༢༠༡༠ ཕྱི་ཟླ་ ༡ ཚེས་ ༦ རེས་གཟའ་ལྷག་པ།
༄༅། །བོད་མི་མང་སྤྱི་འཐུས་ཆབ་སྲིད་སྡེ་ཚན་གྱི་བེ་རི་འཇིགས་མེད་དབང་རྒྱལ་ལགས་ནས་བཏང་གནས་ནང་། ཉེ་ལམ་བོད་ནས་གནས་ཚུལ་ཁུངས་ལྡན་འབྱོར་གསལ་ལྟར་ན། ཕྱི་ལོ་ ༢༠༠༩ ཟླ་ ༡༢ ཚེས་ ༢༣ ཉིན་གྱི་ཞོགས་པ་ཚོུད་ ༩ ཐོགས་དཀར་མཛེས་ཁུལ་དར་མདོ་འབྲིང་རིམ་མི་དམངས་ཁྲིམས་ཁང་ནས་ཁྲིམས་གཅོད་ཀྱི་བཅད་ཁྲ་བཏང་བའི་ནང་བང་རི་རིན་པོ་ཆེ་ལ་མི་ལོ་ཧྲིལ་པོ་ ༨ དང་ཟླ་བ་ ༦ གི་བཙོན་འཇུག་ཐག་གཅོད་བྱས་འདུག ཁོང་ལ་ཁྲིམས་ཐག་གཅོད་སྐབས་ཁྲིམས་རྭའི་ནང་དེ་སྔོན་ཁོང་གི་ཁྲིམས་རྩོད་པ་གཉིས་གླས་མྱོང་བ་དེ་གཉིས་ཀ་རྩ་བ་ནས་ཡོང་མི་བཅུག་པ་མ་ཟད། ཁྲིམས་རྭའི་ནང་ཕྱོགས་གཅིག་གིས་མ་གཏོགས་སྐད་ཆ་ཤོད་དབང་གཏན་ནས་མེད་པ་དང་། ཕྱོགས་གཅིག་པུ་དེས་གང་བཤད་པ་ལྟར་ཐག་གཅོད་བྱེད་པ་ལས་ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་དོན་གཏུག་བཤེར་བཅའ་ཁྲིམས་དོན་ཚན་ ༣༢ ནང་ཉེས་ཅན་པ་དང་གྱོད་ཡ་རང་ཉིད་ཀྱིས་རང་ལ་དག་འབུད་བྱེད་པའི་ཐོབ་ཐང་ཡོད་པ་མ་ཟད། མི་གཅིག་ནས་གཉིས་ཀྱིས་དག་འབུད་བྱེད་རྒྱུར་མངགས་བཅོལ་ཡང་བྱས་ཆོག ཁྲིམས་རྭའི་ནང་ཐག་གཅོད་སྐབས་ནང་མི་ལྔ་ཙམ་ཡོང་བཅུག་ཡོད་ནའང་ཕན་ཚུན་ཐུག་འཕྲད་དང་སྐད་ཆ་ཤོད་རྒྱུ་སོགས་གང་ཡང་བྱུང་མི་འདུག རྒྱུན་ལྡན་ཁོང་ལ་དད་པ་དང་དོ་སྣང་ཞུ་མཁན་རྒྱ་ཆེ་མང་ཚོགས་སྟོང་ཕྲག་བརྒལ་བ་ཡོད་པའི་ནང་ནས་མང་པོ་ཞིག་ཁྲིམས་རྭའི་ནང་ཞུགས་འདོད་བྱས་ཡོད་ཀྱང་གཅིག་ཀྱང་བཏང་མི་འདུག རྒྱ་གཞུང་གིས་ཁོང་ཕྱི་ལོ་ ༢༠༠༨ ཟླ་ ༥ ཚེས་ ༤ ཉིན་འཛིན་བཟུང་བྱས་ཡོད་ཀྱང་ད་བར་བཙོན་འཇུག་གི་ནག་ཉེས་ར་འཕྲོད་གཅིག་ཀྱང་བྱུང་མེད་པ་བཅས།།
