༢༠༠༩ ཕྱི་ཟླ་ ༡༢ ཚེས་ ༧ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༦ ཉིན་བཙན་བྱོལ་བོད་གཞུང་གི་བཀའ་བློན་ཁྲི་པ་སློབ་དཔོན་ཟམ་གདོང་རིན་པོ་ཆེ་མཆོག་རྒྱ་གར་རྒྱལ་ས་ལྡི་ལི་ནས་ཨོ་སི་ཊོ་ལི་ཡར་ཕེབས་ཐོན་གནང་ཡོད། དེ་ཡང་ཨོ་སི་ཊོ་ལི་ཡའི་གྲོང་ཁྱེར་མེལ་བོན་ནང་རྒྱལ་སྤྱིའི་ཆོས་ལུགས་མཐུན་སྒྲིལ་གྱི་ཚོགས་འདུ་དེ་ཟླ་ ༡༢ ཚེས་ ༣ ནས་ ༡༡ བར་འཚོགས་བཞིན་ཡོད་པ་ལྟར་ཕྱི་ཚེས་ ༩ ཉིན་གྱི་སྔ་དྲོ་བཀའ་ཁྲི་མཆོག་ལྷན་ཚོགས་དེར་ལྷན་བཞུགས་གནང་རྒྱུ་ཡིན་པ་མ་ཟད། ནང་པའི་བྱམས་བརྩེར་ལྟ་ཕྱོགས། ཞེས་པའི་བརྗོད་གཞིའི་ཐོག་གསུང་བཤད་ཀྱང་གནང་རྒྱུ་ཡིན་འདུག ཕྱི་ཚེས་ ༣ ནས་འགོ་བཙུགས་པའི་ཉིན་བདུན་ཙམ་གྱི་ཆོས་ལུགས་མཐུན་སྒྲིལ་གྱི་ཚོགས་འདུ་དེར་རྒྱལ་སྤྱིའི་ཆོས་ལུགས་འདྲ་མིན་ཁག་ནས་མི་གྲངས་ ༨༠༠༠ ཙམ་ལྷན་ཞུགས་གནང་ཡོད་པ་རེད།
ཕྱི་ཟླ་ ༡༢ ཚེས་ ༡༠ ཉིན་བཀའ་བློན་ཁྲི་པ་མཆོག་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༢༠ ཧྲིལ་པོ་འཁོར་བའི་དགའ་སྟོན་རྟེན་འབྲེལ་གྱི་མཛད་སྒོ་གྲོང་ཁྱེར་མེལ་བོན་ནང་འཚོགས་རྒྱུ་ཡིན་པ་དེར་ལྷན་ཞུགས་གནང་རྒྱུ་ཡིན་པ་བཅས་ཀྱི་གནས་བསྡུས་སུ།
