༢༠༡༠ ཕྱི་ཟླ་ ༡ ཚེས་ ༢༢ རེས་གཟའ་པ་སངས།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༢༢ ཉིན་སྔ་དྲོ་ཆུ་ཚོད་ ༡༠།༣༠ ཐོག་བོད་གཞུང་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་ཚོགས་ཁང་དུ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཨུ་རྒྱན་བསྟན་འཛིན་ལགས་དང་འགན་འཛིན་གཞོན་པ་འཇམ་དཔལ་སྨོན་ལམ་ལགས་རྣམ་གཉིས་ནས་ཕྱི་ལོ་ ༢༠༠༩ ལོའི་ལོ་འཁོར་སྙན་ཐོ་གསར་འགོད་གསལ་བསྒྲགས་གནང་ཡོད། དེ་ཡང་གསར་འགོད་ལྷན་ཚོགས་ཀྱི་ཐོག་མར་འགན་འཛིན་ཨུ་རྒྱན་བསྟན་འཛིན་ལགས་ཀྱིས་ཕྱི་ལོ་ ༢༠༠༩ ལོའི་བོད་ནང་གི་འགྲོ་བ་མིའི་ཐོབ་ཐང་ཐོག་ཉམས་ཞིབ་གནང་བའི་ཕྱི་ལོ་ ༢༠༠༩ ལོའི་སྙན་ཐོ་གསར་འགོད་པ་རྣམས་ལ་ངོ་སྤྲོད་དང་སྦྲགས་གསུང་བཤད་གནང་དོན། ཕྱི་ལོ་ ༢༠༠༩ ལོ་ནི་རྒྱ་ནག་གཞུང་གིས་བོད་ནང་གི་ཞི་རྒོལ་བ་ཚོར་དྲག་གནོན་བྱས་ཏེ་ལོ་གཅིག་འཁོར་ཡོད། འོན་ཀྱང་ད་དུང་རྡུང་རྡེག་དང་མནར་གཅོད་ཀྱི་ཐབས་ལམ་ངན་པ་མཚམས་འཇོག་མ་བྱས་པར་བོད་མི་ཚོར་སྡུག་སྦྱོང་མནར་གཅོད་བྱ་དང་བྱེད་བཞིན་ཡོད་པར་བརྟེན། ད་ལྟའི་བོད་ནང་གི་གནས་སྟངས་དེ་ཛ་དྲག་ཅན་ཞིག་ཏུ་གྱུར་ཡོད། ཅེས་དང་། དེ་བཞིན་ཕྱི་ལོ་ ༢༠༠༩ ལོ་དེ་ནི་དྲང་བདེན་མིན་པའི་ཁྲིམས་བཅད་བྱས་པའི་ལོ་ཞིག་ཆགས་ཡོད་སྐོར་གསུངས་ཡོད། གཞན་ཡང་ས་མཚམས་ཁག་ལ་དམ་བསྒྲགས་ཤུགས་ཆེ་རུ་ཕྱིན་པར་བརྟེན་བོད་མི་སྐྱབས་བཅོལ་དུ་ཡོང་རྒྱུ་ཇེ་ཉུང་དུ་ཕྱིན་ཡོད་པ་དང་། ཡང་བོད་ནང་རྒྱ་མིའི་མི་འབོར་སྤོ་ཤུགས་ཆེ་བའི་རྐྱེན་གྱིས་བོད་མི་ཚོར་ལས་རིགས་སོགས་གང་ཅིའི་ཐོག་ནས་གོ་སྐབས་བརླག་གི་ཡོད་པའི་སྐོར་ལ་གསུང་བཤད་གནང་། མཐའ་དོན་ཁོང་གིས་གསུང་དོན་ཉེན་ཚབས་ཆེ་ཤོས་ནི་རྒྱ་ནག་གཞུང་གིས་བོད་ཕྲུག་ཚོར་ཆུང་དུས་ནས་དམར་པོའི་ལྟ་བའི་སློབ་གསོ་བརྒྱབ་སྟེ་བོད་མི་རིགས་རྩ་བརླག་ཏུ་གཏོང་རྒྱུའི་ལས་འགུལ་སྤེལ་བཞིན་ཡོད་སྐོར་གསུང་བཤད་གནང་ཡོད། དེ་རྗེས་ཁོང་རྣམ་པ་གཉིས་ཀྱིས་གསར་འགོད་པའི་དོགས་དྲིས་ཁག་ལ་ལན་འདེབས་དང་གསལ་བཤད་ཀྱང་གནང་ཡོད་པ་བཅས།།
