༢༠༡༠ ཕྱི་ཟླ་ ༡ ཚེས་ ༨ རེས་གཟའ་པ་སངས།
༄༅། །ཕྱི་ལོ་ ༢༠༠༧ ལོར་སྟག་ཚང་ལྷ་མོ་ཀིརྟི་དགོན་དུ་མདོ་སྟོད་སྨད་ཀྱི་དགོན་སྡེ་ཁག་ལྔ་བཅུ་ལྷག་ལྷན་འཛོམས་ཀྱིས་ཚད་མའི་དགུན་ཆོས་ཆེན་མོ་ཐེངས་དང་པོ་ཚུགས་སྐབས་ཀིརྟི་ཚང་གི་གདན་ས་ཆེ་ཁག་བཞི་སྟེ་སྟག་ཚང་ལྷ་མོ་ཀིརྟི་དགོན་དང་། རྔ་པ་ཀིརྟི་དགོན། ཚོ་བདུན་ཀིརྟི་དགོན། ཧོར་གཙང་ཀིརྟི་དགོན་བཅས་སུ་ལོ་ལྟར་རེས་མོས་ཀྱིས་ཚད་མའི་དགུན་ཆོས་ཆེན་མོ་འཚོགས་རྒྱུ་གཏན་འཁེལ་ཡོད་པ་ལྟར། འདི་ལོའི་ཚད་མའི་དགུན་ཆོས་ཆེན་མོ་ཐེངས་གསུམ་པ་དེ་རྒྱལ་རོང་ཚོ་བདུན་ཀིརྟི་དགོན་དུ་འཚོགས་འཆར་ཡོད་ཀྱང་། རྒྱ་ནག་གཞུང་གིས་ཐེངས་འདིའི་དགུན་ཆོས་འཚོགས་རྒྱུར་བཀག་སྡོམ་ཤུགས་ཆེ་བྱས་ཡོད། བཞུགས་སྒར་དུ་རྟེན་གཞི་བྱས་པའི་ཀིརྟི་བྱེས་པ་གྲྭ་ཚང་གི་ཛ་དྲག་འབྲེལ་མཐུད་ཚོགས་ཆུང་གིས་གནས་ཚུལ་མཁོ་སྤྲོད་བྱས་པ་ལྟར་ན། ས་གནས་རྒྱ་གཞུང་གི་དཔོན་རིགས་རྣམས་ནས་དགུན་ཆོས་འཚོགས་རྒྱུར་བཀག་འགོག་བྱས་ཡོད་པ་མ་ཟད། དགོན་སྡེ་ཁག་ནས་མཉམ་ཞུགས་བྱས་ཚེ་ཚོ་བདུན་དགོན་པ་སྒོ་རྒྱག་རྒྱུ་དང་། གནད་དོན་དེའི་སྐོར་འབྲེལ་ཡོད་གྲྭ་པ་ཚོར་ཉེས་ཆད་ནན་པོ་དང་བཙོན་འཇུག་བྱ་རྒྱུ་ཡིན་པའི་ཡིག་ཆ་ཡང་འདོན་སྤེལ་བྱས་ཡོད། ལོ་འཁོར་ཚད་མའི་དགུན་ཆོས་ཆེན་མོ་འཚོགས་རྒྱུར་རྒྱ་ནག་གཞུང་གི་ཆོག་མཆན་ཐོབ་དགོས་པ་ལྟར་ས་གནས་འབར་ཁམས་རྫོང་དང་རྔ་པ་རང་སྐྱོང་ཁུལ་གྱི་འབྲེལ་ཡོད་ལས་ཁུངས་ཁག་ལ་ཆོག་མཆན་ཡོང་བའི་སྙན་ཞུ་ཟླ་བ་ལྔའི་གོང་ནས་ཕུལ་ཟིན་ཡོད་ཀྱང་། རྒྱ་གཞུང་གིས་ལུགས་མཐུན་ཆོག་མཆན་སྤྲོད་རྒྱུ་མེད་ཁར་དེ་ལས་ལྡོག་སྟེ་ཀིརྟི་དགོན་ཁག་ལྷན་འཛོམས་ཀྱི་ཚད་མའི་དགུན་ཆོས་ཆེན་མོ་དེ་བཞིན་ཆབ་སྲིད་ཀྱི་གནད་དོན་ཡིན་ཚུལ་འཁྱོག་བཤད་བྱས་ཏེ་གཏན་ནས་འཚོགས་མི་ཆོག་ཅེས་བཙན་བཀའ་བཏང་ཡོད། ཚད་མའི་དགུན་ཆོས་དེ་ཉིད་རིགས་པ་་བའི་དགེ་འདུན་པ་མང་པོ་ལྷན་འཛོམས་ཀྱིས་བོད་བརྒྱུད་ནང་བསྟན་གྱི་ཚད་མ་རིག་པའི་གཞུང་ལུགས་ལ་རྩོད་པའི་སྒོ་ནས་བགྲོ་གླེང་དང་སློབ་གཉེར་བྱེད་པའི་ཆོས་ཕྱོགས་ཀྱི་བྱེད་སྒོ་ཞིག་ཡིན་པས། དེ་ལྟ་བུའི་ཆོས་ཕྱོགས་ཀྱི་བྱེད་སྒོར་བཀག་སྡོམ་བྱས་པ་ནི་བོད་ནང་ཆོས་དད་རང་དབང་མེད་པའི་རྟགས་ཤིག་ཡིན། བཙན་བྱོལ་བོད་མིའི་གྲོས་ཚོགས་ཀྱིས་རྒྱ་གཞུང་ནས་གཞི་རྩའི་འགྲོ་བ་མིའི་ཐོབ་ཐང་ལ་མ་རྩིས་པར་སྐྱོན་འཛུགས་ཤུགས་ཆེ་བྱས་ཡོད་པ་དང་། ཚད་མའི་དགུན་ཆོས་འཚོགས་བཅུག་དགོས་རྒྱུར་རྒྱ་གཞུང་ལ་རེ་འདུན་བཏོན་ཡོད་པ་མ་ཟད། འགྲོ་བ་མིའི་ཐོབ་ཐང་དང་བོད་དོན་རྒྱབ་སྐྱོར་ཚོགས་པར་གནད་དོན་འདི་དག་རྒྱ་གཞུང་དང་གླེང་སློང་བྱེད་དགོས་པའི་རེ་འདུན་ཡང་བཏོན་ཡོད་པ་བཅས་སུ།། བོད་མི་མང་སྤྱི་འཐུས་རྒྱུན་ལས་ཚོགས་ཆུང་ནས་ཕྱི་ལོ་ ༢༠༡༠ ཟླ་ ༡ ཚེས་ ༦ ཉིན། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
