༢༠༡༠ ཕྱི་ཟླ་ ༡ ཚེས་ ༢༥ རེས་ཟླ་བ།

་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་

༄༅། །ཕྱི་ལོ་ ༢༠༡༠ ཟླ་ ༡ ཚེས་ ༢༡ ཉིན་ཨ་རིའི་ཕྱི་སྲིད་དྲུང་ཆེ་ལྕམ་ཧི་ལ་རི་ཁི་ལིན་ཊོན་མཆོག་གིས་ཉེ་ལམ་རྒྱ་ནག་ནང་གྷུ་གྷལ་དྲ་རྒྱ་བེད་སྤྱོད་བྱེད་མཁན་ཚོའི་སྒེར་གྱི་ཡི་གེེ་དང་འབྲེལ་བའི་གནད་དོན་རྣམས་ཕྱི་མིས་གསང་བརྐུས་བྱས་པའི་གནད་དོན་དེར་རྒྱ་གཞུང་གིས་ངེས་པར་རྟོག་ཞིབ་བྱེད་དགོས་པའི་སྐུལ་མ་གནང་ཡོད་པ་མ་ཟད། ཞིབ་འཇུག་གི་རྗེས་འབྲས་གནས་ཚུལ་ཇིེ་འདྲ་ཞིག་རྙེད་སོན་བྱུང་བ་རྣམས་སྦས་གསང་མེད་པར་གསལ་བསྒྲགས་དགོས་པའི་དགོས་འདུན་ཡང་བཏོན་ཡོད། དེ་ཡང་ལྕམ་སྐུ་མཆོག་གིས་གསུང་དོན། རྒྱལ་ཁབ་སུ་འདྲ་ཞིག་ཡིན་རུང་ཆ་འཕྲིན་དང་དྲ་རྒྱ་བེད་སྤྱོད་བྱ་རྒྱུ་གཞི་རྩའི་རང་དབང་ཐོག་དམ་བསྒྲགས་བཀག་སྡོམ་བྱས་ཚེ་དུས་རབས་ ༢༡ གི་ཡར་རྒྱས་འགྲོ་ལམ་དེ་རྒྱལ་ཁབ་རང་ཉིད་ཀྱིས་འགོག་རྐྱེན་བཟོས་པ་ལྟ་བུ་ཞིག་རེད་ཅེས་གསུངས་ཡོད། དེ་བཞིན་ཆ་འཕྲིན་གྱི་རང་དབང་ལ་དམ་བསྒྲགས་བྱེད་མཁན་གྱི་རྒྱལ་ཁབ་རྒྱ་ནག (China) ཊ་ནེ་ཤི་ཡ། (Tunishia) ཨུ་ཛུ་བྷེ་ཀིས་ཐན། (Ukbekistan) ཨི་ཇིབ། (Egypt) ཨི་རན། (Iran) ས་ཌི་ཨ་ར་བྷི་ཡ། (Saudi Arabi) ཏི་ནམ་ (Vietnam) བཅས་དངོས་སུ་མིང་བཏོན་ཡོད། གྷུ་གྷལ་དྲ་རྒྱ་དེ་བཞིན་རྒྱ་ནག་ནང་ཐོག་མར་ཕྱི་ལོ་ ༢༠༠༦ ལོར་བཙུགས་པ་ཞིག་ཡིན་པ་དང་། ད་ལྟའི་ཆར་དྲ་རྒྱ་དེ་བེད་སྤྱོད་བྱེད་མཁན་རྒྱ་ནག་ནང་བརྒྱ་ཆ་ ༣༠ ཙམ་ཡོད། འོན་ཀྱང་ཉེ་ལམ་རྒྱ་ནག་མང་གཙོ་དོན་གཉེར་བ་རྣམས་ཀྱི་ཡིག་ཆ་ཁག་དྲ་རྒྱ་བརྒྱུད་རྒྱ་ནག་གཞུང་གིས་རྐུན་མ་རྒྱག་གི་ཡོད་པའི་དོགས་གཞི་ཆེན་པོ་བྱུང་བར་བརྟེན་གྷུ་གྷལ་དྲ་རྒྱ་རྒྱ་ནག་ནས་ཕྱིར་འཐེན་བྱེད་རྒྱུ་ཡིན་པའི་ཉེན་བརྡ་བཏང་ཡོད།