༢༠༠༩ ཕྱི་ཟླ་ ༡༢ ཚེས་ ༣༡ རེས་གཟའ་ཕུར་བུ།
༄༅། །དཔལ་ལྡན་བཀའ་ཁྲི་ཟམ་གདོང་རིན་པོ་ཆེ་མཆོག་ཕྱི་ལོ་ ༢༠༡༠ ཟླ་ ༡ ཚེས་ ༤ ཕྱི་དྲོ་ས་ཐོག་བརྒྱུད་ཅཀྐཱི་བྷེངྐ་དུ་ཕེབས་ཐོན་གྱིས་ལྡི་ལིར་ཕེབས་འབྱོར་གནང་རྒྱུ་དང་། དེ་ནས་མཁའ་ལམ་བརྒྱུད་ཀོལཀ་ཏར་ཕེབས་ཐོན་གྱིས་འགྲོ་བ་མི་རིགས་དང་ཆོས་ཕྱོགས་སྐོར་གྱི་ཚོགས་ཆེན་དུ་ཚོགས་ཞུགས་དང་གསུང་བཤད་གནང་རྒྱུ། གནས་མཆོག་རྡོ་རྗེ་གདན་དུ་བོད་འབྱོར་བ་ཁག་གཅིག་ལ་གསུང་བཤད་གནང་རྒྱུ། ཀོལཀཏར་ནས་མེ་འཁོར་བརྒྱུད་ཕེབས་ཐོན་གྱིས་གཱ་ཡར་ཕེབས་འབྱོར་གནང་རྒྱུ་དང་དེ་ནས་ལྡི་ལིར་ཕེབས་འབྱོར་གནང་རྒྱུ། ལྡི་ལི་ནས་མཁའ་ལམ་བརྒྱུད་བུབ་ནེཤབར་དུ་ཕེབས་ཐོན་གནང་རྒྱུ་དང་དེ་ནས་ཕུན་ཚོགས་གླིང་གཞིས་སྒར་དུ་ཕེབས་འབྱོར་གྱིས་གཞིས་སྒར་དུ་མི་མང་ཚོགས་ཆེན་དུ་གསུང་བཤད་གནང་རྒྱུ། ཚེས་ ༡༣ ཉིན་གྱི་ཕྱི་དྲོ་ཕུན་ཚོགས་གླིང་གཞིས་སྒར་ནས་བུབནེཤབར་དུས་ཐོག་ཕེབས་ཐོན་གནང་རྒྱུ་དང་དེ་རྗེས་མཁའ་ལམ་བརྒྱུད་ལྡི་ལིར་ཕེབས་འབྱོར་གནང་རྒྱུ། དེ་ནས་མཁའ་ལམ་བརྒྱུད་གྷ་གལ་དང་དེ་རྗེས་བཞུགས་སྒར་དུ་ཕེབས་འབྱོར་གནང་རྒྱུ་ཡིན་པ་བཅས་སོ།
