༢༠༠༩ ཕྱི་ཟླ་ ༡༢ ཚེས་ ༥ རེས་གཟའ་སྤེན་པ།
༸གོང་ས་མཆོག་དང་སྐུ་ཞབས་ཊོ་ནི་ཨེ་བོ་ཊི་མཆོག་དང་ལྷན་དུ་སྒྲོན་པ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་སི་ཊི་ནི་ནང་གི་བཞུགས་གནས་མགྲོན་ཁང་དུ་ཉིན་གྲངས་གསུམ་སྔོན་ཨོ་སི་ཊོ་ལི་ཡའི་ཕྱོགས་འགལ་ཚོགས་པའི་དབུ་ཁྲིད་དུ་འདེམས་ཐོན་བྱུང་བའི་སྐུ་ཞབས་ཊོ་ནི་ཨེ་བོ་ཊི་ Tony Abbott མཆོག་དང་མཇལ་འཕྲད་དང་སྦྲགས་
༸གོང་ས་མཆོག་ནས་སྐུ་ཞབས་ཊོ་ནི་ཨེ་བོ་ཌི་ལྷན་དུ་གསར་འགོད་ལྷན་ཚོགས་སྐྱོང་བཞིན་པ།
གསུང་མོལ་མཛད་ཡོད་པ་དང་དེ་རྗེས་ལྷན་རྒྱས་མཉམ་ཞུགས་ཐོག་གསར་འགོད་ལྷན་ཚོགས་ཤིག་བསྐྱངས་ཡོད། སྐུ་ཞབས་ཨེ་བོ་ཊི་མཆོག་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ལྷན་གསར་འགོད་ལྷན་ཚོགས་དེའི་སྟེང་། མི་ཚེའི་ལས་བྲེལ་ཧ་ཅང་ཆེ་བའི་དུས་སྐབས་འདིར་ནང་སེམས་ཀྱི་ཞི་བདེ་འཚོལ་ཐབས་དང་རྒྱ་ནག་དང་རྒྱ་གར་དབར་གྱི་གནད་དོན། དེ་བཞིན་ཨོ་སི་ཊོ་ལི་ཡ་དང་བོད་གཉིས་དབར་གྱི་འབྲེལ་བ། ལྷག་པར་ཨོ་སི་ཊོ་ལི་ཡིའི་གཞུང་གིས་བོད་མི་སྐྱབས་བཅོལ་བ་རྣམས་ལ་རོགས་རམ་དང་ཆབ་སྲིད་ཀྱི་རྒྱབ་སྐྱོར་གནང་བཞིན་པའི་གནད་དོན་སྐོར་ལ་གསུང་མོལ་ཞུས་ཡོད་སྐོར་གྱི་འགྲེལ་བརྗོད་གནང་བ་མ་ཟད། ཨོ་སི་ཊོ་ལི་ཡའི་སྲིད་བློན་ཁེ་ཝན་རུ་ཌ་ Kevin Michael Rudd མཆོག་ནས་ཐེངས་འདིར་༸གོང་ས་མཆོག་དང་མཇལ་འཕྲད་ཞུས་མེད་པའི་གནད་དོན་དང་འབྲེལ་བའི་སྐོར་གྱི་དྲི་བ་ཞིག་ལ་ཁོང་ནས་ལན་འདེབས་གནང་དོན།
དེ་འདྲའི་གནད་ཐོན་ཐོག་གཞུང་ལ་དཀའ་ངལ་གང་འཕྲད་མིན་ངས་བསམ་ཤེས་ཞུ་ཐུབ་ཀྱི་ཡོད། ལྷག་པར་དུ་གནད་དོན་ཁ་ཤས་ཐད་ཕྱོགས་འགལ་ཚོགས་པའི་དབུ་ཁྲིད་ཀྱིས་གནང་ཐུབ་པ་དེ་གཞུང་ནས་གནང་རྒྱུ་ཁག་པོ་ཆགས་ཀྱི་ཡོད། འོན་ཀྱང་དེ་སྔོན་སྲིད་བློན་ཟུར་པ་ཇོན་ཧར་ཝ་ཌི་ John Winston Howard མཆོག་སྲིད་བློན་གནང་སྐབས་༸གོང་ས་མཆོག་དང་མཇལ་འཕྲད་ཞུ་རྒྱུའི་དུས་ཚོད་བྱུང་བ་རེད། དེར་བརྟེན་ད་རེས་སྲིད་བློན་ཁེ་ཝན་མཆོག་གི་སྲིད་བློན་ཟུར་པ་ཇོན་ཧར་ཝ་ཌི་མཆོག་ནས་གནང་བ་ལྟར་གནང་མ་ཐུབ་པ་དེར་འདི་གའི་མི་མང་པོ་ཞིག་ཧ་ཅང་བློ་ཕམ་ཆེན་པོ་བྱེད་བཞིན་པར་ངས་བསམ་ཤེས་ཐུབ་ཀྱི་འདུག་ཅེས་གསུང་ཡོད། ད་རེས་ཀྱི་མཇལ་འཕྲད་སྐབས་ཨོ་སི་ཊོ་ལི་ཡའི་གཞུང་ནས་འདས་པའི་ལོ་མང་པོ་ཞིག་ནས་ལོ་ལྟར་རྒྱ་ནག་གཞུང་གི་མནར་གཅོད་འོག་དཀའ་སྡུག་ཚད་མེད་མྱངས་པའི་བོད་མི་བཙན་བྱོལ་བ་མང་དག་ཅིག་རྒྱལ་ཁབ་དེའི་ནང་སྐྱབས་བཅོལ་དུ་ལེན་བཞིན་ཡོད་པའི་གནད་དོན་ཐོག་བཀའ་བསྡུར་གནང་བ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱོགས་འགལ་ཚོགས་པའི་དབུ་ཁྲིད་མཆོག་ལ་ཨོ་སི་ཊོ་ལི་ཡའི་གཞུང་ཕྱོགས་ནས་ད་བར་བོད་མིར་རོགས་རམ་དེ་ལྟར་གནང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་བཀའ་སློབ་སྩལ་ཡོད། ཕྱོགས་མཚུངས་སྐུ་ཞབས་ཨེ་བོ་ཊི་ལགས་ནས་ཀྱང་ཨོ་སི་ཊོ་ལི་ཡའི་གཞུང་ནས་བོད་མི་སྐྱབས་བཅོལ་བ་རྣམས་ལ་རོགས་རམ་མུ་མཐུད་གནང་རྒྱུའི་འདུན་པ་ཆེན་པོ་ཡོད་སྐོར་ཡང་༸གོང་ས་མཆོག་ལ་སྙན་སྒྲོན་ཞུས་ཡོད། དེ་བཞིན་༸གོང་ས་མཆོག་ནས་ཕྱོགས་འགལ་ཚོགས་པའི་སྐུ་ཞབས་ཊོ་ནི་ཨེ་བོ་ཊི་མཆོག་དང་མཇལ་འཕྲད་གནང་བ་མ་ཟད་གྲོས་ཚོགས་ཀྱི་འཐུས་མི་སྐུ་ཞབས་མེ་ཁལ་ཇོན་སེན་ Michael Johnson ལགས་དང་ཡང་མཇལ་འཕྲད་མཛད་ཡོད། ༸གོང་ས་མཆོག་གི་ཨོ་སི་ཊོ་ལི་ཡའི་གྲོང་ཁྱེར་སི་ཊི་ནི་ནང་ཉིན་གསུམ་གྱི་མཛད་འཆར་མཐའ་མར་མང་ཚོགས་ ༡༠༠༠ བརྒལ་བར་ཐེངས་འདིའི་བརྗོད་གཞི་གཙོ་བོ་༼ང་ཚོའི་མ་འོངས་པ་དང་དེའི་ལས་འགན་སུ་ལ་ཡོད་དམ༽ ཅེས་བརྗོད་གཞིའི་ཐོག་མི་མང་ལ་བཀའ་སློབ་བཀའ་དྲིན་སྩལ། ཉིན་འདིའི་སྔ་དྲོ་ ༼སེམས་དང་སེམས་ཀྱི་ནུས་པ་༽ ཞེས་པའི་ནང་ཆོས་དང་ཚན་རིག་དབར་གྱི་འབྲེལ་བའི་སྐོར་བགྲོ་གླེེང་ཚོགས་འདུ་ཞིག་ལ་ལྷན་ཞུགས་མཛད་ཡོད་པ་བཅས་ཀྱི་གནས་བསྡུས་སུ། བརྙན་འཕྲིན་དེ་གཟིགས་འདོད་ཡོད་ཚེ་འདིར་སྣོན། Abbot finds his inner peace
