༢༠༠༩ ཕྱི་ཟླ་ ༡༢ ཚེས་ ༢༥ རེས་གཟའ་པ་སངས།
༄༅། །འདི་ག་ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ ༢༠༠༩ ཟླ་ ༡༢ ཚེས་ ༢༤ ཉིན་བཏང་གནས་ནང་འཁོད་དོན། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ནས་གོ་སྒྲིག་ཞུས་ཐོག ༢༠༠༩ ཟླ་ ༡༢ ཚེས་ ༡༨ ནས་ ༢༠ བར་ཉིན་གསུམ་རིང་བཞུགས་སྒར་རྡ་རམ་ས་ལ་གངས་སྐྱིད་ལས་བྱེད་གསོལ་ཚང་ཡང་སྟེང་ཚོགས་ཁང་དུ་ས་གནས་ཁྲིམས་ཞིབ་པ་དང་། གཅིག་ལྕོགས་ས་གནས་ཁྲིམས་ཞིབ་པ། ཁྲིམས་དྲུང་། ལས་དྲུང་བཅས་ལ་བཙན་བྱོལ་བོད་མིའི་ཁྲིམས་ལུགས་སྐོར་ཟབ་སྦྱོང་ཞིག་འཚོགས་ཡོད་པ་དང་། ཟབ་སྦྱོང་དབུ་འབྱེད་མཛད་སྒོར་དྲུང་གཞོན་ཚེས་གསུམ་ལྷ་མོ་ལགས་ནས་མཛད་རིམ་སྙན་སྒྲོན་ཞུས་ཏེ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གིས་ཟབ་སྦྱོང་གི་དགོས་དམིགས་ངོ་སྤྲོད་གསུང་བཤད་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དབུ་ཁྲིད་འོག་བཙན་བྱོལ་བོད་མིའི་མང་གཙོའི་གཞུང་ལུགས་བཟང་པོ་གསར་འཛུགས་བཀྲིན་བསྐྱངས་པ་ནས་བཟུང་འདས་པའི་མི་ལོ་ ༤༩ རིང་བཙན་བྱོལ་བོད་མིའི་མང་གཙོའི་ལམ་ལུགས་ཀྱི་འཕེལ་རིམ་ནང་མུ་མཐུད་ཡར་རྒྱས་ཚགས་ཚུད་འགྲོ་ཐབས་སུ་ལེགས་བཅོས་རིམ་པ་མཛད་དེ། བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་འབྲེལ་ཆགས་དོན་ཚན་ཁག་གཞིར་བཟུང་བཙན་བྱོལ་བོད་མིའི་མང་གཙོའི་ཀ་བ་གསུམ་གྱི་ཡ་གྱལ་ཁྲིམས་ལུགས་དབང་འཛིན་གྱི་ཆེས་མཐོའི་ཁྲིམས་ཞིབ་ཁང་ཕྱི་ལོ་ ༡༩༩༢ ཟླ་ ༣ ཚེས་ ༡༡ ཉིན་དངོས་སུ་གསར་འཛུགས་གནང་སྟེ།
བཙན་བྱོལ་བོད་མིའི་སྤྱི་ཚོགས་ནང་ཁྲིམས་ཀྱི་དབང་སྒྱུར་གྱི་ནུས་པ་དོན་འཁྱོལ་ཡོང་ཐབས་སུ། རྒྱ་གར་དང་། བལ་ཡུལ། སུད་སི་བཅས་ཀྱི་བོད་མིའི་གཞིས་ཆགས་དང་སྡོད་སྒར་ཁག་ཏུ་ས་གནས་ཁྲིམས་ཞིབ་ཁང་ ༢ དང་གཅིག་ལྕོགས་ས་གནས་ཁྲིམས་ཞིབ་ཁང་ ༡༧ བཅས་བཙུགས་གནང་ཡོད་པ་དང་། བཙན་བྱོལ་བོད་མིའི་སྤྱི་ཚོགས་ནང་སེར་སྐྱ་མི་མང་དང་དགེ་ལས་སློབ་ཕྲུག་རྣམས་ལ་བོད་མིའི་ཁྲིམས་ལུགས་སྐོར་གོ་རྟོགས་སྤེལ་རྒྱུའི་ལས་རིམ་རྒྱ་གང་ཆེ་སྤེལ་དང་སྤེལ་མུས་ཡིན། གཅིག་ལྕོགས་ས་གནས་ཁྲིམས་ཞིབ་པ་དང་ལས་དྲུང་རྣམས་འཛིན་སྐྱོང་གི་ལས་འགན་བཀོད་སྒྲིག་འོག་ཡང་སེ་ལས་གནས་འཕོ་འགྱུར་འགྲོ་གི་ཡོད་སྟབས། བོད་མིའི་ཁྲིམས་ལུགས་སྐོར་ཟབ་སྦྱོང་འདི་ལྟ་བུ་དུས་ནས་དུས་སུ་གོ་སྒྲིག་ཞུ་དགོས་གལ་གནད་ཆེན་པོ་ཆགས་ཡོད།
གཅིག་ལྕོགས་ས་གནས་ཁྲིམས་ཞིབ་པའི་ལས་འགན་གཙོ་བོ་ནི་ས་གནས་སུ་ཁ་མཆུ་ཞུ་གཏུག་བྱུང་ན་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་དགོངས་དོན་ཁ་མཆུའི་བྱ་རིམ་དང་ཐག་གཅོད་བཅས་དུས་འགོར་མེད་པར་བསྒྲུབ་དགོས་ཐོག། ཁྱབ་ཁོངས་སེར་སྐྱ་མང་ཚོགས་ལ་དུས་ནས་དུས་སུ་བོད་མིའི་ཁྲིམས་ལུགས་སྐོར་གོ་རྟོགས་སྤེལ་ཏེ། མང་ཚོགས་ཀྱི་བོོད་མིའི་ཁྲིམས་ལུགས་ཀྱི་ཤེས་བྱའི་གནས་ཚད་གོང་མཐོར་གཏོང་ཐུབ་པའི་འབད་བརྩོན་གནང་དགོས་གལ་གནད་ཆེན་པོ་ཡིན། གཅིག་ལྕོགས་ས་གནས་ཁྲིམས་ཞིབ་པའི་འགན་ཁུར་གྱི་སྒོ་ནས་ལོ་འཁོར་གཅིག་ནང་ས་གནས་སོ་སོར་བཙན་བྱོལ་བོད་མིའི་ཁྲིམས་ལུགས་དབང་འཛིན་གྱི་ལས་དོན་ཇི་ཞུས་ཀྱི་ལས་བསྡོམས་འབུལ་རྒྱུའི་ཆེད་དུ་ཆེས་མཐོའི་ཁྲིམས་ཞིབ་ཁང་ནས་སྟབས་བདེའི་ལས་བསྡོམས་འགེངས་ཤོག་ཁུངས་སོ་སོར་གཏོང་གནང་རྒྱུར། འབྲེལ་ཡོད་ཚང་མས་ལས་བསྡོམས་དུས་ཐོག་འབུལ་ཐུབ་པའི་འབད་བརྩོན་གནང་དགོས་དང་།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་བཀའ་སློབ་དགོངས་དོན་ས་གནས་སོ་སོའི་ཁྱབ་ཁོངས་སུ་མི་མང་སྙོམ་ཆུང་ཉམ་ཐག་མགོན་མེད་སྐྱབས་མེད་ཁ་མཆུ་ཞུ་གཏུག་ཐུབ་མིན་གྱི་དཀའ་ངལ་འཕྲད་ཀྱི་ཡོད་མེད་སྐོར་རྒྱུན་དུ་དོ་སྣང་དང་ཞིབ་འཇུག་ངེས་པར་དུ་གནང་རོགས་གནང་བཅས་གསུངས། ད་ལྟའི་ཟབ་སྦྱོང་འདི་བཞིན་དམིགས་བསལ་ས་གནས་ཁྲིམས་ཞིབ་པའི་ཟབ་སྦྱོང་ཞིག་ཡིན་པ་དང་། ཟབ་སྦྱོང་འདིའི་སློབ་ཁྲིད་གནང་མཁན་གཙོ་བོ་བཙན་བྱོལ་བོད་མིའི་ཁྲིམས་ལུགས་སྐོར་ཤེས་མྱོང་ལྡན་པའི་ཁྲིམས་ཞིབ་པ་ཆེ་བ་ཟུར་པ་སྐུ་ངོ་ཕུན་རབ་བློ་བཟང་དར་རྒྱས་མཆོག་དང་། ཁྲིམས་ཞིབ་པ་ཆེ་བ་ཟུར་པ་སྐུ་ངོ་བྱ་དུར་བསོད་ནམས་བཟང་པོ་མཆོག ཁྲིམས་ཞིབ་པ་ཆེ་བ་ཟུར་པ་སྐུ་ངོ་གྲེས་ནང་རྣམ་རྒྱལ་ཚེ་རིང་མཆོག་བཅས་ཁྲིམས་ཞིབ་པ་ཆེ་བ་ཟུར་པ་གསུམ་དང་། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆུ་སྟེང་ངག་དབང་ཐུབ་བསྟན་མཆོག་བཅས་ནས་བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་དེབ་གསུམ་གྱི་གལ་གནད་ཆེ་བའི་དོན་ཚན་ཁག་ཟུར་འདོན་གྱིས་སློབ་ཚན་གཏན་འབེབས་ཞུས་པ་ལྟར་ཉིན་གསུམ་རིང་སློབ་ཁྲིད་གནང་ཡོད།
ཐེངས་འདིའི་ཟབ་སྦྱོང་དུ་ཟུར་འཛུགས་ས་གནས་ཁྲིམས་ཞིབ་ཁང་གི་ཁྲིམས་ཞིབ་པ་ ༢ དང་། གཅིག་ལྕོགས་ས་གནས་ཁྲིམས་ཞིབ་པ་ ༡༣ ཁྲིམས་དྲུང་ ༢ ལས་དྲུང་ ༡༠ ཆེས་མཐོའི་ཁྲིམས་ཞིབ་ཁང་གི་ཁྲིམས་ཀྱི་སློབ་ཐོན་པ་ལས་བྱེད་གཉིས་བཅས་མི་གྲངས་ ༢༩ མཉམ་ཞུགས་གནང་ཡོད། ཟབ་སྦྱོང་གི་མཇུག་བསྡོམས་མཛད་སྒོར་ཁྲིམས་ཞིབ་པ་ཆེ་བ་ཟུར་པ་ཕུན་རབ་བློ་བཟང་དར་རྒྱས་མཆོག་ནས་ཟབ་སྦྱོང་བ་རྣམས་ལ་ཕྱག་ཁྱེར་གསོལ་རས་གནང་། ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གིས་ཁྲིམས་ཞིབ་པ་ཆེ་བ་ཟུར་པ་གསུམ་ལ་ཐུགས་རྗེ་ལེགས་འབུལ་གྱི་མཇལ་དར་དང་སྟོང་མིན་ལེགས་སྐྱེས་བཅས་ཕུལ།
ཁྲིམས་ཞིབ་པ་ཆུ་སྟེང་ངག་དབང་ཐུབ་བསྟན་མཆོག་ནས་ཟབ་སྦྱོང་གི་མཇུག་བསྡོམས་གསུང་བཤད་གནང་དོན། ད་ལན་གྱི་ཟབ་སྦྱོང་ཉིན་གསུམ་རིང་བཙན་བྱོལ་བོད་མིའི་ཁྲིམས་ལུགས་སྐོར་སློབ་ཁྲིད་གང་གནང་བ་རྣམས་ཟབ་སྦྱོང་བ་ཚང་མས་རྒྱུན་དུ་ལག་ལེན་ཐོག་ཐུགས་ཕན་གསོས་པ་དགོས་རྒྱུ་མ་ཟད། ཁྱབ་ཁོངས་མང་ཚོགས་ལ་མུ་མཐུད་བོད་མིའི་ཁྲིམས་ལུགས་སྐོར་གོ་རྟོགས་རྒྱ་གང་ཆེ་སྤེལ་ཐབས་གནང་རྒྱུ་གལ་ཆེན་པོ་ཡིན། ༸གོང་ས་མཆོག་གི་དགོངས་གཞི་ལྟར་ཁྲིམས་ཞིབ་ཁང་གི་དགོས་པ་དང་། དམིགས་ཡུལ་དོན་འཁྱོལ་ཡོང་བ་ཚང་མས་འབད་བརྩོན་གནང་རོགས། དེ་བཞིན་གྱོད་གཞི་དང་འབྲེལ་བའི་ལས་དོན་ལག་བསྟར་བྱ་རྒྱུ་རང་བཞིན་གྱི་མགོ་རྙོག་དང་། དཀའ་རྙོག་ཅན་ཡིན་པས་ཚང་མས་ཁ་ཞེ་གཉིས་མེད་ཀྱིས་དམ་བཅའི་འབྲུ་དོན་ལྟར་འཇིགས་ཞུམ་མེད་པར་གདོང་ལེན་གནང་དགོས་ཧ་ཅང་གལ་ཆེན་པོ་ཡིན་ཞེས་གསུངས།
ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་ཁྲིམས་དྲུང་ཆུ་ཁྲི་སྟེང་པ་ངག་དབང་ཆོས་གྲགས་མཆོག་ནས་ཐུགས་རྗེ་ཆེ་ཞུའི་གསུང་བཤད་གནང་བ་བཅས་ཀྱི་གནས་བསྡུས་སུ།
