༢༠༡༠ ཕྱི་ཟླ་ ༡ ཚེས་ ༢༧ རེས་གཟའ་ལྷག་པ།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
༄༅། །བོད་རྒྱ་འབྲེལ་མོལ་ཐེངས་དགུ་པ་དེ་འགོ་འཛུགས་ཐུབ་པར་ཨ་རི་དང་། དབྱིན་གཞུང་། ཌན་མག ཁེ་ཌྷ་ཌ་གཞུང་བཅས་ནས་དགའ་བསུ་དང་འབྲེལ་མོལ་ཀྱི་མཇུག་འབྲས་ཀྱང་བཟང་པོ་ཞིག་ཡོང་རྒྱུའི་རེ་འདུན་གནང་ཡོད་པ་རེད། བོད་རྒྱ་འབྲེལ་མོལ་ཐེངས་དགུ་པ་བྱུང་བ་དེར་ཨ་རིའི་གཞུང་གིས་དགའ་མོས་བྱུང་ཡོད་སྐོར་གྱི་བརྗོད་དོན། ཕྱི་ལོ་ ༢༠༡༠ ཟླ་ ༡ ཚེས་ ༢༦ ཉིན་༸གོང་ས་མཆོག་གི་དམིགས་བསལ་སྐུ་ཚབ་རྣམས་འབྲེལ་མོལ་ཐེངས་དགུ་པ་གནང་ཆེད་རྒྱ་ནག་ཏུ་འབྱོར་གྱི་ཡོད་པ་ཤེས་རྟོགས་བྱུང་བར་དགའ་ཚོར་བྱུང་། ཨ་རིའི་གཞུང་ཕྱོགས་ནས་བོད་རྒྱ་གཉིས་དབར་བསམ་ཚུལ་མི་མཐུན་པ་ཁག་གསལ་བཟོའི་ཆེད་དུ་རྒྱ་ནག་གཞུང་དང་ཏཱ་ལའི་བླ་མའི་སྐུ་ཚབ་གཉིས་ཀྱི་དབར་འབྲེལ་མོལ་བྱེད་རྒྱུའི་ཐད་ལ་རྒྱབ་སྐྱོར་ཤུགས་ཆེ་བྱེད་ཀྱི་ཡོད། ཨ་རིའི་གཞུང་ནས་ད་ལན་གྱི་འབྲེལ་མོལ་སྐབས་གྲུབ་འབྲས་བཟང་པོ་ཞིག་དང་མ་འོངས་གྲོས་མོལ་གནང་རྒྱུར་གཞི་རྟེན་ཞིག་ཀྱང་བསྐྲུན་ཐུབ་པའི་རེ་བ་བྱེད་ཀྱི་ཡོད་ཅེས་རེས་གཟའ་ཟླ་བའི་ཉིན་ཨ་རིའི་གཞུང་གི་དྲ་རྒྱའི་ནང་བཀོད་ཡོད། དེ་བཞིན་དབྱིན་གཞུང་གི་ཕྱི་སྲིད་བློན་ཆེན་གཞོན་པ་ཨི་ན་ལི་ཝི་ས་མཆོག་གིས་ཀྱང་འབྲེལ་མོལ་བསྐྱར་གསོ་བྱུང་བར་དགའ་བསུ་དང་སྦྲགས་ཁོང་གིས་བོད་རྒྱའི་ཕྱོགས་གཉིས་ཀས་ཁ་ཞེ་གཉིས་མེད་ཀྱི་འབྲེལ་མོལ་བྱེད་པའི་ཐོག་བོད་ལ་མིང་དོན་མཚུངས་པའི་རང་སྐྱོང་ཞིག་ཡོང་རྒྱུར་ཡར་རྒྱས་དགོས་པའི་སྐུལ་མ་བྱས་ཡོད། ཡང་ཁོང་གིས་༸གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་དབར་ཞི་བའི་གྲོས་མོལ་བྱེད་རྒྱུ་དེ་ནི་བོད་ནང་གི་དཀའ་རྙོག་སེལ་རྒྱུའི་ཐབས་ལམ་བཟང་ཤོས་གཅིག་པུ་དེ་རེད། ང་རང་སྔ་ལོ་བོད་དང་པེ་ཅིང་དུ་འགྲོ་སྐབས་གནས་ཚུལ་དེ་ཚོ་གསལ་པོ་བཤད་པ་ཡིན། ཞེས་གསུངས་ཡོད་པ་ཕ་རན་སིའི་གསར་འགྱུར་བརྒྱུད་ལམ་ཞིག་ནང་འཁོད་ཡོད་པ་བཅས་ཀྱི་གནས་བསྡུས་སུ།།
