༢༠༠༩ ཕྱི་ཟླ་ ༡༢ ཚེས་ ༡༡ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༨ ཉིན་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནིའུ་ཛི་ལནཌི་ཁུལ་གྱི་མཛད་འཕྲིན་རྣམས་ལེགས་གྲུབ་ཀྱིིས་ཨོ་སི་ཊོ་ལི་ཡའི་མཚོ་གླིང་ཊེ་སི་མེ་ནི་ཡའི Tasmania གྲོང་ཁྱེར་ Hobart ཧོ་བཊ་རུ་ཆིབས་སྒྱུར་བསྐྱངས་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ལ་ཊེ་སི་མེ་ནི་ཡའི་གཙུག་ལག་སློབ་གཉེར་ཁང་དང་རྒྱ་གར་ནང་རྟེན་གཞི་བྱས་པའི་ཝར་ཌྷ་བོད་ཀྱི་གཙུག་ལག་སློབ་གཉེར་ཁང་གཉིས་ཕན་ཚུན་ཤེས་ཡོན་བརྗེ་ལེན་གྱི་འབྲེལ་ལམ་བཙུགས་ཏེ་ལོ་བཅུ་འཁོར་བའི་མཛད་སྒོའི་ཐོག་ཇི་ལྟར་གསོལ་འདེབས་ཞུས་དོན་བཞིན། སྔ་དྲོ་ཊེ་སི་མེ་ནི་ཡའི་གཙུག་ལག་སློབ་གཉེར་ཁང་དུ་༸ཞབས་སོར་འཁོད་ཡོད་པ་རེད། སྐབས་དེར་མགོན་པོ་གང་ཉིད་མཆོག་ལ་སློབ་གྲྭའི་འགན་འཛིན་གྱིིས་དགའ་བསུའི་གསུང་བཤད་གནང་དོན། ད་བར་ང་ཚོའི་གཙུག་ལག་སློབ་ཁང་དང་ཝར་ཌྷ་བོད་ཀྱི་གཙུག་ལག་སློབ་གཉེར་ཁང་གཉིས་ཕན་ཚུན་ཤེས་ཡོན་བརྗེ་ལེན་གྱི་ལས་དོན་འཆར་གཞི་འགོ་བཙུགས་ཏེ་མི་ལོ་བཅུ་ཕྲག་གཅིག་ཕྱིན་ཡོད། དེའི་རིང་ལས་དོན་རྣམས་ཧ་ཅང་གི་ལམ་ལྷོང་དང་དོན་སྙིང་ལྡན་པ་ཞིག་བྱུང་ཡོད་ཅེས་སྙན་སྒྲོན་ཞུས་ཡོད་པ་རེད། དེ་རྗེས་༸གོང་ས་མཆོག་གིས་དེར་འདུས་མི་མང་རྣམས་ལ་བཀའ་སློབ་སྩལ་དོན། ད་རེས་མཛད་སྒོ་དེའི་ཐོག་ངོས་རང་ཚོགས་བཞུགས་བྱེད་ཐུབ་པ་འདི་ནི་གཟི་བརྗིད་ཅིག་ཡིན་པ་ངོས་འཛིན་བྱེད་ཀྱི་ཡོད། ཅེས་བཀའ་སྩལ། དེ་བཞིན་༸གོང་ས་མཆོག་གི་རླབས་ཆེན་མཛད་ཁུར་གཙོ་བོ་གསུམ་ཡོད་པའི་ནང་ནས་འགྲོ་བ་མིའི་བཟང་སྤྱོད་གོང་འཕེལ་གཏོང་རྒྱུ་དང་། ཆོས་ལུགས་ཕན་ཚུན་འཆམ་མཐུན་གོང་འཕེལ་གཏོང་རྒྱུ་བཅས་འཛད་ཁུར་དེ་གཉིས་ཐོག་བཀའ་སློབ་ནན་པོ་སྩལ་ཡོད། ཕྱོགས་མཚུངས་༸གོང་ས་མཆོག་གིས་ཕྱི་དངོས་པོའི་ཡར་རྒྱས་ཁོ་ནས་ནང་སེམས་ཀྱི་ཞི་བདེ་བསྐྲུན་ཐུབ་རྒྱུ་ཞིག་མེད་པ་ཞིག་དང་། ནང་སེམས་ཀྱི་ཞི་བདེ་ནི་སྨན་ཁབ་རྒྱབ་པ་དང་དྲ་རྒྱ་བརྒྱུད་ནས་སྐྲུན་ཐུབ་ཐབས་མེད། དེ་ནི་སོ་སོའི་རྒྱུད་ལ་ཡོད་པའི་བཟང་པོའི་ཡོན་ཏན་དང་བྱམས་བརྩེའི་ས་བོན་དེ་དག་གོང་འཕེལ་བཏང་ནས་ཡོང་ཐུབ་པ་ཞིག་ཡིན་སྐོར་བཀའ་སྩལ་ཡོད།།
༸གོང་ས་མཆོག་ནས་མང་ཚོགས་ལ་བཀའ་སློབ་མ་སྩལ་གོང་ཨོ་སི་ཊོ་ལི་ཡའི་གྲོས་ཚོགས་གོང་མའི་འཐུས་མི་འམ་ལྗང་ཁུ་ཚོགས་པའི་དབུ་ཁྲིད་ Bob Brown བོབ་བ་རོན་མཆོག ཊེ་སི་མེ་ནི་ཡའི་ཁོར་ཡུག་བློན་ཆེན་མཆོག་དང།། གྲོང་ཁྱེར་དེའི་སྤྱི་ཁྱབ་པ་བཅས་དང་ལྷན་དུ་མཇལ་འཕྲད་མཛད་ཡོད། གྲོང་ཁྱེར་དེའི་སྤྱི་ཁྱབ་ལྷན་མཇལ་འཕྲད་མཛད་སྐབས་ཁོང་ནས་༸གོང་ས་མཆོག་ལ་མཇལ་དར་དང་ཕེབས་བསུའི་ཕྱག་བྲིས་ཤིག་ཕུལ་ཡོད། སྐབས་དེར་མགོན་པོ་གང་ཉིད་མཆོག་ནས་ཊེ་སི་མེ་ནི་ཡར་རྟེན་གཞི་བྱས་པའི་བོད་རིགས་མི་གྲངས་ ༢༠ ཙམ་ལ་མཇལ་ཁ་དང་བཀའ་སློབ་སྩལ་ཡོད་པའི་ནང་། ༸གོང་ས་མཆོག་གིས་དེར་འཛོམས་པའི་བོད་རིགས་ཚོར་གཙོ་བོ་བོད་ནང་ཡོད་པའི་རྒྱལ་གཅེས་བོད་མི་ཚོར་སྙིང་སྟོབས་ཧ་ཅང་ཆེན་པོའི་ཐོག་ནས་བསྡད་ཡོད་སྐོར་དང།། ང་ཚོ་རང་དབང་ལུང་པར་ཡོད་པའི་བཙན་བྱོལ་བོད་མིའི་ངོས་ནས་ལྷག་པར་དུ་སེམས་ཤུགས་སྐྱེད་དེ་སྙིང་སྟོབས་སྤེལ་དགོས། དེ་བཞིན་ང་ཚོ་བཙན་བྱོལ་བ་ས་གནས་གང་དུ་གནས་ཡོད་ཀྱང་བོད་པའི་འདུ་ཤེས་དེ་མ་དོར་བ་བྱ་དགོས་སྐོར་བཀའ་སློབ་ཕེབས་ཡོད།
དེའི་ཕྱི་ཡོལ་༸གོང་ས་མཆོག་གིས་ཊེ་སི་མེ་ནི་ཡའི་མི་མང་ ༤༠༠༠ ལྷག་ཙམ་ལ། ང་ཚོའི་གོ་ལ་དང་དེའི་འགན་སུ་ལ་ཡོད། ཅེས་པའི་བརྗོད་གཞིའི་ཐོག་ Derwent Entertaintment Centre ཞེས་པའི་ཚོགས་ཁང་དུ་བཀའ་སློབ་སྩལ་ཡོད། སྐབས་དེར་བོད་དོན་ལ་རྒྱུན་རིང་ནས་རྒྱུས་མངའ་ཡོད་མཁན་ལྗང་ཁུ་ཚོགས་པའི་དབུ་ཁྲིད་སྐུ་ཞབས་བོབ་བ་རོན་ Bob Brown མཆོག་གིས་མང་ཚོགས་ལ་༸གོང་ས་༸སྐྱབས་མགོན་ཆེན་པོ་མཆོག་ངོ་སྤྲོད་ཀྱི་གསུང་བཤད་གནང་ཡོད། དེ་བཞིན་༸གོང་ས་མཆོག་གིས་སྐུ་ཞབས་བོབ་བ་རོན་མཆོག་ལ་བོད་དོན་ཐོག་ད་བར་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུའི་བཀའ་སློབ་སྩལ་ཡོད། མགོན་པོ་གང་ཉིད་མཆོག་ནས་སྐུ་ཞབས་བོ་རོན་མཆོག་གིས་བོད་དོན་ལ་རྒྱབ་སྐྱོར་གནང་བ་ཙམ་མིན་པར་དྲང་བདེན་ལ་རྒྱབ་སྐྱོར་གནང་གི་ཡོད་པར་ངོས་འཛིན་གནང་གི་ཡོད་སྐོར་བཀའ་སློབ་ཕེབས་ཡོད། ༸གོང་ས་མཆོག་གིས་བོད་ཀྱི་དཀའ་རྙོག་དེ་དབྱེ་བ་གསུམ་དུ་འབྱེད་གནང་མཛད་ཡོད། དེ་དག་ནི་བོད་དུ་འགྲོ་བ་མིའི་ཐོབ་ཐང་དང་ཆོས་དད་རང་མོས་མེད་པ། ཁོར་ཡུག་གི་གནད་དོན། དེ་བཞིན་བོད་ཀྱི་རིག་གཞུང་གི་གནད་དོན་བཅས་གསུམ་དུ་དབྱེ་འབྱེད་མཛད་པ་དང་སྦྲགས་མགོན་པོ་གང་ཉིད་མཆོག་གིས་ཁོར་ཡུག་ཐོག་བཀའ་སློབ་སྩལ་བའི་ནང་། ཨེ་ཤི་ཡའི་རྒྱལ་ཁབ་ཕལ་མོ་ཆེའི་རྒྱུག་ཆུ་མང་པོ་ཞིག་བོད་ནས་ཡོང་གི་ཡོད་པ་དང་། བོད་ཀྱི་རྒྱག་ཆུ་དེ་དག་ལ་མི་མང་ཐེར་འབུམ་མང་པོ་ཞིག་གིས་འཚོ་བརྟེན་བྱེད་བཞིན་ཡོད། དེར་བརྟེན་བོད་ཀྱི་ཁོར་ཡུག་སྲུང་སྐྱོབ་དེ་བོད་མི་ས་ཡ་དྲུག་གིས་གནད་དོན་ཙམ་མིན་པར་མི་མང་ཐེར་འབུམ་མང་པོའི་བདེ་དོན་དང་འབྲེལ་བ་ཡོད་སྐོར་བཀའ་སློབ་སྩལ་ཡོད། དེ་བཞིན་༸གོང་ས་མཆོག་གིས་ཁོར་ཡུག་དང་འབྲེལ་བའི་ཆེད་ལས་པ་ཚོར་བོད་ནང་ཕེབས་ཏེ་བོད་ནང་གི་ཁོར་ཡུག་གི་དངོས་ཡོད་གནད་དོན་ཐོག་ཉམས་ཞིབ་གནང་དགོས་པའི་འབོད་སྐུལ་མཛད་ཡོད། སྐབས་དེར་མགོན་པོ་གང་ཉིད་མཆོག་གིས་གོ་ལའི་ཚ་དྲོད་དེ་འཛམ་གླིང་སྤྱི་ཡོངས་ལ་ཚེག་གཅིག་ཡིན་ཡང་བོད་ནང་ཚེག་གསུམ་ཆགས་ཀྱི་ཡོད་པར་བརྟེན་བོད་ནང་གི་ཁོར་ཡུག་གི་གནས་སྟངས་དེ་ཛ་དྲག་པོ་ཞིག་ཆགས་ཡོད་པ་རེད་ཅེས་བཀའ་སྩལ། ༸གོང་ས་མཆོག་གིས་ཐེངས་དེར་མང་ཚོགས་དང་དེ་བཞིན་གསར་འགོད་ལྷན་ཚོགས་ལ་ཁོར་ཡུག་དང་འབྲེལ་བའི་ཐོག་བཀའ་སློབ་གཙོ་བོ་སྩལ་ཡོད་པ་བཅས་ཀྱི་གནས་བསྡུས་སུ།།
