༢༠༠༩ ཕྱི་ཟླ་ ༡༢ ཚེས་ ༧ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༣ ཉིན་ཨོ་སི་ཊོ་ལི་ཡའི་གྲོང་ཁྱེར་མེལ་བོན་ནང་རྒྱལ་སྤྱིའི་ཆོས་ལུགས་མཐུན་སྒྲིལ་ལྷན་ཚོགས་དབུ་བཙུགས་གནང་ཡོད་པ་རེད། རྒྱལ་སྤྱིའི་ཆོས་ལུགས་ནང་ཁུལ་གྱི་ལྷན་ཚོགས་དེའི་ཐོག་འཛམ་གླིང་ནང་ཡོད་པའི་ཆོས་ལུགས་འདྲ་མིན་ཁག་གི་རྗེས་འབྲང་པ་ཁྱོན་མི་གྲངས་ ༨༠༠༠ ཙམ་ཚོགས་བཞུགས་གནང་ཡོད། ལྷན་ཚོགས་དེའི་བརྗོད་གཞི་གཙོ་ཆེ་ཁག་ནི། གནམ་གཤིས་འགྱུར་ལྡོག་དང་གདོད་མའི་མི་རིགས་ཀྱི་ཐོབ་ཐང་། ནུབ་ཕྱོགས་དང་ཨི་སི་ལམ་༼ཁ་ཆེ༽ཆོས་ལུགས་དབར་གྱི་འབྲེལ་ལམ་ཞེས་པ་དེ་དག་ཡིན་འདུག
ཕྱི་ཟླ་ ༡༢ ཚེས་ ༩ ཉིན་གྱི་མཇུག་བསྡོམས་ཚོགས་འདུའི་ཐོག་༸གོང་ས་མཆོག་ལ་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་ཆིབས་སྒྱུར་བསྐྱང་གནང་མཛད་རྒྱུ་མ་ཟད་བཀའ་སློབ་བཀའ་དྲིན་སྩལ་གནང་མཛད་རྒྱུ་ཡིན་འདུག
ཉིན་དྲུག་རིང་གི་ཆོས་ལུགས་ནང་ཁུལ་མཐུན་སྒྲིལ་ཚོགས་འདུ་འདི་བཞིན་ལོ་ལྔ་རེའི་མཚམས་སུ་ཚོགས་བཞིན་ཡོད། ཐེངས་འདིའི་ལྷན་ཚོགས་སྐབས་རྒྱལ་ཁབ་འདྲ་མིན་ ༨༠ ཙམ་ནས་འཐུས་མི་མཉམ་བཞུགས་གནང་ཡོད་ཁོངས་ནས་ཨ་རིའི་གདོད་མའི་མི་རིགས་ཀྱི་དབུ་ཁྲིད་དང་། ཨི་སི་རེལ་ནས་ཇིའུ་ཆོས་ལུགས་ཀྱི་བླ་མ། ཝི་ཏི་ནམ་ནང་པའི་དགེ་འདུན་པ། ཧིན་དྷུའི་ལྟ་གྲུབ་་བ། དེ་བཞིན་ཡེ་ཤུའི་ཆོས་ལུགས་ནང་གི་ཆོས་བརྒྱུད་འདྲ་མིན་ཡོད་པ་རྣམས་ནས་སྐུ་ཚབ་འཐུས་མི་བཅས་ལྷན་ཞུགས་གནང་སྟེ་ལྷན་ཚོགས་གནང་ཡོད་པ་བཅས་ཀྱི་གནས་བསྡུས་སུ།
