༢༠༠༩ ཕྱི་ཟླ་ ༡༢ ཚེས་ ༧ རེས་གཟའ་ཟླ་བ།
བཙུན་མ་དབྱངས་སྐྱིད་སྒྲོལ་མ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ། ཕྱི་ལོ་ ༢༠༠༩ ཟླ་ ༣ ཚེས་ ༢༤ ཉིན་རྒྱབ་ཆུ་ཚོད་ ༣ པ་ཙམ་དུ་དཀར་མཛེས་རྫོང་གི་ཁྲོམ་གཞུང་དུ་དཀར་མཛེས་ལམ་གྲགས་དགོན་གྱི་རང་ལོ་ ༣༣ སོན་པའི་བཙུན་མ་དབྱངས་སྐྱིད་སྒྲོལ་མ་དང་། རང་ལོ་ ༢༨ སོན་པའི་བཙུན་མ་བསོད་ནམས་དབྱངས་གཉིས་ནས་ཞི་བའི་ཐོག་༸རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག ༸རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། བོད་ནང་ཆོས་ལུགས་རང་དབང་དང་འགྲོ་བ་མིའི་ཐོབ་ཐང་དགོས་སོགས་སྐད་འབོད་དང་ཡིག་ཆ་འགྲེམས་གཏོར་བྱས་པས་དྲག་ཆས་ཉེན་རྟོག་པས་འཇུ་བཟུང་བྱས་རྗེས་ཉེས་བརྡུང་ཚད་མེད་བཏང་སྟེ་བཙན་འཁྲིད་བྱས་པ་མ་ཟད། ཉིན་དེའི་ཕྱི་དྲོ་ཆུ་ཚོད་ ༧ ཙམ་དུ་དྲག་ཆས་ཉེན་རྟོག་པ་སླར་ཡང་ཁྱིམ་དུ་ཡོང་སྟེ་བསྔོག་བཤེར་གྱིས་༸གོང་ས་མཆོག་གི་སྐུ་དཔར་འཕྲོག་བཅོམ་དང། ཁྱིམ་མི་ཚོར་རྒྱལ་ཁབ་ཁ་བྲལ་གཏོར་བཤིགས་གཏོང་མཁན་རེད། ཅེས་སྡིགས་ར་ཚད་མེད་བཏང་ཡོད་ལ། ཡང་གོང་ཟླའི་ཚེས་ ༢༥ ཉིན་སྔ་དྲོ་རྫོང་འབྲེལ་ཡོད་ཚན་པའི་ལས་ཁུངས་སུ་ཁོང་གཉིས་ཀྱི་སྤུན་མཆེད་བསྐོང་སྟེ་ཁྱིམ་མི་ཚོར་ཡང་བསུན་གཙེར་ཤུགས་ཆེ་བཟོས་ཡོད། དེ་ནས་ཕྱི་ཟླ་ ༨ ཚེས་ ༢༤ བར་གནས་ཚུལ་ཇི་ཡིན་ཤེས་རྟོགས་མེད་པར་གྱུར་རྗེས་དེ་ཉིན་དཀར་མཛེས་ས་ཁུལ་འབྲིང་རིམ་མི་དམངས་ཁྲིམས་ཁང་ནས་ཁྲིམས་ཐག་གཅོད་ཀྱི་ཡོད་པའི་གནས་ཚུལ་ཙམ་ལས་ཁྲིམས་ཐག་ཇི་བྱས་རྩ་བ་ནས་ཤེས་རྟོགས་མེད་པར་གྱུར་བའི་སྐབས་འདིར་ད་ལམ་ཟླ་ ༡༢ ཚེས་ ༥ དགོང་དྲོའི་ཆུ་ཚོད་ ༢ པའི་ཐོག་གོང་གསལ་བཙུན་མ་གཉིས་ལས་བཙུན་མ་དབྱངས་སྐྱིད་སྒྲོལ་མ་རྒྱ་ནག་ཁྲེན་ཏུའུ་གྲོང་ཁྱེར་ཁུལ་དུ་ཡོད་པའི་སྨན་ཁང་ཞིག་ནང་འདས་གྲོངས་ཕྱིན་པའི་གནས་ཚུལ་ཐོན་འདུག་པ་མ་ཟད། ཕུང་པོ་ད་བར་ནང་མིར་རྩིས་སྤྲོད་བྱས་མེད་པ་རེད།
དབྱངས་སྐྱིད་སྒྲོལ་མ་ནི་ད་ལྟ་རང་ལོ་ ༣༣ ཙམ་དུ་སོན་གྱི་ཡོད་པ་དང་། ཕ་མིང་དགེ་འདུན་དར་རྒྱས་ཞུ་བ་དང་རང་ལོ་ ༡༧ ཙམ་ནས་ལམ་གྲགས་བཙུན་དགོན་དུ་ཆོས་ཞུགས་གནང་སྟེ་སློབ་གཉེར་དང་ལོ་མང་བསྙེན་མཚམས་སུ་ཞུགས་གནང་མྱོང་ཡོད།
རྒྱ་ནག་གཞུང་གིས་བོད་མི་གང་བྱུང་ཉེས་མེད་འཛིན་བཟུང་བྱས་རྗེས་སྤྱི་བདེ་ཉེན་རྟོག་པ་དང་དྲག་ཆས་ཉེན་རྟོག་པ་སོགས་ནས་རྒྱུ་མཚན་ཁ་གསལ་མེད་པར་ཉེས་བརྡུང་ཚད་མེད་གཏོང་བ་དང། ལྷག་པར་དུ་བཙོན་བཅུག་བྱས་རྗེས་བཙོན་སྲུང་བ་སོགས་ནས་ཉེས་བརྡུང་ཚད་མེད་ཀྱིས་ཟས་བཅུད་དང་སྨན་བཅོས་མཐུན་རྐྱེན་ལྡེང་ངེས་སྤྲོད་ཀྱི་མེད་པ་སོགས་ལས་བོད་མི་ཆབ་སྲིད་བཙོན་པ་ཚོར་ལུས་སེམས་གཉིས་ཐད་ཚད་ལས་འདས་པའི་མནར་གཅོད་མྱོངས་དགོས་ཀྱི་ཡོད་སྟབས། བཙོན་པ་ཁག་གཅིག་རིམ་བཞིན་བཙོན་ཁང་དང་སྨན་ཁང་ནང་འདས་གྲོངས་འགྲོ་བའི་གནས་ཚུལ་བོད་ནང་བསྟུད་མར་ཐོན་བཞིན་ཡོད།
གནས་ཚུལ་དེ་ཚོའི་ཐོག་ནས་རྒྱ་ནག་གཞུང་ཕྱོགས་ནས་རྒྱལ་སྤྱིའི་ཐོག་རྒྱུན་དུ་བརྗོད་བཞིན་པའི་བོད་མིར་མནར་གཅོད་གཏོང་གི་མེད། ཅེས་པ་དེ་ནི་རྫུན་གཏམ་ཡིན་པ་མ་ཟད་ཁྲིམས་ཁང་དེའང་བརྒྱུད་མི་དགོས་པར་བོད་མི་སྲོག་ཐོག་གཏོང་སྟངས་ཞིག་ཡིན་པ་བཅས་ཀྱི་གནས་བསྡུས་སུ།
