༢༠༡༠ ཕྱི་ཟླ་ ༡ ཚེས་ ༡༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༡༥ ཉིན་རྒྱ་གར་མངའ་སྡེ་གུ་ཇ་རཊ་གྱི་གྲོང་ཁྱེར་ཝ་ཌོ་ཌ་ར་ཞེས་པར་རྒྱལ་སྤྱིའི་ནང་པའི་ལེགས་བྱང་གི་ལྷན་ཚོགས་ཤིག་འཚོགས་རྒྱུ་ཡིན་པར་མགོན་པོ་གང་ཉིད་མཆོག་ལ་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་ཨོ་རི་སའི་མཛད་འཕྲིན་ཁག་ལེགས་པར་གྲུབ་མཚམས་ལྷན་ཚོགས་དེའི་ཚོགས་མགོན་དུ་ཆིབས་སྒྱུར་བསྐྱང་གནང་མཛད་རྒྱུ་ཡིན་འདུག གྲོང་ཁྱེར་ཝ་ཌོ་ཌ་རའི་མཐོ་རིམ་སློབ་གྲྭའི་ནང་ཉིན་གསུམ་རིང་འཚོགས་རྒྱུ་ཡིན་པའི་རྒྱལ་སྤྱིའི་ནང་པའི་ལེགས་བྱང་ལྷན་ཚོགས་དེར་རྒྱལ་ཁབ་འདྲ་མིན་ཁག ༡༥ ཙམ་ནས་ནང་པའི་མཁས་དབང་ཁག་ལྷན་ཞུགས་གནང་རྒྱུ་ཡིན་འདུག སྐབས་དེར་རྒྱ་གར་ནང་པའི་དགེ་འདུན་པ་གྲངས་ ༥༠༠ ལྷག་དང་དེ་བཞིན་ཕྱི་རྒྱལ་ཡུལ་གྲུ་འདྲ་མིན་ནས་དགེ་འདུན་པ་གྲངས་ ༢༠༠ ལྷག་ཚོགས་འདུ་དེར་ལྷན་ཞུགས་གནང་འཆར་ཡོད་པ་རེད། ལྷན་ཚོགས་དེ་གོ་སྒྲིག་གནང་རྒྱུའི་དམིགས་ཡུལ་གཙོ་བོ་གཅིག་ནི་ས་གནས་དེར་ནང་པའི་ཡུལ་སྐོར་སྤྲོ་འཆམ་གྱི་གྲངས་འབོར་གོང་མཐོར་གཏོང་རྒྱུ་དང་། དེ་བཞིན་ས་ཁུལ་དེ་དག་གི་ནང་དུ་སྔ་མོ་ནང་ཆོས་དར་སྲོལ་བྱུང་ཡོད་པའི་དཔང་རྟགས་སུ་ནང་པའི་དགོན་པ་དང་སྟོན་པའི་སྐུ་བརྙན་གྱི་གཙོས་དངོས་རྫས་ཀྱི་རྗེས་ཤུལ་མང་པོ་ཞིག་རྙེད་སོན་བྱུང་བ་དེ་དག་མང་ཚོགས་ལ་འགྲེམས་སྟོན་བྱ་རྒྱུ་ཡིན་པ་རེད། ལྷན་ཚོགས་དེའི་སྐབས་འབྲེལ་ཡོད་ནང་པའི་ཡུལ་གྲུ་འབར་མ། ཉི་ཧོང་། རྒྱ་ནག བལ་ཡུལ་བཅས་ནས་རྙེད་སོན་བྱུང་བའི་སྟོན་པའི་སྐུ་བརྙན་དང་ནང་པའི་དངོས་རྫས་སོགས་ཀྱང་གཙུག་ལག་སློབ་གྲྭ་དེར་ཚོགས་འདུ་དེ་དང་སྟབས་བསྟུན་འགྲེམས་སྟོན་གནང་འཆར་ཡོད་པ་བཅས་ཀྱི་གནས་བསྡུས་སུ།།
[slideshow id=2]
