༢༠༠༩ ཕྱི་ཟླ་ ༡༢ ཚེས་ ༣༡ རེས་གཟའ་ཕུར་བུ།
༄༅། །དེ་རིང་ཕྱི་ལོ་ ༢༠༠༩ ཕྱི་ཟླ་ ༡༢ ཚེས་ ༣༠ ཉིན་ཀུན་གཟིགས་༸པཌྷ་ཆེན་རིན་པོ་ཆེ་སྐུ་ཕྲེང་བཅུ་པ་རྗེ་བཙུན་བསྟན་འཛིན་འཕྲིན་ལས་འཇིགས་མེད་ཆོས་ཀྱི་དབང་ཕྱུག་དཔལ་བཟང་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་བགྲང་བྱ་ཧྲིལ་པོ་ཉི་ཤུ་འཁོར་བར་བདག་ཅག་རྣམས་ཀྱིས་མགོན་པོ་གང་གི་བཀྲིན་རྗེས་དྲན་ཞུ་ཆེད་འདི་ག་བཞུགས་སྒར་རྡ་རམ་ས་ལ་ཐེག་ཆེན་ཆོས་གླིང་གཙུག་ལག་ཁང་དུ་མཆོད་འབུལ་དང་འབྲེལ་བའི་མཛད་སྒོའི་ཚོགས་མགོན་དུ་༸ཞབས་ཀྱི་པདྨ་རྣམ་པར་བཀོད་པའི་ལྷར་བཅས་སྲིད་ཞིའི་གཙུག་རྒྱན། འཛམ་གླིང་ཞི་བདེའི་དེད་དཔོན། གཞིས་བྱེས་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་གུས་ཕྱག་སྔོན་དུ་ཕུལ་ནས། སྐྱབས་གནས་དགེ་འདུན་གྱི་སྡེ་རྣམས་དང་། བཙན་བྱོལ་བོད་མིའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། གཞུང་ཞབས་རྣམ་པ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་མགྲོན་རྣམ་པ། དམིགས་བསལ་གདན་ས་བཀྲིས་ལྷུན་པོའི་མཁན་རིན་པོ་མཆོག་གིས་དབུས་དགེ་འདུན་པ་རྣམ་པ། དེ་བཞིན་དེ་རིང་འདིར་ཆེད་དུ་ཕེབས་པའི་རྒྱ་ཆེའི་མང་ཚོགས་བཅས་ལ་ངས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཞུས་ཏེ་མཚམས་འདྲི་ཞུ་རྒྱུ་ཡིན། ཐོག་མར་ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་མཁའ་ཁྱབ་བསྟན་འགྲོའི་མགོན་སྐྱབས་དམ་པར་༸སྐུ་ཚེ་༸ཞབས་པད་བསྐལ་བརྒྱར་བརྟན་པའི་གཞིས་བྱེས་གདན་ས་བཀྲིས་ལྷུན་པོའི་ལྷ་སྡེ་མི་སྡེ་ཡོངས་ནས་གནས་བརྟན་མདོ་ལུགས་ཀྱི་སྒོ་ནས་བརྟན་བཞུགས་རྒྱས་འབུལ་ཞུས་དོན་བཞིན་མགོན་པོ་གང་ཉིད་ནས་༸སྐུ་ཚེ་༸ཞབས་པད་ཡུན་རིང་དུ་བརྟན་པའི་བཀའ་བཞེས་ཟབ་མོ་སྤྱི་བོའི་རྒྱན་དུ་བཀའ་དྲིན་སྩལ་བར་ཐུགས་རྗེ་བཀའ་དྲིན་བླ་ན་མེད་པར་ཆེ་ཞེས་གྲངས་མེད་ཞུ་རྒྱུ་དང་། དེ་རིང་ཀུན་གཟིགས་༸པཎ་ཆེན་རིན་པོ་ཆེ་སྐུ་ཕྲེང་བཅུ་པ་རྗེ་བཙུན་བསྟན་འཛིན་འཕྲིན་ལས་འཇིགས་མེད་ཆོས་ཀྱི་དབང་ཕྱུག་དཔལ་བཟང་པོ་མཆོག་དགོངས་པ་གཞན་དོན་དུ་གཤེགས་པའི་ཚུལ་བསྟན་ནས་མི་ལོ་ཉི་ཤུ་ཐམ་པ་ཕྱིན་པ་རེད། ཀུན་གཟིགས་༸པཎ་ཆེན་རིན་པོ་མཆོག་ནི་ནང་བསྟན་ཆོས་ལུགས་ཀྱི་དབུ་འཛིན་ཞིག་ཡིན་པ་མ་ཟད། བསྟན་འགྲོའི་བདེ་སྐྱིད་དོན་དུ་སྐུ་ངལ་བརྒྱ་ཕྲག་ལྷུར་བཞེས་ཀྱིས་ཞུམ་མེད་ཀྱི་འཐབ་རྩོད་དང་། ལྷག་པར་བོད་མི་རིགས་ཀྱི་རང་དབང་འཐབ་རྩོད་ལ་གསབ་ཐབས་བྲལ་བའི་བཀའ་དྲིན་བསྐྱངས་མཁན་གྱི་དཔའ་བོ་ཞིག་ཡིན། དེ་ཡང་ཕྱི་ལོ་ ༡༩༤༩ ལོར་རྒྱ་ནག་དམར་པོའི་སྲིད་དབང་བཙུགས་རྗེས་དམར་དམག་གིས་བོད་ལ་བཙན་འཛུལ་བྱས་པའི་གདུག་རྩབ་མནར་གཅོད་བཟོད་གླགས་བྲལ་ཏེ་ལོ་རབས་ལྔ་བཅུ་པའི་དུས་དཀྱིལ་དུ་མདོ་སྟོད་སྨད་ཁུལ་ནས་བཙན་འཛུལ་བར་ངོ་རྒོལ་གྱི་ལས་འགུལ་གཅིག་རྗེས་གཉིས་མཐུད་དུ་བྱུང་ཞིང་། མཐར་ཕྱི་ལོ་ ༡༩༥༩ ལོར་རྒྱལ་ས་ལྷ་སར་བཙན་རྒོལ་རྒྱལ་སྐྱོབ་ཀྱི་ཞི་རྒོལ་ལངས་པ་མ་ཟད། མི་རིང་བར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་འཕགས་པའི་ཡུལ་དུ་བཙན་བྱོལ་དུ་ཕེབས་གནང་མཛད་དགོས་བྱུང་། སྐབས་དེར་རྒྱ་དམར་གཞུང་ནས་ངན་གཡོ་སྣ་ཚོགས་ཀྱི་སྒོ་ནས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་ཟེར་བའི་གཙོ་འཛིན་ལས་ཚབ་ཏུ་བསྐོས་པ་ལྟར་ཐུགས་འགན་མ་བཞེས་ཀ་མེད་ཆགས། བོད་རྒྱ་ཆེའི་མི་མང་ལ་སྔར་ཕན་ལོ་རྒྱུས་ཐོག་མ་གྲགས་པའི་དཀའ་སྡུག་ཚད་མེད་མྱོང་དགོསབྱུང་བའི་དངོས་ཡོད་གནས་ཚུལ་རྣམས་རྒྱ་ནག་མཐོ་རིམ་མི་སྣར་ཞུ་རྒྱུ་དེ་ནི་ནམ་ཡང་གཡོལ་ཐབས་མེད་པའི་ལོ་རྒྱུས་ཀྱི་འགན་བབ་ཅིག་ཡིན་པར་དགོངས་ཏེ་རྒྱ་དམར་ནས་བོད་རང་སྐྱོང་ལྗོངས་སོགས་བོད་རིགས་གནས་ཡུལ་ཁག་ལ་ཟིང་འཁྲུག་ཞོད་འཇགས་དང་། དམངས་གཙོའི་བཅོས་སྒྱུར་སོགས་ལ་ཁ་གཡར་ནས་འགྲོ་བ་མིའི་རིགས་ཀྱིས་བཟོད་སྒོམ་བྱེད་ཐབས་བྲལ་བའི་རྡུང་རྡེག་དང་། འཕྲོག་བཅོམ། གཏོར་བཤིག དམར་གསོད་སོགས་རང་སྣང་གང་དྲན་བྱས་པ་རྣམས་རྒྱ་ནག་མཐོ་རིམ་མི་སྣར་སྙན་སེང་དང་འབྲེལ་གདོང་ལེན་ནུས་ལྡན་མཛད་ཡོད། ལྷག་པར་ཕྱི་ལོ་ ༡༩༦༢ ལོར་བོད་ཀྱི་དངོས་ཡོད་གནས་ཚུལ་ལ་བསམ་གཞིགས་འབྱུང་སླད་རྒྱ་ནག་གཞུང་ལ་ཡིག་འབྲུ་ཁྲི་བདུན་ལྷག་ཙམ་ཡོད་པའི་ཡིག་ཆ་ཕུལ་ཡོད། ཕྱི་ལོ་ ༡༩༦༤ ལོར་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་ཟེར་བའི་ཐེངས་བདུན་པའི་ཚོགས་འདུ་རྒྱས་འཛོམས་སྐབས་༸པཎ་ཆེན་རིན་པོ་ཆེར་སྐྱོན་བརྗོད་བྱེད་སྐབས་༸པཎ་ཆེན་རིན་པོ་ཆེས་ལྷག་བསམ་རྣམ་དག་གི་སྒོ་ནས་རྒྱ་ནག་གི་འགོ་འཁྲིད་ཚོར་དངོས་ཡོད་གནས་ཚུལ་རྣམས་སྙན་སེང་ཞུས་པ་དང་། དགོངས་འཆར་འདོན་གནང་མཛད་པ་དེ་དག་ནི་བོད་ས་ཁུལ་ཡོངས་ཀྱི་ལས་དོན་ལེགས་སྒྲུབ་ཡོང་ཆེད་ཡིན་པས་ནོར་འཁྲུལ་དུ་ངོས་བཞེས་གནང་རྒྱུ་ལྟ་ཅི། དག་འབུད་ཤུགས་ཆེས་གདོང་ལེན་མཛད་པར་བརྟེན་རྒྱ་དམར་ནས་༸པཎ་ཆེན་རུ་ཚོགས་ཞེས་འཐབ་རྩོད་ཀྱི་རིམ་པ་རྒྱ་བསྐྱེད་དང་འབྲེལ་མཐར་༸པཌྷ་ཆེན་རྒྱལ་ཁབ་ལ་ངོ་རྒོལ་ཚོགས་པ་ཞེས་བསྒྲགས་ཏེ་འཐབ་རྩོད་ཐེར་འདོན་གྱིས་ཏང་ལ་ངོ་རྒོལ་དང་། མི་མང་ལ་ངོ་རྒོལ། སྤྱི་ཚོགས་རིང་ལུགས་ལ་ངོ་རྒོལ་བྱས་པ་ཞེས་པའི་ཞྭ་མོ་གསུམ་གཡོགས་པ་དང་ཆབས་ཅིག་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་གི་གཙོ་འཛིན་ལས་ཚབ་ཀྱི་གོ་གནས་ཀྱང་མེད་པ་བཟོས། ཕྱི་ལོ་ ༡༩༦༦ ལོར་རྒྱ་དམར་ནས་བཙན་འཁྲིད་ཀྱིས་པེ་ཅིང་མི་རིགས་སློབ་གྲྭའི་མི་གྲངས་སྟོང་ཕྲག་འདུས་པའི་ཚོགས་ཆེན་སྟེང་༸པཎ་ཆེན་རིན་པོ་ཆེ་མཆོག་ལ་སྐྱོན་བརྗོད་འཐབ་རྩོད་བྱས། ཕྱི་ལོ་ ༡༩༦༨ ལོར་ཀུན་གཟིགས་༸པཎ་ཆེན་རིན་པོ་ཆེ་མཆོག་མེས་རྒྱལ་ལ་ངོ་རྒོལ་དང་། མི་རིགས་ཁག་གི་མི་དམངས་ཀྱི་དགྲ་བོ་ཡིན་ཚུལ་ཁྱབ་བསྒྲགས་བྱས་ཏེ་ཁྱོན་མི་ལོ་དགུ་དང་ཟླ་བ་བརྒྱད་རིང་བཙོན་ཁང་དུ་བཅུག་སྟེ་དཀའ་སྡུག་མྱངས་དགོས་བྱུང་ཡོད། ཕྱི་ལོ་ ༡༩༧༧ ལོར་༸པཌྷ་ཆེན་རིན་པོ་ཆེ་མཆོག་བཙོན་གྲོལ་གྱིས་ཕྱི་ལོ་ ༡༩༧༩ ལོར་སླར་ཡང་རྒྱ་ནག་རྒྱལ་ཡོངས་ཆབ་སྲིད་གྲོས་ཚོགས་ཀྱི་གཙོ་འཛིན་གཞོན་པའི་གོ་གནས་སླར་གསོ་དང་། ཕྱི་ལོ་ ༡༩༨༠ ལོར་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཀྱི་ཚོགས་གཙོ་གཞོན་པ་བཅས་སུ་བསྐོ་གཞག་ཞུས་ཡོད་ཀྱང་རྒྱ་དམར་ཀྱི་བསམ་དོན་ལྟར་མ་འགྲུབ་པ་མཐར་རྒྱ་ནག་གཞུང་གི་ངན་བྱུས་འོག་ཕྱི་ལོ་ ༡༩༨༩ ལོར་གློ་བུར་དགོངས་པ་ཆོས་དབྱེངས་སུ་གཤེགས་ཚུལ་བསྟན་དགོས་བྱུང་བ་ནས་གསལ་པོ་ཤེས་རྟོགས་ཐུབ་པ་ཡིན། ༸ཀུན་གཟིགས་པཌྷ་ཆེན་རིན་པོ་ཆེར་ཏང་དང་། མི་དམངས། སྤྱི་ཚོགས་རིང་ལུགས། རྒྱལ་ཁབ་བཅས་པར་ངོ་རྒོལ་གནང་མཁན་གྱི་ཞྭ་མོ་གཡོགས་ཏེ་ཆབ་སྲིད་ཀྱི་དབང་ཆ་འཕྲོགས་པ་དང་། འཐབ་རྩོད་བཏང་བ། བཙོན་དུ་བཅུག་པ་བཅས་བྱེད་དོན་ནི་རྒྱ་ནག་དམར་པོའི་སྲིད་གཞུང་གིས་གསར་བརྗེ་དང་། ཡར་ཐོན། མི་རིགས་འདྲ་མཉམ་སོགས་བཤད་ཀྱང་དེ་དག་ཚང་མ་ལག་ལེན་ངོ་མའི་ཐོག་མང་ཚོགས་ཀྱི་བདེ་སྡུག་ལ་ཕན་ཐོགས་མེད་པའི་ཁར་དེ་ལས་ལྡོག་སྟེ་གདུག་རྩབ་དྲག་ཤུལ་གྱི་སྒོ་ནས་སྲིད་དབང་སྒེར་འཛིན་བྱེད་ཀྱི་ཡོད་པའི་ར་ སྤྲོད་གསལ་རྗེན་དང་འབྲེལ་བོད་མི་རིགས་ཀྱི་བདེ་སྡུག་དང་། སངས་རྒྱས་ཀྱི་བསྟན་པ་ཐུགས་ཀྱིས་མ་བོར་བར་བོད་མི་རྣམས་སྡུག་བསྔལ་ལས་སྐྱོབ་པའི་མཛད་འཕྲིན་འདི་ལྟ་བུ་བསྐྱངས་པར་རང་ཅག་བོད་མི་སྤྱི་བོ་གནམ་བསྟན་ཚང་མས་བཀྲིན་རྗེས་དྲན་ཞུ་དགོས་པ་ཞིག་ཡིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀུན་གཟིགས་༸པཎ་ཆེན་རིན་པོ་ཆེ་མཆོག་གི་ཡང་སྲིད་མཆོག་སྤྲུལ་འཁྲུལ་བྲལ་ངོས་འཛིན་མཛད་ཡོད་ནའང་རྒྱ་དམར་དབང་འཛིན་པའི་ངན་གཡོའི་དམ་བསྒྲགས་འོག་ད་ཆ་སྐྱེས་མཆོག་གང་ཉིད་གར་སོང་ཆ་མེད་དུ་གྱུར་ཡོད་པ་འཕྲལ་ནས་མྱུར་དུ་གློདའགྲོལ་ཡོང་བ་དང་། གང་ཉིད་ཀྱི་དགོངས་གཞི་ལྟར་བོད་བསྟན་སྲིད་མི་རིགས་བཅས་ཀྱི་སླད་མཛད་འཕྲིན་རྒྱས་ཤིང་། སྐུ་ཚེ་༸ཞབས་པད་ཡུན་དུ་བརྟན་པའི་མཆོག་གསུམ་གསོལ་འདེབས་ཞུ་རྒྱུ། མཐའ་དོན་སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་དབུས་བསྟན་འཛིན་ཀྱི་སྐྱེས་ཆེན་དམ་པ་རྣམས་ཀྱི་སྐུ་ཚེ་༸ཞབས་པད་ཡུན་དུ་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ་དང་། བོད་དོན་བདེན་མཐའ་མྱུར་དུ་གསལ་བའི་སྨོན་འདུན་ཞུ་རྒྱུ་བཅས། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༠༩ ཟླ་ ༡༢ ཚེས་ ༣༠ ལ།།
