༢༠༠༩ ཕྱི་ཟླ་ ༡༢ ཚེས་ ༢༤ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༢༣ ཉིན་སྤེལ་བའི་གནས་ཚུལ་ལྟར་ན་ཕྱི་ལོ་ ༡༩༥༩ སྔ་རྗེས་སུ་བོད་ཀྱི་དམག་དོན་དང་ཆབ་སྲིད་ཀྱི་ལས་དོན་གནང་མྱོང་མཁན་གཞུང་ཞབས་རྒན་གྲས་ང་ཕོད་ངག་དབང་འཇིགས་མེད་མཆོག་ཕྱི་ཟླ་ ༡༢ ཚེས་ ༢༣ ཉིན་རྒྱ་ནག་གི་རྒྱལ་ས་པེ་ཅིང་དུ་དགུང་གྲངས་ ༩༩ ཐོག་འདས་གྲོངས་སུ་གྱུར་ཡོད་པ་རེད། ང་ཕོད་ངག་དབང་འཇིགས་མེད་མཆོག་ནི་ཕྱི་ལོ་ ༡༩༡༠ ལོར་བོད་ཀྱི་རྒྱལ་ས་ལྷ་སར་འཁྲུངས་པ་དང་། ཕྱི་ལོ་ ༡༩༣༦ ལོ་ནས་བོད་གཞུང་གི་སྲི་ཞུའི་ལས་དོན་གནང་འགོ་བཙུགས་ཡོད་པ་རེད། རྗེས་སུ་བོད་གཞུང་གི་བཀའ་བློན་དང་། ཕྱི་ལོ་ ༡༩༥༠ ལོར་མི་དམངས་བཅིངས་བཀྲོལ་དམག་ཆབ་མདོར་འབྱོར་སྐབས་མདོ་སྨད་སྤྱི་ཁྱབ་པར་བསྐོ་གཞག་སོགས་གནང་ཡོད་པ་རེད། ཕྱི་ལོ་ ༡༩༥༡ ཟླ་ ༥ ཚེས་ ༢༣ ཉིན་ང་ཕོད་ངག་དབང་འཇིགས་མེད་མཆོག་གི་འགོ་ཁྲིད་གནང་སྟེ་བོད་གཞུང་གི་སྐུ་ཚབ་ལྔ་རྒྱ་ནག་པེ་ཅིང་དུ་ཕེབས་པའི་སྐབས་དེར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་ནས་བཙན་དབང་ཐོག་གྲོས་མཐུན་དོན་ཚན་ ༡༧ ཟེར་བར་མིང་རྟགས་བཀོད་བཅུག་པ་རེད། སྐུ་ཚབ་རྣམས་ལ་རྒྱ་ནག་གཞུང་གིས་གྲོས་མཐུན་དོན་ཚན་ ༡༧ སྐོར་བོད་གཞུང་ལ་སྙན་སེང་ཙམ་ཡང་ཞུ་མ་འཇུག་པར་བཙན་དབང་གིས་མིང་རྟགས་བཀོད་བཅུག་སྟབས། སྐབས་དེར་མིང་རྟགས་བཀོད་པ་དེ་དག་སྐུ་ཚབ་སོ་སོ་སྒེར་གྱི་དབང་ཚད་ཐོག་ནས་མིང་རྟགས་བཀོད་པ་ཞིག་ཡིན་ཞེས་ནན་བརྗོད་བྱས་ཡོད་པ་རེད། གྲོས་མཐུན་དོན་ཚན་ ༡༧ ཐོག་བཀོད་པའི་ཐམ་ཀ་ཚུན་ཆད་བོད་གཞུང་གི་མིན་པར་རྒྱ་གཞུང་ནས་གསར་བཟོས་བྱས་པ་ཡིན་པ་རེད།
