོ་རེད་མ་གཏོགས་བླ་དྲག་མི་དྲག་དེ་ཚོ་མ་རེད། ཅེས་གསལ་བཤད་ཞུས་པ་ཡིན། གང་ཡིན་ཟེར་ན་གནས་ཚུལ་དེ་ཚོ་ང་ཚོས་གལ་གནད་ཆེན་པོ་གཅིག་ལ་འཛིན་གྱི་ཡོད། ལྷག་པར་དུ་སྔ་ལོ་ནས་བོད་རང་སྐྱོང་ལྗོངས་ཀྱི་ས་གནས་དཔོན་རིགས་གཅིག་བོད་རྒྱ་གྲོས་མོལ་ཚོགས་འདུའི་ནང་ཞུགས་རྒྱུའི་ལམ་ཞིག་བཟོས་ཡོད་ཙང་ང་ཚོས་གསལ་བཤད་བྱེད་དགོས་པ་ཞིག་ཆགས་ཡོད་ཅེས་གསུངས། དེ་བཞིན་གྲོས་མོལ་སྐབས་རྒྱ་ནག་གཞུང་གིས་སྐུ་ཚབ་འཐུས་མི་ཡིན་པ་བོད་རིགས་ཚོས་བོད་མིའི་ངོ་ཚབ་སུས་བྱེད་ཐུབ་མིན་ཤོད་པར་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས་བོད་རྒྱ་ཆེའི་མི་མང་གི་ཚབ་བྱེད་ཐུབ་མཁན་དེ་རྒྱལ་བ་བསྟན་འཛིན་རྒྱ་མཚོ་ལས་ལྷག་མེད་པ་དེ་དངོས་ཡོད་གནས་ཚུལ་ཡིན་སྐོར་གསལ་བཤད་ཞུས་ཡོད་ཅེས་དང་། དེ་བཞིན་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་གིས། བྱེད་མི་རུང་བ་བཞི། ཟེར་བའི་གནད་དོན་ཐོག་གསུངས་དོན།
ཧོབ་སྟེེ་བལྟས་པ་ཡིན་ན་དཀའ་ངལ་གང་ཡང་མི་འདུག གང་ཡིན་ཟེར་ན་ང་ཚོས་ཁ་བྲལ་གྱི་ལས་འགུལ་བྱེད་ཀྱི་མེད། རང་བཙན་གནས་ཚུལ་ཤོད་ཀྱི་མེད། ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་གཞིར་བཟུང་ཐོག་འགྲོ་རྒྱུ་ཡིན་པ་དེ་དག་མང་ཆེ་བ་ཞིག་༸གོང་ས་མཆོག་གིས་གསལ་པོར་བཀའ་སྩལ་ཡོད། རྙོག་དྲ་དེ་འགྲེལ་བཤད་བྱེད་སྐབས་ང་ཚོས་བོད་རིགས་ཡོད་དོ་ཅོག་འཛིན་སྐྱོང་གཅིག་དགོས་པའི་རེ་འདུན་དེ་ཡང་རྩ་ཁྲིམས་དང་འགལ་ཚུལ་ཤོད་ཀྱི་ཡོད་ཙང་རྙོག་དྲ་དེ་འདྲའི་སྒང་ལ་ལྷག་ཡོད། ཧོབ་སྟེ་བལྟས་པ་ཡིན་ན་རྩ་ཁྲིམས་དང་འགལ་བའི་སྐད་ཆ་མ་ཤོད་ལབ་སྐབས་དཀའ་ངལ་མེད་པ་འདྲ་པོ་རེད། འོན་ཀྱང་འགྲེལ་བཤད་ཞུ་སྐབས་ཚད་མཐོའི་རང་སྐྱོང་དང་བོད་ཆེན་པོ་ཟེར་བ་དེ་ཚོ་རྩ་བ་ནས་ངོས་ལེན་བྱེད་ཀྱི་མེད་ལབ་ཀྱི་ཡོད་རེད་ཅེས་གསུངས། དེ་བཞིན་བཟང་ཕྱོགས་ཀྱི་འགྱུར་བ་གཅིག་གཟིགས་ཡོད་སྐོར་དམིགས་བསལ་སྐུ་ཚབ་བཀའ་ཟུར་རྒྱ་རི་བློས་གྲོས་རྒྱལ་མཚན་མཆོག་གིས་གསུངས་དོན། ཉེ་ལམ་རྒྱ་ནག་གི་དབུ་ཁྲིད་ཚོས་ཚོགས་འདུ་ཚོགས་ནས་ཐག་གཅོད་བྱས་པའི་ནང་སྔར་དང་མི་འདྲ་བར་བོད་རིགས་ས་ཁུལ་ཡོངས་རྫོགས་ཀྱི་མི་སྐད་བཏང་ཡོད་པ་མ་ཟད། མ་འོངས་པར་ཡིན་ནའང་སློབ་གསོའི་སྐོར་རེད། ཁོར་ཡུག་སྐོར་སོགས་ལ་ཐག་གཅོད་བྱེད་རྒྱུའི་ལམ་སྟོན་དེ་བོད་རིགས་ཡོངས་ལ་ཁྱབ་ཐུབ་པ་གཅིག་བཟོས་ཡོད། ང་ཚོའི་དགོས་གནས་གཙོ་བོ་དེ་བོད་རིགས་ཡོངས་རྫོགས་སྲིད་བྱུས་གཅིག་གི་འོག་དང་འཛིན་སྐྱོང་གཅིག་གི་འོག་གནས་དགོས་ཟེར་བ་དེ་རེད། ང་ཚོས་ད་དུང་རྒྱ་ནག་གཞུང་གི་སྐུ་ཚབ་ཚོར་རེ་འདུན་གང་ཞུ་ཡི་ཡོད་ཟེར་ན་བོད་ཀྱི་དཀའ་ངལ་སེལ་རྒྱུ་དེ་ཁྱེད་ཚོ་གཅིག་པུས་སེལ་ཐུབ་ཀྱི་མེད་པ་དང་། ཁྱེེད་ཚོའི་སྟོབས་ནུས་པ་གཅིག་པུས་འདང་རྒྱུ་མེད། བོད་མི་ཚོར་ཁ་ལ་ཟ་རྒྱུའི་ལྟོ་དང་རྒྱབ་ལ་གྱོོན་རྒྱུའི་གོས་གཅིག་རག་པ་གཅིག་པུས་འགྲིག་གི་མེད། སེམས་ནང་བདེ་སྐྱིད་དགོས་ཀྱི་ཡོད། དེ་རག་པར་༸སྐྱབས་མགོན་ཏཱ་ལའི་བླ་མ་དང་རྒྱ་ནག་དབུས་གཞུང་མཉམ་འབྲེལ་ཐོག་ལས་ཀ་མ་བྱས་ན་དུས་ནམ་ཡང་ཡོང་མི་ཐུབ་པ་རེད། ཅེས་འགྲེལ་བརྗོད་བྱས་པ་ཡིན་ཞེས་གསུངས་ཡོད་པ་བཅས།
