༢༠༡༠ ཕྱི་ཟླ་ ༢ ཚེས་ ༡༨ རེས་གཟའ་ཕུར་བུ།

ཕྱི་ལོ་ ༢ ཚེས་ ༡༧ ཉིན་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་རྒྱལ་ས་ཝ་ཤིང་ཊོན་(Washington)གྱི་གནམ་ཐང་དུ་༸ཞབས་སོར་འཁོད་སྐབས་ཨ་རིར་རྟེན་གཞི་བྱས་པའི་༸གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་དང་ཨ་རིའི་བོད་གཞུང་སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་མཆོག ཨ་རིའི་གཞུང་འབྲེལ་སྣེ་ལེན་མི་སྣ་དང་དེ་བཞིན་རྒྱ་གར་གཞུང་ཚབ་ཁང་གི་སྐུ་ཚབ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་གནམ་ཐང་ནས་བཞུགས་གནས་མགྲོན་ཁང་དུ་ཆིབས་སྒྱུར་སྐྱོང་སྐབས་ས་གནས་བོད་རིགས་ཚོགས་པ་དང་རྒྱལ་སྤྱིའི་བོད་དོན་ལས་འགུལ་ཚོགས་མི་རྣམ་པ། དེ་བཞིན་བོད་ཀྱི་གྲོགས་པོ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད་པ་མ་ཟད། བོད་ཕྲུག་ཕོ་མོ་གཉིས་ཀྱིས་མགོན་པོ་གང་ཉིད་མཆོག་ལ་གྲོ་སོ་ཕྱེ་མར་དང་ཆང་ཕུད་འདེགས་འབུལ་ཞུས་པ་དང་སྦྲགས་བོད་ཀྱི་རིག་གཞུང་གི་གཞས་སྣ་འཁྲབ་སྟོན་གྱི་ལམ་ནས་མགོན་པོ་གང་ཉིད་མཆོག་ལ་སྣེ་ལེན་ཕེབས་བསུ་གཟབ་ཅིང་རྒྱས་པ་ཞུས་ཡོད། ཉིན་དེར་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་མ་རི་ཡོ་ཨོ་ཏེ་རོ་མཆོག་(Mario Otero)དང་རྒྱ་གར་གཞུང་ཚབ་སྐུ་ཞབས་མི་ར་ཤང་ཀར་མཆོག་( Meera Shankar)མཇལ་འཕྲད་མཛད་རྒྱུ་ཡིན་པ་རེད། ཕྱི་ཚེས་ ༡༨ སྔ་དྲོ་༸གོང་ས་མཆོག་ཨ་རིའི་སྲིད་འཛིན་སྐུ་ཞབས་བྷ་རཀ་ཨོ་བྷ་མ་མཆོག་(Barack Obama)དང་མཇལ་འཕྲད་གནང་རྒྱུ་ཡིན་འདུག་པ་མ་ཟད་ཉིན་རྒྱབ་ཨ་རིའི་ཕྱི་སྲིད་དྲུང་ཆེ་ལྕམ་སྐུ་ཧི་ལེ་རི་ཁི་ལིན་ཊོན་མཆོག་( Hillary Clinton)དང་མཇལ་འཕྲད་གནང་རྒྱུ་ཡིན་པ་བཅས་ཀྱི་གནས་བསྡུས་སུ།།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་